ޗައިނާއިން މަދިރިއެއްގެ ސިފައަށް ފަރުމާކޮށްފައިވާ، އިންގިލާބީ މައިކްރޯ ޑްރޯންއެއްގެ ޕްރޮޓޯޓައިޕް ދައްކާލައިފިއެވެ. މިއީ ކުދި ރޮބޮޓިކްސް އަދި ސިއްރުން ފާރަލުމުގެ ޓެކްނޮލޮޖީގެ ދާއިރާއިން އެ ޤައުމުން ހޯދި ބޮޑު ކުރިއެރުމެކެވެ.

ހޫނާން ޕްރޮވިންސްގެ ނޭޝަނަލް ޔުނިވާސިޓީ އޮފް ޑިފެންސް ޓެކްނޮލޮޖީ އިން ތަރައްޤީކުރި މި ޑްރޯންގެ ދިގުމިނުގައި ހުންނަނީ އެންމެ 2 ސެންޓިމީޓަރެވެ. އަދި ބަރުދަނުގައި ހުންނަނީ އެންމެ 0.3 ގްރާމެވެ. ސޫތްޕެއްގެ ސިފައަށް، ނުހަނު ކުޑަކޮށް ފަރުމާކޮށްފައިވާ މި ޑްރޯންއަކީ އާންމު މާހައުލާ އެކުވެގެންދާ ފަދަ އެއްޗަކަށް ވުމުން، މިއީ ކޮން އެއްޗެއްކަން ދެނެގަތުމަކީ ނުހަނު އުނދަގޫ ކަމެކެވެ.

ސިކުންތަކު 500 ފަހަރު ތަޅުވައިލެވޭ ނާޒުކު ދެ ފިޔަގަނޑާއެކު އުފައްދާފައިވާ މި އާލާތް އުދުހެނީ ހަމަ އަސްލު މަދިރިއެއް އުދުހޭ ގޮތަށެވެ. މީގެ އިތުރުން، މި ޑްރޯންގައި ކުދި ސެންސަރުތަކާއި ތިން ފައި ހަރުކޮށްފައިވެއެވެ. މީގެ ސަބަބުން އެކި ތަންތަނަށް ތިރިކުރުމާއި ހަމަޖެހިގެން ހަރަކާތްތެރިވުމަށް ފަސޭހަވެގެންދެއެވެ.

ޗައިނާގެ ދައުލަތުގެ އަސްކަރީ ޗެނަލް ސީސީޓީވީ-7 މެދުވެރިކޮށް މި ޑްރޯން ދައްކާލާފައިވާއިރު، ދިރާސާވެރިން މިއީ ޖާސޫސީ މަޢުލޫމާތު އެއްކުރުމަށާއި ހަނގުރާމައިގެ މައިދާނުގައި ޚާއްސަ މިޝަންތަކުގައި ބޭނުންކުރުމަށް އުފައްދާފައިވާ “މަދިރި ރޮބޮޓެއް” ކަމަށް ސިފަކޮށްފައިވެއެވެ. މީގެ ކުޑަކަމުން، އާންމު ޑްރޯންތަކަށް ކާމިޔާބުނުވާ ފަދަ ސިއްރު އޮޕަރޭޝަންތަކުގައި މީގެ ބޭނުން ވަރަށް ފުރިހަމައަށް ހިފޭނެއެވެ.

މި އީޖާދަކީ ބޮޑު ކުރިއެރުމެއް ނަމަވެސް، މީގައި ބައެއް ގޮންޖެހުންތައް ވެސް އެބަހުއްޓެވެ. އޭގެ ތެރޭގައި މާ ބަރު ތަކެތި އުފުލުމުގެ ޤާބިލުކަން ނެތުމާއި، ދުރު ރާސްތާއަށް ދަތުރު ނުކުރެވުމާއި، އަދި ގިނަ ވަގުތު އުދުހިފައި ނޯވެވުން ހިމެނެއެވެ. ތަޖުރިބާކާރުން ލަފާދޭ ގޮތުގައި، ގިނަ އަދަދެއްގެ މިފަދަ ޑްރޯންތައް އެއްފަހަރާ ބޭނުންކޮށްގެން މި މައްސަލަތަކަށް ހައްލެއް ހޯދިދާނެއެވެ.

އަސްކަރީ ބޭނުންތަކުގެ އިތުރުން، ތިމާވެށި ބެލެހެއްޓުމާއި، ކާރިސާތަކުގެ ވަގުތުގައި އެހީތެރިވުމާއި، އަދި ވަދެނިކުމެ އުޅެން އުނދަގޫ ނުވަތަ ނުރައްކާތެރި ތަންތަން ބަލައި ފާސްކުރުމަށް އާންމު ދާއިރާތަކުގައި ވެސް މި ޓެކްނޮލޮޖީ ބޭނުންކުރެވިދާނެއެވެ.

މި ކުރިއެރުމުން ހާމަވަނީ ދިރުންތަކުގެ ސިފައަށް ރޮބޮޓް އުފެއްދުމުގެ ދާއިރާ ހަލުވިކަމާއެކު ކުރިއަރަމުންދާ ކަމެވެ. މިއީ މުސްތަޤުބަލުގައި ފާރަލާ އާލާތްތައް މިހާރަށްވުރެ ކުޑަވެ، ބުއްދިވެރިވެ، އަދި މީހުންނަށް ފާހަގަ ނުކުރެވޭނެހެން ބޭނުންކުރެވޭނެ ކަމުގެ ހެއްކެކެވެ.