މާލޭގެ ތެތްފިނިކަން އެކުލެވިފައިވާ ވައިގެ ތެރެއަށް މަޣުރިބު ނަމާދުގެ ބަންގީގެ އަޑު ފެތުރިގެން ދިޔަ ވަގުތެވެ.
އަހަރެން އިނީ އަހަރެމެންގެ ދިރިއުޅޭ ހަނި ކޮޓަރީގެ ފިނި ތަޅުންގަނޑު މަތީގައި އިށީނދެގެން، ދަރިފުޅުގެ ސްކޫލް ޔުނީފޯމް ފަތްޖަހާށެވެ.
އަހަރެންގެ އިނގިލިތަކުން އަރާމަކީ ކޮބައިކަން ހަނދާން ނެތިފައިވާ ކަހަލައެވެ. ބޯމަތީގައި ހުރި ފަންކާ މަޑުމަޑުން އެނބުރެމުން ދިޔައިރު، ކޮންމެ ސިކުންތަކު އިވޭ “ކްލިކް” އަޑުން ހީވަނީ އެ ފަންކާވެސް މި ގޭގެ ދިރިއުޅުމާއި، މި ތަކުރާރުވާ ކަންތައްތަކަށް ފޫހިވެފައިވާ ހެންނެވެ.
އަހަރެންގެ ފޯނު ތަޅުންގަނޑު މަތީގައި އޮއްވާ ވައިބްރޭޓްވާން ފެށިއެވެ. ރަނގަބީލެއް ނުވެއެވެ. އޯގާތެރިކަމެއް ނެތެވެ. އެއީ އަމުރެއް ފަދަ ވައިބްރޭޝަނެކެވެ. އެއީ އަހަރެންގެ ކޮއްކޮއެވެ.
“ފާތިމަތު،” އަހަރެން ފޯނަށް ޖަވާބު ދިނީމެވެ. އޭރުވެސް ހިތަށް ބިރުވެރިކަމެއް ވަދެފައިވެއެވެ.
“މިރޭ އައިޝަތު ބަލާނީ ކަލޭ،” އޭނާ ބުންޏެވެ. އޭނާގެ އަޑުގައި ހުރީ ބާރުވެރިކަމާއި ގޮތްދޫނުކުރުމެވެ. “މިރޭ އަހަރެން ބޭރަށްދާން ރާވާފަ އޮތީ.”
ސަލާމެއް ނެތެވެ. ސުވާލެއް ނެތެވެ. ހަމައެކަނި އުންމީދުތަކާއި މަޖުބޫރު ކުރުވުމެވެ.
“އަހަންނަކަށް ނުވާނެ،” އަހަރެން މަޑުމަޑުން ބުނީމެވެ. “މިރޭ ކެފޭގެ ނައިޓް ޝިފްޓަށް ދާންޖެހޭ.”
ވަގުތުކޮޅަކަށް ހިމޭންވިއެވެ. އެއަށްފަހު އޭނާ ހީނގަތެވެ. އެއީ ވިހަގަދަ ހިނިގަނޑެކެވެ. އެއީ އޭނާގެ ފަހަތުގައި މުޅި އާއިލާ އޮތްކަން ދަންނަ މީހެއްގެ ހިނިގަނޑެކެވެ.
“އަދި އެއްފަހަރު ބުނެބަލަ،” އޭނާ މަޑުމަޑުން ބުންޏެވެ. “ކެރެންޏާ ބުނެބަލަ.”
އަހަރެން ލޯ މަރާލީމެވެ. “އަހަންނަކަށް ނުވާނެ.”
މިފަހަރު މާ ގިނައިރު ހިމޭނުން އޮތެވެ. “އަހަރެން ބައްޕަ ގާތު ބުނާނަން،” އޭނާގެ އަޑު ފިނިވެގެން ދިޔައެވެ. “ބަލަމާ ކިހާ އިރަކު ތި ޖަވާބުގައި ހުރެވޭތޯ.” ފޯނު ކަނޑާލިއެވެ.
ވަގުތުކޮޅަކަށް އަހަރެން ފޯނުގެ ކަޅު ސްކްރީނަށް ބަލަހައްޓައިގެން އިނީމެވެ. އޭގެއިން ފެންނަނީ އުމުރަށްވުރެ މުސްކުޅިވެފައިވާ އަންހެނެއްގެ ސޫރައެވެ. އަމިއްލަ އިޚްތިޔާރަކީ ކޮބައިކަން ހަނދާން ނެތިފައިވާ އަންހެނެކެވެ.
އަހަރެންގެ ކައިރީގައި، ފާރު ކައިރީގައި އަޅާފައި އޮތް ތުނި ގޮދަޑިއެއްގެ މަތީގައި އަހަރެންގެ ދަރިފުޅު އާދަމް ނިދާފައި އޮތެވެ. އޭނާގެ ކުޑަކުޑަ މޭމަތި މަޑުމަޑުން މައްޗަށް އުފުލި ތިރިވަމުން ދިޔައެވެ. އޭނާ ނިދިފައި އެއޮތީ އަނެއްކާވެސް އަހަރެންގެ އިންތިޒާރުގައެވެ. އޭނާގެ ލަންޗުބޮކްސް އަދިވެސް ހުރީ ނުދޮވެއެވެ. ބޫޓުގައި ހުރީ ކުޅޭތަނުގެ ވެއްޔެވެ.
އަދި އަހަރެން… އަހަރެން އަދިވެސް މިހުރީ މިތަނުގައެވެ. މަސައްކަތްތައް ހުރީ ތޮއްޖެހިފައެވެ.
ޝިފްޓް ނިންމާފައި ގެއަށް އައިއިރު، މުޅި މާލެ އޮތީ ހަމަހިމޭންވެފައެވެ. އެކަމަކު އަހަރެމެންގެ ގެއަކަށް ހަމަހިމޭންކަމެއް ނެތެވެ. ދޮރު ހުޅުވާލުމާއެކު ދުވީ ތެލުލި މަހުގެ ވަހާއި، ބަންދުވެ ބާވެފައިވާ ވައިގެ ވަހެވެ. އަދި އޭގެ ދަށުގައި ފޮރުވިފައިވާ ނުތަނަވަސްކަމެވެ.
ބައްޕަ އިނީ ބެލްކަނި ކައިރީގައި އާދައިގެ މަތިންވެސް އަބަދު އިންނަ ބޮޑު ގޮނޑީގައެެެެވެ. މުންޑު އޮތީ ދޫކޮށް އައްސާފައެވެ. އަތުގައި އޮތް ނޫހުން ބައްޕަގެ މޫނު ފޮރުވައިގެން އިން ނަމަވެސް، ދުންފަތް ބިޑީގެ ވަސް ދުވަމުން ދިޔައެވެ. މަންމަ ހުރީ އުނދުުން ކައިރީގައި ބާކީ ހުރި ކާއެއްޗެހި ހޫނުކުރާށެވެ. އަދި އައިސް އަލަމާރި ކައިރީ ލެނގިލައިގެން ކޮއްކޮ ފާތިމަތު ހުއްޓެވެ. އަތް އުރާލައިގެން، ހިނިތުންވެފައި، އިންތިޒާރުގައެވެ.
“ކަލޭ މިހާރު ވަރަށް މުހިންމު މީހަކަށް ވެއްޖެތާ،” ނޫސް ތިރިނުކޮށް ބައްޕަ ބުންޏެވެ.
އަހަރެން މަޑުމަޑުން ބޫޓު ބާލައި، ގޮނޑިއެއްގެ މަތީގައި ދަބަސް ބެހެއްޓީމެވެ. “އަހަރެން އުޅުނީ މަސައްކަތުގަ.”
“މަސައްކަތޭ؟” ބައްޕަ ނޫސް ތިރިކޮށްލަމުން ބުންޏެވެ. “ނުދަންނަ މީހުންނަށް ކޮފީ އަޅައިދިނުންތަ ދިރިއުޅުމަކީ؟”
މަންމަ ކުރު ހިނިގަނޑެއް ޖަހާލިއެވެ. ” އެމީހުން އޭނާއަށް ލާރި ދެއެއްނު،” މަންމަ ބުންޏެވެ.
ފާތިމަތު މަލާމާތުގެ ހިނިތުންވުމަކާއެކު ބުންޏެވެ. “ކަލެއަށް އަމިއްލަ އާއިލާގެ ކުއްޖަކުވެސް ބަލައެއް ނުލެވުނު. ކަލޭ ތީ ކޮން ކަހަލަ އަންހެނެއް؟”
އަހަރެންގެ އެތެރެއިން ކޮންމެވެސް އެއްޗެއް ބަދަލުވިހެން ހީވިއެވެ.
“އަހަރެން ބުނިން ނުވާނެއޭ،” އަހަރެން އަޑަށް ބާރުލާފައި ބުނީމެވެ. “އަހަރެން ޖެހޭ ލާރި ހޯދަން.”
“ލާރިއޭ؟” ބައްޕަ ހަޅޭއްލަވައިގަތެވެ. “ކޮން ކަމަކު؟ ކަލޭ ކަނީ މިތަނުން. ނިދަނީ މިތަނު. ކަލެއަށް ލިބޭ ހުރިހާ އެއްޗަކީ މި ގޭގެ ސަބަބުން ލިބޭ އެއްޗެހި.”
އަހަރެން ކަރުބުޑުން ދިރުވާލީމެވެ. “އަހަރެންގެ ދަރިފުޅު..”
“ފަށާނެ ކަމެއް ނެތް!” މަންމަ މެދުކަނޑާލިއެވެ. “ކަލޭގެ ހާލަތާ ކޮއްކޮގެ ހާލަތާ އަޅާނުކިޔާ. އޭނާގެ ޒިންމާތަކެއް އެބަހުރި.”
އެ ވާހަކަތަކުން މުޅި މާހައުލު ބަރުވެގެން ދިޔައެވެ. “އަހަރެންގެވެސް ޒިންމާތަކެއް އެބަހުރި،” އަހަރެން ބުނީމެވެ.
މުޅި ތަން ހިމޭންވިއެވެ. ބިރުވެރި ހިމޭންކަމެކެވެ. ނޫސް އެއްކޮށް ތިރިކޮށްލާފައި ބައްޕަ އަހަރެންގެ ލޮލަށް ބަލާލިއެވެ. “ކީކޭ ތިބުނީ؟”
އަހަރެންގެ ހިތް ބާރަށް ތަޅެމުން ދިޔައެވެ. އަހަރެން އިސްޖަހާލަން ޖެހެއެވެ. މާފަށް އެދެން ޖެހެއެވެ. އެކަމަކު އަހަރެންގެ އެތެރޭގައި އެތައް އަހަރަކު ފޮރުވިފައި އޮތް ހިތްވަރު މިއަދު ދެކޮޅު ހެދިއެވެ.
“އަހަރެން މިބުނީ،” އަހަރެން ތުރުތުރުލާ އަޑަކުން ނަމަވެސް ސާބިތުކަމާއެކު ބުނީމެވެ. “އަހަރެންގެވެސް ޒިންމާ އެބަހުރި. އަހަރެން ދެ ޝިފްޓްގައި މަސައްކަތް ކުރަން. ކަރަންޓު ބިލް ދައްކަން. ކާއެއްޗެހި ހުސްވުމުން ގަންނަން. ކައްކަން، ސާފުކުރަން، އެންމެންގެ އެއްޗެހި ދޮންނަން. ބައްޕަގެ ބޭސްތައް ބަލަހައްޓަން. މަންމަ ކްލިނިކަށް ގެންދަން. އަދި ފާތިމަތު ބޭނުންވީމާ އޭނާގެ ދަރިފުޅުވެސް ބަލަން. އަދި އަހަރެންގެ ދަރިފުޅު ބަލައިބޮޑުކުރަން.”
ފާތިމަތު މަލާމާތް ކުރިއެވެ. “ހޫން..، ކަލޭ ތި އުޅެނީ ވަރަށް ދަތި ހާލުގަ އުޅޭ މީހަކު ހެން.. ކަލޭ މިތާ އުޅެނީ… ހިލޭ ނޫން ތަ؟”
“ހިލޭ ހެއްޔެވެ؟” އަހަރެން ހިތި ހިނިގަނޑެއް ޖަހާލީމެވެ. “މިހާރު ނޯކަރުންނަށް އުޖޫރައިގެ ގޮތުގައި ދެނީ މަލާމާތާ އިހާނެތި ބަސްތައް ހެއްޔެވެ؟”
ކުއްލިއަކަށް ބައްޕަގެ އަތުގެ ހޫނު ހަމަލާއެއް އަހަރެންގެ ކޯތާފަތަށް އެރިއެވެ. “މި ގޭގަ ހުރެގެން ތިހެން ވާހަކަ ނުދައްކާ!” ބައްޕަ ގަދަ އަޑުން ބުންޏެވެ.
އަހަރެންގެ އަނގަޔަށް ލޭގެ ރަހަ އައެވެ. އެކަމަކު އަހަރެން ނުރޮމެވެ.
“އަހަރެން މީ ބައްޕަގެ ނޯކަރެއް ނޫން،” އަހަރެން މަޑުމަޑުން ބުނީމެވެ.
އެވަގުތު ބައްޕަ ގޮނޑި ނެގިއެވެ. އެއީ ބަރު ނޫނަސް ލަކުޑި ގޮނޑިއެކެވެ. އުފުލާލަން ފަސޭހަ ނަމަވެސް، އޭގެއިން ޖެހުމުން ތަދުވާނެ ވަރުގެ ގޮނޑިއެކެވެ. ސިކުންތަކަށް އަހަރެންގެ ހިތަށް އެރިއެވެ.. ނޫނެކެވެ، ބައްޕަ އެވަރެއް ނުކުރާނެއެވެ. ޔަގީނުންވެސް މި ހިސާބުން މިކަން ހުއްޓޭނެއެވެ.
ނަމަވެސް އެހެންނެއް ނުވިއެވެ.
ބައްޕަ އެ ގޮނޑިން އަހަރެންގެ ކޮނޑުގައި ވަރަށް ބާރަށް ޖެހިއެވެ. އެއާއެކު އަހަރެން ތަޅުންގަނޑު މައްޗަށް ވެއްޓުނެވެ. މުޅި ހަށިގަނޑަށް އެރި ތަދުން ނޭވާ ހާސްވިއެވެ.
“ވިޔާނުދާ އަންހެނާ!” ބައްޕަ އަނެއްކާވެސް ގޮނޑި އުފުލާލަމުން ހަޅޭއްލަވައިގަތެވެ. “އަހަރެމެން ކަލެއަށް ކޮށްދިން ހުރިހާ ކަމަކަށްފަހުވެސް ތިޔަ ދެނީ ކޮން ޖަވާބެއް؟”
އަހަރެން އަމިއްލަ ދިފާޢުގައި ދެއަތުން ބޯ ނިވާކޮށްލީމެވެ. ދެވަނަ ހަމަލާ އެރީ އަހަރެންގެ ބުރަކަށްޓަށެވެ.
މަންމަ ހީނގަތެވެ. ހަގީގަތުގައިވެސް މަންމަ ހީނގަތެވެ.
“ބަލާބަލަ އޭނާއަށް،” މަންމަ ބޯ ހޫރުވާލަމުން ބުންޏެވެ. “އަނިޔާ ލިބޭ މީހަކަށް ވެގެން އެ އުޅެނީ. މީ ހަމަ އޫރެއް ކަހަލަ އަންހެނެއް. އަބަދު ކެއުމާއި ޝަކުވާ ކުރުން ނޫން ކަމެއް ނޯވޭ. ދުވަހަކުވެސް ފުދޭ މީހެއް ނޫން.”
އޫރު. އެ ބަސް އަހަރެންގެ ހިތުގެ އެންމެ ފުނަށް ވަނެވެ. ލިބުނު ޖިސްމާނީ ތަދަށްވުރެ އެ ބަހުގެ ތަދު މާ ބޮޑެވެ.
ފާތިމަތު ގުޑާވެސް ނުލައެވެ. ބައްޕަ ހުއްޓުވާކަށް މަސައްކަތެއް ނުކުރެއެވެ. އޭނާ ހަމައެކަނި ބަލަން ހުރީއެވެ. ހިނިތުންވެފައެވެ.
އެ ވަގުތު، އެތައް އަހަރަކު އަހަރެން ބަލަހައްޓަމުން އައި ގޭގެ ފިނި ތަޅުންގަނޑު މަތީގައި އޮވެ… އަހަރެންގެ ހިތުގައި ކޮންމެވެސް ކަމެއް އެއްކޮށް ނިމުމަކަށް އައެވެ. އެއީ ބާރު އަޑަކާއެކު ވީ ކަމެއް ނޫނެވެ. އެއްވެސް ހަޅޭކެއް ނެތެވެ. ހަމައެކަނި… ހަމަހިމޭންކަމެވެ. ނިންމުމެކެވެ.
އެރޭ އެންމެން ނިދުމުން، އަހަރެން މަޑުމަޑުން ތެދުވީމެވެ. ކޮންމެ ހަރަކާތަކުން ހަށިގަނޑަށް ތަދުވަމުން ދިޔައެވެ. އާދަމް ނިދާފައި އޮތް ތަނަށް އަހަރެން ގޮސް އޭނާގެ ކައިރީގައި ކަކޫ ޖަހައި އިށީނީމެވެ. އަދި އޭނާގެ ނިތްކުރިމަތިން އިސްތަށިކޮޅު އެއްފަރާތް ކޮށްލީމެވެ.
“އަހަރެމެން މިދަނީ،” އަހަރެން މަޑުމަޑުން ބުނީމެވެ.
އޭނާ ނިދީގައި ކުޑަކޮށް ގުޑިލިއެވެ. އަދި ނިދީގައިވެސް އަހަރެންގެ އަތުގައި ހިފާލިއެވެ. އެތައް އަހަރަކަށްފަހު ފުރަތަމަ ފަހަރަށް… އަހަރެން ބިރެއް ނުގަނެއެވެ.
އަހަރެން އެކަކަށްވެސް ނުއެއް ގޮވަމެވެ. ނާސްތާއެއް ތައްޔާރެއް ނުކުރަމެވެ. ތަށިތަކެއް ނުދޮންނަމެވެ. ކާއެއްޗެހި އަޅާ ފޮށިތަކެއް ތައްޔާރެއް ނުކުރަމެވެ. އަހަރެން އެމީހުންގެ ދުނިޔެއަކުން ދެން ނުފެންނާނެއެވެ.
އަހަރެން ކުޑަ ދަބަހެއް ތައްޔާރުކުރީމެވެ. މަދު އަންނައުނުކޮޅަކާއި، އާދަމްގެ ސްކޫލް ފޮތްތަކާއި، އޭނާ އެންމެ ގަޔާވާ ކުޅޭ ކާރުލީމެވެ. އަދި އަހަރެން ނުކުމެގެން ދިޔައީމެވެ. ސިޓީއެއް ނެތެވެ. މާނައެއް ނެތެވެ. ވަދާއީ ސަލާމެއްވެސް ނެތެވެ.
ފުރަތަމަ ދުވަސްތައް ދިޔައީ ވަރަށް ދަތިކޮށެވެ. އަހަރެމެން އުޅުނީ ހުޅުމާލޭގެ ހަނި އެޕާޓްމަންޓެއްގައި މަސައްކަތްކުރާ ރަހުމަތްތެރިއަކާއެކުގައެވެ. އަހަރެން ގިނަ ޝިފްޓްތަކެއްގައި މަސައްކަތް ކުރީމެވެ. ގިނަ ވަގުތު މަސައްކަތުގައި ހޭދަކުރީމެވެ. ހަށިގަނޑަށް ބުރަވިއެވެ. އެކަމަކު އަހަރެންގެ ރޫހަށް… އަހަރެންގެ ރޫހަށް މިނިވަންކަމުގެ ނޭވާލެވެން ފެށިއެވެ. މަޑުމަޑުންނެވެ. ވަރަށް ފަރުވާތެރިކަމާއެކުގައެވެ.
ހަފްތާތައް މަސްތަކަށް ބަދަލުވިއެވެ. އަހަރެން ކުއްޔަށް ކުޑަ ކޮޓަރިއެއް ހޯދީމެވެ. އާދަމްގެ މޫނުމަތިން ހިނިތުންވުން ގިނަވާން ފެށިއެވެ. ބިރުން ހުރެ ހޭލުމުގެ ބަދަލުގައި، އޭނާ ހަމަޖެހިގެން ނިދަން ފެށިއެވެ.
އަދި އަހަރެން؟
އަހަރެން ދިރިހުރުމަށްޓަކައި އެހެން މީހެއްގެ ހުއްދައަށް އިންތިޒާރު ކުރުން ހުއްޓާލީމެވެ.
ތިން އަހަރު ފަހުން، އަނެއްކާވެސް ފޯނެއް އައެވެ. ނުދަންނަ ނަންބަރެކެވެ. އަހަރެން ފޯނަށް ޖަވާބު ނުދޭންވެސް އުޅުނީމެވެ.
“ހެލޯ؟”
ވަގުތުކޮޅަކަށްފަހު، އެތައް އަހަރަކަށްފަހު އަޑުނީވޭ އަޑެއް އިވުނެވެ. “އަހަރެމެން ކަލެއަށް ބޭނުންވެއްޖެ.” އެއީ މަންމައެވެ. ރުޅިއައިސްފައެއް ނޫނެވެ. މަލާމާތެއް ނުކުރެއެވެ. ހަމައެކަނި… ވަރުބަލިވެފައެވެ.
“ކިހިނެއްވީ؟” އަހަރެން އެހީމެވެ.
“ބައްޕަ…” މަންމަ ފަސްޖެހުނެވެ. “ބައްޕަ ބަލިވެއްޖެ. ކަލޭގެ ކޮއްކޮ އެހެން ރަށަކަށް ބަދަލުވެއްޖެ. އަހަރެމެންނަކަށް މިކަންކަން ނުބެލެހެއްޓޭނެ.”
އަހަރެންނަށް އެނގެއެވެ. އޭނާ އެހެން ހަދާނެކަން ޔަގީނެވެ.
“މިހާރުތަ އަހަރެން މަތިން ހަނދާންވީ؟” އަހަރެން މަޑުމަޑުން ބުނީމެވެ.
ހިމޭންވިއެވެ. “އަހަރެމެން ހީކުރީ…” މަންމަ ފެށިއެވެ، އަދި ހުއްޓާލިއެވެ. “އަހަރެމެން ހީކުރީ ކަލޭ އެނބުރި އަންނާނެ ކަމަށް.”
އަހަރެން އަހަރެންގެ ކުޑަ ނަމަވެސް ހިތްފަސޭހަ ގޭގެ ތެރެއަށް ބަލާލީމެވެ. ފަތްޖަހާފައި ހުރި ސާފު އަންނައުނުތަކަށެވެ. ފިލާވަޅު ހަދަން އިން އާދަމް އަށެވެ. އަދި އެއްވެސް އެހީއަކާ ނުލައި އަހަރެން ބިނާކުރި ދިރިއުޅުމަށެވެ.
“ނޫން،” އަހަރެން ބުނީމެވެ. އެއީ ބާރު އަޑެއް ނޫނެވެ. އަދި އެއީ ރަހުމެއް ނެތް ގޮތަކަށް ބުނި ބަހެއްވެސް ނޫނެވެ. އެއީ ހަމައެކަނި… އެންމެ ފަހުގެ ނިންމުމެވެ. “އަހަރެންނެއް ނުދާނަން.”
އަނެއްކާވެސް ހިމޭންވިއެވެ. މިފަހަރު މާ ގިނައިރުވިއެވެ. އެއަށްފަހު މަންމަ ސިއްރުސިއްރުން އަހާލިއެވެ…”ކީއްވެ؟”
އަހަރެން މަޑުމަޑުން ހިނިތުންވެލީމެވެ. ސަބަބަކީ އަހަރެންގެ މުޅި ހަޔާތުގައިވެސް ފުރަތަމަ ފަހަރަށް އަހަރެންގެ އަތުގައި ޖަވާބެއް އޮތީމައެވެ.
“ސަބަބަކީ، ތިޔަ މީހުން ބޮޑުކުރި ނޯކަރަށް،” އަހަރެން އޯގާތެރިކަމާއެކު ބުނީމެވެ، “އޭނާއަކީ ތިޔަ މީހުންގެ މިލްކެއް ނޫންކަން އެންމެ ފަހުން އޭނާއަށް އެނގިއްޖެ.”
އަދި އަހަރެން ފޯނު ކަނޑާލީމެވެ.
އެރޭ، ކަނޑުގެ ރާޅުތަކުގެ އަޑާއެކު ފިނިވައިރޯޅިތައް ކޮޓަރީގެ ތެރެއަށް ވަންނަމުން ދިޔައިރު، އަހަރެން އިނީ ދަރިފުޅުގެ ކައިރީގައި އޭނާ ނިދާފައި އޮއްވާ ބަލާށެވެ. ހަމަޖެހިގެންނެވެ. ރައްކާތެރިކަމާއެކުގައެވެ. މިނިވަންކަމާއެކުގައެވެ.
އޮއިވަރު ބަދަލުވެއްޖެއެވެ. އަދި މިފަހަރު… އަހަރެން ހުންނާނެ އައްސޭރިއެއް އިޚްތިޔާރުކުރީ އަމިއްލައަށެވެ.
(ނިމުނ)
