ހޫނު މާހައުލެއްގައި ހުއްޓައި، ކުއްލިއަކަށް ތުންފަތުގެ ކުލަ ފިޔާތޮށި ކުލައިން ނޫ ނުވަތަ ގަދަ ދަނބުކުލައަކަށް ބަދަލުވުމަކީ އާދައިގެ ކަމެއް ނޫނެވެ. މިއީ ސިއްޙީ ކުއްލި ފަރުވާ ބޭނުންވާ ފަދަ ނުރައްކާތެރި ހާލަތެއްގެ ނިޝާނަކަށް ވެދާނެއެވެ. ސިއްޙީ މާހިރުން މި ހާލަތަށް ކިޔަނީ “ސެންޓްރަލް ސަޔަނޯސިސް” އެވެ. މިއީ ލޭގައި އޮކްސިޖަން ހުންނަންޖެހޭ މިންވަރަށްވުރެ ބޮޑަށް ދަށްވުމުން ފެންނަ ނިޝާނެކެވެ.
ތުންފަތުގެ ހަންގަނޑަކީ ތުނި އަދި ލޭހޮޅިތައް ގިނަ ތަނަކަށްވުމުން، ހަށިގަނޑުގެ ލޭގެ ދައުރުވުމަށް ދިމާވާ މައްސަލަތައް އެންމެ ފުރަތަމަ ފާހަގަކުރެވޭ އެއް ތަނަކީ ތުންފަތެވެ. ފުއްޕާމޭގެ ޒަރީއާއިން ލޭގެ ތެރެއަށް އެކަށީގެންވާ ވަރަށް އޮކްސިޖަން ނުލިބުމުން، ނުވަތަ ހިތުން ލޭ ފޮނުވައިދޭންޖެހޭ މިންވަރަށް ނުފޮނުވައިދެވޭނަމަ، ލޭގެ ރަތްކަން ކެނޑި ކުލަ ގަދަވެއެވެ. މީގެ ނަތީޖާއެއްގެ ގޮތުން ތުންފަތުން ނޫ ނުވަތަ ދަނބުކުލައެއް ފެންނަން ފަށައެވެ.
ސިއްޙީ މާހިރުން އިންޒާރު ދޭ ގޮތުގައި، މިއީ ހަށިގަނޑުގެ މުހިންމު ގުނަވަންތަކަށް ބޭނުންވާ ވަރަށް އޮކްސިޖަން ނުލިބޭކަމުގެ ނުރައްކާތެރި ސިގްނަލެކެވެ. މި ހާލަތަކީ އާންމުކޮށް ހިތުގެ މައްސަލަތަކާއި، ފުއްޕާމޭގެ ބަލިތަކާއި، ނުރައްކާތެރި އިންފެކްޝަންތަކުގެ އިތުރުން ނޭވާލާ ނިޒާމަށް ހުރަސްއެޅޭ ފަދަ ކަންކަމާ ގުޅިފައިވާ ކަމެކެވެ.
އެއްވެސް ސަބަބަކާ ނުލައި ތުންފަތުގެ ކުލަ ނޫ ނުވަތަ ދަނބުކުލައަށް ބަދަލުވެ، އޭގެ އިތުރުން ނޭވާ ކުރުވުމާއި، މޭގައި ރިއްސުން ނުވަތަ މާބޮޑަށް ވަރުބަލިވުން ފަދަ އަލާމާތްތައް ފެންނަނަމަ، ލަސްނުކޮށް ސިއްޙީ ފަރުވާ ހޯދަންވާނެއެވެ.
ފިނިގަދަ މޫސުމުގައި މިފަދަ ބަދަލެއް ވަގުތީ ގޮތުން އަތުވެދާނެއެވެ. ނަމަވެސް އާދައިގެ ހޫނުމިނެއްގައި ހުންނައިރުވެސް މި ބަދަލު ދެމިހުންނަނަމަ، އެއީ ދުވަހަކުވެސް ފަރުވާކުޑަކޮށް ދޫކޮށްލައިގެންވާނެ ކަމެއް ނޫނެވެ.
