ދަރިފުޅަށް ބޭނުންވާ ފައިދާހުރި މާއްދާތައް ހޯދައިދިނުމުގެ އިތުރުން، ގިނަ ބެލެނިވެރިން ފޯމިއުލާ ކިރު އިޚްތިޔާރު ކުރާ އެހެން ސަބަބެއް އޮވެއެވެ. އެއީ ގާތުންދޭ ކިރު ބޯ ކުދިންނަށްވުރެ ފޯމިއުލާ ކިރު ބޯ ކުދިން އަރާމުކޮށް ގިނަވަގުތު ނިދާނެ ކަމަށް ގަބޫލުކުރެވޭތީއެވެ. މި ގަބޫލުކުރުން ވަނީ މުޖުތަމައުގައި ވަރަށް ބޮޑަށް ފެތުރިފައެވެ. ގިނަ ބަޔަކު ދެކޭގޮތުގައި ގާތުންދޭ ކިރު އަވަހަށް ހަޖަމުވާތީ، އެކުދިން އަވަސްއަވަހަށް ހޭލައި، ނިދާ ވަގުތު ކުރުވެއެވެ. ނަމަވެސް، ޖަޕާނުގައި ކުރެވުނު ވަރަށް ފުޅާ ދިރާސާއަކުން މިހާރު މިވަނީ މި ހަގީގަތް ބަދަލުކޮށްލާފައެވެ.
ގާތުންދިނުމާއި ނިދުމާ ހުރި ގުޅުން
ދަރިފުޅުގެ ހަޔާތުގެ ފުރަތަމަ އަހަރަކީ ނިދި ވަރަށް މުހިންމު ދުވަސްވަރެކެވެ. ތުއްތުއިރު ނިދި މަދުވުމަކީ ފަހުން ކުއްޖާ މާބޮޑަށް ފަލަވުމާއި، އުޅުމުގެ މައްސަލަތައް ދިމާވުމާއި، ވިސްނުން ކޮށިވުމާ ގުޅުންހުރި ކަމެކެވެ. ދުނިޔޭގެ ސިއްހަތު ޖަމިއްޔާ (ޑަބްލިޔު.އެޗް.އޯ) އިން ލަފާދެނީ ފުރަތަމަ ހަ މަސްދުވަހު ހަމައެކަނި ގާތުން ކިރު ދިނުމަށެވެ. އެއީ ބަލިތަކުން ރައްކާތެރިވުމަށާއި ދިގު މުއްދަތުގެ ސިއްހީ ފައިދާތަކަށެވެ.
މި ދިރާސާގެ އިސް މުސައްނިފު އެމް.އެސް ނަކަގާވާ ވިދާޅުވި ގޮތުގައި، ގާތުންދޭ ކިރުގެ ފައިދާތައް ގިނަ ބަޔަކަށް އެނގުނު ކަމުގައިވިޔަސް، ގާތުންދޭ ކުދިން މަދުން ނިދާކަމަށް ކުރެވޭ ތަސައްވުރު އަދިވެސް ވަނީ އާންމުވެފައެވެ. އެހެންކަމުން، މި ދިރާސާގެ ބޭނުމަކީ މި ކުށްހީ ނައްތާލުމަށް ވަރުގަދަ ހެކިތަކެއް ހޯދުމެވެ.
ދިރާސާ ކުރިއަށްދިޔަ ގޮތް
ޖަޕާނުގެ ޓޮޔާމާ ޔުނިވަރސިޓީގެ ދިރާސާވެރިން މިކަން ތަހުގީގުކުރުމަށްޓަކައި 82,918 މައިންނާއި ތުއްތު ކުދިންގެ މައުލޫމާތު ބޭނުންކުރިއެވެ. މި ދިރާސާގައި ކުދިން ހަތަރު ގުރޫޕަކަށް ބަހާލެވުނެވެ. އެއީ ހަމައެކަނި ފޯމިއުލާ ކިރު ދިން ކުދިންނާއި، ހަ މަސް ހަމަނުވަނީސް ގާތުންދިނުން ހުއްޓާލި ކުދިންނާއި، ގާތުންދިނުމާއެކު ފޯމިއުލާ ދިން ކުދިން އަދި ހަ މަސް ދުވަސް ވަންދެން ހަމައެކަނި ގާތުން ކިރުދިން ކުދިންނެވެ.
އެމެރިކާގެ ނޭޝަނަލް ސްލީޕް ފައުންޑޭޝަނުން ބުނާގޮތުގައި އެއް އަހަރުގެ ކުދިން ދުވާލަކު 11 ގަޑިއިރާއި 14 ގަޑިއިރާ ދެމެދު ނިދަންޖެހެއެވެ. 11 ގަޑިއިރަށްވުރެ މަދުން ނިދާ ކުދިން މި ދިރާސާގައި ބެލެވުނީ “މަދުން ނިދާ” ކުދިންގެ ގޮތުގައެވެ.
ގާތުންދޭ ކިރުގެ ސަބަބުން ނިދި އިތުރުވުން
ދިރާސާގެ ނަތީޖާއިން ދެއްކި ގޮތުގައި، ކޮންމެވެސް މިންވަރަކަށް ގާތުން ކިރު ލިބުނު ކުދިން، ހަމައެކަނި ފޯމިއުލާ ބުއި ކުދިންނަށްވުރެ ރަނގަޅަށް ނިދާފައިވެއެވެ. ހަމައެކަނި ފޯމިއުލާ ބުއި ކުދިންގެ ތެރެއިން 12.2 އިންސައްތަ ކުދިން މަދުން ނިދިއިރު، ހަމައެކަނި ގާތުން ކިރުދިން ކުދިންގެ ތެރެއިން މަދުން ނިދީ އެންމެ 8.8 އިންސައްތަ ކުދިންނެވެ.
އާއިލާގެ އާމްދަނީއާއި މަންމަގެ ތައުލީމީ ފެންވަރު ފަދަ އެހެނިހެން ކަންކަމަށް ރިއާޔަތްކުރުމަށްފަހުވެސް، މި ހޯދުމަށް ބަދަލެއް ނާދެއެވެ. ހަމައެކަނި ގާތުން ކިރުދޭ ކުދިން، ފޯމިއުލާ ބޯ ކުދިންނަށްވުރެ މަދުން ނިދުމުގެ ފުރުސަތު 23 އިންސައްތަ ކުޑައެވެ.
މިކަން މިހެން ވަނީ ކީއްވެ؟
ދިރާސާވެރިން ފާހަގަކުރާ ގޮތުގައި، ފޯމިއުލާ ކިރުގެ މާއްދާތައް ހުންނަނީ އަބަދުވެސް އެއް މިންވަރެއްގައެވެ. ނަމަވެސް ގާތުންދޭ ކިރުގެ މާއްދާތައް ދުވާލުގެ ވަގުތުތަކަށް ބަދަލުވެއެވެ.
1- މެލަޓޮނިން: މިއީ ނިދި ގެނުވައިދޭ ހޯރމޯނެކެވެ. ރޭގަނޑު ގާތުންދޭ ކިރުގައި މި ހޯރމޯން އެކުލެވިގެންވެއެވެ. މީގެ ސަބަބުން ދަރިފުޅަށް ރޭދުވާ ވަކިކުރަން އެނގި، ނިދުމުގެ ތަރުތީބެއް ގާއިމުކުރުމަށް އެހީތެރިވެދެއެވެ.
2- ޓްރިޕްޓޯފޭން: މިއީ މެލަޓޮނިން އުފެއްދުމަށް ހަށިގަނޑަށް ބޭނުންވާ މާއްދާއެކެވެ. ރޭގަނޑު ގާތުންދޭ ކިރުގައި މީގެ މިންވަރު މަތިވެއެވެ.
3- ބަނޑުގެ ބެކްޓީރިއާ: ގާތުންދޭ ކިރުގެ ސަބަބުން ކުއްޖާގެ ބަނޑުގައި ހުންނަ ފައިދާހުރި ބެކްޓީރިއާތައް އިތުރުވެއެވެ. މިއީ ސިކުނޑިއަށް ސިގްނަލް ފޮނުވައި، ދިގު މުއްދަތުގައި ނިދުމުގެ އާދަތައް ރަނގަޅުކޮށްދޭ ކަމެކެވެ.
ނިންމާލަމުން ދިރާސާވެރިން ބުނެފައިވަނީ، ގާތުންދޭ ކިރު އަވަހަށް ހަޖަމުވާތީ ކުއްޖާގެ ނިދި މަދުވާނެ ކަމަށް ގަންނަ ބިރަކީ ހަގީގަތެއް ނޫން ކަމަށެވެ. އެހެންކަމުން، ނިދީގެ ކަންބޮޑުވުމަށްޓަކައި ގާތުންދިނުން ހުއްޓާލުމަކީ ކުރަންޖެހޭ ކަމެއް ނޫނެވެ.
މިއީ ޔޫރަޕިއަން ޖަރނަލް އޮފް ކްލިނިކަލް ނިއުޓްރިޝަންގައި ޝާއިއުކޮށްފައިވާ ދިރާސާއެކެވެ.
