އިންޑިއާގެ މަޝްހޫރު އެކްޓަރު ރާމް ޗަރަން އާއި ޖާންވީ ކަޕޫރު މުހިންމު ރޯލުތަކުން ފެނިގެންދިޔަ “ޕެޑީ” ޑިޖިޓަލް ޕްލެޓްފޯމްތަކުގައި ދައްކަން ފަށާނެ ތާރީޚެއް އާންމުވެއްޖެއެވެ.
ބުޗީ ބާބޫ ސަނާ ޑައިރެކްޓްކޮށްފައިވާ މި ފިލްމަކީ ކުޅިވަރުގެ މައްޗަށް ބިނާކޮށް އުފައްދާފައިވާ އެކްޝަން ޑްރާމާއެކެވެ. ޖޫން މަހުގެ 4 ވަނަ ދުވަހު ސިނަމާތަކުގައި ރިލީޒްކުރި މި ފިލްމު، ރިޕޯޓްތައް ބުނާގޮތުން އަންނަ ޖުލައި މަހުގެ 16 އިން ފެށިގެން ނެޓްފްލިކްސް މެދުވެރިކޮށް ސްޓްރީމް ކުރަން ފަށާނެއެވެ. ނަމަވެސް، މިކަމާ ގުޅޭގޮތުން ފިލްމުގެ އުފެއްދުންތެރިން އަދި ރަސްމީކޮށް އެއްވެސް އެއްޗެއް ހާމަކޮށްފައެއް ނުވެއެވެ.
“ޕެޑީ” ގެ ވާހަކަ ބިނާވެފައިވަނީ ފައިސާ ދޭ ކޮންމެ ޓީމަކަށް ކްރިކެޓް ކުޅެދޭ “ކްރިކެޓާ ފޯ ހަޔާ” އެއްގެ މައްޗަށެވެ. ނަމަވެސް، އޭނާ ދިރިއުޅޭ އަވަށަށް ރޭލު ދަތުރުފަތުރުގެ ޚިދުމަތް ހޯދުމަށް އަވަށުގެ މީހަކު ކުރާ މަސައްކަތުން ހިތްވަރު ލިބިގެން، އޭނާގެ ހުނަރު ބޭނުންކޮށްގެން އަވަށުގެ ކުރިއެރުމަށް މަސައްކަތް ކުރަން ފަށައެވެ. މި ފިލްމުން ފެނިގެންދަނީ ފައިސާއަށްޓަކައި ކުޅުނު ކުޅުންތެރިއަކު، ޤައުމީ ލޯތްބާއި އަމިއްލަ އަވަށުގެ ޙައްޤުގައި މަސައްކަތްކުރާ ހިތްވަރުގަދަ މީހަކަށް ބަދަލުވެގެންދާ ގޮތެވެ.
މި ފިލްމުގައި ރާމް ޗަރަން އާއި ޖާންވީގެ އިތުރުން ޝިވާ ރާޖްކުމާރު، ޖަގަޕަތީ ބާބޫ، ބޯމަން އިރާނީ އަދި ރަވީ ކިޝަން ފަދަ މަޝްހޫރު ތަރިން ފެނިގެންދެއެވެ. ވްރިދީ ސިނަމާސްގެ ބެނާގެ ދަށުން އުފެއްދި މި ފިލްމުގެ މިއުޒިކް ތައްޔާރުކޮށްފައިވަނީ ދުނިޔޭގެ ފެންވަރުގެ މިއުޒިޝަން އޭ.އާރު ރަހުމާންއެވެ.
ރާމް ޗަރަން އެންމެ ފަހުން ފެނިގެންދިޔައީ އެސް. ޝަންކަރްގެ “ގޭމް ޗޭންޖާ” އިންނެވެ. އޭނާގެ ކުރިއަށް އޮތް ޕްރޮޖެކްޓަކީ ޑައިރެކްޓަރު ސުކުމާރާއެކު މަސައްކަތްކުރާ “އާރްސީ 17” އެވެ. އަދި ޖާންވީ ކަޕޫރު ދެން އެންމެ އަވަހަށް ފެންނާނީ ޓައިގާ ޝްރޮފްއާއި ލަކްޝްޔާއާއެކު “ލަގް ޖާ ގަލޭ” އިންނެވެ.
“ޕެޑީ” ސިނަމާތަކަށް ރިލީޒްކުރުމުން ބެލުންތެރިންގެ ފަރާތުން ލިބިފައިވަނީ އެވްރެޖް ތަރުހީބެކެވެ.
