ޕާކިސްތާން ޑްރާމާ ސިލްސިލާ “އާޕް ކީ އިއްޒަތު” ދައްކަން ފަށަން ތައްޔާރުވެއްޖެއެވެ.

މި ޑްރާމާގެ މައިގަނޑު ރޯލުތަކުން ފެނިގެންދާނީ ޕާކިސްތާނުގެ މަޝްހޫރު ދެ ތަރިން ކަމަށްވާ އަހްސަން ޚާން އާއި އުރުވާ ހުސައިންއެވެ. މީގެ އިތުރުން ތަޖުރިބާކާރު އެކްޓަރުން ކަމަށްވާ ސާނިޔާ ސައީދު އާއި ނައުމާން މަސްއޫދު ވެސް މުހިންމު ރޯލުތަކުން ފެންނާނެއެވެ. ޚާއްސަ ގޮތެއްގައި، “ތަމާޝާ” ސީޒަން 4 ކާމިޔާބުކުރި ސައިފް އަލީ ޚާންގެ ޓީވީ ސިލްސިލާއަކުން އަލަށް މި ޑްރާމާއިން ފެނިގެންދާނެތީ ގިނަ ބައެއްގެ ސަމާލުކަން ވަނީ މި މަސައްކަތަށް ހުއްޓިފައެވެ.

“އާޕް ކީ އިއްޒަތު” ގެ ވާހަކަ ބިނާވެފައިވަނީ އިންސާނީ ޖަޒުބާތުތަކާއި، ލޯބީގެ ބިންގަލާއި، ކައިވެނީގެ ގުޅުމަށް ކުރިމަތިވާ ގޮންޖެހުންތަކުގެ މައްޗަށެވެ. ޚާއްސަކޮށް ގުޅުމެއްގެ ތެރޭގައި އޮންނަ އިޙުތިރާމާއި އިތުބާރު ގެއްލުމުން ދިމާވާ ހިތާމަވެރި ހާދިސާތަކާއި، ދިރިއުޅުމުގައި ނިންމާ ނިންމުންތަކުގެ ސަބަބުން ކުރިމަތިވާ ހިތްދަތި ނަތީޖާތައް މި ސިލްސިލާގައި ވަރަށް ފުންކޮށް ދައްކުވައިދޭނެއެވެ.

މަޝްހޫރު ލިޔުންތެރިޔާ އުމޭރާ އަހްމަދުގެ ސްކްރީންޕްލޭއަކަށް މި ސިލްސިލާ ޑައިރެކްޓްކުރަނީ މަޝްހޫރު ޑައިރެކްޓަރު ސައިފީ ހަސަންއެވެ. އަދި ޕްރޮޑިއުސް ކުރަނީ ނީނާ ކާޝިފް އާއި މޫމިނާ ދުރައިދުއެވެ.

“އާޕް ކީ އިއްޒަތު” ޕްރިމިއާ ކުރުމަށް ހަމަޖެހިފައިވަނީ 2026 ޖުލައި 17 ގައެވެ. މި ޑްރާމާ ކޮންމެ ހުކުރު އަދި ހޮނިހިރު ދުވަހެއްގެ ރޭ ރާއްޖެ ގަޑިން 8:00 ގައި ހަމް ޓީވީން ދައްކާނެއެވެ. މީގެ އިތުރުން ހަމް ޓީވީގެ ރަސްމީ ޔޫޓިއުބް ޗެނަލުންވެސް މި ޑްރާމާގެ އެޕިސޯޑްތައް ބަލައިލެވޭނެއެވެ.