ނުބައި ތަޞައްވުރެއް
މަޝްރޫއުގެ މަސައްކަތްތައް އަމަލީ ގޮތުން ފެށިގެން ދިޔައިރު، ޔާނިޔާ އާއި ޒަޔާންގެ ބައްދަލުވުންތައް އާދަޔާ ޚިލާފަށް އިތުރުވިއެވެ. ކޮންމެ ދުވަހަކު ކަހަލަ ގޮތަކަށް އޮފީހުގެ ކޮންފަރެންސް ރޫމުން މި ދެމީހުން ފެންނަން ފެށިއެވެ. ނަމަވެސް އެއީ އޮމާންކަމާއެކު ކުރިއަށްދާ ބައްދަލުވުންތަކެއް ނޫނެވެ. ކޮންމެ ބައްދަލުވުމެއްގެ ފެށުމަކީވެސް ދެމީހުންގެ ދެމެދުގައިވާ ނުތަނަވަސްކަން އިތުރުކޮށްދޭ ކަމަކަށް ވެގެންދިޔައެވެ. މާލަމުގެ ފިނިހޫނުމިން ކިތަންމެ ދަސް ނަމަވެސް، މި ދެމީހުންގެ މެދުގައި ހިނގާ ބަހުގެ ހަމަލާތަކުން މުޅި ތަން އޮންނަނީ ހޫނުވެފައެވެ.
ޔާނިޔާ ހުށަހަޅާ ކޮންމެ ޤާނޫނީ މާއްދާއަކަށް ޒަޔާން ފާޑުކިޔަނީ އޭނާގެ “ވިޔަފާރީގެ ތަޖުރިބާ” އިސްކޮށްގެންނެވެ. ޒަޔާން ބޭނުންވަނީ ކަންކަން ހަލުވިކޮށް ނިންމާށެވެ. ޔާނިޔާ ބޭނުންވަނީ ކޮންމެ އަކުރެއްގައި ކުލަޖައްސައިގެން، ފަހުން ދިމާވެދާނެ މައްސަލައަކުން ސަލާމަތްވާށެވެ. “މިސް ޔާނިޔާ، ތިޔަވަރަށް ބަލައިފިއްޔާ އަޅުގަނޑުމެންނަށް މި ރިސޯޓް އެޅޭނީ އަންނަ ގަރުނުގައި.” ޒަޔާން ބުނެލާނީ މަލާމާތުގެ ރާގަކަށެވެ. ޒަޔާންގެ މިފަދަ ބަސްތަކުން ޔާނިޔާގެ ހިތުގައި އޭނާއަށްޓަކައި އޮތް ނުރުހުން ދިޔައީ ދުވަހެއް ދުވަހަކަށް ބޮޑުވަމުންނެވެ.
ޔާނިޔާވެސް ދޫނުކޮށް، “ޒަޔާން ސާރ، އަވަސް އަރުވާލައިގެން ކުރާ ކަންކަމުގެ ނަތީޖާ ހިތިވާނެކަން މާޒީން އެނގެން އޮތްއިރު، އަޅުގަނޑުގެ މަސައްކަތަށް އިޙުތިރާމް ކުރެއްވުން ބުއްދިވެރިވާނެ.” މިހެން ބުނެ ރައްދު ދެއެވެ. މިފަދަ ކޮންމެ ބަހުގެ ހަމަލާއަކުން ދެމީހުންގެ ދެމެދުގައިވާ ފާރު އިތުރަށް އުސްވަމުން ދިޔައެވެ. އެކަކު އަނެކަކަށް ދޫދިނުމަކީ ނާކާމިޔާބީއެއް ކަމަށް ދެމީހުންވެސް ދެކުނެވެ. މި ބަހުސްތަކުގެ ސަބަބުން މަޝްރޫއުގެ މަސައްކަތަށް މަޑުޖެހުމެއް އައި ނަމަވެސް، އެކަކުވެސް އަމިއްލަ ގޮތް ދޫކޮށްލާކަށް ބޭނުމެއް ނުވިއެވެ. ކޮންމެ ބައްދަލުވުމެއް ނިމިގެންދަނީ އެކަކު އަނެކަކު ދެކެވާ ނުރުހުން އިތުރުވެގެންނެވެ.
މި ހަރުކަށި ބަހުސްތަކުގެ ތެރެއިން ބައެއް ފަހަރު ހިނިއަންނަ ފަދަ އޮޅުންބޮޅުންތައްވެސް ދިމާވެއެވެ. އެއް ދުވަހަކު ޒަޔާން އޭނާގެ އެސިސްޓެންޓަށް ފޮނުވަން އުޅުނު މެސެޖެއް އޮޅިގެން ޔާނިޔާއަށް ފޮނުވުނެވެ. އޭގައި އޮތީ “އެ ބޯހަރު ކުއްޖާގެ ކަންތަކާ ބޯގޮވައިފި. މިއަދުވެސް އައީ ހަމަ ޒުވާބު ކުރަން.” މިހެންނެވެ. ޔާނިޔާ އެ މެސެޖު ކިޔާލުމަށްފަހު، އެއްވެސް ޖެހިލުމެއް ނެތި ރައްދުގައި ލިޔުނެވެ. “ބޯގޮވަނީ ހަމައެކަނި ސާރގެ އެއް ނޫން. އަޅުގަނޑުގެ ކެތްތެރިކަންވެސް ކޮޅުންލައިފި. އަދި ބޯހަރު މީހުންނަށް ބޯހަރު މީހުންނާ ދިމާވުމުން ވާނެ ގޮތް މިއަދު ތިޔަ ފެންނަނީ.” ޒަޔާން އެ މެސެޖު ކިޔާފައި ލަދުން މަރުވާވަރުވިއެވެ. އޭނާ ހީކުރީ ޔާނިޔާ ރުޅިއަންނާނެ ކަމަށެވެ. ނަމަވެސް ޔާނިޔާގެ އެ “ކެރޭ” ރައްދުން ޒަޔާންގެ ތުންފަތަށް ނޭނގި ނަމަވެސް ހިނިތުންވުމެއް އައެވެ.
ޔާނިޔާގެ އެކުވެރިޔާ ޝިފާ އާއި ޒަޔާންގެ އެކުވެރިޔާ ފައިސަލް ތިބީ މި ކުޅިވަރުގެ ފޯރި ބަލާށެވެ. “ޒަޔާން، މަށަށް ހީވަނީ ޒަޔާން ތި އުޅެނީ ޔާނިޔާ ދެކެ ލޯބިވެވިގެންހެން. އެކަމަކު އެކަން ފޮރުވަން ޒުވާބު ކުރަނީ.” ފައިސަލް ޒަޔާނާ ދިމާކޮށްލާނެއެވެ. ޒަޔާން ވަގުތުން އެކަން ދޮގުކުރާނެއެވެ. “ލޯތްބޭ؟ އެއީ އަހަރެންގެ ހަޔާތަށް އައި އެންމެ އުނދަގޫ މުސީބާތް!” ޒަޔާން ބުނާނެއެވެ. އަނެއްކޮޅުން ޝިފާވެސް ޔާނިޔާއާ ސުވާލުކުރެއެވެ. “ޔާނިޔާ، ތިޔަވަރަށް ޒަޔާންގެ ކުށް ހޯދާއިރު، އޭނާގެ ރީތިކަމާއި ކާމިޔާބީއަށް ކުޑަކޮށްވެސް ހިތް ނުލެނބޭތަ؟” ޔާނިޔާ ލޯ އަޅާލުމަށްފަހު ބުނާނީ، “ބޮޑާ މީހުން އަހަރެންގެ ލިސްޓަކު ނެތް” ކަމަށެވެ. މި ދިމާކުރުންތަކުގެ ސަބަބުން ދެމީހުންގެ ހިތުގައިވެސް ނޭނގޭ ފިނިކަމެއް އުފެދެން ފެށިއެވެ.
ހަޤީޤަތުގައި ދެމީހުންގެ ހިތުގެ އަޑީގައި އެކަކު އަނެކަކަށް އޮތީ ފުން އިޙުތިރާމެކެވެ. ޔާނިޔާ ރޭގަނޑު އެކަނި އިނދެ ވިސްނާލާއިރު، ޒަޔާންގެ ވިޔަފާރީގެ ހުޝިޔާރުކަމާއި، އޭނާގެ ކުންފުނީގެ މުވައްޒަފުންނަށް ބަހައްޓާ ގާތްކަމަށް ސިއްރުން ތަޢުރީފު ކުރެވެއެވެ. ޒަޔާންވެސް އޭނާގެ ކެބިންގައި އިނދެ ޔާނިޔާގެ ރިޕޯޓްތައް ކިޔާއިރު، އޭނާގެ އިލްމީ ޤާބިލުކަމާއި، ކޮންމެ ކަމެއްގައި ގެންގުޅޭ ހަރުދަނާ އުސޫލުތަކަށް ހިތާހިތުން ސާބަސް ދެއެވެ. “މިއީ ހަމަ އަހަރެން ބޭނުންވާ ކަހަލަ ހަރުދަނާ އަންހެނެއް.” ޒަޔާންގެ ހިތަށް އެރިއެވެ. ނަމަވެސް އަމިއްލަ ނަފުސުގެ ކިބުރުވެރިކަން އެކަން ދުލުން ބުނުމަށް ހުރަސް އަޅަނީއެވެ.
ދެން އައީ މަޝްރޫއުގެ މުހިންމު ނިންމުންތައް ނިންމަންޖެހޭ މަރުހަލާއެވެ. މިހާރު ދެމީހުންގެ މެދުގައި އޮތީ ބޮޑު ވާދަވެރިކަމެކެވެ. ކޮންމެ ނިންމުމެއްގައިވެސް އެކަކު އަނެކަކަށްވުރެ މޮޅުވާން މަސައްކަތް ކުރެއެވެ. ޔާނިޔާ އާ ޤާނޫނީ ހޯދުންތަކެއް ހުށަހަޅާއިރު، ޒަޔާން ބޭނުންވަނީ އޭނާގެ މެނޭޖްމަންޓް ވިސްނުން އެއަށްވުރެ މަތިކަން ސާބިތުކޮށްދޭށެވެ. މުޅި މަސައްކަތުގެ މާހައުލަކީ މިހާރު މި ދެމީހުންގެ ހުނަރު ދައްކާލާ އޮލިމްޕިކްސްއެއް ފަދަ ތަނެކެވެ. އެއްވެސް މީހަކު ދޫދޭކަށް ބޭނުމެއް ނުވެއެވެ. އެކަކު އަނެކަކާ ދިމާލަށް ބަލައިލާ ކޮންމެ ފަހަރަކު ލޮލުން ފެންނަނީ “އަހަރެން މޮޅުވާނެ” ކަމުގެ ކުލަވަރެވެ. ބައްދަލުވުން ނިންމާލުމަށްފަހު ދެމީހުންވެސް ހިތާހިތުން އެދެމުން ދިޔައީ، މި މަޝްރޫއު ނިމި، ދެން ދުވަހަކުވެސް އެކުގައި މަސައްކަތް ކުރަން ނުޖެހުމަށެވެ. އެކަކު އަނެކަކުގެ މޮޅުކަން ޤަބޫލުކުރަން ބޭނުންވިޔަސް، އަމިއްލަ އިއްޒަތާއި ކިބުރުވެރިކަން އެކަމަށް ހުރަސް އަޅާފައިވާ މަންޒަރެކެވެ.
(ނުނިމޭ)
