ނެޓްފްލިކްސްގެ އެމީ އެވޯޑް ކާމިޔާބުކޮށްފައިވާ އެންތޮލޮޖީ ސީރީޒް “މޮންސްޓާ” ގެ ހަތަރުވަނަ ސީޒަންގެ ފުރަތަމަ ފެނިލުމާއި ރިލީޒްކުރާނެ ތާރީޚު އިޢުލާނުކޮށްފިއެވެ.
މި އާ ސީޒަންގައި ފެނިގެންދާނީ 1892 ވަނަ އަހަރު އެމެރިކާގެ މެސެޗުސެޓްސްގެ ފޯލް ރިވަރގައި ހިނގި، އޭނާގެ ބައްޕައާއި ދޮންމަންމަ ކޮޅުތޫނު ފުރޯއަކުން މަރާލިކަމުގެ ތުހުމަތު ކުރެވުނު ލިޒީ ބޯޑަންގެ ވާހަކައެވެ. މިއީ މި ސީރީޒްގައި އަންހެން “މޮންސްޓާ” އެއް ފެންނާނެ ފުރަތަމަ ފަހަރެވެ.
މި ސީޒަންގައި ލިޒީ ބޯޑަންގެ ރޯލުން ފެންނާނީ އެލާ ބީޓީއެވެ. މީގެ އިތުރުން މުހިންމު ރޯލުތަކުން ވިކީ ކްރިއެޕްސް (ބްރިޖެޓް ސުލިވަން)، ރެބެކާ ހޯލް (އެބީ ބޯޑަން) އަދި ޗާލީ ހަންނަމް (އެންޑްރޫ ބޯޑަން) ފެންނާނެއެވެ.
މި ސީޒަންގެ ވާހަކަ ބިނާވެފައިވަނީ މުއްސަނދި އާއިލާއެއްގެ ތެރޭގައި އޮބިއަޅުވައިގެން ގެންގުޅޭ އަންހެން ދަރިއަކާއި، ނުކިޔަމަންތެރި މަސައްކަތު މީހަކު، އިހާނެތިކަމާއި އަނިޔާވެރިކަމުން ފުރިފައިވާ ގޭގެ މާހައުލުން ސަލާމަތްވުމަށް ކުރާ މަސައްކަތުގެ މައްޗަށެވެ.
ލިޒީ ބޯޑަންގެ ރޯލު ކުޅޭ އެލާ ބީޓީ ބުނި ގޮތުގައި، މި ސީޒަންގައި އަންހެނުންގެ ރުޅިވެރިކަމާއި އޮބިއަޅުވައިގެން ގެންގުޅުމުގެ ސަބަބުން ކުރިމަތިވާ ކަންތައްތަކެއް ފެންނާނެއެވެ. އަދި މިއީ މިއަދުގެ މުޖުތަމައާވެސް ގުޅުންހުރި މައުޟޫއެއް ކަމަށް އޭނާ ފާހަގަކުރިއެވެ.
“މޮންސްޓާ” ސީޒަން 4 ގެ ހުރިހާ އެޕިސޯޑެއް (ޖުމްލަ 8 އެޕިސޯޑް) ނެޓްފްލިކްސް މެދުވެރިކޮށް ރިލީޒްކުރުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ 17 ވަނަ ދުވަހުއެވެ. މީގެ ކުރީގެ ސީޒަންތަކުގައި ޖެފްރީ ޑާމާ، މެނެންޑޭޒް ބްރަދާސް އަދި އެޑް ގީން ފަދަ މަޝްހޫރު ޤާތިލުންގެ ވާހަކަތައް ވަނީ ގެނެސްދީފައެވެ.
