ނެޓްފްލިކްސްގެ އައު ސީރީޒް “އޮޕަރޭޝަން ސަފޭދު ސާގަރު: ދަ އަންޓޯލްޑް ސްޓޯރީ އޮފް ދަ ކާރްގިލް ވޯ” އޮގަސްޓް 7، 2026 ގައި ވަނީ ދައްކަން ފަށާފައެވެ. މި ސީރީޒް ބިނާކޮށްފައިވަނީ 1999 ވަނަ އަހަރު ހިނގައިދިޔަ ކާރްގިލް ހަނގުރާމައިގައި އިންޑިއާގެ ވައިގެ ސިފައިން ދެއްކި ހިތްވަރުގަދަ ލެގަސީގެ މައްޗަށެވެ.
ޙަޤީޤީ “އޮޕަރޭޝަން ސަފޭދު ސާގަރު” ގެ ވާހަކަ
އޯނީ ސެން ޑައިރެކްޓްކޮށްފައިވާ މި ސީރީޒަކީ ކާރްގިލް ހަނގުރާމައިގައި ހިންގި އެންމެ މުހިންމު އެއް އޮޕަރޭޝަނުގެ މައްޗަށް ބިނާކޮށް އުފައްދާފައިވާ ޑްރާމާ ސީރީޒެކެވެ. އިންޑިއާގެ ވައިގެ ސިފައިން ހިންގި “އޮޕަރޭޝަން ސަފޭދު ސާގަރު”ގެ ނަމުން ނަންދެވިފައިވާ މި އޮޕަރޭޝަނުގެ މައްޗަށް ބިނާކޮށްފައިވާ މި ސީރީޒުން ފެނިގެންދަނީ މި މިޝަން ކާމިޔާބު ކުރުމުގައި އިސްކޮށް އުޅުނު “ގޯލްޑަން އެރޯސް ސްކޮޑްރަން”ގެ ސިފައިންގެ ދިރިއުޅުމެވެ.
އިންޑިއާގެ ވައިގެ ސިފައިންނަށް ކުރިމަތިވި ގޮންޖެހުން ބޮޑު މިޝަން
ކާރްގިލް ހަނގުރާމައިގެ ތެރޭގައި 26 މޭ 1999 ގައި ފެށި “އޮޕަރޭޝަން ސަފޭދު ސާގަރު” އަކީ ވަރަށް ގޮންޖެހުން ބޮޑު އޮޕަރޭޝަނެކެވެ. އެއީ އިންޑިއާގެ ހަނގުރާމަމަތީ ބޯޓުތަކަށް ދެ ގައުމު ގުޅޭ ސަރަހައްދީ ރޮނގު ހުރަސްކުރުމުގެ ހުއްދަ ނެތުމާއި، ޕާކިސްތާނު ސިފައިން ހިފާފައިވާ ފަރުބަދަތަކުގެ އުސްމިންތަކުން އެމީހުން ފަހަތަށް ޖެއްސުމަކީ އުނދަގޫ ކަމަކަށް ވީތީއެވެ.
މިއީ އިންޑިއާގެ ވައިގެ ސިފައިން މިހާ އުސް ސަރަހައްދެއްގައި ހިންގި ފުރަތަމަ އޮޕަރޭޝަނެވެ. މި މިޝަނުގެ ކުރީކޮޅު ވައިގެ ސިފައިންގެ ގިނަ އޮފިސަރުންތަކެއް ޝަހީދުވެ، ބައެއް ބޯޓުތައް ވެސް ވަނީ ވެއްޓިފައެވެ.
އެހެންނަމަވެސް، އިންޑިއާގެ ވައިގެ ސިފައިން ދިން ވަރުގަދަ އަދި އަމާޒު ސީދާ ހަމަލާތަކުގެ ސަބަބުން، ޕާކިސްތާނުން ހިފާފައިވާ މުހިންމު ސަރަހައްދުތަކުގެ ކޮންޓްރޯލް އަލުން ހޯދުމަށް މަގުފަހިވިއެވެ.
85 ދުވަހަށް ދެމިގެންދިޔަ މި ހަނގުރާމަ 26 ޖުލައިގައި ނިމުމަކަށް އައިއިރު، އިންޑިއާގެ ވައިގެ ސިފައިން ވަނީ 550 އަށްވުރެ ގިނަ ވައިގެ ހަމަލާތައް ދީ، ތާރީޚީ ކާމިޔާބީއެއް ހޯދާފައެވެ.
މި ސީރީޒަކީ “ގޯލްޑަން އެރޯސް ސްކޮޑްރަން”ގެ ހަނދާންތައް އާކޮށްދޭ ސީރީޒެކެވެ. މި ސީރީޒްގެ މައިގަނޑު ރޯލުން ފެނިގެންދަނީ ސިދާތު އެވެ. އޭނާ ކުޅެނީ މި އޮޕަރޭޝަނުގައި ޝަހީދުވި ސްކޮޑްރަން ލީޑަރު އަޖޭ އަހޫޖާގެ ބައެވެ. މީގެ އިތުރުން ދިއާ މިރްޒާ، ޖިމީ ޝެރްގިލް، އާދިލް ޙުސައިން، ޕްރަޖަކްތާ ކޯލީ، އަބޭ ވަރުމާ، މިހީރު އަހޫޖާ، ތާރޫކް ރައިނާ އަދި އަރްނަވް ބާސިން ފަދަ ތަރިން މި ސީރީޒުން ފެނިގެންދާނެއެވެ.
މިހާރު މި ސީރީޒް ނެޓްފްލިކްސް އިން ބަލައިލެވޭނެއެވެ.
