ބޮލީވުޑްގެ މަޝްހޫރު ތަރިން ކަމަށްވާ އަކްޝޭ ކުމާރާއި ސައިފް އަލީ ޚާން ލީޑް ރޯލުން ފެނިގެންދާ އާ ފިލްމު “ހައިވާން” ގެ ފުރަތަމަ ލަވަ “މެރޭ ހީރޯ ހޭ ވޯ” ބުދަ ދުވަހު އާންމުކޮށްފިއެވެ.
މި ލަވައަކީ ލޯފަން ބައްޕައަކު އޭނާގެ ކުޑަ އަންހެން ދަރިފުޅަށް ދޭ ޝަރުތަކާ ނުލައި ވާ ލޯތްބާއި، އެ ދެމެދުގައިވާ ގާތް ގުޅުން ދައްކުވައިދޭ އަސަރުގަދަ ލަވައެކެވެ. ލަވައިގެ ވީޑިއޯއިން ފެންނަނީ ލޮލަށް ނުފެނުނު ނަމަވެސް، ސައިފްގެ ކެރެކްޓަރު އޭނާގެ ދަރިފުޅު ބަލައިބޮޑުކުރުމުގައި އަދާކުރާ ބައްޕައެއްގެ ފުރިހަމަ ޒިންމާތަކެވެ.
ޕްރީތަމް މިއުޒިކް ތައްޔާރުކޮށްފައިވާ މި ލަވަ ކިޔާފައިވަނީ ޝާން އާއި ވާނިކާ ނަޔަކް އެވެ. އަދި މި ލަވައިގެ ޅެން ލިޔެފައިވަނީ މަޝްހޫރު ޅެންވެރިޔާ ޖާވިދު އަޚްތަރެވެ. ޒީ މިއުޒިކް ކޮމްޕެނީގެ އިންސްޓަގްރާމް މެދުވެރިކޮށް މި ލަވަ ހިއްސާކުރަމުން ބުނެފައިވަނީ، މިއީ ކުޑަކުދިންގެ ޅަފަތުގެ މައުސޫމުކަން ފަދަ މަޑުމައިތިރި ރާގެއް ކަމަށާއި، ބައްޕައެއްގެ ލޯބި ފަދައިން އަބަދަށް ދެމިގެންވާނެ ލަވައެއް ކަމަށެވެ.
ޕްރިޔަދަރްޝަން ޑައިރެކްޓްކުރާ “ހައިވާން” އަކީ ސައިކޮލޮޖިކަލް ތުރިލާއެކެވެ. ސައިފް އަދި އަކްޝޭގެ އިތުރުން މި ފިލްމުގެ މުހިންމު ރޯލުތަކުން ބޯމަން އިރާނީ، ސައްޔާމީ ކޭރް އަދި ޝްރިޔާ ޕިލްގާއޮންކަރު ފެނިގެންދާނެއެވެ.
މި ފަހުން ނެރުނު މި ފިލްމުގެ ޓީޒާއިން ވެސް ފިލްމާމެދު ބެލުންތެރިންގެ ޝައުޤުވެރިކަން ވަނީ އިތުރުވެފައެވެ. މި ފިލްމުގައި ސައިފް އަދި އަކްޝޭގެ ކުރިމަތިލުންތަކެއް ފެނިގެންދާނެ ކަމަށް ބެލެވޭއިރު، މައިގަނޑު ސުވާލަކީ “ހީރޯ ޔާ ހައިވާން (ހީރޯއެއް ނުވަތަ މޮންސްޓާއެއް)؟” މިއެވެ.
ކޭވީއެން ޕްރޮޑަކްޝަންސް އަދި ތެސްޕިއަން ފިލްމްސް ގުޅިގެން ވެންކަޓް ކޭ ނާރަޔަނާ އަދި ޝައިލަޖާ ދެސާއީ ފެން ޕްރޮޑިއުސްކުރާ މި ފިލްމު ސިނަމާތަކުގައި އަޅުވަން ހަމަޖެހިފައިވަނީ 11 ސެޕްޓެމްބަރު 2026 ގައެވެ.
