ޒަމާނީ ތާރީޚުގައި ދުނިޔެ އެންމެ ބޮޑަށް އިންތިޒާރުކުރި އެއް ވަގުތުކޮޅުގައި، އެޕޯލޯ 11ގެ އެސްޓްރޮނޯޓުން ކަމަށްވާ ނީލް އާމްސްޓްރޯންގް އާއި ބަޒް އޯލްޑްރިން ވަނީ ހަނދުގައި ފައިބީއްސި އެންމެ ފުރަތަމަ އިންސާނުންގެ ޝަރަފު ހޯދާފައެވެ.
ހަނދަށް ފޭބި ފުރަތަމަ އިންސާނާގެ ގޮތުގައި އާމްސްޓްރޯންގް މަޝްހޫރުވެފައި ވީނަމަވެސް، އެންމެ މަޝްހޫރުވި ފޮޓޯއިން ފެންނަނީ އޭނާ ނޫންކަން އެނގުމުން ގިނަ ބަޔަކަށް ހައިރާންކަން ލިބިދާނެއެވެ. އެ ފޮޓޯ ނެގީ އާމްސްޓްރޯންގް އެވެ. ފޮޓޯއިން ފެންނަނީ އޭނާގެ ބައިވެރިޔާ އޯލްޑްރިން އެވެ.
ހަނދަށް ފޭބި މަންޒަރުތައް ޓީވީ މެދުވެރިކޮށް ގާތްގަނޑަކަށް 650 މިލިއަން މީހުން ބަލަމުންދިޔައިރު، އޯލްޑްރިންގެ އެ ފޮޓޯއަކީ އިންސާނީ ތަރައްޤީއާއި ކާމިޔާބީ ރަމްޒުކޮށްދޭ، ފަންނީ ގޮތުން ފުރިހަމަ ރީތި ނިޝާނެކެވެ. މި ފޮޓޯއަކީ އެ ދެމީހުން ހަނދުގައި ހޭދަކުރި ދެގަޑިއިރާއި ބައިގެ ތެރޭގައި ނެގި 166 ފޮޓޯގެ ތެރެއިން އެކެކެވެ.
ބަޒް އޯލްޑްރިން ހަނދުގައި. މި ފޮޓޯ ނެގީނީލް އާމްސްޓްރޯންގް / ނާސާ
ނާސާއިން ހާމަކުރާ ގޮތުގައި، މި ފޮޓޯތަކަކީ ދުނިޔެއިން ބޭރު އެހެން ތަނެއްގައި އިންސާނުން ތިއްބާ ނެގިފައިވާ ހަމައެކަނި ފޮޓޯތަކެވެ.
ހަނދުގެ ބިމުގައި އެސްޓްރޮނޯޓުން އެމެރިކާގެ ދިދައެއް ހަރުކުރިއެވެ. ނަމަވެސް، އެނބުރި ދަތުރު ފެށުމަށްޓަކައި އުޅަނދު އުދުއްސާލި ވަގުތު އިންޖީނުން ބޭރުވި ބާރުގަދަ ވަޔާއެކު އެ ދިދަ ވެއްޓުނު ކަމަށް އޯލްޑްރިން ބުނެފައިވެއެވެ. މީގެ އިތުރުން، ރާނީ އެލިޒަބަތު ދެވަނައިގެ އިތުރުން ދުނިޔޭގެ އެކި ޤައުމުތަކުގެ ވެރިން ފޮނުއްވި ހެޔޮއެދުމުގެ މެސެޖުތައް ހިމެނޭ ސިލިކަން ޑިސްކެއްވެސް އެމީހުން އެތަނުގައި ބޭއްވިއެވެ.
މި މިޝަނަކީ އިންސާނީ ތާރީޚުގައި ހޯދުންތައް ހޯދުމުގެ ރޮނގުން ހޯދި އެންމެ ފާހަގަކޮށްލެވޭ އެއް ކާމިޔާބީއެވެ.
