މީހަކަށް އިންތިހާއަށް އެހީތެރިވުމަކީ، އެމީހެއްގެ ކުރިމަތީގައި ތިމާގެ އަގު ވެއްޓިގެން ހިނގައިދާނެ ކަމެއްކަމަށް ބުނާ ބުނުމުގެ ފަހަތުގައި ފުން ހަޤީޤަތްތަކެއް އެކުލެވިގެންވެއެވެ. މީގެ އެންމެ ބޮޑު ނުރައްކަލަކީ، ލޯބި ހޯދުމަށްޓަކައި ނުވަތަ ގުޅުން ދެމެހެއްޓުމަށްޓަކައި އެހީތެރިވުމަކީ މަޖުބޫރު ކަމެއް ކަމަށް އަންހެނާއަށް ޤަބޫލުކުރެވޭ ހިސާބަށް ދިއުމެވެ.
މިކަން ފެށިގެން އަންނަނީ ވަރަށް އާދައިގެ ގޮތަކަށެވެ. ފިރިމީހާގެ ކަންކަން ހަމަޖައްސައިދިނުމާއި، ތިމާގެ އަތްމަތި ދަތިވިޔަސް އޭނާގެ ޚަރަދުތައް ބެލެހެއްޓުމާއި، އޭނާ އުފުލަންޖެހޭ ޒިންމާތަކާ ހަވާލުވުމުގެ އިތުރުން، އޭނާގެ ކުށްތަކަށް އުޒުރުދައްކައި ތިމާގެ އަމިއްލަ ބޭނުންތައް ފަސްކޮށްލުމުންނެވެ. ލޯބީގެ ނަމުގައި އޭނާ މިކަންކަން ސިފަކުރަނީ އެހީތެރިކަމުގެ ގޮތުގައެވެ.
ނަމަވެސް، ވަގުތު ފާއިތުވަމުންދާ ވަރަކަށް، ހުރިހާ ކަމެއް ހަނދާންކޮށްދީ، އިސްލާހުކޮށް، ކަންކަން މެނޭޖްކުރަންޖެހޭ މީހަކަށް އޭނާ ބަދަލުވެއެވެ. އޯގާތެރިކަމުން ފެށުނު މި ދަތުރު ނިމިގެންދަނީ ނުރުހުމާއި ޝަކުވާގެ ތެރެއަށެވެ. އޭނާ ބޭނުންވީ ބައިވެރިއެކެވެ. އެކަމަކު ނޭނގި ހުއްޓާ އޭނާއަށް މި އުފުލުނީ ހަރުދަނާ ފިރިހެނަކު އުފުލަންޖެހޭ ޒިންމާތަކެވެ.
އެއް ބައިވެރިއަކު އަނެއް ބައިވެރިޔާގެ ހުރިހާ ކަމެއް އަބަދު ހަމަޖައްސައިދޭން އުޅޭނަމަ، އަނެއް ބައިވެރިޔާ ޒިންމާދާރުވުމަށާއި، އިސްނެގުމަށާއި، ކުރިއެރުމަށް އޮންނަ ފުރުސަތު ހަނިވެގެންދެއެވެ.
މީގެ މާނައަކީ އަނބިން ފިރިންނަށް އެހީތެރިވުން ހުއްޓާލުމެއް ނޫނެވެ.
ކައިވެންޏަކީ ޤުރުބާނީއާއި، ކެތްތެރިކަމާއި، ޚާއްސަކޮށް ދަތި އުނދަގޫ ވަގުތުތަކުގައި އެކަކު އަނެކަކަށް އެހީތެރިވުން މައްޗަށް ބިނާވެފައިވާ ގުޅުމެކެވެ. ނަމަވެސް، ދޭ އެހީތެރިކަމަކީ އަނެކާ ކަންނެތްކޮށް، ޒިންމާއިން ރެކުމަށް މަގުފަހިކޮށްދޭ ކަމަކަށް ވެގެންނުވާނެއެވެ. އަދި ޒިންމާތަކަކީ ހަމައެކަނި އެކަކު އުފުލަންޖެހޭ އެއްޗަކަށް ވެގެންނުވާނެއެވެ.
އިސްލާމްދީނުގައި ކައިވެނީގެ ބިންގަލަކީ ލޯތްބާއި، އޯގާތެރިކަމާއި، އެކުވެރިކަމުގެ އިތުރުން ދެފަރާތުގެ ޙައްޤުތަކެވެ. ކީރިތި ޤުރުއާނުގައި ސިފަކުރައްވާފައިވާ ގޮތުގައި ދެމަފިރިންނަކީ އެކަކު އަނެކެއްގެ ފޭރާމެވެ. އެއީ އެކަކު އަނެކަކަށް ހިތްހަމަޖެހުމާއި ރައްކާތެރިކަން ހޯދައިދިނުމަށެވެ. އެހެންކަމުން އިޙްތިރާމް އޮންނަންވާނީ ދެފަރާތުންނެވެ. އަނބިމީހާ ފިރިމީހާއަށް ޤަދަރުކުރަންޖެހޭ ފަދައިން، ފިރިމީހާވެސް އަނބިމީހާގެ އަގުވަޒަންކޮށް އިޙްތިރާމް ކުރަންޖެހޭނެއެވެ. އެކަކުވެސް އަނެކެއްގެ ލޯތްބަކީ އަމިއްލަ ޙައްޤެއް ކަމަށް ބަލައި އިހުމާލުވެގެން ނުވާނެއެވެ.
ކައިވެނީގެ ބައެއް ދުވަސްވަރު އެކަކު އަނެކަކަށްވުރެ ބޮޑަށް ޒިންމާ އުފުލަންޖެހޭ ހާލަތްތައް އަންނާނެއެވެ. އެއީ ކައިވެނީގެ ބައެކެވެ. ނަމަވެސް ކަންބޮޑުވާންޖެހޭ ކަމަކީ، ވަގުތީ އެހީތެރިކަމެއްގެ ބަދަލުގައި، މުޅި ގުޅުން ހަމައެކަނި އެކަކު އުފުލަންޖެހޭ ދާއިމީ އާދަޔަކަށް އެކަން ބަދަލުވުމެވެ.
ކުރަންވީ ސުވާލަކީ “އޭނާ އަހަރެން ދޫކޮށްލާފައި ނުދާނެ ގޮތަކަށް އަހަރެން ކުރާނީ ކޮންކަމެއް ހެއްޔެވެ؟” މިއެއް ނޫނެވެ. އޭގެ ބަދަލުގައި ކުރަންވީ ސުވާލަކީ “އަހަރެން މި ދޭ ލޯތްބަކީ އަހަރެމެން ދެމީހުންގެވެސް ޤަދަރާއި އިޙްތިރާމް ރައްކާތެރިކޮށްދޭ ލޯތްބެއް ހެއްޔެވެ؟”
އެހީތެރިވާންވީ އެކަމުން ރަނގަޅު ނަތީޖާ ނުކުންނަ ހާލަތްތަކުގައެވެ. ދޭންވީ ހިތުން ރުހުމުން ދެވޭ މިންވަރަށެވެ. އެކަކު އަނެކަކަށް އިޙްތިރާމް ކުރާށެވެ. މަންމައެއްގެ ދައުރު އަދާކުރުމުގެ ބަދަލުގައި މުޢާމަލާތްކުރާށެވެ. ބައިވެރިޔާގެ ޒިންމާތަކަށް ހުރަސްނޭޅޭ ގޮތަށް އެހީތެރިވާށެވެ.
ސަބަބަކީ ލޯތްބަކީ އެކަކު އަނެކަކަށް ބަރޯސާވުމެއް ނޫނެވެ. އެއީ ބައިވެރިވުމެކެވެ. ބައެއް ފަހަރު ބުއްދިވެރި ގޮތުގައި ލޯބިވުމަކީ ލޯބިވާ މިންވަރު މަދުކުރުމެއް ނޫނެވެ. އެއީ ލޯބީގެ ތެރޭގައި ތިމާގެ އަމިއްލަ ނަފްސު ގެއްލުވައިނުލައި ލޯބިވުމެވެ.
