ބޮލީވުޑްގެ މަޝްހޫރު ޑައިރެކްޓަރު ސަންޖޭ ގުޕްތާ 2002 ވަނަ އަހަރު ނެރުނު ކާމިޔާބު އެކްޝަން ތުރިލާ ފިލްމު “ކާންޓޭ” އުފެއްދުމުގައި ހިނގައިދިޔަ ވަރަށް ޚާއްސަ އަދި ޝައުޤުވެރި ކަމެއް ހާމަކޮށްފިއެވެ.
ހުސައިން ޒައިދީއާ ވާހަކަދައްކަމުން ސަންޖޭ ގުޕްތާ ބުނީ، އެ ފިލްމުގެ އަސްލު ސްކްރިޕްޓުގައި ގިނަ އަދަދަކަށް ހުތުރު ބަސްތައް ހިމަނާފައި އޮތް ކަމަށެވެ. ނަމަވެސް، ބޮލީވުޑްގެ ލެޖެންޑް އަމީތާބް ބައްޗަންގެ އެދުމުގެ މަތިން އެ ބަސްތައް ފަހުން ވަނީ އުނިކޮށްފައެވެ. އަމީތާބް ވަނީ އޭނާގެ ކެރެކްޓަރަށް ނިސްބަތްކޮށް އެފަދަ އެއްވެސް ހުތުރު ބަހެއް ބޭނުންކުރުމަށް ދެކޮޅު ހަދައި، އެކަން ސާފުކޮށް ޑައިރެކްޓަރަށް އަންގާފައެވެ.
“ސްކްރިޕްޓުގައި ހުތުރު ބަސްތައް ލިޔެވިފައި ހުރި. އެކަމަކު ފަހުން އަހަރެމެން އެ ބަސްތައް ބޭނުމެއް ނުކުރަން. އަމިތު ޖީ ވިދާޅުވީ އޭނާއަށް އަމާޒުކޮށް އެއްވެސް މީހަކު ހުތުރު ބަސް ބޭނުންކޮށްގެން ނުވާނެކަމަށް. އެހެންވެ އަހަރެން ބުނިން އެންމެ ރަނގަޅޭ. އެކަމަކު އޭގެ މާނައަކީ އެހެން ކެރެކްޓާތަކުން އެކަކު އަނެކަކަށް އެފަދަ ބަސްތައް ބޭނުން ނުކުރުމެއް ނޫނޭ.” ސަންޖޭ ގުޕްތާ ކިޔައިދިނެވެ.
އަދި ފަހުން ސެންސަރު ބޯޑުގެ މަރުހަލާގައި ވެސް ޑައިލޮގްތަކަށް އިތުރު ބަދަލުތައް ގެނައި ކަމަށް އޭނާ ބުންޏެވެ.
މީގެ ކުރިން ނޫހަކަށް ދިން އިންޓަވިއުއެއްގައި ވެސް ގުޕްތާ ވަނީ މިކަމާ ގުޅޭގޮތުން ވާހަކަދައްކާފައެވެ. އެގޮތުން، ސްކްރީންމަތީގައި ދުވަހަކުވެސް ހުތުރު ބަހެއް ބޭނުންކޮށްފައި ނުވާނެ ކަމަށާއި، މި ފިލްމުގައި ވެސް އެފަދަ ބަހެއް ބޭނުން ނުކުރާނެ ކަމަށް އަމީތާބް ބުނި ކަމަށް އޭނާ ފާހަގަކުރިއެވެ.
“ސަންޖޭ، އަހަރެން ހުތުރު ބަހެއް ނުބުނާނަން. އެއީ ދުވަހަކުވެސް އަހަރެން ކޮށްފައިވާ ކަމެއް ނޫން. އެހެން މީހަކު އެފަދަ ބަހެއް ބޭނުންކުރިޔަސް އަހަރެންގެ މައްސަލައެއް ނެތް.” އަމީތާބް ބުނި ކަމަށް ސަންޖޭ ގުޕްތާ ހާމަކުރިއެވެ.
ފިލްމުގެ ވާހަކަ އަމީތާބަށް ކިޔައިދިން ދުވަހުގެ ހަނދާންތައް އާކުރަމުން ގުޕްތާ ބުނީ، އެއީ ވަރަށް ބިރުގަތް އަދި ނުތަނަވަސްވި ވަގުތުކޮޅެއް ކަމަށެވެ. މި ޕްރޮޖެކްޓަކީ ފުރަތަމަ ސަންޖޭ ދަތު ގެނެސްދިނުމަށް އެއްބަސްވި ފިލްމެއް ނަމަވެސް، ވާހަކަ ރީތިކަމުން އޭނާ އަމިއްލައަށް އެކްޓްކުރަން ނިންމައި، އަމީތާބަށް ރޯލެއް ދިނުމަށް ލަފާދިނީއެވެ. އަމީތާބްގެ ގެއަށް ގޮސް، އޭނާގެ ފޮޓޯތަކުން ފުރިފައިވާ މާހައުލުގައި އިނދެ ވާހަކަ ކިޔައިދޭން ޖެހުމުން އިތުރަށް ޖެހިލުންވި ކަމަށް ސަންޖޭ ގުޕްތާ ބުންޏެވެ.
ކުއެންޓިން ޓެރެންޓީނޯގެ މަޝްހޫރު ފިލްމު “ރެޒަވޯ ޑޯގްސް” އިން އިންސްޕަޔާވެގެން އުފެއްދި “ކާންޓޭ” ރިލީޒްކުރީ 20 ޑިސެމްބަރު 2002 ގައެވެ. އެމެރިކާގެ ލޮސް އެންޖެލިސްގެ ބޭންކެއް ފޭރިގަންނަން އުޅޭ ހަ މީހެއްގެ ވާހަކަ ކިޔައިދޭ މި ފިލްމުގައި އަމީތާބްގެ އިތުރުން ސަންޖޭ ދަތު، ސުނިލް ޝެޓީ، ލަކީ އަލީ، މަހޭޝް މަންޖްރޭކަރު އަދި ކުމާރު ގޯރަވް މުހިންމު ރޯލުތަކުން ފެނިގެންދިޔައެވެ. މި ފިލްމަކީ އޭގެ ތަފާތު ސްޓައިލާއި، ވަރުގަދަ ޑައިލޮގްތަކާއި މިއުޒިކުގެ ސަބަބުން ބެލުންތެރިންގެ މެދުގައި ބޮޑު މަޤުބޫލުކަމެއް ހޯދި ފިލްމެކެވެ.
