ސޯޝަލް މީޑިއާގެ މި ޒަމާނުގައި ވަރަށް އަޖައިބުކުރުވަނިވި ކަމެއް ފާހަގަކުރެވެއެވެ. އެއީ މީހަކުދެކެ އިންތިހާއަށް ފޫހިވާކަމަށް ބުނާއިރުވެސް، އެމީހަކު ސޯޝަލް މީޑިއާއަށްލާ ކޮންމެ އެއްޗަކާއި، ދިޔަ ތަންތަނާއި، ލީ ހެދުމާއި، ބައްދަލުކުރި މީހުންނާއި، ބުނި ބަސްތަކާއި، ފޮހެލި ޕޯސްޓުތަކުގެ އިތުރުން، މީގެ ތިން ހަފުތާ ކުރިން ލީ އެއްޗަކުން ދޭހަވާ މާނަވެސް އެނގިފައި އޮތުމެވެ.
މި ހިސާބުން އުފެދޭ ސުވާލަކީ، މިއީ ހަމަ ފޫހިވުން ހެއްޔެވެ؟ ނުވަތަ ނޭނގި ނަމަވެސް ތިޔައީ އެމީހެއްގެ އެންމެ ވަރުގަދަ ސަޕޯޓަރަކަށް ބަދަލުވީ ހެއްޔެވެ؟
އޮޅުމަކުން ނުވަތަ މަދުމަދުން ފޫހިވާ މީހެއްގެ ކަންތައްތައް ބަލާލުމަކީ އިންސާނީ ތަބީޢަތުގައި ހުންނަ ކަމެކެވެ. ކަންކަން އޮޅުންފިލުވަން ބޭނުންވުމަކީ އެމީހަކަށް ތާއީދުކުރުމެއް ނޫނެވެ. އަދި މީހެއްގެ ކޮންޓެންޓް ފެނުމަކީ އެމީހަކަށް ހިތްކިޔައިގެން އުޅުން ކަމަށް ނުވެދާނެއެވެ. ސޯޝަލް މީޑިއާގެ އެލްގޮރިދަމްތައް ހުންނަ ގޮތުން، އަހަރެމެން ބޭނުން ނުވިޔަސް ބައެއް މީހުންގެ ޕޯސްޓުތައް ފީޑުން ފެނުމަކީ އާންމު ކަމެކެވެ. ނަމަވެސް، މީހަކު ގަސްތުގައި ތަކުރާރުކޮށް ވަކި މީހެއްގެ ކަންތައްތައް ހޯދައި، ކޮންމެ ވީޑިއޯއެއް ބަލައި، ލިޔުންތައް ކިޔައި، ހުރިހާ އަޕްޑޭޓެއް ހޯދުމަށްފަހު، އެހެން ތަނަކަށް ގޮސް އެމީހަކާ ބެހޭގޮތުން ޝަކުވާ ކުރަން އަވަސްވެގަންނަ ނަމަ، އެއީ މަޖާ ކަމެކެވެ. ތިޔަބުނާ މީހަކުދެކެ ފޫހިވާވަރުން، ތިމާގެ ދިރިއުޅުމުގެ އާދަކާދައިގެ ތެރޭގައި އެމީހަކު ހިމަނާފައިވާ ކަމަށް ބެލެވެއެވެ.
ނަފްސާނީ ގޮތުން ބަލާއިރު، މިފަދަ އަމަލުތައް ގުޅިފައިވަނީ އެކަކު އަނެކަކާ އަޅާކިޔުމާއި، ހަސަދަވެރިކަމާއި ނުވަތަ އެހެން މީހުންގެ ކަންކަން ބަލަން ބޭނުންވުމާއެވެ. ބައެއް ފަހަރު މީހަކުދެކެ ފޫހިވަނީ، ތިމާއަށް ބަލައިގަންނަން އުނދަގޫ ސިފައެއް އެމީހެއްގެ ކިބައިގައި ހުރުމުންނެވެ. އެއީ އެމީހެއްގެ އަމިއްލަ ނަފްސަށް އޮންނަ އިތުބާރު ނުވަތަ މަޤުބޫލުކަން ނުވަތަ ދިރިއުޅުމުގެ ވައްޓަފާޅި ކަމަށްވެސް ވެދާނެއެވެ. މިފަދަ މީހުން ބެލުމަކީ ތިމާ ހިތްނުތަނަވަސްވާ ކަންކަން މޮނިޓަރ ކުރުމުގެ އާދައެކެވެ.
ސޯޝަލް މީޑިއާއިން މިކަންކަން ކުރަން ވަރަށް ފަސޭހައެވެ. މީހެއްގެ ދޮރުގައި ޓަކިޖަހާފައި، “އަހަރެން މިއައީ ކަލޭދެކެ ފޫހިވާވަރުން ކަލޭގެ ހުރިހާ ކަމެއް ބަލާށޭ” ބުނާކަށް ނުޖެހެއެވެ. ހަމައެކަނި ހިމޭންކަމާއެކު އެމީހެއްގެ ޕްރޮފައިލް ބަލައިލުމުން ނިމުނީއެވެ.
ނަމަވެސް ބައެއް ފަހަރު، “އަހަރެން އެމީހަކާމެދު ކުޑަކޮށްވެސް އަޅައެއް ނުލަން” ކަމަށް ބުނާ މީހާއަށް، އެމީހެއްގެ ގާތް ރަހުމަތްތެރިންނަށްވުރެ ބޮޑަށް އެމީހެއްގެ ދިރިއުޅުން އެނގެއެވެ.
އާ ވީޑިއޯއެއް ލީ ވަގުތާއި، އިސްތަށިގަނޑަށް ގެނައި ބަދަލާއި، ދިޔަ ރެސްޓޯރެންޓާއި، ބޭނުންކުރި ދަބަހުގެ ބްރޭންޑާއި، ޕޯސްޓަށް ލައިކް ދިން މީހުންނާއި، އަދި ޕޯސްޓްކުރާ މިންވަރު މަދުވިކަންވެސް މިފަދަ މީހުންނަށް ފާހަގަވެއެވެ. ލޯބިވާ ރަހުމަތްތެރިޔާއެވެ. އެއީ މިހާރު ހަމައެކަނި ފޫހިވުމެއް ނޫނެވެ. އެއީ ދިރާސާކުރުމެވެ.
ހަނދާން ބަހައްޓަންޖެހޭ މުހިންމު ކަމެއް އެބައޮތެވެ. ފާޑުކިޔުމަކީ މީހެއްގެ ކަންކަން އަބަދު ފާރަލައި ބަލަންޖެހޭ ކަމެއް ނޫނެވެ. މީހެއްގެ ކޮންޓެންޓެއްގެ ސަބަބުން ތިމާއަށް އުނދަގޫވާނަމަ، އެންމެ ރަނގަޅު ގޮތަކީ އެމީހަކު “މިއުޓް” ކުރުން ނުވަތަ “އަންފޮލޯ” ކުރުމެވެ. ތިމާ ފޫހިވާ ފިލްމެއްގެ ކޮންމެ މަންޒަރެއް ބަލާކަށް ނުޖެހެއެވެ.
ތިމާގެ ސަމާލުކަމަކީ ވަރަށް އަގުހުރި އެއްޗެކެވެ. ފޫހިވާ މީހެއްގެ ކަންކަން ބަލަން ހޭދަކުރާ ކޮންމެ މިނެޓަކީ ތިމާގެ އަމިއްލަ ދިރިއުޅުމުގެ ވަގުތު އެހެން މީހަކަށްޓަކައި ހުސްކޮށްލެވޭ ވަގުތެކެވެ.
ކޮންމެ މީހަކުދެކެ ލޯބިވާކަށް ނުޖެހެއެވެ. ކޮންމެ މީހެއްގެ ރައުޔަކާ އެއްބަސްވާކަށްވެސް ނުޖެހެއެވެ. އަދި ބައެއް މީހުންގެ ކަންކަމާ ފޫހިވުމުގެ ޙައްޤު ކޮންމެ މީހަކަށްމެ ލިބިގެންވެއެވެ. ނަމަވެސް، އެމީހަކީ ތިމާއަށް އެއްވެސް މުހިންމު މީހެއް ނޫންކަމަށް ބުނާއިރުވެސް އެމީހެއްގެ ހުރިހާ ކަމެއް ބަލަމުންދާނަމަ، އަމިއްލަ ނަފްސާ މި ސުވާލު ކޮށްލުން ބުއްދިވެރިއެވެ.
“އަހަރެން ފޫހިވާ މީހަކަށް އަހަރެންގެ އަގުހުރި ސަމާލުކަން މިވަރަށް މިދެނީ ކީއްވެ ހެއްޔެވެ؟”
އެންމެ އިޚްލާޞްތެރި “އަންފޮލޯ” އަކީ ފޯނުގެ ސްކްރީނުން ކުރާ “އަންފޮލޯ” އެއް ނޫނެވެ. އެއީ ތިމާގެ ސިކުނޑިން އެމީހަކު ނެރެލުމެވެ. އަދިވެސް އެމީހެއްގެ ހުރިހާ ކަމެއް ބަލަމުން، “އަހަރެން ކުޑަކޮށްވެސް ޝައުޤުވެރިއެއް ނުވޭ” ކަމަށް ބުނާނަމަ.. ލޯބިވާ ރަހުމަތްތެރިޔާއެވެ، ތިޔައީ އެމީހެއްގެ އެންމެ ބޮޑު ފާޑުކިޔުންތެރިޔާ ނޫންކަމުގައި ވެދާނެއެވެ. ބޮޑަށް ބެލެވެނީ ތިޔައީ އެމީހެއްގެ އެންމެ ވަރުގަދަ “ވިއުއަރ” ކަމުގައެވެ.
