އައު ފަތިހެއްގެ އަލިކަމާއި، ހިތްތަކުގެ ބަހާރު އަދި އުންމީދުގެ މޭވާ
ކެފޭގައި ވެވުނު އެ މާތް ޢަހުދާއި، ކަރުނައިގެ ތެރެއިން ދެވުނު ތެދުވެރި މަޢާފަށްފަހު، މަރިޔަމާއި ރައްޔާންގެ ދިރިއުޅުމަށް ފެށިގެން ދިޔައީ އާދަޔާ ޚިލާފު އަމާން، ބަރަކާތްތެރި ދުވަސްވަރެކެވެ. އެއީ ހަމައެކަނި ދެމީހުން އެކުގައި އަލުން ދިރިއުޅެން ފެށުމެއް ނޫނެވެ. އޭގެ ބަދަލުގައި، އެއީ ވޭތުވެދިޔަ ހިތްދަތި ތަޖުރިބާތަކުން ފިލާވަޅު ލިބިގަނެ، ހިތްތަކުގައި އޮތް ބިރުވެރިކަމާއި ފަސްޖެހުންތައް މުޅިން ފޮހެލައި، ފުރިހަމަ އިތުބާރާއި އިޚްލާޞްތެރިކަމުގެ މައްޗަށް ބިނާކުރެވުނު ވަރުގަދަ ބިންގަލެކެވެ.
މަރިޔަމް އެނބުރި ރައްޔާންގެ ގާތަށް ބަދަލުވުމަށް ނިންމި ހިނދު، ދެމަފިރިން ވެސް އެންމެ ފުރަތަމަ އެއްބަސްވި މުހިންމު އެއް ކަމަކީ ކުރިން އުޅުނު އެޕާޓްމަންޓް މުޅިން ދޫކޮށްލުމަށެވެ. އެއީ މާޒީގެ ހިތާމަވެރި ހަނދާންތަކުގެ އެއްވެސް ކުނިބުންޏެއް ނުވަތަ ހިޔަންޏެއް އެމީހުންގެ އައު ދިރިއުޅުމުގެ ތެރެއަށް ފޯރިޔަނުދިނުމުގެ ގޮތުންނެވެ. އެމީހުން ހޯދީ މާލޭގެ ހަމަހިމޭން، ހިތްފަސޭހަ މަގަކުން، ބޮޑެތި ކުޑަދޮރުތަކުން އިރުގެ ރަން އަލި ވަންނަ، ތަނަވަސް އައު ގެއެކެވެ. އެ ގޭގެ ކޮންމެ ކަނެއް ޒީނަތްތެރިކުރުމުގައި ދެމަފިރިން ބައިވެރިވީ އުފާވެރިކަމާއެކުގައެވެ. ސިޓިންގރޫމުގެ ފާރުތަކުގައި މަޑު ފެހި އަދި ކްރީމް ކުލަލުމާއި، ދޮރުފޮތިތައް އެޅުވުމާއި، ގޭތެރޭގައި ތާޒާ ގަސްތައް ބެހެއްޓުމުގައި ރައްޔާން ހަރަކާތްތެރިވީ ވަރުބަލިކަމެއް ނެތިއެވެ. އޭނާގެ މޫނުމަތިން ފެންނަމުން ދިޔައީ މަރިޔަމް އުފަލުގައި ބެހެއްޓުމަށްޓަކައި ހިތުގެ އަޑިން ކުރަމުން ދިޔަ މަސައްކަތުގެ ނަތީޖާއެވެ.
ރައްޔާންގެ ދިރިއުޅުމުގެ ވައްޓަފާޅިއަށް އައި ބަދަލަކީ މަރިޔަމްގެ ހިތް އިންތިހާއަށް ފުރިގެން ދިޔަ ކަމެކެވެ. އޭނާގެ ފޯނާއި، ލެޕްޓޮޕާއި، ދުވަހުގެ ތާވަލު މަރިޔަމަށް އަބަދުވެސް އޮތީ ހާމައަށެވެ. އެއްވެސް ފޮރުވުމެއް ނެތް ސާފު ދިރިއުޅުމެކެވެ. ވަޒީފާ ނިންމާލުމަށްފަހު އޭނާ ސީދާ އަންނަނީ ގެއަށެވެ. ބައެއް ދުވަސްދުވަހު މަރިޔަމް އެންމެ ގަޔާވާ ވައްތަރުގެ މަލެއް ނުވަތަ ފޮނިކާއެއްޗެއް ހިފައިގެންނެވެ. އަދި ބަދިގޭގެ ކަންކަމުގައާއި، ގޭތެރެ ސާފުކުރުމުގައި ރައްޔާން އަބަދުވެސް އުޅުނީ އުފަލާއެކު އެހީތެރިވެދޭށެވެ.
ފަތިސް ނަމާދުގެ ބަންޤީގެ އަޑާއެކު ދެމީހުން އެކުގައި ހޭލައި، ޖަމާޢަތުގައި ނަމާދުކުރުމަށްފަހު، އިރުއަރަންދެން ކީރިތި ޤުރުއާން ކިޔެވުމަކީ އެ ގޭގައި ކޮންމެ ދުވަހަކު ވެސް ހިނގާ އެންމެ ބަރަކާތްތެރި ވަގުތެވެ. އެ އަޅުކަމުގެ ތެރެއިން މަރިޔަމްގެ ހިތުގައި ކުރިން އޮތް ޝައްކާއި ނުތަނަވަސްކަމުގެ ވިލާގަނޑު މުޅިން ކެހިގެން ދިޔައެވެ. ދެހިތުގެ ދެމެދުގައި އޮތް ގުޅުން، ހަމައެކަނި ދުނިޔަވީ ގުޅުމަކުން ފަހަނައަޅައި، އާޚިރަތުގެ ބާއްޖަވެރިކަމަށް އެދޭ މާތް ގުޅުމަކަށް ބަދަލުވިއެވެ.
ދުވަސްތައް ހަފުތާތަކަށް، އަދި ހަފުތާތައް މަސްތަކަށް ބަދަލުވަމުން ގޮސް، އެމީހުންގެ ކައިވެންޏަށް އަހަރެއްހާ ދުވަސް ވޭތުވެގެން ދިޔައީ އަމާންކަމާއި ހިތްހަމަޖެހުމުގައެވެ. ދެ ޢާއިލާގެ މެދުގައި އޮތް ގުޅުން ވެސް އިހުނަށްވުރެ ބަދަހިވެ، ލޯބި އިތުރުވިއެވެ. މަރިޔަމްގެ މަންމަ ފާޠިމަތު އަދި ރައްޔާންގެ މަންމަ ހަލީމާ، ދޭތެރެދޭތެރެއިން އެ ގެއަށް ޒިޔާރަތްކޮށް، ދެކުދިންގެ މޫނުމަތިން ފެންނަ ހިނިތުންވުމާއި ހަމަޖެހުން ދެކެ މާތް ﷲ އަށް ޙަމްދާއި ޝުކުރު ކުރެއެވެ.
އެއްދުވަހެއްގެ އުޑުމަތި ސާފު، ހިތްގައިމު ހެނދުނެކެވެ. މަރިޔަމް ހޮސްޕިޓަލަށް ގޮސް ޑޮކްޓަރަށް ދެއްކުމަށްފަހު ގެއަށް އައީ ކުޑަ ކޮތަޅެއް ހިފައިގެންނެވެ. އޭރު ރައްޔާން އިނީ ސިޓިންގރޫމުގެ ސޯފާގައި އޮފީހުގެ ރިޕޯޓެއް ކިޔާށެވެ. މަރިޔަމް މަޑުމައިތިރި ފިޔަވަޅުތަކެއްގައި އައިސް ރައްޔާންގެ ކުރިމަތީގައި ހުރި ކުޑަ މޭޒު ކައިރީގައި އިށީނެވެ. އޭނާގެ މޫނުމަތިން ފެންނަމުން ދިޔައީ ލަދުވެތި، ނަމަވެސް އިންތިހާއަށް އުފާވެރި ކުލަވަރެކެވެ.
“ރައްޔާން.” މަރިޔަމް މަޑުމަޑުން ގޮވައިލިއެވެ.
ރައްޔާން ފޮތުން ނަޒަރު ވަކިކޮށްލަމުން މަރިޔަމަށް ބަލައިލިއެވެ. “ކިހިނެއްވީ މަރިޔަމް؟ ޑޮކްޓަރު ކީކޭ ބުނީ؟ ހުރިހާ ކަމެއް ރަނގަޅުތަ؟” ރައްޔާންގެ އަޑުގައި ވަގުތުން ކަންބޮޑުވުމުގެ އަސަރު އެކުލެވުނެވެ.
މަރިޔަމް ލުއި ހިނިތުންވުމަކާއެކު، އޭނާގެ އަތުގައި އޮތް ކޮތަޅުން ކުޑަކުޑަ، ރީތި ފޮށްޓެއް ނަގައި ރައްޔާންގެ އަތްމައްޗަށް ދިއްކޮށްލިއެވެ. “މީ ރައްޔާނަށް ޚާއްސަ ހަދިޔާއެއް.”
ރައްޔާން ހައިރާންވެފައި އެ ފޮށްޓަށް ބަލައިލިއެވެ. “ހަދިޔާއެއް؟ މިއަދަކީ އެއްވެސް ޚާއްސަ ދުވަހެއް ނޫނެއްނު؟”
“ހުޅުވާލަބަލަ، އޭރުންނެއްނު އެނގޭނީ.” މަރިޔަމް ބުންޏެވެ.
ރައްޔާން މަޑުމަޑުން އެ ފޮށީގެ މަތި ހުޅުވައިލިއެވެ. އޭގެ ތެރޭގައި އޮތީ ތުއްތު ކުޑަކުއްޖެއްގެ ކުޑަކުޑަ ހުދު އިސްޓާކީނު ޖޯޑަކާއި، ޕޮޒިޓިވް ވެފައިވާ ޕްރެގްނެންސީ ޓެސްޓު ކިޓެކެވެ. އޭގެ އަރިމަތީގައި ކުޑަ ކަރުދާސްކޮޅެއްގައި ލިޔެފައި އޮތެވެ. “ބައްޕާއެވެ! އަޅުގަނޑު އަންނަނީއެވެ.”
ރައްޔާންގެ ދެލޯ ބޮޑުވެ، މުޅި މީހާ ހުއްޓުން އެރިއެވެ. އޭނާގެ ހިއްސުތައް މަޑުޖެހި، ލިޔުމަށާއި އިސްޓާކީނަށް ތަކުރާރުކޮށް ބަލަމުން ދިޔައެވެ. ދެން އޭނާ އިސްއުފުލައި މަރިޔަމްގެ ދެލޮލަށް ބަލައިލިއެވެ. “މަރިޔަމް. މީ.. މީ ހަމަ ތެދެއްތަ؟ އަހަރެމެންނަށް.. އަހަރެމެންނަށް ދަރިއަކު ލިބެނީތަ؟”
މަރިޔަމްގެ ދެލޮލުން އުފަލުގެ ކަރުނަ ފައިބައިގަތެވެ. އޭނާ ބޯޖަހައިލިއެވެ. “ލައްބަ ރައްޔާން. ﷲ ގެ ރަޙްމަތްފުޅުން އަހަރެމެންގެ ދިރިއުޅުމަށް ދަރިއަކު ދެއްވަން މިންވަރުކުރައްވައިފި.”
ރައްޔާން އެ ފޮށި މޭޒުމަތީގައި ބަހައްޓައި، ވަގުތުން ތަޅުންގަނޑުމައްޗަށް ތިރިވެ، ޝުކުރުގެ ސަޖިދައެއް ޖެހިއެވެ. އޭނާ ސަޖިދައިގައި އޮވެ ގިސްލާފައި ރުޔެވެ. އެއީ ކުށްފާފަތަކަށް ތައުބާވެ، ކެތްތެރިކަމާއެކު ހޭދަކުރި ދުވަސްތަކަށްފަހު، ރަޙްމާންވަންތަ ރަސްކަލާނގެ ދެއްވި މަތިވެރި ނިޢުމަތަށްޓަކައި ކުރެވުނު ޝުކުރުގެ ރުއިމެކެވެ. ސަޖިދައިން ތެދުވެ، ރައްޔާން މަރިޔަމްގެ ގައިގައި ނުހަނު ލޯތްބާއެކު ބައްދައިގަތެވެ.
“ޝުކުރިއްޔާ މަރިޔަމް.. ޝުކުރިއްޔާ.” ރައްޔާންގެ އަޑު ބެދެމުން ދިޔައެވެ. “އަހަރެންގެ ދިރިއުޅުން ފުރިހަމަކޮށްދިނީތީ. އަހަރެންގެ ކުށްތަކަށް މަޢާފުކޮށް، އަހަންނަށް މިފަދަ މަތިވެރި އުފަލެއް ހޯދައިދިނީތީ. އަހަރެން މުޅި އުމުރު ހޭދަކުރާނީ މަރިޔަމާއި އަހަރެމެންގެ ދަރިފުޅަށް ޚިދުމަތްކުރުމުގައި.”
އެ ދުވަހަށްފަހު، މަރިޔަމްގެ ބަލިވެއިނުމުގެ ދުވަސްވަރު ވެގެން ދިޔައީ ރައްޔާންގެ ފަރާތުން އިންތިހާއަށް ލޯތްބާއި އަޅާލުން ލިބުނު ދުވަސްތަކަކަށެވެ. މަރިޔަމް ވަރުބަލިވާނެ އެއްވެސް ކަމެއް ގޭތެރޭގައި ކުރިޔަކަ ނުދެއެވެ. ޑޮކްޓަރަށް ދައްކަން ދިއުމާއި، ގަޑިން ގަޑިއަށް ބޭސް ދިނުމާއި، މަރިޔަމް ކާހިތްވާ ކޮންމެ އެއްޗެއް ހޯދައިދިނުމުގައި ރައްޔާން ހުރީ ފަރުވާތެރިކަމާއެކުގައެވެ. ރޭގަނޑު މަރިޔަމްގެ ފައި ދުޅަވެގެން ނުނިދިގެން އުޅޭ ވަގުތުތަކުގައި، ރައްޔާން އިނދެގެން ކުޑަކަކޫމައްޗަށް ތިރިވެ، މަޑުމަޑުން ތެޔޮލައި މަސާޖުކޮށްދެއެވެ. އަދި ބަނޑުގައިވާ ދަރިފުޅަށް އަޑުއިވޭނޭހެން މަޑުމައިތިރި ރާގަކަށް ކީރިތި ޤުރުއާން ކިޔަވައިދިނުމަކީ ރައްޔާން ކޮންމެ ރެއަކު ވެސް ނިދުމުގެ ކުރިން އާދަވެގެން ކުރާ ކަމަކަށް ވިއެވެ.
މަރިޔަމް އެ މަންޒަރުތައް ބަލަން އޮންނައިރު، އޭނާގެ ހިތް އުފަލާއި ޝުކުރުވެރިކަމުން ފުރިގެން ދެއެވެ. ޒަވާޖީ ޙަޔާތުގެ އެންމެ އުނދަގޫ، ހިތްދަތި ދުވަސްތަކުގައި އޭނާ ހިފެހެއްޓި ކެތްތެރިކަމުގެ ފޮނި މޭވާ، މިއަދު އޭނާއަށް ލިބެމުންދާކަން ޔަޤީންވިއެވެ.
ނުވަ މަސް ފުރިހަމަވެ، ވިހަން ހޮސްޕިޓަލުގައި އެޑްމިޓްކުރި ރެއަކީ މުޅި ޢާއިލާގެ ހިތްތައް އަވަސްވެ، ދުޢާތަކުން ޖައްވު ގުގުމައިގެން ދިޔަ ރެއެކެވެ. މަރިޔަމްގެ މަންމަ ފާޠިމަތާއި، ރައްޔާންގެ މަންމަ ހަލީމާ ތިބީ ވިހާ ކޮޓަރީގެ ބޭރުގައި ތަސްބީޙަ ކިޔާށެވެ. ރައްޔާން ހުރީ ދެކޮޅަށް ހިނގާލަ ހިނގާލައެވެ. އޭނާގެ ދެއަތް ވަނީ ބާރަށް މުށްކަވާލެވިފައެވެ. ކޮންމެ ސިކުންތަކު އޭނާގެ ދުލުން ނުކުންނަމުން ދިޔައީ އަނބިމީހާއާއި ދަރިފުޅުގެ ރައްކާތެރިކަމަށް އެދި ކުރެވޭ ދުޢާތަކެވެ.
ވިހާ ކޮޓަރީގެ ދޮރު ހުޅުވި، ޑޮކްޓަރު ނުކުތީ ދަންވަރު ތިނެއް ޖަހަން އުޅެނިކޮށެވެ.
“މަރުޙަބާ ރައްޔާން! ޞިއްޙަތު ރަނގަޅު، ވަރަށް ލޯބި އަންހެން ކުއްޖެއް. މަންމަގެ ޙާލު ވެސް ވަރަށް ރަނގަޅު.” ޑޮކްޓަރު ހިނިތުންވެލަމުން ބުންޏެވެ.
އެ ޚަބަރާއެކު ރައްޔާންގެ ދެލޮލުން އުފަލުގެ ކަރުނަ ފައިބައިގަތެވެ. އޭނާ ވަގުތުން ބިންމައްޗަށް ތިރިވެ ޝުކުރުގެ ސަޖިދައެއް ޖެހިއެވެ. އެއަށްފަހު އޭނާއަށް ކޮޓަރިއަށް ވަނުމުގެ ހުއްދަ ލިބުނެވެ.
ކޮޓަރިއަށް ވަދެވުނު އިރު، މަރިޔަމް އޮތީ ވަރުބަލިކަމުގެ ތެރެއިން ވެސް މައިވަންތަކަމުގެ ނޫރުން ފުރިފައިވާ މޫނަކާއެކު ހިނިތުންވެލައިގެންނެވެ. އޭނާގެ މޭމަތީގައި އޮތީ ހުދު ފޮތިގަނޑެއްގައި އޮޅާލާފައިވާ ކުޑަކުޑަ މަލެއް ފަދަ ތުއްތު ފުރާނައެކެވެ. ރައްޔާން މަޑުމަޑުން ގޮސް އެނދުގެ އަރިމަތީގައި އިށީނދެ، ތުރުތުރުއަޅާ އަތުން ދަރިފުޅު އުރާލިއެވެ.
އެ ތުއްތު ކުއްޖާގެ މަޑުމަޑު ކޯތާފަތާއި، ކުދިކުދި އިނގިލިތައް ފެނުމުން ރައްޔާންގެ މުޅި ހަށިގަނޑުން ހީބިހި ނަގައިގެން ދިޔައެވެ. އޭނާ ތިރިވެ، ދަރިފުޅުގެ ކަނާތު ކަންފަތްދޮށުގައި ވަރަށް އަސަރާއެކު މަޑުމައިތިރިކޮށް ބަންގި ގޮވައިލިއެވެ. އަދި ވައަތު ކަންފަތްދޮށުގައި ޤަމަތް ދިނެވެ. އެއަށްފަހު މަރިޔަމްގެ ނިތްކުރީގައި ލޯތްބާއި ޤަދަރާއެކު ބޮސްދިނެވެ.
“މަރިޔަމް. އަހަރެމެންގެ ދަރިފުޅު.” ރައްޔާންގެ އަޑު ބެދުނެވެ.
“އާނ ރައްޔާން. ﷲ ގެ ރަޙްމަތްޕުޅުގެ ހެކި.” މަރިޔަމް ލޮލުން ފޭބި އުފާވެރިކަމުގެ ކަރުނަތައް ފޮހެލަމުން ބުންޏެވެ. “އަހަރެން ބޭނުންވަނީ ދަރިފުޅަށް އާޔާ ގެ ނަމުން ނަން ކިޔަން.”
“އާޔާ. ވަރަށް ރީތި، ފުރިހަމަ ނަމެއް.” ރައްޔާން އެއްބަސްވިއެވެ.
އަހަރުތަކެއް ފަހެވެ.
މާލޭގެ އުސްފަސްގަނޑު ސަރަޙައްދުގައި، ކަނޑުގެ ފިނި ރޯޅިތައް ޖެހެމުން ދިޔަ ހިތްގައިމު ހަވީރެކެވެ. އުމުރުން ފަސް އަހަރުގެ އާޔާ، ކުދިކުދި ފިޔަވަޅުތަކުގައި ދުވެ، މަޖާކުރަމުން ދިޔައެވެ. އޭނާގެ ހުނުމުގެ އަޑަކީ އެ މާޙައުލުގައި ވީ އެންމެ އުފާވެރި މިއުޒިކެވެ.
މަރިޔަމާއި ރައްޔާން ތިބީ ހިޔާވާ ގަހެއްގެ ދަށުގައި ހުރި ގޮނޑިއެއްގައި، އެކަކު އަނެކަކުގެ އަތުގައި ހިފަހައްޓައިގެންނެވެ.
“މަރިޔަމް.” ރައްޔާން މަރިޔަމްގެ އަތަށް ބާރުކޮށްލަމުން ބުންޏެވެ. “އަހަރެމެން އެންމެ ފުރަތަމަ ދިމާވި ދުވަހު އަހަރެން ބުނީ އަހަރެމެން އަމިއްލައަށް ގޮތް ނިންމަންވާނީއޭ. މިއަދު އަހަރެން ބުނާނީ، އަހަރެންގެ ޙަޔާތުގައި ނިންމުނު އެންމެ ރަނގަޅު ނިންމުމަކީ މަރިޔަމް އިޚްތިޔާރުކުރުމޭ.”
މަރިޔަމް ރައްޔާންގެ ކޮނޑުގައި ލޯތްބާއެކު ބޯއަޅައިލިއެވެ. “ރައްޔާން. ޙަޤީޤީ ލޯތްބަކީ ހަމައެކަނި އުފަލުގައި ތިބުމެއް ނޫން. ލޯތްބަކީ ކޮޅިގަނޑުތަކުގެ ތެރެއިން އެކުގައި ކެތްތެރިވެ، މަޢާފުކޮށް، ﷲ އަށް ވަކީލުކޮށްގެން އައު ދިރުމެއް ހޯދުން.”
އެ ވަގުތު އާޔާ ދުވެފައި އައިސް އެ ދެމަފިރިންގެ އުނގުމައްޗަށް ވެއްޓިގަތެވެ. ރައްޔާން ދަރިފުޅު އުރާލައި މޭގައި ޖައްސައިލިއެވެ. އިރުއޮއްސެމުން ދިޔަ ވަގުތު، އުޑުމަތީގައި ފެތުރިގެން ދިޔަ ރަން ކުލަތަކުގެ ތެރެއިން، ދެހިތެއްގެ ދެމެދުގައި އޮތް ހުރިހާ ބީރައްޓެހިކަމަކާއި ހިތާމަތަކެއް ފޮހެވި، އެ ގުޅުން ޙަޤީޤީ އަމާންކަމުގެ ތެރެއަށް ވާޞިލުވިއެވެ.
ހަމަހިމޭންކަމަށް ލޯބިކުރި އެ އަންހެންކުއްޖާގެ ޙަޔާތް، ތެދުވެރިކަމާއި އިޚްލާޞްތެރި ލޯބީގެ ފުރިހަމަ ގުލްޝަނަކަށް ބަދަލުވެގެން ދިޔައީއެވެ.
(ނުނިމޭ)
