ނޯރާ ފަތޭހީގެ ބޮލީވުޑް ހުވަފެންތައް ހަޤީޤަތަކަށް ހެދުމަށްޓަކައި، އުމުރުން 22 އަހަރުގައި އިންޑިއާއަށް ބަދަލުވި ހަނދާންތައް އާކުރަމުން ބުނީ، “ޖެހިލުންކުޑަވާން ޖެހޭނެ” ކަމަށެވެ.
އެކްޓަރަކަށް އަދި ފަންނާނަކަށް ވުމަށް ކުރި އުންމީދުތަކުގައި، އުމުރުން 22 އަހަރުގައި އިންޑިއާއަށް ދިރިއުޅުން ބަދަލުކުރަން ނިންމި ނިންމުމާ ބެހޭގޮތުން ނޯރާ ފަތޭހީ ދާދިފަހުން ވަނީ ވާހަކަދައްކާފައެވެ. “އަންޓްރިގަރޑް ޕޮޑްކާސްޓް” ގައި ވާހަކަދައްކަމުން ނޯރާ ވަނީ، ބޮލީވުޑާ އޭނާއާ އޮތް ކުރީގެ ގުޅުމާއި، އާ ޤައުމެއްގައި އަލުން ހަޔާތެއް ފެށުމުގައި ކުރިމަތިވި ގޮންޖެހުންތަކާއެކުވެސް އެ ފިޔަވަޅު އެޅުމަށް އޭނާއަށް ހިތްވަރު ލިބުނު ސަބަބުތައް ހިއްސާކޮށްފައެވެ.
ނޯރާ ބުނި ގޮތުގައި އޭނާ ބޮޑުވީ ހިންދީ ފިލްމުތައް ބަލަމުންނެވެ. އަދި ބޮލީވުޑުން މިއުޒިކާއި، ނެށުމާއި، ސިނަމާ އެކުލަވައިލާ ގޮތް އޭނާއަށް ވަރަށް ބޮޑަށް ކަމުދިޔައެވެ. މި ދާއިރާއިން ކުރިއަށް ދިއުމަށް އޭނާގެ ހިތް އެދެމުންދިޔަ ކަމަށްވެސް އޭނާ ފާހަގަކުރިއެވެ.
“ބޮލީވުޑުން މިއުޒިކާއި، ނެށުމާއި، ފިލްމީ މަސައްކަތްތައް އެއްކޮށްލާފައިވާ ގޮތަކީ ވަރަށް ފުރިހަމަ ގޮތެއް. އަހަރެން ބޮޑުވީ ވަރަށް ގިނަ ބޮލީވުޑް ފިލްމުތައް ބަލަމުން. އެކަމަކު އަހަރެންގެ ހިތުގެ ކޮންމެވެސް ކަނެއްގައި އޮތް އިޙުސާސެއް އަހަރެން މިކަމަށް ބާރުއެޅި. އޭގެ ފަހުން ވީގޮތް މިހާރު އެންމެންނަށްވެސް އެނގޭނެ. އަހަރެން ޤަބޫލުކުރާ ގޮތުގައި ކާމިޔާބީއާ ހަމައަށް ދިއުމަށް ޖެހިލުންކުޑަވާން ޖެހޭނެ. އަހަރެން ބޭނުންވީ މަޝްހޫރުވާން، ސިނަމާގެ މަސައްކަތްތައް ކުރަން، އަދި ނެށުމާއި ސިނަމާ އެކުލަވައިލާނެ ގޮތެއް ހޯދަން. އެއީ ހަޤީޤަތުގައި ބޮލީވުޑް.” ނޯރާ ކިޔައިދިނެވެ.
އިންޑިއާއަށް އެނބުރި އައުމަށްފަހު އޭނާ ގެންގުޅުނު އުސޫލުތަކާ ބެހޭގޮތުން ވާހަކަދައްކަމުން ނޯރާ ބުނީ، އޭނާގެ މުޅި ފޯކަސް ބެހެއްޓީ ކެރިއަރު ބިނާކުރުމަށާއި، އޮޑިޝަންތަކަށް ދަމުން ބަސް ދަސްކުރުމަށެވެ. އަދި އޭނާގެ އަމާޒުތަކަށް ވާސިލްވުމަށް މަސައްކަތް ކުރަމުންދިޔައިރު، އަމިއްލަ އަގުތަކާއި އުސޫލުތައް ހިފެހެއްޓުމުގެ މުހިންމުކަން އޭނާ ފާހަގަކުރިއެވެ.
“އަހަރެން އެނބުރި އައީ ތަފާތު ހަކަތައަކާއެކު. އެއީ ކޮންމެފަދަ ގޮތަކުންވެސް ކާމިޔާބު ހޯދުމުގެ އަޒުމެއް. އިޖުތިމާއީ ދިރިއުޅުމެއް، ރަހުމަތްތެރިންނެއް، ނުވަތަ ބޭރަށް ގޮސް އުޅުމެއް ނެތް. ބަސް ދަސްކުރުމާއި، މެދުކެނޑުމެއްނެތި އޮޑިޝަންތަކުގައި ބައިވެރިވުމަކީ ކޮންމެހެން ކުރަންޖެހޭ ކަމެއް. އަދި އެންމެ މުހިންމު ކަމެއްގެ ގޮތުގައި އަހަރެން ދެމެހެއްޓީ އަހަރެންގެ އަގުތަކާއި އުސޫލުތައް. މުޅި މި ދަތުރުގައި އަހަރެންގެ ތެދުވެރިކަމާއި އުސޫލުތައް ހިފެހެއްޓިން. ތިމާގެ ހުވަފެންތަކާއި ޝައުޤުވެރިކަން ހާސިލްކުރަން މަސައްކަތް ކުރޭ، އެކަމަކު އަމިއްލަ އަގުތަކާއި ތެދުވެރިކަން ދޫކޮށްނުލާ.” ނޯރާ ބުންޏެވެ.
މަސައްކަތުގެ ދާއިރާއަށް ބަލާއިރު، ނޯރާ ފަތޭހީ މިހާރު ދަނީ “ދަ ރޯޔަލްސް” ސީޒަން 2 ގެ މަސައްކަތް ކުރަމުންނެވެ. މި ސީރީޒްގައި އޭނާ ފެނިގެންދާނީ އިޝާން ޚައްތަރާއެކުގައެވެ. މީގެ އިތުރުން، މިއަހަރުގެ ތެރޭގައި އޭނާ ވަނީ މިއުޒިކީ އެކި މަޝްރޫއުތަކުގައި ބައިވެރިވެފައެވެ. އޭގެ ތެރޭގައި ފީފާ ވޯލްޑް ކަޕް 2026 އާ ގުޅޭ މަސައްކަތްތައް ހިމެނެއެވެ. އޭނާގެ އެންމެ ފަހުގެ މަސައްކަތްތަކުގެ ތެރޭގައި، ފީފާ ވޯލްޑް ކަޕް 2026 ގެ ރަސްމީ އަލްބަމްގައި ހިމެނޭ “ސަރ ސަރ” ގެ އިތުރުން “ޗެމްޕިއަންސް: ލޮކްޑް އިން” އަދި “ސްލޭ ޓު ދަ ރިދަމް” ހިމެނެއެވެ.
