އިޙުސާސްތަކަށް ބަލައިލުމެއްނެތި ކަންކަމުގައި އަމަލުކުރާ ނުވަތަ ނަފްސާނީ ގޮތުން ފުރިހަމައަށް ތަސައްރަފު ނުފުދޭ މީހުން، ބަހުސްތަކާއި ހާސްކަން ބޮޑު ދަނޑިވަޅުތަކުގައި އާންމުކޮށް ބޭނުންކުރާ 9 ބަހެއް ނުވަތަ ޖުމުލައެއް މިތަނުގައި ބަޔާންކުރެވިފައި އެވަނީއެވެ.
1. “ހަމަޖެހިބަލަ”
ކަމަކާމެދު ވަރަށް ބޮޑަށް ކަންބޮޑުވެގެން ނުވަތަ ޝައުޤުވެރިކަމާއެކު ވާހަކަދައްކަމުން ދަނިކޮށް މީހަކު “ހަމަޖެހިބަލަ” އޭ ބުނުމަކީ އިންތިހާއަށް ރުޅިގަދަވާ ކަމެކެވެ. މިއީ ތިމާގެ އިޙުސާސްތަކަށް އިޙުތިރާމް ކުޑަކޮށް، އެ އިޙުސާސްތަކަކީ ބޭކާރު އެއްޗެއް ކަމުގައި ދެއްކުމަށް ބުނާ ބަހެކެވެ. މީގެ ސަބަބުން މައްސަލަ އިތުރަށް ގޯސްވުން ނޫން ކަމެއް ނުވެއެވެ. ނަފްސާނީ ގޮތުން ހަރުދަނާ މީހުން މިފަދަ ބަސްތައް އަޑުއިވުމުން އެ މީހަކާ އިތުރަށް ބަހުސްކުރުމުގެ ބަދަލުގައި އެ މަޝްވަރާއަކުން ދުރުވެ، އަމިއްލަ ހަމަޖެހުމަށް އިސްކަންދެއެވެ.
2. “އެންމެ ރަނގަޅު” (ނުވަތަ “ވަޓްއެވަރ”)
މިއީ އަނެކާ ދައްކާ ވާހަކައަށް އެއްވެސް ސަމާލުކަމެއް ނެތްކަން ހާމަކޮށްދޭ އެންމެ ފާހަގަކޮށްލެވޭ ބަހެވެ. މީހަކު އޭނާގެ ހިތުގެ ޝުއޫރުތައް ބަޔާންކުރަމުން ދަނިކޮށް މިފަދަ ގޮތަކަށް ޖަވާބު ދިނުމަކީ އެމީހާގެ ވާހަކަ ބަލައިނުގަންނަކަން ހާމަވާ ކަމެކެވެ. ބުއްދިވެރި މީހުންނަށް މިފަދަ ޖަވާބެއް ލިބުމުން، އެތަނުގައި އެކަށީގެންވާ މަޝްވަރާއެއް ނުހިނގާނެކަން ދެނެގަނެ، އެ ވާހަކަ އެ ހިސާބުން ހުއްޓާލައެވެ.
3. “ވާން އޮތް ކަމެއް ވާނީ”
މި ޖުމުލައަކީ ބައެއް ހާލަތްތަކުގައި ބޭނުންކުރުން އެކަށީގެންވާ އެއްޗަކަށް ވިޔަސް، މީހަކު އޭނާގެ އިޙުސާސްތަކާ ބެހޭގޮތުން ވާހަކަދައްކާ ވަގުތެއްގައި ނުވަތަ މާފަށް އެދެންޖެހޭ ހާލަތެއްގައި ބޭނުންކުރުމަކީ ވަރަށް އިހާނެތި ކަމެކެވެ. މިއީ ކުރިމަތިވެފައިވާ މައްސަލައާމެދު އިތުރަށް ވާހަކަދައްކަން ބޭނުންނުވާކަމާއި، އެކަމުގައި އެއްވެސް ޒިންމާއެއް އުފުލަން ބޭނުންނުވާކަން ދައްކައިދޭ ބަހެކެވެ. ބުއްދިވެރި މީހުން މިފަދަ ހާލަތްތަކުގައި ބޭކާރު ވަގުތު ނަގާނުލައި، ނަތީޖާ ޤަބޫލުކޮށް އެކަމުން ދުރުވެއެވެ.
4. “ތިއީ އަދި ކިހިނެއްވީ ކަމެއް! މަށަށް ވީގޮތް އަޑުއަހާބަލަ”
ދިރިއުޅުމުގެ ދަތި ހާލަތެއްގައި އެހީތެރިކަމަށް އެދި މީހަކާ ވާހަކަދެއްކުމުން، ތިމާގެ ވާހަކަ މެދުކަނޑާލައި އެމީހާގެ އަމިއްލަ ހިތާމަތަކުގެ ވާހަކަ ދައްކަން ފެށުމަކީ ނަފްސާނީ ގޮތުން ތަސައްރަފު ނުފުދޭ މީހުންގެ އާދައެކެވެ. މީގެ ސަބަބުން ލަފާ ހޯދަން ދިޔަ މީހާއަށް ޖެހެނީ އަނެކާގެ ޝަކުވާތައް އަޑުއަހައި، އިތުރު ނަފްސާނީ ބުރައެއް އުފުލާށެވެ. ބުއްދިވެރި މީހުންނަށް މިކަން ފާހަގަވުމުން، ވަރަށް އަދަބުވެރިކަމާއެކު އެ ވާހަކަ ނިންމާލައި އެތަނުން ދެއެވެ.
5. “މަ ބުނީމެއްނު ތިހެން ވާނެއޭ”
ކަމެއް ގޯސްކޮށް ދިޔުމުން، ތިމާ ކުރިން ބުނި ބަސް ތެދުވިކަން ސާބިތުކޮށްދޭން އުޅުމަކީ ވަރަށް ދަށު ދަރަޖައިގެ ކަމެކެވެ. މީހަކު ދެރަވެފައިވާ ވަގުތެއްގައި މިފަދަ ބަހެއް ބުނުމުން އެމީހާގެ ހިތާމަ އިތުރުވުން ނޫން ކަމެއް ނުވާނެއެވެ. ބުއްދިވެރި މީހުންނަށް މިފަދަ ރައްދެއް ލިބުމުން، އެވަގުތު އެމީހުންގެ ފަރާތުން އެދެވޭ އެހީތެރިކަމެއް ނުލިބޭނެކަން ދެނެގަނެ، އެ މާހައުލުން ދުރުވެއެވެ.
6. “ކަލޭ އަބަދުވެސް..” އަދި “ކަލޭ ދުވަހަކުވެސް..”
އިންސާނުންނަކީ ތަފާތު މިޒާޖުގެ ބަޔަކަށްވާއިރު، މީހަކު ކުރާ ކަމެއް އެއީ “އަބަދުވެސް” ކުރާ ކަމެއްގެ ގޮތުގައި ނުވަތަ “ދުވަހަކުވެސް” ނުކުރާ ކަމެއްގެ ގޮތުގައި ސިފަކުރުމަކީ ހަޤީޤަތާ ޚިލާފު، އިޙުތިރާމް ކުޑަ ކަމެކެވެ. މިފަދަ ވާހަކަތަކަށް ދިފާއީ ގޮތުން ޖަވާބުދިނުމުގެ ބަދަލުގައި، ހަރުދަނާ މީހުން އިޚްތިޔާރު ކުރަނީ ހަނުހުރުމެވެ. ސަބަބަކީ އެފަދަ ދެކޮޅުނުޖެހޭ ވާހަކަތަކަށް ޖަވާބުދިނުމަކީ ވަގުތު ބޭކާރުކުރުން ކަމަށްވާތީއެވެ.
7. “ކަލޭ ތި ދައްކަނީ ވަރަށް މޮޔަ ވާހަކަ”
ބަހުސްގެ ތެރޭގައި މީހަކަށް “މޮޔަ” އޭ ބުނުމަކީ އެންމެ ބޮޑަށް އަނެކާ ދަށްކޮށްލުމެވެ. މިއީ ރުޅިގަދަވެ، މައްސަލަ ބޮޑުވާން މެދުވެރިވާ ކަމެކެވެ. ބުއްދިވެރި މީހުން މިފަދަ ބޭއަދަބީ ބަސްތަކަށް ކެތެއް ނުކުރާނެއެވެ. ނަމަވެސް އެމީހުން އޭގެ ބަދަލުގައި އެއްޗެހި ކިޔުމުގެ ބަދަލުގައި، އެތަނުން ވަގުތުން ދުރުވެގެން ދަނީއެވެ.
8. “ކޮންމެ ކަމެއްވެސް ވާނީ ރަނގަޅަކަށް”
މިއީ ރަނގަޅު ނިޔަތެއްގައި ބުނާ ބަހެއް ކަމަށް ވިޔަސް، ބޮޑު ހިތާމައެއްގައި އުޅޭ މީހަކަށް މި ބަސް އިވުމުން އިޙުސާސް ކުރެވެނީ އެމީހާގެ ތަދު ބަލައިނުގަންނަ ކަމަށެވެ. ގާތް މީހަކު މަރުވުން ނުވަތަ ވަރިވުން ފަދަ ހާލަތްތަކުގައި މިއީ ބުނަން އެންމެ އެކަށީގެންވާ ބަހެއް ނޫނެވެ. އޭގެ ބަދަލުގައި “ތިކަމާ ވަރަށް ދެރަވެއްޖެ” އޭ ބުނުމަކީ މާ އޯގާތެރި ގޮތެކެވެ.
9. “ކަމުގެ ރަނގަޅު ފަރާތަށް ބަލާބަލަ”
ކަމެއްގެ ބޭރުގައި ހުންނަ މީހަކަށް އެކަމުގެ ރަނގަޅު ފަރާތް ފެނުމަކީ ފަސޭހަ ކަމެކެވެ. ނަމަވެސް އެ މުސީބާތެއްގެ ތެރޭގައި އުޅޭ މީހަކަށް ފެންނާނީ ހަމައެކަނި އަނދިރިކަމެވެ. ހިތާމައިން އަރައިގަންނަން މަސައްކަތްކުރާ ވަގުތެއްގައި، ކޮންމެހެން އުފާވެރިކަމެއް ހޯދަން މަޖުބޫރުކުރުމަކީ އޯގާތެރި ގޮތެއް ނޫނެވެ. އެހެންކަމުން މިފަދަ ބަސްތައް ބޭނުންކުރުމުގައި ސަމާލުވާންޖެހެއެވެ.
