ސްރީލަންކާގައި ހުންނަ އެކި ޤައުމުތަކުގެ އެމްބަސީތަކުގައި މަސައްކަތްކުރާ ޑިޕްލޮމެޓިކް މުވައްޒަފުންގެ މެދުގައި ބޭއްވި “ޑިޕްލޮމެޓިކް ފުޓްސެލް 2026” މުބާރާތް ކާމިޔާބުކަމާއެކު ނިންމާލައިފިއެވެ. ސްރީލަންކާގައި ހުންނަ ދިވެހިންގެ މައި މަރުކަޒު، ސޯސަންވިލާގެ ފުޓްސެލް ދަނޑުގައި އެއްދުވަހުގެ މުއްދަތަށް ކުރިއަށް ގެންދިޔަ މި މުބާރާތުގެ ޗެމްޕިއަންކަން ހޯދާފައިވަނީ ސައުދީ އަރަބިއްޔާގެ ޑިޕްލޮމެޓިކް ޓީމެވެ.
މި މުބާރާތަކީ ދިވެހިރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ސަފީރު އަލްފާޟިލް މަސްޢޫދު ޢިމާދު އިސްނަންގަވައިގެން، އެކި ޤައުމުތަކުގެ އެމްބަސީތަކުގެ މެދުގައި އުފާވެރި މާހައުލެއްގައި ގުޅުން ބަދަހިކޮށް، އެކުވެރިކަން އާލާކުރުމުގެ މަޤްޞަދުގައި ބޭއްވި މުބާރާތެކެވެ. މިއީ މި ސިލްސިލާގެ ދަށުން ބޭއްވުނު ދެވަނަ މުބާރާތެވެ.
މުޅިއެކު 8 ޤައުމަކުން ވާދަކުރި މި މުބާރާތުގައި ބައިވެރިވެފައިވަނީ ދިވެހިރާއްޖެ، ސައުދީ ޢަރަބިއްޔާ، ޖަޕާން، ލީބިޔާ، މެލޭޝިޔާ، ޕާކިސްތާނު، އެމެރިކާ އަދި ފަލަސްތީނެވެ. ވާދަވެރި އަދި އެހާމެ އެކުވެރި މާހައުލެއްގައި ކުރިއަށްދިޔަ މި މުބާރާތުގައި ރާއްޖޭގެ ސަފީރުގެ އިތުރުން އެހެން ޤައުމުތަކުގެ ސަފީރުންވެސް ވަނީ ޢަމަލީގޮތުން ކުޅުއްވައި ބައިވެރިވެވަޑައިގެންފައެވެ. މީގެ އިތުރުން ސްރީލަންކާގެ ޕާލިމެންޓް މެންބަރު އޮނަރަބަލް ރިޒްވީ ޝާހް އަދި ދިވެހިރާއްޖޭގެ ރައްޔިތުންގެ މަޖިލީހުގެ މެންބަރު އޮނަރަބަލް އަޙްމަދު ޒަމީރު ވެސް މި މުބާރާތުގައި ބައިވެރިވެވަޑައިގެންނެވިއެވެ.
ފޯރިގަދަ ކުޅުމަކަށްފަހު މުބާރާތުގެ ފައިނަލްގައި ސައުދީ އަރަބިއްޔާގެ ޓީމާއި ދިވެހިރާއްޖޭގެ ޓީމު ބައްދަލުކުރި މެޗުގެ ފުރިހަމަ ވަގުތު ހަމަވީ ދެ ޓީމު އެއްވަރުވެގެންނެވެ. އެހެންކަމުން ނަތީޖާ ނެރުމަށް ޖެހި ޕެނަލްޓީގައި 4-3 ގެ ނަތީޖާއަކުން ކުރިހޯދައި މުބާރާތުގެ އެއްވަނަ ހޯދީ ސައުދީ އަރަބިއްޔާގެ ޓީމެވެ. މުބާރާތުގެ 3 ވަނަ ހޮވި މެޗުގައި ޖަޕާނާއި ލީބިޔާ ބައްދަލުކޮށް، ދެ ހާފު އެއްވަރުވުމުން ޕެނަލްޓީ ޖަހައިގެން 4-3 އިން ކުރިހޯދައި 3 ވަނަ ހާސިލްކުރީ ޖަޕާނުގެ ޓީމެވެ.
މި މުބާރާތުގެ ޝަރަފްވެރި މެހެމާނަކީ ދިވެހިރާއްޖޭގެ މިނިސްޓަރ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް އަލްފާޟިލް ޢަބްދުﷲ ރާފިޢުއެވެ. މުބާރާތުގެ ވަނަތަކަށް ހޮވުނު ޓީމުތަކަށާއި ކުޅުންތެރިންނަށް ތައްޓާއި، މެޑަލް އަދި ސެޓްފިކެޓް ހަވާލުކޮށްދެއްވީ ރަސްމިއްޔާތުގެ ޚާއްސަ މެހެމާނުންނެވެ. އަދި މުބާރާތް އިންތިޒާމުކުރުމުގައި އެކި ގޮތްގޮތުން އެހީތެރިވި ފަރާތްތަކަށާއި، ރެފްރީންނާއި އޮފިޝަލުންގެ އަގުވަޒަންކޮށް ހަނދާނީ ސެޓްފިކެޓް ދީފައިވެއެވެ.
މުބާރާތުގެ ވަކިވަކި ވަނަތަކަށް ބަލާއިރު:
އެންމެ މޮޅު ކުޅުންތެރިޔާ: މުތައިމް (ސައުދީ އަރަބިއްޔާ، ޖާޒީ ނަންބަރު 13)
އެންމެ މޮޅު ސްކޯރަރ: ޝަހަން (ދިވެހިރާއްޖެ)
އެންމެ މޮޅު ކީޕަރު: ސައުދީ އަރަބިއްޔާގެ ކީޕަރު
ފެއަރ ޕްލޭ ޓީމު: އެމެރިކާގެ ޑިޕްލޮމެޓިކް ޓީމު
