ހޮލީވުޑްގެ މަޝްހޫރު ދެ ތަރިން ކަމަށްވާ ޗާލީ ޝީން އާއި އޭނާގެ ބައްޕަ މާޓިން ޝީން އެކުގައި އާ ކޮމެޑީ ސީރީޒަކުން ފެނުމަށް ތައްޔާރުވެއްޖެއެވެ. “ހެޕީ ޖެކް” ގެ ނަން ދީފައިވާ މި މަލްޓި-ކެމެރާ ކޮމެޑީ ސީރީޒްގެ މައިގަނޑު ރޯލުތަކުން މި ދެ ތަރިން ފެނިގެންދާނެ ކަމަށް ވެރައިޓީން ވަނީ ރިޕޯޓްކޮށްފައެވެ.
މި ސީރީޒްގެ ޕްރޮޑަކްޝަން މަސައްކަތްތައް އަންނަ އަހަރު އެމެރިކާގެ ލޮސް އެންޖެލިސްގައި ފެށުމަށް ހަމަޖެހިފައިވާއިރު، މި ޝޯވ ރިލީޒްކުރުމަށް ތާވަލުކޮށްފައިވަނީ 2027 ވަނަ އަހަރު އޭއެމްސީ ނެޓްވޯކުންނެވެ. އަދި މަޝްހޫރު ސީރީޒް “ފްރެންޑްސް” ވެސް ޝޫޓްކުރި ވޯނާ ބްރަދާސް ސްޓޫޑިއޯގައި، ލައިވް އޯޑިއަންސެއްގެ ކުރިމަތީގައި މި ސީރީޒް ޝޫޓްކުރުމަށް ވަނީ ނިންމާފައެވެ.
މި ސީރީޒްގައި ޗާލީ ޝީން ފެނިގެންދާނީ ދެ އަންހެން ކުދިންގެ ބައްޕައެއް ކަމަށްވާ “ޖެކް” ގެ ރޯލުންނެވެ. އަދި މާޓިން ޝީން ފެންނާނީ ޖެކްގެ ބައްޕަގެ ރޯލުންނެވެ. މި ސީރީޒްގެ ވާހަކަ މައިގަނޑު ގޮތެއްގައި ބިނާވެފައިވަނީ އަމިއްލަ އެދުން އިސްކުރުމާއި، ދަރިންގެ ދިރިއުޅުމުގައި މުހިންމު ދައުރެއް އަދާކުރުމާ ދެމެދު ޖެކް ހޮވަންޖެހޭ ހޮވުންތަކުގެ މައްޗަށެވެ. މި ޕްރޮޖެކްޓްގެ ރައިޓަރުންނާއި، އެގްޒެކެޓިވް ޕްރޮޑިއުސަރުންގެ އިތުރުން ކޯ-ޝޯރަނަރުންނަކީ ޖިމް ޕެޓަސަން އަދި މެޓް ރޮސް އެވެ. މީގެ އިތުރުން، ކުރިއަށް އޮތް އޮކްޓޯބަރު މަހު ބާއްވާ “މިޕްކޮމް” ގައި ބައިނަލްއަޤުވާމީ ގަންނަން ބޭނުންވާ ފަރާތްތަކަށް މި ޝޯވ ދައްކާލުމަށް އޭއެމްސީ ގްލޯބަލް މީޑިއާއިން ވަނީ ހަމަޖައްސާފައެވެ.
މިއީ ބައްޕައާއި ދަރިފުޅު އެކުގައި މަސައްކަތްކުރާ ފުރަތަމަ ފަހަރެއް ނޫނެވެ. މީގެ ކުރިން “ވޯލް ސްޓްރީޓް” އަދި “ނޯ ކޯޑް އޮފް ކޮންޑަކްޓް” ފަދަ ފިލްމުތަކުގައިވެސް އެ ދެމީހުން ވަނީ ބައްޕައާއި ދަރިފުޅުގެ ރޯލު ކުޅެފައެވެ. މީގެ އިތުރުން މާޓިން ޑައިރެކްޓްކުރި “ކެޑެންސް” އާއި “ފްރީ މަނީ” އަދި “ހޮޓް ޝޮޓްސް ޕާޓް ދޫ” އިންވެސް މި ދެ ތަރިން އެކުގައި ފެނިފައިވެއެވެ.
ޗާލީ ޝީން އަކީ “ޓޫ އެންޑް އަ ހާފް މެން”، “ސްޕިން ސިޓީ”، “ބުކީ” އަދި “ޕްލެޓޫން” ފަދަ މަޤުބޫލު އުފެއްދުންތަކުން ގިނަ ބައެއްގެ މަޤުބޫލުކަން ހޯދާފައިވާ ތަރިއެކެވެ. އޭނާގެ ބައްޕަ މާޓިން ޝީންއަކީ އެމީ އެވޯޑަށް 10 ފަހަރު ނޮމިނޭޓްވެފައިވާ، އަދި “އެޕޮކަލިޕްސް ނައު”، “ގާންދީ”، “ދަ ޑިޕާޓެޑް” އަދި “ދަ އެމެރިކަން ޕްރެޒިޑެންޓް” ފަދަ މަޝްހޫރު ފިލްމުތަކުގައި ކުޅަދާނަ ހުނަރުތަކެއް ދައްކުވައިދީފައިވާ ތަޖުރިބާކާރު އެކްޓަރެކެވެ.
