ފިންލެންޑުގެ ޔުނިވަރސިޓީ އޮފް ޖީވަސްކީލާގެ ފެކަލްޓީ އޮފް ސްޕޯޓް އެންޑް ހެލްތު ސައިންސަސްގެ ދިރާސާވެރިން ހާމަކުރި ގޮތުގައި، އިންސާނާގެ ބަޔޮލޮޖިކަލް އުމުރު (ހަށިގަނޑުގެ ގުނަވަންތަކުގެ ދުވެލި) މުސްކުޅިވުން ޒުވާން އުމުރުގެ ކުރީކޮޅުގައި ފެށިދާނެއެވެ. ދިރިއުޅުމުގެ އާދަކާދަތަކުގެ އިތުރުން، ތިމާވެށީގެ އެކި ނުފޫޒުތަކާއި ދިރިއުޅޭ މާހައުލަކީވެސް މިކަމަށް މަގުފަހިކުރާ ކަންކަމެވެ. މި ދިރާސާއިން ދެއްކި ގޮތުގައި، އުމުރުން 22 އަހަރުގައި ހުންނަ ބަޔޮލޮޖިކަލް އުމުރުގެ ތަފާތުތަކުގެ ތެރެއިން ގާތްގަނޑަކަށް 28 އިންސައްތަ ހިއްސާކުރަނީ ކުޑައިރުގައާއި ފުރާވަރުގައި ދިރިއުޅުނު މާހައުލާއި ގެންގުޅުނު އާދަކާދަތަކެވެ.
އަހަރެމެންގެ ހަށިގަނޑު މުސްކުޅިވާ ދުވެލި ކަނޑައެޅެނީ ވިރާސީ ސިފަތަކާއި، ދިރިއުޅުމުގެ ވައްޓަފާޅިއާއި، ތިމާވެށީގެ ސަބަބުންނެވެ. ބަޔޮލޮޖިކަލް އުމުރު މުސްކުޅިވާން ފަށަނީ އުފަންވުމުގެވެސް ކުރިންނެވެ. އަދި ބައެއް ފަހަރު އިންސާނާގެ އަސްލު އުމުރަށްވުރެ ހަށިގަނޑުގެ އުމުރު މާ އަވަހަށް ނުވަތަ ލަހުން މުސްކުޅިވެދާނެއެވެ. ބަޔޮލޮޖިކަލް އުމުރު އަވަހަށް މުސްކުޅިވުމަކީ އުމުރުން ދުވަސްވުމުން ކުރިމަތިވާ ބަލިތައް މާ ކުރިން ޖެހުމުގެ ފުރުސަތު ބޮޑުވާ ކަމެކެވެ.
މި ދިރާސާގައި މެޝިން ލާނިންގ މޮޑެލްތައް ބޭނުންކޮށްގެން، ދިރިއުޅުމުގެ އާދަކާދަތަކާއި ތިމާވެށީގެ 186 ކަމެއް (އެކްސްޕޯސޯމް) ޒުވާން އުމުރުގެ ބަޔޮލޮޖިކަލް އުމުރަށް ކުރާ އަސަރު ބަލާފައިވެއެވެ. އޭގެ ތެރޭގައި ދިރިއުޅުމުގެ އާދަތަކާއި، ވަށައިގެންވާ ފެހިކަމާއި، ވައިގެ ތަޣައްޔަރުކަމާއި، އަދި ދިރިއުޅޭ ސަރަހައްދުގެ އިޖުތިމާއީ އަދި އިޤުތިސާދީ ހާލަތްތައް ހިމެނެއެވެ.
ބަޔޮލޮޖިކަލް އުމުރު ކަނޑައެޅެނީ ހަމައެކަނި އަމިއްލަ އިޚްތިޔާރުގެ މައްޗަކަށް ނޫން
ދުންފަތުގެ އިސްތިއުމާލުކުރުމާއި، ބަނގުރާ ބުއިމާއި، އަދި ޒުވާން އުމުރުގައި ވަޒީފާއެއް ނެތި ހުރުމަކީ ބަޔޮލޮޖިކަލް އުމުރު އަވަހަށް މުސްކުޅިވުމާ ގުޅުންހުރި ކަންކަމެވެ. އޭގެ އިދިކޮޅަށް، ގިނައިން ގަސްގަހާގެހި ހުންނަ ސަރަހައްދުތަކުގައި އުޅުމަކީ މުސްކުޅިވުން ލަސްކޮށްދޭ ކަމެއްގެ ގޮތުގައި ފާހަގަކުރެވުނެވެ.
މި ހޯދުންތަކުން އެނގޭ ގޮތުގައި ދިރިއުޅޭ މާހައުލާއި އިޖުތިމާއީ ހާލަތަކީ ކުޑައިރުއްސުރެ އިންސާނާގެ ބަޔޮލޮޖިކަލް އުމުރަށް ބޮޑެތި އަސަރުތަކެއް ކުރާ ކަންކަމެވެ.
“އަހަރެމެންގެ ދިރާސާއިން ދައްކަނީ ބަޔޮލޮޖިކަލް އުމުރު ކަނޑައެޅެނީ ހަމައެކަނި ފަރުދުން އަމިއްލައަށް ނިންމާ ނިންމުންތަކަކުން ނޫންކަން. ތިމާވެށީގެ ގިނަ ކަންކަމަކީ ނިޒާމީ ކަންތައްތަކެއް. އެއީ ފަރުދަކު އަމިއްލައަށް ބަދަލުކުރެވޭނެ ކަންކަމެއް ނޫން. އެކަމަކު މުޖުތަމައަށް އެކަންކަން ބަދަލުކުރެވިދާނެ.” ދިރާސާގައި ބައިވެރިވި އެނިކާ އޮޕަބެކް ވިދާޅުވިއެވެ.
އޭނާ އިތުރަށް ވިދާޅުވީ، މިކަމުގެ ސަބަބުން ސިއްޙީ މައްސަލަތައް ދާއިމީވުމުގެ ކުރިން، ކުރީބައިގައި ފިޔަވަޅު އަޅައިގެން ދިގުމުއްދަތުގެ ސިއްޙީ ހާލަތު ރަނގަޅުކުރުމުގެ ފުރުސަތު ލިބިގެންދާނެ ކަމަށެވެ.
ނުވިސްނޭ ކަމެއްގެ ގޮތުގައި ފާހަގަކުރެވުނީ، ބައެއް ފަހަރު ބޮޑެތި ފެހި ސަރަހައްދުތަކުގައި އުޅުމަކީ ބަޔޮލޮޖިކަލް އުމުރު އަވަސްވާ ކަމެއްގެ ގޮތުގައި ދެއްކުމެވެ. ދިރާސާވެރިން ޤަބޫލުކުރާ ގޮތުގައި މިއީ އަވަށާއި ސިޓީގެ ދިރިއުޅުމުގެ ފެންވަރާއި އާދަކާދަތަކުގެ ތަފާތުން ދިމާވާ ކަމެކެވެ.
ދިރާސާއާ ބެހޭ ގޮތުން:
މި ދިރާސާއަކީ “ފިންޓްވިން 12” ގެ ތަފާސްހިސާބުތަކުގެ މައްޗަށް ބިނާކޮށް ހަދާފައިވާ ދިރާސާއެކެވެ. މީގައި 847 މީހެއްގެ އުމުރުން 12، 14، 17 އަދި 22 އަހަރުގައި މަޢުލޫމާތު އެއްކޮށް، ދިރިއުޅުމުގެ އާދަކާދަތަކާއި، ފެހި މާހައުލާއި، ވައިގެ ތަޣައްޔަރުކަން ފަދަ 186 ކަމެއް ދިރާސާކޮށްފައިވެއެވެ.
މިއީ އެނިކާ އޮޕަބެކްގެ ޕީ.އެޗް.ޑީ ތީސީސްގެ ދަށުން ޝާއިއުކުރި ފުރަތަމަ މަޒުމޫނެވެ. މި ދިރާސާ ވަނީ މަޝްހޫރު “އެންވަޔަރޮންމެންޓް އިންޓާނޭޝަނަލް” ޖާނަލްގައި ޝާއިއުކޮށްފައެވެ. މި މަސައްކަތަކީ ފިންލެންޑުގެ އެކި ޔުނިވަރސިޓީތަކާއި ސިއްޙީ އިދާރާތައް ގުޅިގެން ކޮށްފައިވާ ބޮޑު މަސައްކަތެކެވެ.
މި ދިރާސާ ވަނީ ބައިނަލްއަޤުވާމީ އެކި ސަމިޓްތަކުގައި ހުށަހަޅާފައެވެ. އަދި އެނިކާ އޮޕަބެކް ވަނީ ބޯޑޯގައި ބޭއްވި ސަމިޓެއްގައި ޒުވާން ދިރާސާވެރިންގެ މުބާރާތުން 3 ވަނަ ހޯދާފައެވެ. މި ދިރާސާއަށް އެހީތެރިކަން ފޯރުކޮށްދީފައިވަނީ ފިންލެންޑުގެ އެކި ފައުންޑޭޝަންތަކާއި، ރިސާޗް ކައުންސިލް އަދި ޔޫރަޕްގެ އިއްތިހާދުގެ އެކި ޕްރޮގްރާމްތަކުންނެވެ.
