ކިޔައިދިނީ: އިބްރާހީމް (40 އަހަރު) – މިޞްރު

އަހަރެންގެ އުމުރުން 13 އަހަރުގައި ފޮތް ކިޔުމަށް، ޚާއްޞަކޮށް ޖިންނި ޝައިޠާނުންގެ ކަންކަމާ ގުޅޭ ފޮތްތައް ކިޔުމަށް ވަރަށް ބޮޑު ޝައުޤުވެރިކަމެއް އުފެދުނެވެ. އެހެންވެ، ސިހުރާއި އެސްފީނާއާ ގުޅޭ ތަފާތު ފޮތްތައް އަހަރެން ގަތީމެވެ. އޭގެ ތެރޭގައި “”الجواهر اللماعة في إستحضار ملوك الجن في الوقت والساعة” (ތަފާތު ވަގުތުތަކުގައި ޖިންނީންގެ ރަސްކަލުން ޙާޟިރުކުރުމުގެ މުތީތައް) އަދި “شمس المعارف الكبرى” (ބޮޑު މަޢުރިފާގެ އިރު) ނަމަކަށް ކިޔާ ފޮތް ހިމެނެއެވެ. އަހަރެންނާއި އަހަރެންގެ ޢާއިލާއަށް ޢަޖާއިބުކުރުވަނިވި ކަންތައްތަކެއް ދިމާވާން ފެށުމާ ހަމައަށް، އަހަރެން ދިޔައީ ސިހުރުވެރިންގެ އުކުޅުތައް ވަރަށް ބާރަށް ދަސްކުރަމުންނެވެ.

އާދަޔާޚިލާފު ކުޅަދާނަކަމެއް ލިބުން
އެ ފޮތްތަކުގައި އެކި ވައްތަރުގެ ކުރެހުންތަކާއި، ރޫޙާނީ ނިޝާންތައް ކުރަހާނެ ގޮތްތައް ބަޔާންކޮށްފައިވެއެވެ. އަދި އޭގައި “ޝަޤްމޫޝް” ފަދަ ޖިންނީންގެ ނަންތައް ޛިކުރުކޮށްފައިވެއެވެ. އަދިވެސް އަހަރެންގެ ހަނދާނުގައި ހަރުލާފައިވާ ހަމައެކަނި ނަމަކީ އެއީއެވެ؛ އޭގެ ސަބަބެއް އަހަރެންނަކަށް ނޭނގެއެވެ. މީގެއިތުރުން، ސޫރަތުލް ޔާސީންގެ ބައެއް އާޔަތްތަކާއި ޤުރްއާނުގެ އެހެނިހެން އާޔަތްތައްވެސް އެ ފޮތްތަކުގައި ހިމެނިފައިވެއެވެ.

– ތެދަށް ބުނާނަމަ، އަހަރެން އެ ފޮތްތައް ކިޔަމުން ދިޔައީ އާދަޔާޚިލާފު ފޯރިއަކާއި ޝައުޤުވެރިކަމަކާއެކުގައެވެ. އެދުވަހުން ފެށިގެން ނާމާން ކަންތައްތައް ހިނގަން ފެށިއެވެ. އަހަރެންގެ ހަނދާންގަދަވެ، ކޮންމެ އެއްޗެއްވެސް ދެފަހަރަކު ކިޔާލުމުން ހިތުދަސްވާ ގޮތްވިއެވެ. އަދި ފޮތްތައް ކިޔައި ނިމުނުފަހުން، ޚާއްޞަކޮށް ޝައިޠާނީ ޢަހުދުނާމާ ކިޔުމަށްފަހު، ހަނދާންބެހެއްޓުމުގެ ބާރު އިންތިހާއަށް ވަރުގަދަވެގެން ދިޔައެވެ. ކީރިތި ޤުރްއާން ފިޔަވައި އެހެން ކޮންމެ އެއްޗެއް އެންމެ ފަހަރަކު ކިޔާލުމުންވެސް ހަނދާނުގައި ހުންނަ ގޮތްވިއެވެ. ނަމަވެސް ޤުރްއާނުން ދަސްކުރާ ކޮންމެ އެއްޗެއް ވިއްޔާ، ޖެހިގެން އަންނަ ދުވަހު މުޅިން ހަނދާންނެތެއެވެ.

– އަހަރެން ޤަޞްދުގައި ބޮޑު ސިހުރެއް ހަދާކަށް ނޫޅެމެވެ. އެހެންނަމަވެސް، އެދުވަހުން ފެށިގެން އަހަރެންނަށް އުނދަގޫކުރާ ކޮންމެ މީހަކަށް ދެރައެއް ލިބުމަށް ހިތުން އެދެފިނަމަ، ވަގުތުން އެކަން އެމީހަކަށް މެދުވެރިވެއެވެ. މިއީ ވަރަށް ގިނަ މީހުންގެ ކިބައިން އަހަރެންނަށް ތަޖުރިބާކުރެވުނު ކަމެކެވެ.

– ފޮތްތައް ކިޔަމުން ދިޔަ ދުވަސްވަރު، އެކަމަށް ހިތްވަރުދީ އަހަރެންގެ ކޮނޑުގައި މީހަކު އަތްބާއްވާލައިގެން ހުންނަ ކަހަލަ އިޙްސާސެއް ކުރެވެއެވެ. އަދި ބައެއް ފަހަރު ޖިންނީން، ޚާއްޞަކޮށް މާރިދުން (ނުކިޔަމަންތެރި ބާރުގަދަ ޖިންނީން) ކިޔަމަންކުރުމާ ބެހޭ ބައިތައް ކިޔަމުންދާއިރު، މަންމަ އެއްބަސްނުވާ ކަމަކަށް ހުއްދައަށް އެދެފިނަމަ، އެއްވެސް ދެކޮޅުހެދުމެއް ނެތި މަންމަ އެއްބަސްވާތަން ފެނެއެވެ. މަންމައާ ސުވާލުކުރުމުން ބުނަނީ: “އަހަރެންނަކަށް ނޭނގެ… އަހަރެން އެއްވެސް އެއްޗެއް ދެކޭކަށް އަދި ވަހެއް ދުވާކަށްވެސް ބޭނުމެއް ނޫން” މިހެންނެވެ. ސަބަބަކީ އަހަރެން ބޭނުންކުރީ ޖިންނީން ސީދާ ޙާޟިރުނުކޮށް ކުރާ އާދައިގެ ކަންކަމެވެ.

ޖިންނި ރާނީއެއްގެ މިލްކަކަށްވުން!
ދުވަސްވީވަރަކަށް ކަންކަން ދިޔައީ ގޯސްވަމުންނެވެ. އަހަރެންނަށް ބިރުވެރި ހުވަފެންތައް ފެންނަން ފެށިއެވެ. ހުވަފެނުގައި ކުއްތާއާއި، ނަގުލަންދާއްޓާ އަދި ހަރުފަ ފަދަ ޖަނަވާރުތައް ވާހަކަދައްކަނިކޮށް ފެނެއެވެ. އެ ސޫފިތައް ބުނެއެވެ: “ތިޔައީ އަހަރެމެންގެ މިލްކެކެވެ. ތިބާ ބޭނުންވިޔަސް ނުވިޔަސް އަހަރެމެންގެ ކިބައިން ސަލާމަތްވާކަށް އެކަކަށްވެސް އެހީއެއް ނުވެވޭނެއެވެ. އަހަރެމެންގެ ރާނީ ވެގެންދާނީ ތިބާގެ އަނބިމީހާއަށެވެ.” އަހަރެން އެ ސޫފިތަކާ ވާހަކަދައްކަން އިންކާރުކުރުމުން ނުވަތަ އެއްޗެހި ގޮވުމުން (އަހަރެންނަކީ އަވަހަށް ރުޅިއަންނަ މީހަކަށްވާތީ)، ކުއްލިއަކަށް ގޭތެރޭގައި ހުންނަ ބައެއް ސާމާނުތަކުގައި އަލިފާން ރޯވެ އަނދައެވެ. ނުވަތަ އެ އެއްޗެހި ބިރުވެރި، ފެހިކުލައިގެ ހެދުމުގައި ތޫނު ހަތިޔާރު ހިފައިގެން އަހަރެން ބިރުގަންނަވަން އަންނަތަން ފެނެއެވެ. އަހަރެންގެ މައިންބަފައިންގެ ކަންފަތަށްވެސް، އެމީހުންގެ ހުރި ހަމައެކަނި ފިރިހެން ދަރިއަކީ ޖިންނީންގެ މިލްކެއް ކަމަށާއި، އޭގައި އެމީހުންނަށް ކުރެވޭނެ އެއްވެސް ކަމެއް ނޯންނާނެކަމަށް ބުނާ އަޑުތައް އިވެމުން ދިޔައެވެ.

އުނދަގޫތަކާއި ޖިންނި އަންހެންކުއްޖާ
އަހަރެންގެ އުމުރުން 16 އަހަރުގައި މައްސަލަތައް އިތުރަށް ބޮޑުވިއެވެ. އަހަރެންނަށް މީހަކު ފާރަލަމުންދާކަމުގެ އިޙްސާސް ކުރެވި، ހޭލައި ހުންނައިރުގައްޔާއި ނިދާފައި އޮންނައިރުވެސް އަހަރެންގެ ޢައުރައިގައި މީހަކު އަތްލާކަމުގެ އިޙްސާސް ކުރެވެން ފެށިއެވެ. އަހަރެންގެ ޠަބީޢަތުގައި ހުންނަ ލަދުވެތިކަމެއްގެ ބޮޑުކަމުން އެކަމާ އިންތިހާއަށް ބިރުގަތެވެ. އެހެންވެ، އަހަރެން ފެންވަރާއިރުވެސް ހެދުން ލައިގެން ފެންވަރަން މަސައްކަތް ކުރީމެވެ. ސަބަބަކީ އެމީހުން އަހަރެންގެ ގައިގައި އަތްލަނީ ފާޚާނާގައި ހެދުން ނެތި ހުންނައިރު ނުވަތަ ނިދާފައި އޮންނައިރު ކަމަށްވާތީއެވެ. އަދި ބުނެލަން ބޭނުމެވެ؛ އަހަރެން އަމިއްލައަށް އެއްވެސް ނުރަނގަޅު ޢަމަލެއް ނުކުރި ނަމަވެސް، ނިދިން ހޭލެވޭއިރު އޮންނަނީ މުޅި ހަށިގަނޑު ވަރުބަލިވެ ހަކަތަ ހުސްވެފައެވެ.

– ޖިންނީންނަކީ އެނގޭ ފަދައިން ކޮންމެ ސިފައެއްގައިވެސް ފާޅުވެވިދާނެ ބައެކެވެ. އެ ޖިންނި ކުއްޖާ އަހަރެންގެ ގާތަށް އަންނަނީ ދުނިޔޭގެ ރީތީގެ ރާނީންނަށްވުރެވެސް މާ ރީތި، އިންސާނެއްގެ ސިފައިގައެވެ. އެއީ ރަންކުރެހުން އެޅި ފުރިހަމަ ހެދުންތައް ލައިގެން ހުންނަ ކުއްޖެކެވެ. އޭނާއަކީ ރާނީއެއްކަން އަހަރެންނަށް އެނގުނީ އޭނާގެ ހުރި ޝާހީ ރީތިކަމުންނާއި، އަހަރެން ބިރުގަންނަވައި އަނިޔާކުރަމުން ދިޔަ އޭނާގެ ޚާދިމުންވެސް އޭނާއަށް “އޭ ރާނީއެވެ!” މިފަދައިން މުޚާޠަބުކުރާތީއެވެ. އަހަރެންގެ މާމައަށް އޭނާގެ ވާހަކަ ކިޔައިދިނުމުގެ ކުރިން، އޭނާގެ ބައްޕަ އަހަރެންގެ ގާތަށް އައިސް ބުންޏެވެ؛ އޭނާއަކީ ރަސްކަލެއް ކަމަށާއި، އޭނާގެ ދަރިފުޅަކީ ރާނީއެއް ކަމަށެވެ. އަދި އޭނާގެ ދަރިފުޅު އަހަރެން ދެކެ ލޯބިވާތީ އަހަރެންނާ ކައިވެނިކުރަން ބޭނުންވާ ކަމަށެވެ. އެ ޖިންނި ކުއްޖާ ދުވަހަކުވެސް ނިވާކަމެއް ނެތި އަހަރެންގެ ކުރިމައްޗަކަށް ނާދެއެވެ. ނަމަވެސް އަހަރެން ހެދުން ނެތި ހުރުމަށް އޭނާ އެދެއެވެ. އެކަމަކު އަހަރެން އަބަދުވެސް އެކަމާ ދެކޮޅުހަދަމެވެ. އަދި އަހަރެންގެ ނުރުހުމާއި ދެކޮޅުހެދުން ފެނުމުން، އޭނާ ބިރުވެރި، ލޭގެ ސިފައަކަށް ބަދަލުވެ، ވީދިފައިވާ ހެދުމުގައި ފެންނަން ފަށައެވެ.

– އޭނާގެ އަސްލު ނަމެއް އަހަރެން ގާތަކު ނުބުނެއެވެ. އެހެންނަމަވެސް އޭނާއަކީ ޖިންނީންގެ ދުނިޔޭގެ ވަރަށް ބާރުގަދަ ޤަބީލާއެއް ކަމަށްވާ “ޣާނާ” ޤަބީލާގެ ކުއްޖެއް ކަމަށް ބުންޏެވެ. އަދި އަހަރެން ހިތްހަމަޖެހޭ ނަމެއް ކިޔުމަށް ބުނުމުން، އަހަރެން އޭނާއަށް “ރަޟްވާ” ގެ ނަމުން ނަންދިނީމެވެ. އޭގެ ފަހުން އަހަރެން އޭނާއަށް ގޮވަނީ އެ ނަމުންނެވެ. އޭނާގެ ޚާދިމުންނަކީ ވަރަށް ވަރުގަދަ ހަށިގަނޑެއް ލިބިފައިވާ ކަޅު ބައެކެވެ.

– ތެދަށް ބުނާނަމަ، ބައެއް ފަހަރު އަހަރެންގެ ހިތްވެސް އޭނާއަށް ލެނބޭ ގޮތްވިއެވެ. އެހެންނަމަވެސް އަހަރެން އަބަދުވެސް މަސައްކަތްކުރީ އޭނާއާ ދުރުގައި ހުރުމަށެވެ. ސަބަބަކީ އޭނާ ޤަޞްދުގައި އަހަރެން މަގުފުރައްދަން މަސައްކަތްކުރާތީއެވެ. އޭނާ އަހަރެންނާއެކު ގުޅުން ހިންގުމަށް ވަރަށް ބޮޑަށް އެދެމުން ދިޔައެވެ. އަދި އަހަރެންގެ އުމުރުން 15 އަހަރުގައި، އެބަހީ މި ހާދިސާތައް ފެށުނުތާ ދެއަހަރު ފަހުން، އަހަރެންގެ ޣާފިލުކަމުގެ ތެރޭގައި ދެފަހަރަކު އޭނާއާއެކު ގުޅުން ހިންގުނެވެ. ނަމަވެސް ފަހުން އަހަރެންނަށް ވިސްނުނީ މިއީ ޙަރާމް ކަމެއް ކަމާއި، ޖިންނީން ކިޔަމަންކުރުމަކީ ކުފުރެއް ކަމެވެ. އެކަން އެނގުނީ، ފިލާވަޅު ދަސްކުރުމުގެ ބަދަލުގައި އިމްތިޙާނުގެ ޖަވާބުތައް އަހަރެންގެ ކަންފަތްދޮށުގައި ކިޔައިދިނުމަށް އޭނާގެ ކިބައިން އެދެވުނު ހިސާބުންނެވެ. ޢަރަބި ބަހުގެ އިމްތިޙާނުގައި އަހަރެންނަކީ އެ މާއްދާއަށް ވަރަށް ދަށް ކުއްޖަކަށްވާތީ އެކަން ކުރަން މަޖުބޫރުވީއެވެ. މުޅި އަހަރު ދުވަހު ކިޔެވުމަށް ސަމާލުކަން ނުދީ ކުޅިވަރުގައި އުޅުނު ނަމަވެސް، އިމްތިޙާނު ހޯލުގައި އޭނާ އަހަރެންނަށް ރަނގަޅު ޖަވާބުތައް ސިއްރުން ބުނެދިނެވެ. އަދި އިމްތިޙާނު ބަލަހައްޓަން ތިބި މީހުންނަށް މިއިން އެއްވެސް ކަމެއް ރޭކާވެސް ނުލައެވެ. އަހަރެން އެދުމަކާ ނުލައިވެސް، އޭނާ އިމްތިޙާނު ކަރުދާސް ކިޔައި އަހަރެންގެ ކަންފަތްދޮށުގައި ޖަވާބުތައް ކިޔައިދެއެވެ. ނުވަތަ ބައެއް ފަހަރު، ޚާއްޞަކޮށް އިސްލާމީ ތަޢުލީމުގެ އިމްތިޙާނުތަކުގައި، އިމްތިޙާނުގެ ހަފުތާއެއް ކުރިން ސުވާލުތަކާއި ޖަވާބުތައް އަހަރެންނަށް ގެނެސްދެއެވެ. އޭރު މިއީ ކިހާވަރެއްގެ ފާފައެއްކަމާއި އޭނާގެ ކިބައިން ސަލާމަތްވާންޖެހޭކަމެއް އަހަރެންނަކަށް ރަނގަޅަކަށް ނޭނގެއެވެ. ފަހުން އޭނާގެ ބަދަލުހިފުން ވަރުގަދަވެ، އަހަރެންނަށް ފިލާވަޅު ދަސްނުކުރެވޭ ގޮތް ހެދިއެވެ. އޭނާގެ މަޤްޞަދަކީ އަހަރެން ފެއިލްކޮށްލައި، އަބަދުމެ އޭނާގެ އެހީތެރިކަމަށް ބޭނުންވާ މީހަކަށް އަހަރެން ހެދުމެވެ. އަދި ކުރިން ވީ ވަޢުދާ އެއްގޮތަށް އަބަދުވެސް ޖަވާބުތައް ދޭނެކަމަށް ބުންޏެވެ. ނަމަވެސް އަހަރެން ހުރީ އޭނާގެ ކިބައިން މިންޖުވާން ވަރުގަދަ ޢަޒުމެއް ކަނޑައަޅައިގެންނެވެ. އެހެންކަމުން، ސާނަވީ ތަޢުލީމުގެ ފަހު މަރުޙަލާގައި އަހަރެން މާމައަށް މި ހުރިހާ ވާހަކައެއް ކިޔައިދިނީމެވެ.

500 ފިރިހެނުން އަޅުވެތިކުރި ސިހުރުވެރިޔާ!
އަހަރެންގެ މާމައަކީ ދުވަސްވީ، އޯގާތެރި މީހެކެވެ. އެހެންވެ މާމަ އަހަރެން ގޮވައިގެން ދިޔައީ “ޝައިޚު” ގެ ނަމުން މަޝްހޫރުވެފައިވާ މީހެއްގެ ގާތަށެވެ. އެކަމަކު އޭނާއަކީ އަސްލު ޖިންނި ގެންގުޅޭ ސިހުރުވެރިއެކެވެ. އަހަރެމެން އެތަނަށް ދިއުމުން، އެ ސިހުރުވެރިޔާ އަހަރެން އެތެރެއަށް ގެންދިޔައެވެ. ނަމަވެސް، އަހަރެންނާއި މާމައާ ބެހޭ ޒާތީ މަޢުލޫމާތުތަކެއް އޭނާ ކިޔައިދޭން ފެށުމުން، މާމަ އޭނާއާމެދު ޝައްކުކުރަން ފެށިއެވެ. އަހަރެން ވަރަށް މަޑުމައިތިރިކަމާއެކު އޭނާ ގާތު ބުނީމެވެ: “އަހަރެންގެ އެކުވެރިޔާއަކީ ސިހުރުވެރިއެކެވެ…” އެއާއެކު ސިހުރުވެރިޔާ ވަރަށް ބޮޑަށް ޙައިރާންވެ، ތަވީދުތަކާއި ނަންތައް ކިޔައި، ދުންއަޅުވައި ސިހުރުގެ ކަންކަން ކުރަން ފެށިއެވެ. ކުއްލިއަކަށް އޭނާ ނުރުހުންވެ، ބިރުވެރިކަމާއެކު އަހަރެން ގާތު ބުންޏެވެ: “ނުވާނެ! ތިޔައީ އާދައިގެ ފިރިހެން ކުއްޖެއް ނޫން. ތިޔައީ ކުޅަދާނަ ސިހުރުވެރިއެއް! އެބަހީ 500 އަށްވުރެ ގިނަ ޖިންނީން ޚިދުމަތުގައި ގެންގުޅުމުގެ ކުޅަދާނަކަން ލިބިފައިވާ މީހެއް!” އަދި އޭނާ ބުނާ ގޮތުގައި އެއީ ވަރަށް ބާރުގަދަ އިފްރީތުންތަކެކެވެ. އެހެންވެ އަހަރެން އޭނާއަށް ބުނީމެވެ: “ކަލޭ ތިޔަ ދައްކަނީ ކޮން ޖިންނިއެއްގެ ވާހަކައެއް ހެއްޔެވެ؟” އޭނާ ތަކުރާރުކޮށް ބުންޏެވެ: “ތިއީ އެއްގޮތަކަށްވެސް އާދައިގެ ކުއްޖެއް ނޫން، ތިއީ ނުރައްކާތެރި ސިހުރުވެރިއެއް.” އެވަގުތު އަހަރެންގެ މާމަ އެ ސިހުރުވެރިޔާއާ ދެކޮޅަށް އަޑުއުފުލައި، އެތަނުން އަހަރެން ނެރެގެން ގެއަށް ގެންދިޔައެވެ.

– އަހަރެން ކިޔަމުންދިޔަ ސިހުރު ފޮތްތަކުގެ ޙަޤީޤަތް މާމައާއި، ކާފައާއި، ދައްތަ ފިޔަވައި އަހަރެންގެ ޢާއިލާގެ އެހެން އެއްވެސް މީހަކަށް މިއަދާ ހަމައަށްވެސް ނޭނގެއެވެ. އެމީހުންނަށް އެނގުނީ އެ ޖިންނި ކުއްޖާގެ ވާހަކަ އަހަރެން ކިޔައިދިނުމުން، އަހަރެންގެ ވާހަކަތައް ޤަބޫލުކޮށް، އެ ނުބައި ފޮތްތައް އަންދާލައި އަޅިތައް ވަޅުލުމުންނެވެ. ނަމަވެސް އަހަރެންގެ މަންމަ ހީކުރީ އަހަރެންނަށް އިވެމުންދިޔަ އަޑުތަކަކީ ހަމައެކަނި ނަފްސާނީ އަދި ޚަޔާލީ ކަންތައްތަކެއް ކަމަށެވެ. މަންމައަކީ ވަރަށް ހޭލުންތެރި، ޢިލްމީ ވިސްނުމުގެ މީހެކެވެ. ޖިންނީން އިންސާނުން ދެކެ ލޯބިވެދާނެ ކަމަކަށް މަންމަ އެއްގޮތަކަށްވެސް ޤަބޫލެއް ނުކުރެއެވެ. ޖިންނީންގެ ވުޖޫދު ޤަބޫލުކުރި ނަމަވެސް، މަންމަ ބުނަނީ ޖިންނީންގެ ޢާލަމަކީ ވަކި ދުނިޔެއެއް ކަމަށާއި، އެމީހުންނަށް އަހަރެމެންގެ ދުނިޔެއަށް ނުފޫޒު ނުފޯރުވޭނެ ކަމަށެވެ.

ޝަރުޢީ ރުޤްޔާގެ ފަރުވާ
ދެން އަހަރެން ދާން ފެށީ ކީރިތި ޤުރްއާނުން ފަރުވާދޭ ޞައްޙަ ޢިލްމުވެރިންގެ ގާތަށެވެ. އޭގެ ތެރެއިން އެއްބޭފުޅެއްގެ އަރިހަށް ދިއުމުން، އޭނާ އަހަރެން ފެނުމާއެކު ރުޅިވެރިކަމާއެކު ބުންޏެވެ: “ދުރަށް ދާށެވެ! ﷲ ތިބާގެ ޢަމަލުތަކަށް ލަޢުނަތް ލައްވާށިއެވެ!” އަހަރެން ޙައިރާންވެފައި އެހީމެވެ: “ޝައިޚެވެ! ތިޔަހެން ތިޔަ ވިދާޅުވީ ކީއްވެގެން ހެއްޔެވެ؟” އޭނާ ވިދާޅުވިއެވެ: “ދާށެވެ، ތިޔަ ކާފަރު ސިހުރުވެރިޔާއެވެ!” އެވަގުތު ކުރިން ދިމާވި ސިހުރުވެރިޔާ ބުނި ވާހަކަ އަހަރެންގެ ހަނދާނަށް އައެވެ. އެހެންކަމުން އަހަރެން ސިހުރުވެރިއެއް ނޫންކަމަށް ޤުރްއާން ގަންދީ ހުވާކުރުމަށްފަހު، އަހަރެންނަށް ދިމާވި ހުރިހާ ކަމެއް ތަފްޞީލުކޮށް ކިޔައިދިނީމެވެ. އަދި އަހަރެން ސިހުރުގެ ފޮތްތައް ކީ ނަމަވެސް، ދުވަހަކުވެސް މީހަކަށް ގެއްލުމެއް ދިނުމަށް އެފަދަ ޢަމަލެއް ކޮށްފައި ނުވާނެކަމަށް ބުނީމެވެ. އަދި އަހަރެން އެހީމެވެ: “އަހަރެންނަކީ ސިހުރުވެރިއެއްކަމަށް ޝައިޚަށް ހީވީ ކީއްވެގެން ހެއްޔެވެ؟” އޭނާ ވިދާޅުވީ؛ ރުޤްޔާ ކިޔަވަން ފެށުމުން ބާރުގަދަ އިފްރީތެއް އޭނާއާ ވާހަކަދެއްކި ކަމަށާއި، އެ އިފްރީތު ބުނި ގޮތުގައި އަހަރެން ވަނީ އެ ޖިންނީން އަޅުވެތިކޮށް، އަހަރެން ބޭނުންވާ ކަންކަން ކުރުމަށް ސިހުރު ހަދާފައި ކަމަށެވެ. އެހެންވެ އަހަރެން ތަކުރާރުކޮށް ދެންނެވީމެވެ: “މާތް ﷲ ގަންދީ ބުނަމެވެ. އަހަރެންނަކީ ސިހުރުވެރިއެއް ނޫނެވެ.”

ދެން އެ ޝައިޚު އަލުން ރުޤްޔާ ފެއްޓެވިއެވެ. އަދި އަހަރެން ފަރުޟު ނަމާދުތަކަށް ރައްކާތެރިވެ، ކީރިތި ޤުރްއާން ކިޔެވުން ގިނަކޮށް، ފަރުވާގެ ސެޝަންތަކަށް ގަވާއިދުން ގޮސް، އެ ޖިންނީގެ ކިބައިން ސަލާމަތްވުމަށް އެދި ﷲ ގެ ޙަޟްރަތުގައި ދުޢާކުރަން ފެށީމެވެ. ދުވަސްތަކަކަށްފަހު، ފަރުވާދެއްވި ޝައިޚަށް ޙަޤީޤަތް ސާފުވިއެވެ. އެއީ އަހަރެން އުފަންވީއްސުރެ އަހަރެންގެ ފަހަތުން އަޅައިގަނެ، އަހަރެންނާ ކައިވެނިކުރަން ބޭނުންވެގެން އުޅޭ ޖިންނި އަންހެންކުއްޖެއް ވާކަމެވެ. އެހެންވެ، އަހަރެން ބާލިޣުވާ އުމުރަށް އެޅުމަށް އެ ޖިންނި އިންތިޒާރުކުރީއެވެ. އޭގެފަހުން، އެ ޖިންނި އޭނާގެ މުޅި ޢާއިލާ އަހަރެންގެ ވަށައިގެން ޖަމާކުރިއެވެ. ސަބަބަކީ އަހަރެންނަކީ ދީންވެރި ޢާއިލާއަކަށް ނިސްބަތްވާ މީހަކަށްވެފައި، އަހަރެން ކިޔަވާ ޤުރްއާނުގެ ސަބަބުން އޭނާގެ ރޭވުންތައް ފެއިލްވެދާނެތީ ބިރުންނެވެ. ފަރުވާދެއްވި ޝައިޚު ވިދާޅުވި ގޮތުގައި، އެ ޖިންނި އަހަރެންގެ ހަށިގަނޑުން ނުކުންނަން ދެކޮޅުހަދައި ބުނަމުން ދިޔައީ، އޭނާ މަރުވެގެން މެނުވީ އަހަރެންގެ ހަށިގަނޑު ދޫކޮށް ނުދާނެ ކަމަށެވެ. އަދި އޭނާގެ ޢާއިލާއިން އިންޒާރުދިނީ، އޭނާއަށް ގެއްލުމެއް ވެއްޖެނަމަ އަހަރެންގެ ދިރިއުޅުން ނަރަކައަކަށް ހަދާލާނެ ކަމަށެވެ؛ ސަބަބަކީ އޭނާއަކީ އެމީހުންގެ ޤަބީލާގެ ވެރިޔާގެ ދަރިފުޅަށްވާތީއެވެ. އެހެންކަމުން ޝައިޚު އެއްފަހަރު ނަޞޭޙަތްދެއްވައި، އަނެއްފަހަރު ﷲ ގެ ކުޅަދުންވަންތަކަމުން އިންޒާރުދެއްވަމުން، ހުއްޓުމެއްނެތި ޤުރްއާން ކިޔަވަމުން ގެންދެވިއެވެ. އެންމެފަހުން، ގަދަފަދަ ކިޔެވުންތަކުގެ ސަބަބުން އެއްދުވަހަކު އެ ޖިންނި މަރުވެގެން ދިޔައެވެ.

އަހަރެންގެ އަނބިމީހާއާއި ދަރިފުޅު ގެއްލުން!
އަހަރެންގެ އަނބިމީހާ (ﷲ އޭނާއަށް ރަޙްމަތްލައްވާށިއެވެ) އަކީ އަހަރެންގެ ޙަޔާތުގައި އެންމެ ގާތް އެކުވެރިޔާއެވެ. އަހަރެމެންގެ ކައިވެންޏަށް ދުވަސްކޮޅެއް ވީފަހުން، އޭނާގެ ކިބައިން އާދަޔާޚިލާފު ބަދަލުތަކެއް ފެނި، އަހަރެން ފަދައިން ޖިންނީންގެ ވާހަކަތަކަށް ޝައުޤުވެރިވާން ފެށިއެވެ. އޭނާއަށްވެސް އެ ޖިންނީންގެ ނުބައި އަސަރު ފޯރައިފިކަން އަހަރެންނަށް އެނގުނެވެ. އެހެންވެ އެ ޖިންނީގެ ޙަޤީޤަތް ކިޔައިދިނުމުން، އޭނާ ކަންބޮޑުވެ ބިރުން އޭނާގެ ޢާއިލާ ގާތަށް ގޮސް ދެމަސް ދުވަސް ވަންދެން ވަކިން އުޅުނެވެ. އަހަރެން އޭނާއާ ބައްދަލުވީ ޔުނިވަރސިޓީ ދުވަސްވަރުގައެވެ؛ އަދި އަހަރެމެންގެ ދެމެދުގައި ވަރުގަދަ ލޯތްބެއް އޮތެވެ. އޭނާ ނެތި ވޭތުވި ދެމަސް ދުވަހު އަހަރެންނަށް އޭނާއާ ވަކިން އުޅުމަކީ ކުޅަދާނަ ކަމަކަށް ނުވިއެވެ. އެހެންވެ އަހަރެން އަމިއްލައަށް ކީރިތި ޤުރްއާން ކިޔަވައި، އަހަރެމެންނަށް އުނދަގޫކުރަމުން ދިޔަ ޖިންނީން ދުރުކުރަން ވަރަށް ބުރަ މަސައްކަތްތަކެއް ކުރީމެވެ.

އަހަރެންގެ އަނބިމީހާ އެނބުރި ގެއަށް އައިތާ ތިންމަސް ފަހުން، އެ ޖިންނީގެ ފަރާތުން އަހަރެންނަށް އިންޒާރު ލިބުނެވެ؛ އަހަރެން އެމީހުންގެ އެދުންތަކަށް ބޯނުލަނބާނަމަ، އަހަރެންގެ އަނބިމީހާ ދުނިޔޭގައި ނުބަހައްޓާނެ ކަމަށެވެ. އެހެންނަމަވެސް އަހަރެން ﷲ އަށް ވަކީލުކޮށް، އެ އިންޒާރުތަކަށް އެއްވެސް ފަރުވާލެއް ނުބަހައްޓަމެވެ.

– އެއީ ވަރަށް ހިތްދަތި ދުވަހެކެވެ. އަހަރެންގެ ހަނދާނުގައި ހުރި ގޮތުން އެއީ ބުދަ ދުވަހެކެވެ. އަހަރެމެންގެ ކައިވެންޏަށް ދިހަ އަހަރު ފުރުނުތަނާހެން، އަހަރެން ވަޒީފާ ނިންމާފައި އެނބުރި ގެއަށް އައިއިރު މަގުމަތީގައި މީހުން އެއްވެ، އެމްބިއުލާންސްތައް އައިސް ހުއްޓެވެ. އަދި އަހަރެންގެ ލޯބިވާ އަނބިމީހާ ލޭގެ ކޯރެއްގެ ތެރޭގައި ބިންމަތީގައި ވެއްޓިފައި އޮއްވައި ފެނުނެވެ. އޭނާ ވެއްޓުނީ ޢިމާރާތުގެ ތިންވަނަ ބުރިންނެވެ. ވަގުތުން އޭނާ ހޮސްޕިޓަލަށް ގެންދެވުނެވެ. މަރުގެ ތުންފަތްމަތީގައި އޮވެ އޭނާ ބުނި އެންމެ ފަހު ބަހަކީ: “އެ ނުބައި ޖިންނި އަހަރެން ވައްޓާލައި މަރާލީއެވެ. އެހެންވީމާ އަހަރެމެންގެ ދަރިން ރައްކާތެރިކުރާށެވެ!” އަދި އަހަރެންގެ އަނބިމީހާ ކަށްވަޅުގައި އެކަނިވިޔަ ނުދިނުމަށްޓަކައި، ދަރިންވެސް މަރާލާނެކަމުގެ އިންޒާރު އެ ޖިންނީން ދިނެވެ. މި ހިތާމައިގެ ސަބަބުން އަހަރެންގެ ހިތްވަރު އެލުމުގެ ބަދަލުގައި، އެ ނުބައި ބާރުތަކާ ދެކޮޅަށް ޤުރްއާން ކިޔެވުން އިތުރުކުރީމެވެ. ނަމަވެސް އަނބިމީހާ ވަކިވެދިޔަތާ އެންމެ މަހެއްހާ ދުވަސް ފަހުން، އެ ޖިންނީން އަހަރެންގެ މެދު ދަރިފުޅުވެސް ހަމަ އެފަދައިން މަރާލިއެވެ. އެ ހިތާމަވެރި މަންޒަރުވެސް ފެނުނީ އަހަރެން މަސައްކަތް ނިންމާފައި ގެއަށް އައި ވަގުތު، އޭނާގެ މަންމަ ފަދައިން މަގުމައްޗަށް ވެއްޓިފައި އޮއްވައެވެ. އަހަރެންގެ އެ ކުޑަކުޑަ ލޯބިވާ ދަރިފުޅުގެ (ﷲ އޭނާއަށް ރަޙްމަތްލައްވާށިއެވެ) އުމުރަކީ އެންމެ 3 އަހަރެވެ. މި ހިތްދަތި ހާދިސާތަކުގެ ސަބަބުން އަވައްޓެރިންވެސް ބިރުން ތުރުތުރުއަޅަން ފެށިއެވެ.

އަލުން ކައިވެނިނުކުރުމުގެ ވަޢުދު
ޖިންނީން އަހަރެންގެ ކިބައިން ހިފީ ވަރަށް އަނިޔާވެރި ބަދަލެކެވެ. އަހަރެންގެ ލޯބިވާ އަނބިމީހާއާއި، އަހަރެންގެ ކުޑަކުޑަ ދަރިފުޅު މި ދުނިޔެއިން ވަކިވެގެން ދިޔައީ އެމީހުންގެ ސަބަބުންނެވެ. އަހަރެންނަށް ކުރިން ފަރުވާދެއްވި އިޚްލާޞްތެރި ޝައިޚު އަވަހާރަވުމުން، އެ ނުބައި ޖިންނީންގެ އުނދަގޫތައް މައިތިރިކުރެވޭނެ އެހެން ޢިލްމުވެރިއަކު ހޯދަންދެން އަހަރެން އުޅުނީ ބަޔާންކުރަންދަތި ވޭނެއްގައެވެ. އެންމެފަހުން އެ ޖިންނީން އަހަރެންގެ ކިބައިން އެއްބަސްވުމެއް ހޯދިއެވެ؛ އެއީ އަހަރެން ދުވަހަކުވެސް އެހެން އަންހެނަކާ ކައިވެނިނުކުރުމަށެވެ. އަދި އޭގެ ބަދަލުގައި އެމީހުން ދެން އަހަރެންނަށާއި އަހަރެންގެ ބާކީ ތިބި ދަރިންނަށް އެއްވެސް ގޯނާއެއް ނުކުރުމަށެވެ.

އަހަރެންނަށް ފުރަތަމަ ފަރުވާދެއްވި ޝައިޚު (ﷲ އެބޭފުޅާއަށް ރަޙްމަތްލައްވާށިއެވެ) އަބަދުވެސް ވިދާޅުވާ ބަސްފުޅެއް ހަނދާންވެއެވެ: “ތިބާ ތިޔަހުރީ ވަރަށް ނުރައްކާތެރި ޙާލަތެއްގައެވެ. ތިއީ ޢާޝިޤު ޖިންނީގެ ސަބަބުން ޖެހިފައިވާ އެންމެ އުނދަގޫ ބާވަތުގެ އަސަރެވެ.” އެ ޖިންނި އަންހެންކުއްޖާ މަރުވުމުގެ ކުރިން ބުނެފައިވަނީ: “އަހަރެން އޭނާ ދުލެއް ނުކުރާނަމެވެ. އަހަރެން ނުވަތަ އޭނާ މަރުވެއްޖައުމަށް ދާންދެނެވެ.”

– މިއަދު، ﷲ ގެ ރަޙްމަތްފުޅާއި ވާގިފުޅާއެކު އެމީހުންގެ ސީދާ އުނދަގޫތައް އަހަރެންގެ ހަށިގަނޑުން ފިލައިގޮސްފައިވީ ނަމަވެސް، އަލުން ކައިވެންޏެއް ކުރާކަށް އަހަރެންނަކަށް ނުކެރެއެވެ. ސަބަބަކީ އެ ޖިންނި ކުއްޖާގެ ބައްޕަ އެނބުރި އައިސް، އަހަރެންގެ ކިބައިންނާއި އަހަރެންގެ ދިރިތިބި ދަރިންގެ ކިބައިން އަނެއްކާވެސް ބަދަލުހިފަން ފަށައިފާނެތީ ކުރެވޭ ބިރެއްގެ ބޮޑުކަމުންނެވެ. އެހެނީ، އޭނާގެ ދަރިފުޅުގެ ވަޞިއްޔަތާ އެއްގޮތަށް، އަހަރެން އެހެން މީހަކާ ކައިވެނިކޮށްގެން އުޅުމަކީ އެމީހުން ދުވަހަކުވެސް ރުހޭނެ ކަމެއް ނޫނެވެ.