– “އެހެން މީހުން މަރުވާކަށް އަހަރެން ބޭނުމެއް ނުވި” – ޒަޚަމްވި ޕައިލެޓް
ފްލައިދުބާއީގެ ފްލައިޓެއްގެ ކޮކްޕިޓް ތެރޭގައި ކޯ-ޕައިލެޓް ދިން ވަޅީގެ ހަމަލާތަކުން ޒަޚަމްވި އިންޑިއާގެ ކެޕްޓަން ސްމިތު މަޗާރު، ފްލައިޓުގައި ތިބި 170 އަށް ވުރެ ގިނަ ފަސިންޖަރުންގެ ފުރާނަ ސަލާމަތްކުރުމަށް ކުރި ހިތްވަރުގަދަ މަސައްކަތުގެ ތަފްސީލު ހާމަކޮށްފިއެވެ.
މި ހާދިސާ ހިނގާފައިވަނީ މިދިޔަ ބުދަ ދުވަހުގެ ހެނދުނު ދުބާއީން އިސްރާއީލުގެ ތެލް އަވީވަށް ދަތުރުކުރި ފްލައިދުބާއީގެ ފްލައިޓް FZ1073 ގައެވެ. ދަތުރަށް ދެގަޑިއިރު ބައި ވީތަނާ، ފްލައިޓް ވަނީ ކުއްލިއަކަށް 17,000 ފޫޓު (5,200 މީޓަރު) ތިރިއަށް ވެއްޓެން ފަށާފައެވެ. އަދި އެއަރ ޓްރެފިކް ކޮންޓްރޯލަށް އެމަޖެންސީ ސިގްނަލް ފޮނުވުމަށްފަހު، ބޯޓު ހައިޖެކް ކޮށްފިކަން އަންގައިދޭ ‘7500’ ކޯޑަށް ސިގްނަލް ބަދަލުކުރިއެވެ.
އިންޑިއާގެ ބޮޑުވަޒީރު ނަރެންދުރަ މޯދީއާ ވީޑިއޯ ކޯލެއް މެދުވެރިކޮށް ވާހަކަދައްކަމުން ކެޕްޓަން މަޗާރު ބުނީ، ހަމަލާގެ ސަބަބުން ޒަޚަމްވެ ބިންމައްޗަށް ވެއްޓިފައި އޮތްއިރުވެސް ބޯޓު ވެއްޓެމުންދާކަން އިހުސާސްވި ކަމަށެވެ. އަދި އެހާލަތުގައިވެސް ކޮކްޕިޓްގެ ދޮރު އެތެރެއިން ހުޅުވުމަށް އެންމެ ފަހު ހިތްވަރު ނެރުނު ކަމަށް އޭނާ ބުންޏެވެ.
“އަހަރެން އަމިއްލަ ފުރާނަ ސަލާމަތްކުރަން މަސައްކަތް ކުރި ނަމަވެސް، އެހެން އެއްވެސް މީހަކު މަރުވާން ދޫކޮށްނުލާނެ ކަމުގެ އަޒުމް އޮތް،” މަޗާރު ބުންޏެވެ.
ދޮރު ހުޅުވުމާއެކު އެހެން މީހުން ވަދެ ހަމަލާދިން މީހާ ހުއްޓުވި ކަމަށާއި، ބޯޓުގައި ތިބި ދެ ރިޒާވް ޕައިލެޓުންގެ އެހީތެރިކަމާއެކު ސައޫދީ އަރަބިއްޔާގެ ތަބޫކް އެއާޕޯޓަށް ވަނީ ފްލައިޓް ރައްކާތެރިކަމާއެކު ޖައްސާފައެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މީޑިއާއަށް މައުލޫމާތު ދެމުން ބުނެފައިވަނީ ހަމަލާދިން ކޯ-ޕައިލެޓަކީ އޮމާންގެ ރައްޔިތެއް ކަމަށާއި، އޭނާ މަސައްކަތްކުރީ ބޯޓު ވައްޓާލަން ކަމަށެވެ. އަދި އޭނާ ހައްޔަރުކުރުމުން “އަހަރެން މަރާލާށޭ” ގޮވި ކަމަށާއި އެއީ އަމިއްލައަށް މަރުވާން އުޅުނު މީހެއްކަން ސާފުވާ ކަމަށްވެސް އޭނާ ބުންޏެވެ. މި މައްސަލައާ ގުޅިގެން ޔޫއޭއީގެ ކަމާބެހޭ ފަރާތްތަކުން މިހާރު ދަނީ މިއީ ޓެރަރިޒަމްގެ އަމަލެއްތޯ ބެލުމަށް ތަހުގީގު ހިންގަމުންނެވެ.
މި ހާދިސާގައި ޒަޚަމްވި ކެޕްޓަން މަޗާރަށް ތަބޫކްގެ ހޮސްޕިޓަލެއްގައި ފަރުވާ ދިނުމަށްފަހު، މިހާރު ވަނީ އަބޫދާބީއަށް ބަދަލުކޮށްފައެވެ. އަދި އޭނާގެ ހާލު މިހާރު ރަނގަޅުވަމުން އަންނަ ކަމަށް ޔޫއޭއީގައި ހުންނަ އިންޑިއާ އެމްބަސީން ވަނީ ހާމަކޮށްފައެވެ.
މޯދީ ވަނީ މަޗާރުގެ ހިތްވަރާއި އަވަސް ނިންމުމުގެ ސަބަބުން އެތައް ބައެއްގެ ފުރާނަ ސަލާމަތްވި ކަމަށް ވިދާޅުވެ، އޭނާއަށް ތައުރީފު ކުރައްވާފައެވެ. ފާއިތުވި 17 އަހަރު ބޯޓު ދުއްވާފައިވާ މަޗާރު ބުނީ، ލިބުނު އަނިޔާއިން އަވަހަށް ރަނގަޅުވެ، އަލުން އެނބުރި ޚިދުމަތަށް ނުކުމެވޭނެ ކަމުގެ ފުރިހަމަ އުންމީދު އެބައޮތް ކަމަށެވެ.
