ޕާކިސްތާނުގެ މަޝްހޫރު ޓީވީ ޗެނަލް، ހަމް ޓީވީން ގެނެސްދިނުމަށް ހަމަޖެހިފައިވާ އާ ޑްރާމާ ސީރީޒް “ހުރްމަތު” މި ހިނގާ އޮކްޓޫބަރު މަހުގެ 5 ވަނަ ދުވަހު ދައްކަން ފަށާ ގޮތަށް ހަމަޖެހިއްޖެއެވެ.
މި ޑްރާމާގެ ލީޑް ރޯލުން ފެނިގެންދާނީ މަޤުބޫލު ބަތަލާ ދަނާނީރް މުބީން އަދި މަޝްހޫރު ޔޫޓިއުބަރ ޝަހްވީރް ޖަފްރީއެވެ. މިއީ ޝަހްވީރް ޓީވީ ޑްރާމާއެއްގެ މުހިންމު ރޯލަކުން ފެނިގެންދާ ފުރަތަމަ ފަހަރެވެ. މީގެ އިތުރުން، މި ޑްރާމާގެ ސަޕޯޓިންގ ކާސްޓުންގެ ގޮތުގައި އުމައިރު ރާނާ، ޖާވީދު ޝައިޚް، އަލީ ތާހިރް، އަނޫޝޭ އައްބާސީ، ސަނާ ހުމާޔޫން އަދި ޝެހްބާޒް ޝިގްރީ ފަދަ ތަޖުރިބާކާރު ފަންނާނުން ފެނިގެންދާނެއެވެ.
“ހުރްމަތު” ގެ ވާހަކަ ބިނާވެފައިވަނީ އަމިއްލަ ފައިމައްޗަށް ތެދުވުމުގެ ވަރުގަދަ އަޒުމެއް އޮތް ހިތްވަރުގަދަ ޒުވާން އަންހެން ކުއްޖެއް ކަމަށްވާ ހުރްމަތުގެ ހަޔާތުގެ މައްޗަށެވެ. މަތީ ތަޢުލީމު ހާސިލުކުރުމަށްޓަކައި، ބޯދާ ވިސްނުމުގެ އާއިލީ މާހައުލު ދޫކޮށް ޒަމާނީ ސިޓީއަކަށް އޭނާ ބަދަލުވެއެވެ. ޒަމާނީ ދިރިއުޅުމުގެ ގޮންޖެހުންތަކާއި، އިޙުސާސްތަކާއި އަދި ބަދަލުވަމުންދާ ގުޅުންތަކުގެ ތެރެއިން ހުރުމަތަށް ތާބިޝްއާ ބައްދަލުވެއެވެ. އަދި އެ ދެމެދުގައި އުފެދޭ ހިތާމައާއި، ގޮންޖެހުންތަކުން ފުރިގެންވާ އަސަރުގަދަ ލޯބީގެ ގުޅުން މި ޑްރާމާއިން ފެނިގެންދާނެއެވެ.
މޫމިނާ ދުރައިދު ޕްރޮޑަކްޝަންސްގެ މި ޑްރާމާ ސީރީޒް ދެއްކުމަށް ހަމަޖެހިފައިވަނީ ކޮންމެ ހަފުތާއެއްގެ ވެސް ހޯމަ އަދި އަންގާރަ ދުވަހުގެ ރޭގަނޑު 8:00 ގައެވެ. މި ޑްރާމާ ޑައިރެކްޓް ކޮށްފައިވަނީ ނަދީމް ސިއްދީޤީއެވެ. އަދި ވާހަކަ ލިޔެފައިވަނީ ކާޝިފް އަންވަރެވެ.
ޝައުޤުވެރި ވާހަކައަކާއި މޮޅު ކާސްޓެއް ހިމެނޭ މި ޑްރާމާއަކީ ބެލުންތެރިންގެ ބޮޑު މަޤުބޫލުކަމެއް ލިބިގެންދާނެ ސީރީޒެއް ކަމަށް ބެލެވެއެވެ.
