– ޓިކެޓް އަދި ރަށްރަށުގައި ފިލްމު އެޅުވުމުގެ ކަންކަން ހަމަޖެއްސުމަށް: ހޮޓްލައިން 7844422
– “މަޖުނޫން” ރިލީޒްކުރަނީ 26/10/26 ގައި
ދިވެހި ސިނަމާއަށް އަންނަން ތައްޔާރުވަމުންދާ ފިލްމު “މަޖުނޫން” ގެ ފުރިހަމަ ޓްރެއިލާ އާންމުކުރުމާއެކު، ބެލުންތެރިންގެ މެދުގައި ބޮޑު މަގުބޫލުކަމަކާއި ހައިރާންކަމެއް އުފެދިއްޖެއެވެ. ޓްރެއިލާ ބެލި ގިނަ ބަޔަކު ހާމަކުރި ގޮތުގައި، މި ފިލްމަކީ ހަމައެކަނި ލޯބީގެ ފިލްމެއް ނޫން ކަމަށާއި، މިއީ ވަރަށް ވަރުގަދަ ތްރިލާ އެކުލެވޭ ފިލްމެކެވެ.
“މަޖުނޫން”ގެ ޓްރެއިލާ އާއްމުކުރުމާއެކު އެތައް ބަޔަކު އެ ޓްރެއިލާއާމެދު ޝުޢޫރުތައް ބަންޑުންކުރަން ފެށިއެވެ. އޭގެ ތެރެއިން އެންމެ ބޮޑަށް ފާހަގަކޮށްލެވުނު ރިވިއު ތިލަކޮށްނުލާހާ ވަރެއް ނޫނެވެ،
ޓްރެއިލާ ބެލި ބެލުންތެރިއަކު އޭނާގެ ތަޖުރިބާ ހިއްސާކުރަމުން ބުނެފައިވަނީ، މިއީ އޭނާ އެއްގޮތަކަށްވެސް އުންމީދުކުރި ކަހަލަ ފިލްމެއް ނޫން ކަމަށާއި، މި ޓްރެއިލާގެ ސަބަބުން ފިލްމު ބެލުމުގެ ޝައުގުވެރިކަން އިންތިހާއަށް ބޮޑުވެގެން ގޮސްފައިވާ ކަމަށއެވެ. ލޯތްބާއި، ތްރިލާ އެކުލެވިގެންވާ މި ފިލްމުގެ މަންޒަރުތަކާއި، ކުލަތަކާއި، ލަވަތައް އަދި ކޮސްޓިއުމްތައް ފެނިފައި ވަރަށް ބޮޑަށް ހިތްދަމައިގަންނަ ކަމަށް އޭނާ ފާހަގަކުރިއެވެ. އަދި ބޭރުފުށުން ފެންނަ ރީތިކަމުގެ އަޑީގައި ސިއްރުވެރި، ނުރައްކާތެރި ކަންތައްތަކެއް ފޮރުވިފައިވާކަމުގެ އިހުސާސް ޓްރެއިލާގެ ކޮންމެ މަންޒަރަކުންވެސް ގެނެސްދޭ ކަމަށް ބުނެފައިވެއެވެ.
މި ފިލްމުގައި ހިމެނޭ ތަރިންގެ އެކްޓިންއަށް އަލިއަޅުވާލަމުން އެ ބެލުންތެރިޔާ ފާހަގަކުރި ގޮތުގައި، ޝިފާގެ މޫނުމަތީގެ ހަރަކާތްތަކާއި ޖަޒުބާތުތައް ގެނެސްދީފައިވަނީ ވަރަށް ފުރިހަމައަށެވެ. އެއްވެސް ވާހަކައެއް ނުދައްކާ ހުންނަ ވަގުތުތަކުގައިވެސް އޭނާގެ އިހުސާސްތައް ވަރަށް ސާފުކޮށް ބެލުންތެރިންނަށް ދޭހަވާ ކަމަށް ބުންޏެވެ. ހަމައެއާއެކު، ޝާރިފްގެ ކެރެކްޓާއަކީ މީގެ ކުރިން އޭނާ ފެނިފައިނުވާ ފަދަ މުޅިން ތަފާތު، ސިއްރުތަކުން ފުރިގެންވާ ރޯލެއްގެ ގޮތުގައި ވަނީ ފާހަގަކޮށްފައެވެ
މީގެ އިތުރުން، ޓްރެއިލާއިން އެންމެ ބޮޑު ސިހުމެއް ގެނުވީ ވާޝިޔާ ފެނިގެންދިޔަ މަންޒަރުތަކުންނެވެ. ބޯކޮޅުވަތަށް އެލުވާފައި އޮތުމާއި، ފުޅިއަކުން ބޮލުގައި ޖަހާ ތަޅާލައިގެން މާރާމާރީ ހިންގުމާއި، ފުރާނަ ސަލާމަތްކުރަން ދުވާ މަންޒަރުތަކުން އޭނާގެ ކެރެކްޓާއާ މެދު ބޮޑެތި ސުވާލުތަކެއް ވަނީ އުފެދިފައެވެ. މި ކުރު މަންޒަރުތަކުން ވެސް ވާޝިޔާގެ ވަރުގަދަ އެކްޓިން ވަރަށް ބޮޑަށް ފާހަގަވެގެންދިޔަ ކަމަށް ބެލުންތެރިޔާ ބުންޏެވެ.
ޖުމްލަކޮށް ބަލާއިރު، “މަޖުނޫން” ގެ ޓްރެއިލާއިން މުޅި ވާހަކަ އެއްކޮށް ހާމަނުކޮށް، ބެލުންތެރިންގެ ހިތުގައި ގިނަ ސުވާލުތަކަކާއި ޝައުގުވެރިކަމެއް އުފައްދައިދީފައިވާތީ ގިނަ ބަޔަކު މިހާރު ތިބީ ފިލްމު ބަލާލުމަށް ކެތްމަދުވެފައެވެ. މި ފިލްމު ވެގެންދާނީ ދިވެހި ސިނަމާގައި ފަހަކަށް އައިސް ފެންނާނެ އެންމެ ތަފާތު އަދި ފޯރިގަދަ އެއް ފިލްމަށް ކަމަށް މިހާރުވެސް ގިނަ ބަޔަކު އަންނަނީ ބުނަމުންނެވެ.
