ވާރޭ ވެހެން ފެށީ ދަންވަރު ބާރަ ޖެހި ފަހުންނެވެ. އެއީ ދޭތެރެދޭތެރެއިން ވެހިލާ އާދައިގެ ވާރެއެއް ނޫނެވެ. މުޅި އުޑުމަތި އެއްފަހަރާ ބަންޑުންކޮށްލި ފަދަ ބޯ ހުޅަނގު މޫސުމުގެ ވިއްސާރައެކެވެ.

ކުޑަ ގެސްޓްހައުސްގެ ޓިނު ފުރާޅުގައި ވާރޭގެ ތިކިތައް ބާރަށް ތަޅައިގަތެވެ. ލަކުޑި ކުޑަދޮރުތައް ތުރުތުރުއަޅައި، ބޭރުގެ ހަނި މަގުތައް ވިދާ ކަޅު ކޯރުތަކަކަށް ބަދަލުވެގެން ދިޔައެވެ. ފެންޑާއިން ބޭރު ބަލައިލުމުން، ފަޅު އޮތީ އަނދިރީގެ ތެރެއަށް ގެއްލިފައެވެ. ބޯ ވިލާތަކުގެ ތެރެއިން ވިދުވަރެއް ވިދައިލާ މަދު ވަގުތުކޮޅެއްގައި މެނުވީ، ފަރު މައްޗަށް ބިންދާލާ ހުދު ރާޅުތަކުގެ ސަފު ފެންނާކަށް ނެތެވެ.

ގެސްޓްހައުސްގެ އެތެރޭގައި، އުމުރުން ބައްތިރީސް އަހަރުގެ އަޒީމް އިނީ ރިސެޕްޝަން ޑެސްކު ކައިރީގައި، ބޭރުގެ ތޫފާނުގެ އަޑަށް ކަންފަތްދީގެންނެވެ. ބަދިގެ ފަހަތުގައި ހުރި ޖަނަރޭޓަރު ކޮށިއަރަމުން ދިޔަ އަޑު އިވެއެވެ. ބޯމަތީގައި ހުރި ސީލިންގ ފަންކާ ދިޔައީ މަޑުމަޑުން އެނބުރެމުންނެވެ.

ވޫމް… ވޫމް… ވޫމް…

ކުއްލިއަކަށް ކަރަންޓު ދިޔައެވެ. ފަންކާ ހުއްޓުނެވެ. އައިސްއަލަމާރީގެ އަޑު ކެނޑުނެވެ. އިރުކޮޅަކަށް، މުޅި އިމާރާތް ނޭވާ ހިފަހައްޓައިލި ފަދަ ހަމަހިމޭންކަމެއް ވެރިވިއެވެ.

އަޒީމް ރިސެޕްޝަން ކޮމްޕިއުޓަރު ކައިރީގައި ހުރި ޗާޖުކުރާ ބޮކި ދިއްލައިލިއެވެ. އޭގެ ފަނޑު އަލިން މުޅި ލޮބީ ފެންނަން ފެށިއެވެ. ދެ ހުސް ގޮނޑިއާއި ލަކުޑި ކޮފީ މޭޒެވެ. ބޮލިތަކެއް ބަހައްޓާފައި ހުރި ހަރުގަނޑަކާއި ގެސްޓްހައުސް މަރާމާތުކުރުމުގެ ކުރިން ނަގާފައިވާ ރަށުގެ މަންޒަރު ދައްކުވައިދޭ ފޮޓޯ ލޯގަނޑެކެވެ. އާދަޔާ ޚިލާފު އެއްވެސް ކަމެއް ނެތެވެ.

އެހެން ނަމަވެސް، ދެން އޭނާއަށް އަޑެއް އިވުނެވެ. ފިޔަވަޅުގެ އަޑެވެ. މަތިންނެވެ. އަޒީމް ގަނޑުވިއެވެ.

“ޓޮއް.” ވަގުތުކޮޅެއްގެ ހިމޭންކަމަކަށްފަހު އެ އަޑު ތަކުރާރުވިއެވެ. “ޓޮއް.”

އަނެއްކާވެސް ހިމޭންކަމަކަށްފަހު “ޓޮއް… ޓޮއް… ޓޮއް…”

އޭނާގެ ބޯމަތިން ސީލިންގ މަތީގައި ކޮންމެވެސް މީހަކު މަޑުމަޑުން ހިނގަނީއެވެ. އޭނާ ސިޑިއާ ދިމާއަށް ބަލައިލިއެވެ. ނަމަވެސް މި ގެސްޓްހައުސްއަކީ އެންމެ ބުރިއެއް ހުންނަ ތަނެކެވެ. މަތީބުރިއެއް ނުހުރެއެވެ.

އަޒީމް ހިންދިރުވާލިއެވެ. އަޑު ކެނޑުނެވެ. އޭނާ އިންތިޒާރުކުރިއެވެ. އެއްވެސް އަޑެއް ނެތެވެ. ދެން އިވުނީ “ސްކްރާޕް.”

އޭނާގެ ބޯމަތިން، ތަޅުންގަނޑު މަތީގައި ކޮންމެވެސް އެއްޗެއް ދަމާފައި ގެންދިޔަ ފަދަ އަޑެކެވެ. އަޒީމް ކޮޅަށް ތެދުވިއެވެ.

“ކާކު؟”

އަނދިރީގެ ތެރޭގައި އޭނާގެ އަޑު އިވުނީ ވަރަށް ބަލިކަށިކޮށެވެ. އެއްވެސް ޖަވާބެއް ނައެވެ. އޭނާ ޑެސްކު ދަށުގައި އޮތް ބޮޑު ދަގަނޑު ޓޯޗު ނެގިއެވެ.

“އައިޝާ؟”

އޭނާގެ އަނބިމީހާ ނިދާފައި އޮތީ ބަދިގެ ފަހަތުގައި ހުންނަ ސްޓާފް ކޮޓަރީގައެވެ. އެއްވެސް ރައްދެއް ނައެވެ.

އޭނާ ސިޑިއާ ދިމާއަށް ހިނގައިގަތެވެ. ދެބައިކުޅަ އެއްބަޔަށް ދެވުނުތަނާ ހުއްޓުނެވެ. އެ ސިޑިއަކީ އަސްލު ސިޑިއެއް ނޫނެވެ. އެއީ ހަމައެކަނި ޒީނަތްތެރިކުރަން ހަދާފައި ހުރި ފާރުގައި ހަރުކޮށްފައިވާ ހަނި ލަކުޑި ސިޑިއެކެވެ. ސަބަބަކީ ކުރިން އެ ގޭގެ ވެރިޔާ މަތީބުރިއެއް އަޅަން ރޭވި ނަމަވެސް އެ މަސައްކަތް ދުވަހަކުވެސް ނުނިމޭތީއެވެ. ސިޑީގެ ކޮޅުގައި އެއްވެސް ދޮރެއް ނެތެވެ.

އަޒީމަށް މިކަން އެނގެއެވެ. އޭނާ މި އިމާރާތުގައި ދިރިއުޅޭތާ ހަތަރު އަހަރު ވެއްޖެއެވެ. އެ ފާރުގައި އަމިއްލަ އަތުން ކުލަލީވެސް އޭނާއެވެ. އެހެން ނަމަވެސް، މައްޗަށް ބަލަހައްޓައިގެން ހުރިއިރު، ކަނދުރާއަށް ފިނި އެއްޗެއް ބީހިލި ފަދަ އިޙުސާސެއް ކުރެވުނެވެ.

ދެން އިވުނީ އެހެން އަޑެކެވެ. ތިން ފަހަރު ޓަކިދިން އަޑެވެ. “ޓިކް. ޓިކް. ޓިކް.”

ސީދާ އޭނާގެ ބޯމަތިންނެވެ. އަޒީމް ފަހަތަށް ފިޔަވަޅެއް އެޅިއެވެ. ޗާޖުކުރާ ބޮކި ފަނޑުވެ، ނިވި ދިއްލެން ފެށިއެވެ.

“ބިސްމިﷲ!” އޭނާގެ ދުލުން ބޭއިޚުތިޔާރުގައި އެ ބަސް ބޭރުވިއެވެ.

އަނެއްކާވެސް ފިޔަވަޅުގެ އަޑު ފެށުނެވެ. މިފަހަރު މާ އަވަސްއަވަހަށެވެ. ސީލިންގ މަތިން، އިމާރާތުގެ އެއްކޮޅުން އަނެއްކޮޅަށެވެ. ދެން ސީދާ އޭނާގެ ބޯމަތީގައި ހުއްޓުނެވެ. ދެން އައީ ކުޑަ ހަމަހިމޭންކަމެކެވެ. އަޒީމް މައްޗަށް ބަލައިލިއެވެ. ސީލިންގުން ފެންތިއްކެއް ވެއްޓި އޭނާގެ ކޯތާފަތުގައި ޖެހުނެވެ. އޭނާ އެ ފޮހެލިއެވެ. އޭގައި ހުރީ ކުޑަކޮށް ލޮނު ރަހައެކެވެ.

*****

ހެނދުނު ވީއިރު ވިއްސާރަ އަލިވެއްޖެއެވެ. މުޅި ރަށް އޮތީ ދޮވެވި ސާފުވެފައިވާ ފަދައިންނެވެ. ރުއްގަސްތަކުގެ ފަތްތަކުގައި ވިއްސާރައިގެ ފެންތިކިތައް ވިދަމުން ދިޔައެވެ. މަގުމަތީގައި ހުރި ކުދި ފެންގަނޑުތަކުން ހެނދުނުގެ އުޑުމަތި ދައްކުވައިދެއެވެ. ފަޅުތެރެ އަނެއްކާވެސް އޭގެ އާދައިގެ ނޫކުލައަށް ބަދަލުވެފައި އޮތް ނަމަވެސް، ފަރުން ބޭރުގެ ކަނޑު އޮތީ ނުތަނަވަސްކަން މަތީގައެވެ.

އައިޝާއަށް ފެނުނީ އަޒީމް ބޭރުގައި ސައިތަށްޓެއް ހިފައިގެން އިންދައެވެ.

“ތިހުރީ ވަރަށް ވަރުބަލިވެފަ.”

“ރޭގަ ނުނިދޭ.”

އައިޝާ އޭނާގެ ކައިރީގައި އިށީނެވެ. “ޖަނަރޭޓަރުގެ މައްސަލައެއްތަ؟”

“ނޫން.”

“ގެސްޓެއްގެ މައްސަލައެއްތަ؟”

“ނޫން.”

އައިޝާ އޭނާގެ މޫނަށް ބަލައިލިއެވެ. “ދެން ކިހިނެއްވީ؟”

އަޒީމް ޖެހިލުންވިއެވެ. “މަތީގަ މީހަކު ހިނގި އަޑު އިވުނީ.”

އައިޝާ އޭނާއަށް ބަލަހައްޓައިގެން އިނެވެ. “އަހަރެމެންގެ ތަނަކު މަތީބުރިއެއް ނުހުރެއެއްނު.”

“އެނގޭ.”

އައިޝާ ހީނލިއެވެ. “އަޒީމް މޮޔަވީ ދޯ.”

“އަހަންނަށް އަޑު އިވުނޭ.”

“ކޮން އަޑެއް؟”

“ފިޔަވަޅުގެ އަޑު.”

“މީދަލެއް ކަމަށް ވާނީ.”

“މީދަލެއް އެހެން ނުހިނގާނެ.”

“އެއީ މީދަލުގެ ގޮތް.”

އަޒީމް ނުހެއެވެ. އައިޝާގެ ހިނިތުންވުން ގެއްލުނެވެ. “އަސްލުވެސްތަ؟” އޭނާ ބޯޖަހައިލިއެވެ.

އައިޝާ ގެސްޓްހައުސްއާ ދިމާއަށް ބަލައިލިއެވެ. “ކޮންތާކުން؟”

“ރިސެޕްޝަން މަތިން.”

އައިޝާ އިރުކޮޅަކު ހިމޭނުން އިނެވެ. ދެން މަޑުމަޑުން ބުންޏެވެ. “އަނެއްކާވެސް އަޑު އިވުނީތަ؟”

އަޒީމް އޭނާއަށް ބަލައިލިއެވެ. “އަނެއްކާވެސްއޭ؟ ކީކޭ ތިބުނީ؟”

އައިޝާގެ އަތުން ސައިތަށްޓަށް ބާރުވެގެން ދިޔައެވެ. “މީގެ ތިން ރޭ ކުރިން އަހަންނަށްވެސް އެ އަޑު އިވުނު.”

*****

މި ގެސްޓްހައުސްއަކީ ޒަމާނުއްސުރެ އައިޝާގެ އާއިލާގެ ތަނެކެވެ. އޭނާގެ ކާފަ މާލެއިން އެނބުރި އައިސް އަސްލު ގެ އެޅީ މާ ކުރިންނެވެ. އަހަރުތަކުގެ ތެރޭގައި ކޮޓަރިތައް އިތުރުކޮށް، ފާރުތައް ތަޅައި، ބަދިގެ ބޮޑުކުރިއެވެ. ގެސްޓްހައުސް ހެދީ މީގެ ދިހަ އަހަރު ކުރިންނެވެ. ނަމަވެސް އިމާރާތުގެ އެންމެ ދުވަސްވީ ބައި އަދިވެސް ހުރީ ފަހަތުގައެވެ.

އަޒީމް ދުވަހަކުވެސް އެ ބަޔަކަށް ގަޔައެއް ނުވެއެވެ. އެތަނުގައި ހުންނަނީ ތަފާތު ވަހެކެވެ. އެންމެ ހޫނުގަދަ ދުވަސްވަރުވެސް އެ ދުވަސްވީ ލަކުޑި ފާރުތައް ހުންނަނީ ފިނިކޮށެވެ.

އެދުވަހު މެންދުރުފަހު، ފެންދައުރުވާ ހޮޅިއެއް މަރާމާތުކުރަން އުޅުމުގެ ތެރޭގައި، އަޒީމް އައިޝާގެ ބޮޑުބޭބެ ހަމީދު ގާތު އެ ވާހަކަ އެހިއެވެ. މުސްކުޅި ހަމީދު އިނީ ބަނބުކެޔޮ ގަސްދޮށުގައި މަސްދަލެއް މަރާމާތުކުރާށެވެ.

“ބޭބޭ.” އަޒީމް ބުންޏެވެ. “މިގޭގަ ކުރިން ދުވަހަކުވެސް މަތީބުރިއެއް ހުރިތަ؟”

“ހަމީދުގެ އަތުގެ ހަރަކާތް ހުއްޓުނެވެ. “ކީއްވެ ތިހެން ތި އެހީ؟”

“ހަމަ އަހައިލީ.”

“ކީއްވެ؟”

އަޒީމް ކޮނޑު އަރުވައިލިއެވެ. “ހަމަ އެނގެން ބޭނުންވެގެން.”

ހަމީދު ގެސްޓްހައުސްއާ ދިމާއަށް ބަލައިލިއެވެ. ދެން އަޑު މަޑުކޮށްލާފައި ބުންޏެވެ. “ހުންނަން އޮތީ.”

“ކޮން އިރަކު؟”

“ވަރަށް ކުރިން.”

“ދެން ކާކު އެކަން ހުއްޓުވީ؟”

ހަމީދު އަނެއްކާވެސް ދާ މަރާމާތުކުރަން ފެށިއެވެ. “މަސައްކަތްކުރި މީހާ.”

“ކީއްވެ؟”

“އޭނާ ދެކޮޅުހެދީ އިތުރަށް ކުރިއަށް ގެންދަން.”

“ސަބަބެއް ބުނިތަ؟”

“ނޫން.”

އަޒީމް އިންތިޒާރުކުރިއެވެ. އެންމެ ފަހުން ހަމީދު އޭނާއާ ދިމާއަށް ބަލައިލިއެވެ.

“އޭނާ ބުނީ މަތީގައި މިހާރުވެސް މީހަކު ދިރިއުޅެމުންދެއޭ.”

އަޒީމްގެ ގައިން ހީބިހި ނަގައިގެން ދިޔައެވެ. “މީހެކޭ؟”

ހަމީދު ބޯޖަހައިލިއެވެ. “އޭނާ އިތުރު ތަފްސީލެއް ނުދިން.”

“އެއްވެސް މީހަކު އެކަން ބެލިތަ؟”

“ގޭގެ ވެރިޔާ ބެލި.”

“ދެން ކިހިނެއްވީ؟”

“އޭނާ ސިޑި ނައްތައިލީ.”

އަޒީމް ހައިރާންވެފައި ބަލަހައްޓައިގެން ހުއްޓެވެ. “އެކަމަކު އަދިވެސް ސިޑިއެއް އެބަހުއްޓެއްނު.”

ހަމީދު އެ ޒީނަތްތެރި ސިޑިއާ ދިމާއަށް ބަލައިލިއެވެ. “އެއީ އަސްލު ސިޑިއެއް ނޫން.”

“އަސްލު ސިޑިއަށް ކިހިނެއްވީ؟”

ހަމީދުގެ ނަޒަރު ކަނޑާ ދިމާއަށް ދަތުރުކުރިއެވެ. “އަންދާލީ.”

*****

އެރޭ އަޒީމް ނުނިދައި އިނެވެ. އައިޝާއަށް އޮތީ އޭނާގެ ކައިރީގައި ނިދިފައެވެ. ކުޑަދޮރުގައި ވާރޭގެ ތިކިތައް މަޑުމަޑުން ޖެހެމުން ދިޔައެވެ. މުޅި ރަށް އޮތީ ހަމަހިމޭންކަން މަތީގައެވެ. ދުރުން ބުޅަލެއް ރުއި އަޑު އިވުނެވެ. ދެން ބޮޑުމަގުން ސައިކަލެއް ދިޔަ އަޑެވެ.

އަޒީމް ފޯނު ބަލައިލިއެވެ. ދަންވަރު 1:17 އެވެ. އެއްވެސް އަޑެއް ނެތެވެ. 1:26 އެވެ. ހަމަހިމޭންކަމެވެ. ބަރާބަރު 1:31 ގައި މަތިން އަޑެއް އިވުނެވެ.

“ޓޮއް.” އަޒީމް ލޯ ހުޅުވައިލިއެވެ. “ޓޮއް.”

އޭނާގެ ހިތުގެ ތެޅުން އަވަސްވާން ފެށިއެވެ. އޭނާ އައިޝާއަށް ބަލައިލިއެވެ. އޭނާ އޮތީ ގަދަ ނިދީގައެވެ.

“ޓޮއް… ޓޮއް… ޓޮއް…”

މިފަހަރު އޮޅުމެއް ނެތެވެ. އެއީ ހަމަ ފިޔަވަޅުގެ އަޑެވެ.

އޭނާ މަޑުމަޑުން އެނދުން ތެދުވިއެވެ. ބޭރުގެ ކޮރިޑޯ އޮތީ އަނދިރިކޮށެވެ. އޭނާ ރިސެޕްޝަނާ ދިމާއަށް ހިނގައިގަތެވެ. ފިޔަވަޅުގެ އަޑު ކުރިއަށް ދިޔައެވެ. މަޑުމަޑުންނެވެ. ގަސްދުގައެވެ.

“ޓޮއް… ޓޮއް… ޓޮއް…”

އޭނާއަށް ލޮބީއާ ހަމައަށް ދެވުނެވެ. އަޑު ކެނޑުނެވެ. އަޒީމް ޓޯޗު މައްޗަށް ދިއްކޮށްލިއެވެ. ސީލިންގ ހުރީ ސީދާ އޭނާގެ ބޯމަތީގައެވެ. ހުދު ކުލައާއި ލަކުޑި ތަނބުތަކެވެ. އިތުރު އެއްވެސް އެއްޗެއް ނެތެވެ.

ދެން ކޮންމެވެސް އެއްޗެއް ހަރަކާތްކުރިއެވެ. ސީލިންގ މަތިން ހިޔަންޏެއް ހުރަސްކުރިއެވެ. އަޒީމްގެ ނޭވާ ހުއްޓުނެވެ. އެއީ އިންސާނެއްގެ ސިފައެވެ. ހިނގަމުން ދިޔައެވެ. ނަމަވެސް އެ ހިޔަނި ދިޔައީ ގޯސް ދިމާއަކަށެވެ. އޭނާގެ ޓޯޗުގެ އަލި ހުރީ މައްޗަށް އަމާޒުވެފައެވެ. އަލި ދޯއްޔާއި ސީލިންގާ ދެމެދު އެއްވެސް އެއްޗެއް ނެތެވެ. އެކަމަކުވެސް އެ ހިޔަނި އޭގެ މަތިން ހިނގަމުން ދިޔައެވެ.

އަޒީމް ފަހަތަށް ޖެހުނެވެ. ހިޔަނި ހުއްޓުނެވެ.

މަތިން އަޑެއް ސިއްރުސިއްރުން ގޮވައިލިއެވެ. “އަޒީމް..”

އޭނާގެ ލޭ ފިނިވެގެން ދިޔައެވެ. އޭނާއަށް އެ އަޑު އެނގެއެވެ.

(ނުނިމޭ)