މަރިޔަމަށް ހޭލެވުނުއިރު އެންމެ ފުރަތަމަ އިޙުސާސްވީ ތަދެވެ. އެއީ މުޅި ދުވަހު މަސައްކަތުގައި އުޅުމަށްފަހު ނުބައި ގޮތަކަށް ނިދުމުން ހުންނަ ކަހަލަ އާދައިގެ ތަދެއް ނޫނެވެ. ނުވަތަ ގިނަ ވަގުތު މޭޒެއްގެ ދޮށުގައި އިށީނދެގެން އިނުމުން ކޮނޑަށް އަރާ ފާޑުގެ ތަދެއްވެސް ނޫނެވެ. އެއީ މީހަކު ހޫނު ދަގަނޑު ކޮޅަކުން ބޯހަންގަނޑުގައި ކީހާލުމުން ވާކަހަލަ ދިލަ، ތޫނު ތަދެކެވެ.
ދެން އިވުނީ ބިޒްބިޒް އަޑެކެވެ. މެޝިނެއް ހިނގާ ކަހަލަ މަޑު އަޑެކެވެ.
ބިޒްޒްޒްޒް…
އިރުކޮޅަކަށް މަރިޔަމް އިނީ ދެބަދޭތެރޭގައެވެ. އޭނާއަށް އޮވެވުނީ ކޮންތާކު ކަމާއި، ލޯ މަރައިގެން އޮންނައިރު މިހާ ބިރުގަންނަނީ ކީއްވެގެންކަން ދެނެގަންނަން އޭނާގެ ސިކުނޑި މަސައްކަތް ކުރަމުންދިޔައެވެ. ބޯމަތީގައި ސީލިން ފަންކާ މަޑުމަޑުން އެނބުރެމުން ދެއެވެ. އެއާކޯނުގެ އަޑުވެސް އިވެއެވެ. ބޭރުން ކޮންމެވެސް ދިމާލަކުން، ފަތިސްވާން ކުޑަ ވަގުތުކޮޅަކަށް ވެފައި ވަނިކޮށް ކުކުޅެއް ގޮވާ އަޑު އިވެއެވެ. މި ހުރިހާ ދަންނަ އަޑުތަކެއްގެ ތެރެއިން، މާބޮޑަށް ހޫނުވެފައި ހުރި ޕްލާސްޓިކާއި އިސްތަށި އަނދާ ކަހަލަ އާދަޔާ ޚިލާފު ވަހެއް ދުވިއެވެ.
އެވަގުތު އޭނާގެ ކޯތާފަތުގައި ކޮންމެވެސް އެއްޗެއް ބީހުނުކަން އިޙުސާސްވިއެވެ. އެއީ އޭނާގެ އަމިއްލަ އިސްތަށި ބޮނޑިއެކެވެ.
މަރިޔަމް ލޯ ހުޅުވާލިއެވެ. މީހެއްގެ އަތުން އޭނާގެ ބޯ ބާރަށް ބާލީހުގައި ފިއްތާލައިގެން އޮތެވެ. އޭނާ ތެދުވަން މަސައްކަތް ކުރިއެވެ. ނަމަވެސް އެ އަތުން ކުރިއަށްވުރެ ބާރަށް ފިއްތާލިއެވެ. މަރިޔަމްގެ ހިތް ބާރަށް ތެޅެން ފެށިއެވެ. ހަޅޭއްލަވަން އުޅުނު ނަމަވެސް ބާލީހުގައި މޫނު ޖެހިފައި އޮތުމުން އެ އަޑު ބޭރެއް ނުވިއެވެ.
ދެން އެ ބިޒްބިޒް އަޑު ކެނޑުނެވެ. ބޮލަށް ދެމުންދިޔަ ބާރުވެސް ދޫވިއެވެ. މަރިޔަމް ކުއްލިއަކަށް ތެދުވެ އިށީނެވެ. ވަގުތުން އޭނާގެ އަތް ބޮލަށް ދިޔައެވެ. ބޮލުގެ ދެބައިކުޅަ އެއްބައި އިސްތަށިގަނޑު ވަނީ ވަކިވެފައެވެ. ދިގު ކަޅު އިސްތަށިތައް ހުދު ބެޑްޝީޓް މަތީގައެވެ. ބައެއް އިސްތަށިތައް އެނދުގެ އަރިމަތިން އެލިފައި އޮތްއިރު، އަނެއްބައި އިސްތަށިތައް ކޮޓަރީގެ ތަޅުންގަނޑު މަތީގައި އޮތީ ގަސްތުގައި ހަލާކުކޮށްލާފައިވާ އެއްޗެއްގެ ބައިތަކެއް ފަދައިންނެވެ.
އެނދުގެ އަރިމަތީގައި ހުރީ އޭނާގެ މައިދައިތަ ހަލީމާއެވެ. އޭނާ ހުރީ ނިދާ ހެދުމެއްގައެވެ. އަތުގައި އޮތީ އިސްތަށި ކޮށާ މެޝިނެކެވެ. އިރުކޮޅަކަށް ދެމީހުންކުރެ އެކަކުވެސް ވާހަކައެއް ނުދައްކައެވެ. މަރިޔަމަށް ހުރީ ބަލަހައްޓައިގެންނެވެ. ހަލީމާވެސް ހުރީ ބަލަހައްޓައިގެންނެވެ. ހަލީމާގެ މޫނުމަތިން ބިރުގަތުމުގެ އެއްވެސް ނިޝާނެއް ފެންނާކަށް ނެތެވެ. ދެރަވުމެއް ނުވަތަ މާފަށް އެދުމުގެ އަސަރެއްވެސް ނެތެވެ. އޭނާގެ މޫނުމަތިން ފެންނަނީ، އެހެން މީހަކު އޭނާގެ ބަސްއަހާ މީހަކަށް ހަދާނެ ގޮތެއް އެންމެ ފަހުން ފެނިއްޖެކަމުގެ ހިތްހަމަޖެހުމެވެ.
“ކީއް ތި ކުރީ؟” މަރިޔަމްގެ އަޑު ނުކުތީ ކިރިޔާ އިވޭވަރަށެވެ.
ހަލީމާ އެއްކޮށް މެޝިން ނިވާލިއެވެ. “މީގެ މާ ކުރިންވެސް ކުރަންޖެހިފައި އޮތް ކަމެއް.”
މަރިޔަމް އަނެއްކާވެސް އޭނާގެ ބޮލުގައި އަތްލިއެވެ. އޭނާގެ އިނގިލިތައް ތުރުތުރުލައެވެ. “އަހަރެން ނިދާފައި އޮއްވާ އިސްތަށިގަނޑު ކޮށާލީ؟”
“ތި ނޫން ގޮތެއް ކަލޭ އަހަންނަކަށް ނުބޭއްވި.”
“ގޮތެއް ނުބާއްވައޭ؟” މަރިޔަމް ކުއްލިއަކަށް ތެދުވުމުން ބޯ އަނބުރައިގަތެވެ. “ތިޔަ ބުނަނީ ކީކޭ؟”
ހަލީމާ ކޮޓަރީގެ ދޮރާ ދިމާލަށް ބަލާލުމަށްފަހު އަޑު މަޑުކޮށްލިއެވެ. “މި ގޭގައި އަހަރެންގެ ދަރިފުޅުގެ އަނބިމީހާގެ ގޮތުގައި އުޅެން ބޭނުންނަމަ، މާދަމާ ތިޔަ ވަޒީފާއިން ވަކިވާން ޖެހޭނެ.”
މަރިޔަމް ހުރީ ހައިރާންވެ އަންތަރީސްވެފައެވެ. އެ ބުނި ވާހަކަ ޤަބޫލުކުރަން ދަތިވެގެން، މިއީ ހުވަފެނެއް ބާވައޭ އޭނާގެ ހިތަށް އެރިއެވެ.
ހަލީމާ ކުރިއަށް ގެންދިޔައެވެ. “ލަހުން ގެއަށް އައުން ހުއްޓާލަން ޖެހޭނެ. މީޓިންތަކަށް ކިޔާފައި މާލެއާއި ހުޅުމާލޭގައި ދުވުން ހުއްޓާލަން ޖެހޭނެ. އިރުއޮއްސޭއިރު ފިިިރިހެނުންނާއެކު އޮފީސްތަކުގައި އިށީނދެގެން ތިބުން ހުއްޓާލަން ޖެހޭނެ. ފިރިމީހާ ބަލަހައްޓަން ދަސްކުރަން ޖެހޭނެ.”
މަރިޔަމްގެ އަނގަ ހުޅުވުނެވެ. “އަހަރެން ވަޒީފާއަކަށް ދާތީތަ އަހަރެންގެ ބޯ ބޭލީ؟”
“ކަލޭގެ އިސްތަށިގަނޑު ކޮށާލީ އަނތްބެއްގެ ޒިންމާއަކީ ކޮބައިކަން ކަލޭ ހަނދާން ނެތުމުން.”
އެވަގުތު ކޮޓަރީގެ ދޮރު ހުޅުވުނެވެ. އޭނާގެ ފިރިމީހާ އިސްމާޢީލް ފެންނަން ހުއްޓެވެ. އޭނާއަށް ހޭލެވުނީ އެމީހުންގެ އަޑުގަދަވެގެންކަން ޔަގީނެވެ. އޭނާ ހުރީ ނިދިމޫނާއެކު ކަންބޮޑުވެފައެވެ. ނަމަވެސް މަރިޔަމް ފެނުމާއެކު އޭނާ ހުއްޓުން އެރިއެވެ. އޭނާގެ އަނބިމީހާ އެނދު ކައިރީގައި ހުސްފަޔާ ހުއްޓެވެ. އޭނާ ލައިގެން ހުރީ މީގެ މަދު ގަޑިއިރެއް ކުރިން ބަދަލުކުރި ގޭގައި އުޅޭ ހެދުމެވެ. ބޮލުގެ އެއްފަރާތް އޮތީ ބޭލިފައެވެ. ތަޅުންގަނޑު މަތީގައި އިސްތަށިތައް ފެތުރިފައި އޮތެވެ.
އިސްމާޢީލް ހުއްޓުނެވެ. މަރިޔަމް ހީކުރީ މިވަގުތު އޭނާއަށް ހަޤީޤަތް ވިސްނޭނެ ކަމަށެވެ. އޭނާގެ މަންމައާ ދިމާލަށް ބަލާފައި، މަރިޔަމް އެންމެ އަޑުއަހަން ބޭނުންވި ބަސް ބުނާނެ ކަމަށެވެ. “މަންމަ ތިޔަ ހެދީ ކީއް؟”
ނަމަވެސް އޭނާ ހެދި ގޮތަކީ މޫނު އުނގުޅާލުމެވެ. “މިގަޑީގައި ތިޔަ ދެމީހުން ތިޔަ ހަޅޭއްލަވަނީ ކީއްވެ؟”
މަރިޔަމް އޭނާއަށް ބަލާލިއެވެ. “ކަލޭގެ މަންމަ އަހަރެން ނިދާފައި އޮއްވާ ބޯ ބާލައިފި.”
އިސްމާޢީލް ހަލީމާއަށް ބަލާލިއެވެ. ދެން އަނެއްކާވެސް މަރިޔަމަށް ބަލާލިއެވެ. އެއަށްފަހު ތަޅުންގަނޑަށް ނަޒަރު ހުއްޓާލިއެވެ. އޭނާގެ އެ ހިމޭންކަން، އެ ބިޒްބިޒް އަޑަށްވުރެ މާ ހިތްދަތިވިއެވެ.
“އެއްޗެއް ބުނެބަލަ.” މަރިޔަމް މަޑުމަޑުން ބުންޏެވެ.
މަރިޔަމް އިންތިޒާރު ކުރިއެވެ. އިސްމާޢީލް އެންމެ ފަހުން ފުން ނޭވާއެއް ދޫކޮށްލިއެވެ. “މަންމަ ތިކަން ތިގޮތަށް ކޮށްގެން ނުވާނެ.”
މަރިޔަމްގެ ހިތަށް ކުޑަ އުންމީދެއް ލިބުނެވެ. ނަމަވެސް އޭނާގެ ވާހަކަ ކުރިއަށް ގެންދިޔައެވެ. “އެކަމަކު މަރިޔަމް، މަރިޔަމްގެ ވަޒީފާއާމެދު މަންމަ ހިތްހަމަނުޖެހިފައި ހުންނަތާ ކިހާ ދުވަހެއް؟”
އެ އުންމީދުވެސް ގެއްލިގެން ދިޔައެވެ. “ކަލެއަށް އެނގޭތަ؟”
“މަންމަ ހިތްހަމަނުޖެހިފައި ހުރިކަން އެނގޭ.”
“އަހަރެން ވަޒީފާއިން ވަކިވާން މަންމަ ބޭނުންވާކަންވެސް އެނގޭތަ؟”
“އަހަރެން ހީކުރީ އެކަން ރަނގަޅުވާނެ ކަމަށް.”
“އަދި ކަލޭ އެއްވެސް އެއްޗެއް ނުބުނަން؟”
އިސްމާޢީލް ހުރީ އުނދަގޫވެފައެވެ. “އަހަރެން ބޭނުން ނުވީ އިތުރު މައްސަލައެއް ޖެހެން.”
މަރިޔަމް އޭނާއަށް ބަލަހައްޓައިގެން ހުއްޓެވެ. އެއީ އެތައް އަހަރެއް ވަންދެން ޤަބޫލުކުރަން އޭނާ ބޭނުން ނުވި ހަޤީޤަތް ވިސްނުނު ވަގުތެވެ. އޭނާގެ ފިރިމީހާއަކީ ނުވިސްނޭ މީހެއް ނޫނެވެ. އޭނާއަކީ ހަމައެކަނި އަމިއްލަ އެދުމަށް ފަސޭހަ ގޮތް އިޚްތިޔާރުކޮށްގެން ހުރި މީހެކެވެ. އެ ދެމެދުގައި ތަފާތެއް އެބަހުއްޓެވެ.
ވޭތުވެދިޔަ ގާތްގަނޑަކަށް ހަތަރު އަހަރު ދުވަހު އެ އާއިލާ ކޮޅަށް ޖަހައިދިން މީހަކީ މަރިޔަމެވެ. އޭނާ މަސައްކަތްކުރީ މާލޭގެ ލޮޖިސްޓިކްސް ކުންފުންޏެއްގައެވެ. މުދާ ފޮނުވުމުގެ ކަންކަން ރޭވުމާއި، ކަސްޓަމަރުންނާ މުޢާމަލާތްކުރުމާއި، ރިޕޯޓްތައް ތައްޔާރުކުރުމާއި، މީޓިންތަކުގައި ބައިވެރިވުމާއި، އޮފީސް ގަޑި ނިމޭފަހުން އަންނަ ފޯނުތަކަށް ޖަވާބުދިނުމުގެ އިތުރުން މަސައްކަތް ހުންނަ ގޮތުން މާލެއާއި ހުޅުމާލެއާ ދެމެދު ދަތުރުކުރުމަކީ އޭނާގެ އާދައެވެ.
އޭނާ ވަޒީފާ ފެށީ އެޑްމިނިސްޓްރޭޓިވް އެސިސްޓެންޓެއްގެ ގޮތުގައެވެ. ނަމަވެސް މަޑުމަޑުން އޭނާ ކުރިއަށް ދިޔައެވެ. އިސްމާޢީލް ޓީވީ ބަލަން އިންނަ ވަގުތުތަކުގައި އޭނާ ރޭގަނޑު އޮންލައިން ކޯސްތައް ހެދިއެވެ. ރޭގަނޑުގެ ކެއުން ތައްޔާރުކުރަމުން ދިޔައިރު އޭނާ ދިޔައީ މަސައްކަތުގެ ސްޕްރެޑްޝީޓްތައް ބަލަމުންނެވެ. ހެދުންތައް ފަށްޖަހަން އިންނައިރު އޭނާ ދިޔައީ އޮފީސް އީމެއިލްތަކަށް ޖަވާބު ދެމުންނެވެ. ހަލީމާއަށް ބޭނުންވާ ބާޒާރުކޮށްފައި އައިސް، އޭނާ މީޓިންތަކަށް ދެއެވެ. އެންމެ ފަހުން އެތައް އަހަރެއްގެ ބުރަ މަސައްކަތަށްފަހު އޭނާ އޮޕަރޭޝަންސް މެނޭޖަރުގެ މަގާމަށް ކުރިއެރުވުނެވެ.
އެއީ މާ ބޮޑު މުއްސަނދިކަމެއް ނުވަތަ މަޝްހޫރުކަމެއް ލިބޭ މަގާމެއް ނޫނެވެ. ނަމަވެސް މަރިޔަމަށް އެއީ އޭނާ ހޭލާ ހުރި ކޮންމެ ރޭގަނޑެއްގެ، އޭނާއަށް ކުރިމަތިވި ކޮންމެ ނޫނެކޭ ބުނުމެއްގެ، ފުރިފައި އޮންނަ ފެރީ ދަތުރުތަކާއި، ވަރުބަލިވެފައި ހުރެވެސް ހެނދުނު ހޭލައިގެން ދިޔަ ކޮންމެ ދުވަހެއްގެ ނަތީޖާއެވެ. އަދި އާއިލީ ޒިންމާތައް ހުންނަ މީހަކު އެހާ ބޮޑަށް ކުރިއަށް ދާން އުޅެގެން ނުވާނެ ކަމަށް ބުނި މީހުންނަށް ދިން ރައްދެކެވެ.
އޭނާ ދުވަހަކުވެސް އާއިލާ ދޫކޮށްލާކަށް ބޭނުމެއް ނުވެއެވެ. އޭނާ ބޭނުންވީ އޭނާއަކީވެސް އަމިއްލަ މިނިވަންކަމެއް އޮތް އިންސާނެއްކަން އާއިލާއަށް ވިސްނައިދޭށެވެ.
އެރޭ އޭނާ ގެއަށް އައީ އާދައިގެ ގަޑިއަށްވުރެ ލަހުންނެވެ. އެއީ އޭނާގެ ކުންފުންޏަށް ބޮޑު ކޮންޓްރެކްޓެއް ލިބުމުން، އޮފީސް ކުދިން އޭނާއަށް ސަޕްރައިޒް ކެއުމެއް ދިނުމުންނެވެ. އެތަނުގައި އެއްވެސް ނުބައި ކަމެއް ނުހިނގައެވެ. އޮތީ ހަމައެކަނި ކެއުމާއި، ސައި ބުއިމާއި، މަރުހަބާ ކިޔުމާއި ބައެއް ފޮޓޯ ނެގުމެވެ.
(ނުނިމޭ)
