“ޕާޓީ ޕިލް”

މި ވާހަކައަކީ އެންމެންނަށްވެސް އިވިފައިވާ ވާހަކަތަކެކެވެ. ބައެއް މީހުންނަށް މި ޚަބަރުތައް ފެނިފައިވަނީ ނޫސްތަކުގެ ސުރުޚީތަކުންނެވެ. އަނެއް ބަޔަކަށް ރައްޓެހިންގެ މެދުގައި ދެކެވޭ ސިއްރު ވާހަކަތަކުންނެވެ. އަދި ގިނަ ބަޔަކަށް މިކަން އެނގިފައިވަނީ ދިވެހިންގެ ތެރޭގައި އޮންނަ، އެއް ރަށުން އަނެއް ރަށަށް ހަޤީޤަތް ބެލުމެއްނެތް އަވަސްމިނެއްގައި ފެތުރޭ ދޮގު ޚަބަރުތަކުގެ ތެރެއިންނެވެ.

އޭގެ ތެރޭގައި ރާއްޖެއިން ބޭރުގައި އުޅޭ މުއްސަނދި ޒުވާނުންނާއި، ނުފޫޒުގަދަ އާއިލާތަކާއި، އަގުބޮޑު ޗުއްޓީތަކާއި، އަމިއްލަ ޕާޓީތަކާއި، ނައިޓް ކްލަބްތަކާއި، އަދި މީހުން ގިނަ ގޮނޑުދޮށްތަކާ ދުރުގައި ބާއްވާފައިވާ ލަގްޒަރީ ޔޮޓްތަކުގެ ވާހަކަތައް ހިމެނެއެވެ. މިއީ އެބައެއްގެ އަމިއްލަ ދިރިއުޅުމުގެ ކަންކަން ފަޅާއަރާ ކޮންމެ ފަހަރަކު، އާންމުންގެ މުނިފޫހިފިލުވުމަކަށް އެ މީހުންގެ ނަންތައް ބަދަލުވާ މީހުންނެވެ.

ބައެއް ފަހަރު، މަޝްހޫރު ފަރާތެއްގެ ފޮޓޯއަކުން ޖަވާބަށްވުރެ ގިނަ ސުވާލުތައް އުފެދެއެވެ. އަނެއްބައި ފަހަރު، ފިލްމީ ތަރިއަކު ކުއްލިއަކަށް އާންމުންގެ ލޮލަށް ނުފެނި ދުވަސްކޮޅަކު ހުރެދާނެއެވެ. އެއާއެކު، އެމީހަކު ރާއްޖެއިން ބޭރަށް ކުރި ދަތުރުގައި ކަންތައްވީ ގޮތުގެ އާ އަޑުތަކެއް ފެތުރެން ފަށައެވެ. ބައެއް ފަހަރު އެ ވާހަކަތައް ގުޅެނީ މަސްތުވާތަކެއްޗާއި، ނޭނގޭ އެޕާޓްމަންޓްތަކާއި، ފަޅާއަރާފަދަ ފޮޓޯތަކާއި، ނުވަތަ އާއިލާއަށް ކިޔައިދޭން ދަތި ހާލަތްތަކެއްގައި ތާށިވެފައިވާ މީހުންނާއެވެ.

މި ވާހަކަތަކުގެ ތަފުސީލު ބަދަލުވަނީ އެ ވާހަކައެއް ކިޔައިދޭ މީހަކަށް ބިނާކޮށެވެ.

އެއްބަޔަކު ބުނަނީ އެތަނުގައި ހުރި ރައްޓެއްސަކު ދަންނަ ކަމަށެވެ. އަނެއް ބަޔަކު ބުނަނީ އެއީ އެމީހެއްގެ ތިމާގެ މީހަކަށް ލޮލުން ފެނުނު ކަމެއް ކަމަށެވެ. އަދި ބައެއް މީހުން ސްކްރީންޝޮޓްތަކާއި، މާ ކުރީގެ ފޮޓޯތަކާއި، ނުވަތަ ނޭނގޭ ވެބްސައިޓްތަކުގެ ސުރުޚީތައް ދައްކަނީ، އެ ފޮޓޯއެއް އޮތުމަކީ އެއާ ގުޅިގެން ދެކެވޭ ހުރިހާ ވާހަކައެއްގެ ހަޤީޤަތް ސާބިތުވާ ހެއްކެއް ކަމަށް ދެކިގެންނެވެ.

މި ވާހަކަ އެކަކު އަނެކަކަށް ފޯރާއިރު، އޭގައި ހުރި ޝައްކުތައް ފިލައި، އެއީ ކަށަވަރު ހަޤީޤަތްތަކަކަށް ބަދަލުވެއެވެ. ސިއްރުން ދެކެވޭ ވާހަކަތައް ހެކިތަކަށް ބަދަލުވެއެވެ. އަދި އެކަމުގައި ހިމެނޭ މީހުންނަކީ، ހަޤީޤަތް ނޭނގޭ ބީރައްޓެހިންގެ ކުރިމަތީގައި އާންމު މަލާމާތަކަށް ވެގެންދެއެވެ.

ދެން، މަދު ދުވަސްކޮޅެއްގެ ފޯރިއާއި ރުޅިވެރިކަމަށްފަހު، އެންމެން އަނެއްކާވެސް އާ ވާހަކައަކަށް ސަމާލުކަން އަނބުރާލައެވެ.

މިރުޒާ ގަފޫރަށް މިއީ އާ ކަމެއް ނޫނެވެ. މީހުންގެ ބަދުނަސީބު، މުނިފޫހިފިލުވުމަކަށް ބަދަލުކުރާ މަންޒަރު އޭނާ ބަލަމުން އަންނަތާ އެތައް އަހަރެއް ވެއްޖެއެވެ. އޯގާތެރިކަމަށްވުރެ ކަންކަން އޮޅުންފިލުވުމުގެ ޝައުޤުވެރިކަން ކުރިހޯދާ އަވަސްމިނާއި، ފެތުރޭ އަޑުތަކެއްގެ ސަބަބުން މީހެއްގެ އަބުރު ކިލަނބުވެގެންދާ ފަސޭހަކަމާއި، އަދި ހަޤީޤަތް ހާމަވުމުން އެ ވާހަކަ ފެތުރި މީހުން އެކަން އިސްލާހުކުރަން ބޭނުންނުވާ މިންވަރު އޭނާއަށް ރަނގަޅަށް އެނގެއެވެ.

އޭނާގެ ޝައުޤުވެރިކަން ހުރީ އެފަދަ ވާހަކަތަކަކަށް ނޫނެވެ. ނަމަވެސް އެ ވާހަކަތަކުގެ ފަހަތުގައި އޮންނަ ވިސްނުމަށެވެ.

އާންމުން ރާއްޖެއިން ބޭރުގެ ޕާޓީތަކުގައި ބޭނުންކުރާ މަސްތުވާތަކެތީގެ ވާހަކަ ދައްކަނީ، އެއީ ހަމައެކަނި މުއްސަނދި ދިވެހިންނާއި، މަޝްހޫރު ތަރިންނާއި، އަދި އާންމު މީހަކަށް އަތްނުފޯރާ ފަދަ ތަންތަނުގައި އުޅޭ ނުފޫޒުގަދަ ޒުވާނުންނަށް ޚާއްސަ ކަމެއްގެ ގޮތުގައެވެ. އެމީހުން ހީކުރަނީ އެއީ އަގުބޮޑު ޔޮޓްތަކާއި، ޚާއްސަ ކްލަބްތަކާއި، މަތީ ފަންތީގެ ހޮޓާތަކުގައި، އާންމު ޤަވާއިދުތަކާ ޚިލާފަށް އުޅޭ ބައެއްގެ މެދުގައި ހިނގާ ކަންކަން ކަމަށެވެ.

މިފަދަ ވާހަކަތަކުގެ ސަބަބުން، މިއީ އާންމު އާއިލާތަކުގެ ދިރިއުޅުމާ ވަރަށް ދުރު، ހަޤީޤަތެއް ނެތް ކަމެއްގެ ގޮތުގައި ސިފަވެއެވެ. ނަމަވެސް، މިރުޒާއަށް އެނގޭ ހަޤީޤަތް ތަފާތެވެ. އޭނާ ވަދެގެން ދިޔަ ދުނިޔެއަކީ ހަމައެކަނި މަޝްހޫރު މީހުންނަށް ނުވަތަ މުއްސަނދިންނަށް އޮތް ތަނެއް ނޫނެވެ. އެއީ ހަމައެކަނި އަގުބޮޑު ހެދުންލާ، އަގުބޮޑު ބުއިންތައް ބޯ، ނުވަތަ ޔޮޓްތަކުގައި ޗުއްޓީ ހޭދަކުރާ މީހުންގެ ދުނިޔެއެއް ނޫނެވެ.

ބައެއް ފަހަރު މިކަން ފެށެނީ ބޭސްފަރުވާއަށް ރާއްޖެއިން ބޭރަށް ގޮސް އުޅޭ އާންމު މީހުން ތިބޭ އެޕާޓްމަންޓްތަކުންނެވެ. އަނެއްބައި ފަހަރު، އުނދަގޫ އަހަރެއް ނިންމާލުމަށްފަހު އުފާކޮށްލަން ބޭނުންވާ ރައްޓެހިންގެ ގްރޫޕަކުންނެވެ. ނުވަތަ އެތައް ދުވަހަކު ފައިސާ އެއްކޮށްގެން، އާދަޔާ ޚިލާފު ޗުއްޓީއެއް ހޭދަކޮށްފައި އަންނަން ބޭނުންވާ ޒުވާނުންގެ ކިބައިންނެވެ.

އެމީހުން ދަނީ މަސްތުވާތަކެތި ހޯދާކަށް ނޫނެވެ. އެމީހުން ބޭނުންވަނީ “އަޖުމަބަލާލުމުގެ” ތަޖުރިބާއެކެވެ. އަދި މަސްތުވާތަކެއްޗާއި “ތަޖުރިބާ” އާ ދެމެދު އޮތް ތަފާތު، އެހެން މީހުންނަށްވުރެ ބޮޑަށް މިރުޒާއަށް ވިސްނެއެވެ.

“ތަޖުރިބާ” އަކީ އަޑުއަހާލަން ބިރުވެރި އެއްޗެއް ނޫނެވެ. އެއިން ސިފަކޮށްދެނީ ކެރުމާއި، އާ ކަންކަން ހޯދުމާއި، ހަނދާނުން ފޮހެލަން ދަތި އާދަޔާ ޚިލާފު ކަމެކެވެ. އެއީ އާ ރަށަކަށް ދިއުމާއި، ނުދަންނަ ކެއުމެއްގެ ރަހަ ބަލާލުމާއި، ނުވަތަ އާންމުކޮށް މީހުން ނުދާ ތަންތަނަށް ދިއުން ފަދަ ކަމެކެވެ.

އަމިއްލައަށް ހަލާކުގެ ތެރެއަށް ވަންނަން އެއްބަސްނުވާނެ މީހަކަށް، “ތަޖުރިބާ” އެއްގެ ނަމުގައި ކޮންމެ އެއްޗެއްވެސް ވިއްކާލެވިދާނެއެވެ. މިއީ މިރުޒާ ދަސްކުރި ވިޔަފާރީގެ ބަޔެކެވެ. އަދި މިއީ އޭނާ ނުރައްކާތެރި މީހަކަށް ހަދާ ސަބަބުވެސް މެއެވެ.

*****

“ޕާޓީ ޕިލް” ނުވަތަ ޕާޓީ ބޭހުގެ ނަމަކީ ވަރަށް މައުސޫމް ނަމެކެވެ.

އެ ނަމުން ހީވަނީ އެއީ މިއުޒިކާއި، ނެށުމާއި، އަދި ހާސްކަމެއް ނެތް މަދު ގަޑިއިރުތަކަކަށް ޚާއްސަކޮށް ހަދާފައިވާ އެއްޗެއްހެންނެވެ. ހީވާގޮތުން އެ ކުޑަކުޑަ ގުޅައެއްގެ ބޭރު ފުށަށް ބަލާލުމުން ނުވަތަ އެ ދޭ މީހާގެ ވާހަކަ އަޑުއެހުމުން، އޭގެ ނުރައްކާ އެނގިދާނެއެވެ.

ބައެއް މަސްދަރުތަކުގައި މި ނަން ބޭނުންކުރަނީ އޭގައި ހިމެނޭ މާއްދާތަކާއި، އޭގެ އަސްލާއި، ނުވަތަ އެ ބޭނުން ކުރުމުން ވެދާނެ ގޮތަކާމެދު އެއްވެސް ފަރުވާލެއް ނެތިއެވެ. ނަމަވެސް، އެ ނަމަކީ އެ މާއްދާގެ ސައްޙަކަން ސިފަކޮށްދިނުމެއް ނޫނެވެ.

“ޕާޓީ ޕިލް” ގެ ނަމުގައި ވިއްކާ އެކި ބޭސްތަކުގައި ތަފާތު ކެމިކަލްތައް ހިމެނިދާނެއެވެ. އޭގެ ތެރޭގައި ސިންތެޓިކް މާއްދާތައް ހިމެނެއެވެ. އޭގެ ބާރާއި، ހަށިގަނޑަށް ކުރާ އަސަރުތަކަކީ ލަފާކުރަން ދަތި ކަންކަމެވެ. އެއީ ޤަވާއިދާ ޚިލާފު ބާޒާރުތަކުން ހޯދާ އެއްޗަކަށް ވާތީއެވެ. ވަކި އެއްޗެއްގެ ގޮތުގައި ދޭ ބޭސްގުޅައެއްގައި މުޅިން އެހެން އެއްޗެއް ހުރެދާނެއެވެ. އަދި އެ ބޭސް ދޭ މީހާއަށްވެސް، ބޭނުންކުރާ މީހާއަށްވުރެ އިތުރަށް އޭގެ ނުރައްކަލެއް ނޭނގިދާނެއެވެ.

ދުނިޔޭގެ ނައިޓްލައިފްގައި މަޝްހޫރުވެފައިވާ އެއް ނަމަކީ “މިއާއޮ މިއާއޮ” އެވެ. މިއީ މެފެޑްރޯން ކިޔާ ސިންތެޓިކް މާއްދާއަކަށް ކިޔާ ނަމެކެވެ.

މި ބޭސް ބޭނުންކުރުމުން އާދަޔާ ޚިލާފަށް އުފާވެރިކަން އިޙުސާސްވުމާއި، ހަކަތަ އިތުރުވުމާއި، ގިނައިން ވާހަކަދެއްކުމާއި، އަދި އެހެން މީހުންނާމެދު އޮންނަ ގާތްކަން އިތުރުވާ ކަމަށް ބުނެވޭ އަޑުތަކެއް ވަނީ ފެތުރިފައެވެ. ބައެއް މީހުން ބުނާ ގޮތުގައި މިއީ އަމިއްލަ ނަފްސަށް އޮންނަ އިތުބާރު ބޮޑުވެ، މީހުންގެ ތެރޭގައި އުޅެން ފަސޭހަވެ، އާންމުކޮށް ކަންކަމާމެދު ޖެހިލުންވާ ޖެހިލުންވުން ފިލުވައިދޭ އެއްޗެކެވެ. މިއުޒިކްގެ ރިދަމާއެކު ހަށިގަނޑު ހަރަކާތްކުރަން ބޭނުންވުމާއި، ވާހަކަދައްކަން ފަސޭހަވުމާއި، އަދި ދަންނަ މީހަކަށް ނުވިޔަސް އެމީހަކީ ވަރަށް ގާތް މީހެއްގެ ގޮތުގައި އިހުސާސްކުރެވެން ފަށައެވެ.

ކަންބޮޑުވުންތައް ހަނދާން ނައްތާލަން ބޭނުންވާ މީހަކަށް، ނުވަތަ އެކަނިވެރިކަމުން ސަލާމަތްވާން ބޭނުންވާ މީހަކަށް، ނުވަތަ މީހުންގެ މެދުގައި ބަލައިގަންނަ މީހަކަށް ވާން ބޭނުންވާ މީހަކަށް މިފަދަ އަސަރުތަކަކީ ވަރަށް ބޮޑު ހިތްހަމަޖެހުމަކަށް ވެދާނެއެވެ. ނަމަވެސް މި ތަޖުރިބާއަކީ ލަފާކުރެވޭ ފަދަ ނުވަތަ ނުރައްކަލެއް ނެތް ކަމެއް ނޫނެވެ.

މެފެޑްރޯން ބޭނުންކުރުމުގެ ސަބަބުން ހިތުގެ ތެޅުން އަވަސްވުމާއި، ލޭގެ ޕްރެޝަރު މަތިވުމާއި، ދާހިއްލުމާއި، މޭނުބައިކުރުމާއި، ބިރުގަތުމާއި، ފިކުރުބޮޑުވުމާއި، އަދި ހަށިގަނޑުގެ ހޫނުމިން ނުރައްކާތެރި މިންވަރަކަށް މަތިވުން ފަދަ ކަންކަން މެދުވެރިވެއެވެ. މީގެ އިތުރުން، ބޮޑެތި ވިހަވުންތަކާއި، ފިޓުޖެހުމާއި، އަދި މަރުގެ ހާދިސާތައްވެސް ވަނީ ރިޕޯޓުކުރެވިފައެވެ.

މި ބޭހުގެ އަސަރުތައް އެތައް ގަޑިއިރަކަށް ދެމިގެންދާއިރު، ބޭހުގެ މަސްތުކަން ކެނޑުމުން ނިދިނައުމާއި، މާޔޫސްވުމާއި، ވަރުބަލިވުމާއި، އަދި ނަފްސާނީ ބަލިމަޑުކަން ކުރިމަތިވެދާނެއެވެ. މި އަސަރުތައް ދެމިގެންދާ ވަގުތު ބިނާވަނީ ބޭނުންކުރި މާއްދާއާއި، އެމީހެއްގެ ހަށިގަނޑާއި، އަދި އެހެނިހެން ހާލަތްތަކުގެ މައްޗަށެވެ. އެހެންކަމުން، މިއީ އެއްވެސް ހާލެއްގައި ރައްކާތެރި ތަޖުރިބާއެއް ނޫނެވެ.

ތަކުރާރުކޮށް ބޭނުންކުރުމުގެ ސަބަބުން މިކަމަށް ދެވިހިފާ ގޮތްވެއެވެ. އަދި ފުރަތަމަ ލިބުނު ފަދަ އުފާވެރިކަމެއް ނުލިބުނު ކަމުގައި ވިޔަސް، އެ އިޙުސާސް އަލުން ހޯދުމަށް ބައެއް މީހުން މަސައްކަތް ކުރެއެވެ. މީގެ އިތުރުން، ޕާޓީތަކުގައި ދައުރުވާ ބޭސްގުޅަތަކަކީ އޭގެ އަސްލު މާއްދާ (މެފެޑްރޯން) ހިމެނޭ އެއްޗެއް ކަމުގައި ނުވެދާނެއެވެ. މި ނޭނގުމަކީ ނުރައްކަލުގެ ބައެއް ނަމަވެސް، މިއީ މިއުޒިކް ކުޅެވެމުންދާ ވަގުތު މީހުން ދައްކާ ވާހަކައެއް ނޫނެވެ.

(ނުނިމޭ)