ބޮލީވުޑްގެ މަޤުބޫލު ތަރި ކާތިކް އާރްޔަން އަދި ސައުތު ސިނަމާގެ ޒުވާން ބަތަލާ ސްރީލީލާ އެކުގައި ފެނިގެންދާ އާ ރޮމޭންޓިކް މިއުޒިކަލް ފިލްމު ސިނަމާތަކަށް ގެންނާނެ ތާރީޚު ރަސްމީކޮށް އިޢުލާންކޮށްފިއެވެ. ކުޅަދާނަ ޑައިރެކްޓަރު އަނުރާގް ބާސޫ ޑައިރެކްޓްކުރާ މި ފިލްމު ރިލީޒްކުރުމަށް ހަމަޖެހިފައިވަނީ 30 އެޕްރީލް 2027 ގައެވެ.
ޓީ-ސީރީޒްގެ ބޫޝަން ކުމާރު އަދި ކްރިޝަން ކުމާރު ޕްރޮޑިއުސްކުރާ މި ފިލްމުގެ މިއުޒިކް ތައްޔާރުކުރަނީ މަޝްހޫރު މިއުޒިކް ޑައިރެކްޓަރު ޕްރީތަމް އެވެ. މިއީ ކާތިކް އަދި ސްރީލީލާ އެކުގައި ސްކްރީނުން ފެންނާނެ ފުރަތަމަ ފަހަރެވެ. އަދި މިއީ ފިލްމު “ޕުޝްޕާ 2” ގެ ލަވަ “ކިސިކް” އިން ހިންދީ ސިނަމާގެ ބެލުންތެރިންގެ މެދުގައި ބޮޑު މަޤުބޫލުކަމެއް ހޯދި ސްރީލީލާ ބޮލީވުޑަށް ތައާރަފުވާ ފުރަތަމަ ފިލްމުވެސް މެއެވެ.
އަދި ވަކި ނަމެއް ރަސްމީކޮށް ހާމަކޮށްފައި ނުވި ނަމަވެސް، މި ފިލްމަށް “ތޫ މޭރީ ޒިންދަގީ ހޭ” ކިޔަން އުޅޭކަމުގެ އަޑުތަކެއް ވަނީ ފެތުރިފައެވެ. ފިލްމު އިޢުލާންކުރަމުން ޓީ-ސީރީޒްއިން “އެކްސް” ގައި ކޮށްފައިވާ ޕޯސްޓެއްގައި ބުނެފައިވަނީ، “ހިތުގައި ބިންވަޅު ނެގިގެންދާނެ އާ ވާހަކައެއް ބޮޑު ސްކްރީނަށް ގެނައުމަށް މިހާރު ވަނީ ތައްޔާރުވެފައި” ކަމަށެވެ.
މި ފިލްމުގެ އާ ޕޯސްޓަރުގައި ފެންނަނީ ދަނޑެއްގެ ތެރޭގައި ތަފާތު ކަންޓްރީ ލުކެއްގައި ކާތިކް އިށީނދެގެން އިންނައިރު، އޭނާގެ ކުރިމަތީގައި ސްރީލީލާ އިށީނދެގެން އިންނަ މަންޒަރެވެ.
ރިޕޯޓްތައް ބުނާ ގޮތުގައި، 30 އެޕްރީލް 2027 ގައި މި ފިލްމު ރިލީޒްކުރަން ނިންމާފައިވަނީ އެ ދުވަސްވަރު ބޮލީވުޑްގެ އެހެން ބޮޑު ފިލްމަކާ ކުރިމަތިލާން ނުޖެހޭނެ ފަދަ ސްޓްރެޓެޖިކް ގޮތަކަށެވެ.
މި ފިލްމު ސިނަމާތަކަށް އަންނާނީ، އެސްއެސް ރާޖަމޯލީ ޑައިރެކްޓްކޮށް މަހޭޝް ބާބޫ އަދި ޕްރިޔަންކާ ޗޯޕްރާ ޖޯނަސް ލީޑް ރޯލުން ފެންނަ “ވަރަނާސީ” ރިލީޒްކުރާތާ ގާތްގަނޑަކަށް ތިން ހަފުތާ ފަހުންނެވެ. އެ ފިލްމު ރިލީޒްކުރަން ހަމަޖެހިފައިވަނީ 7 އެޕްރީލް 2027 ގައެވެ. މީގެ އިތުރުން، އެ އަހަރު ދެން އެންމެ އަވަހަށް ރިލީޒްވާނެ ބޮޑެތި ފިލްމުތަކަކީ 14 މެއި 2027 ގައި އެއް ދުވަހެއްގައި ނެރުމަށް ހަމަޖެހިފައިވާ “ލަގް ޖާ ގަލޭ” އަދި ސޯރަވް ގަންގޫލީގެ ބަޔޯޕިކް “ދާދާ” އެވެ.
