ފިލްމުގެ ޕްރިމިއަރ ނައިޓުގައި “މަޖުނޫން” ބެލުމުގެ ފުރުޞަތު ލިބުމަކީ ވަރަށް ބޮޑު އުފަލެއް ކަމަށާއި، އެއީ ވަރަށް ހިތްގައިމު ތަޖުރިބާއެއް ކަމަށް ކައިލީން ބުނެފައިވެއެވެ. އޭނާ ފާހަގަކުރި ގޮތުގައި މި ފިލްމަކީ ނަހުލާގެ ލިޔުންތެރިކަމުން އުފަންވި އެންމެ ފުރިހަމަ ކެރެކްޓާތައް ފެނިގެންދިޔަ އެއް ފިލްމެވެ. އަދި އެ ތަރިންގެ ފުރިހަމަ އެކްޓިންގެ ސަބަބުން އެ ކެރެކްޓާތައް ވަރަށް ފުރިހަމައަށް ދައްކުވައިދީފައިވާ ކަމަށް އޭނާ ބުންޏެވެ.

ޚާއްޞަކޮށް، އެވްލީ އަދި ލާލީ ވަރަށް އުނދަގޫ ދެ ރޯލު އެއްވެސް މަސައްކަތަކާ ނުލައި ފަސޭހަކަމާއެކު އަދާކޮށްފައިވާ ކަމަށް ބުނެ އޭނާ ވަނީ ތަޢުރީފުކޮށްފައެވެ. މީގެއިތުރުން، ކުޑަ އާޔަންގެ ރޯލުން ފެނިގެންދިޔަ މާޒްގެ ޖަޒުބާތީ އެކްޓިންގ އަދި ލޯބިލޯބި ޔޫކާ ސްކްރީނުން ފެނުމުން އޭނާއަށް ކުރެވުނު ފަޚުރުވެރި އިޙްސާސް ކައިލީން ހާމަކުރިއެވެ.

ފިލްމުގައި ހިމެނޭ އެހެން ތަރިން ކަމަށްވާ ޝާރިފް، ޝިފާ، ވާޝިޔާ އަދި ސާމީ ޙުސައިން ދީދީ ވެސް އެމީހުންގެ ރޯލުތަކަށް ފުރިހަމައަށް އިންސާފުކޮށްފައިވާ ކަމަށާއި، ޑރ. ނާޝްގެ ރޯލުން ނާޝް ސިނާން ފެނިގެންދިއުމަކީ ލިބުނު ވަރަށް ރަނގަޅު ހައިރާންކަމެއް ކަމަށް ކައިލީން ފާހަގަކުރިއެވެ.

މަންޒަރުތަކުގެ ފުރިހަމަކަމަށް އަލިއަޅުވާލަމުން ކައިލީން ބުނީ، މިއީ ބަލާލަން ވަރަށް ޗާލު ފިލްމެއް ކަމަށާއި، ޚާއްޞަކޮށް ފިލްމުގެ ދެވަނަބައި ރަށުތެރޭގައި ޝޫޓްކޮށްފައިވުމުން ފިލްމުގައި ހުރި ބިރުވެރި އަދި ލޭއޮހޮރުވުންތައް ގިނަ މަންޒަރުތަކަށް ބޮޑު ހަމަޖެހުމެއް ގެނެސްދިން ކަމަށެވެ. އަދި ފިލްމުގެ ސަސްޕެންސްގެ ސަބަބުން ބައެއް މަންޒަރުތަކުގައި ގޮނޑިން ތެދުވެވޭ ވަރުވި ކަމަށްވެސް އޭނާ ބުންޏެވެ.

ޖުމްލަކޮށް ބަލާއިރު، “މަޖުނޫން” އަކީ ކޮންމެހެންވެސް ބަލާލަންޖެހޭ ފެންވަރު ރަނގަޅު މޮޅު ފިލްމެއް ކަމަށް ބުނެ ކައިލީން ވަނީ އޭނާގެ ރިވިއު ނިންމާލާފައެވެ.

ކައިލީން އަކީ ފިލްމު ޕްރޮޑަކްޝަންގެ ދާއިރާއަށް މަޑުމަޑުން ވަންނަމުން އަންނަ ޒުވާން ފަންނާނެކެވެ. ދާދިފަހުން ކުރު ފިލްމެއްގައި އެކްޓިން އިންވެސް އޭނާ ފެނިގެންގޮސްފައިވެއެވެ.