ކުއްލި މެހުމާން
ކަންތައްތައް ފެށިގެން އައީ ހީކަރުވައިގަތުމަކުންނެވެ. އޭގެ ފަހުން އަތް ތުރުތުރުލުމާއި، ލޯ ފުސްވުމުގެ އިތުރުން، އެއްވެސް އިންޒާރެއް ނެތި މުޅި ހަށިގަނޑަށް އަރައިގެންދާ ތޫނު ތަދުތަކެއް އިޙުސާސްވާން ފެށިއެވެ.
ވަޝިއްޔާ އެނދުގެ އަރިމަތީގައި އިށީނދެގެން އިނީ، އަންނަމުންދިޔަ އުނދަގޫތަކަށް ކެތްކުރަމުން، ގޮދަޑީގައި ބާރަށް ހިފަހައްޓައިގެންނެވެ. އޭނާއަށް މިވަނީ ކީއް ހެއްޔެވެ؟ ފަހަރުގައި އެއީ އެ ބޭނުންކުރާ މަސްތުވާތަކެތީގެ ސަބަބުން ވާގޮތެކެވެ. އިންޖެކްޝަން ޖަހާ ވަގުތުތަކުގެ ދެމެދުގައިވާ ދުރުމިން މިހާރު ވަނީ ކުރިއަށްވުރެ ދިގުވެފައެވެ. އޭނާ ހައްޔަރުކޮށްގެން ތިބި މީހުން ގަސްތުގައި އެކަން ލަސްކުރަނީ ކަމަށް ބެލެވެއެވެ. އޭނާ ނުތަނަވަސްވެ، ބޭނުންވެފައިވާ އެއްޗަކަށް ކެތްމަދުވާ މިންވަރު ބަލަން އެމީހުން ބޭނުންވަނީއެވެ. އެމީހުން ގަސްތުގައި އޭނާއަށް އަދަބު ދީ ތަޅުވަނީއެވެ. އޭނާ އިންތިޒާރު ކުރުވަނީއެވެ. ވަޝިއްޔާ ލައްވާ އާދޭސް ކުރުވަން ބޭނުންވަނީއެވެ.
އަހަރެން އާދޭސް ކުރާނަން ހެއްޔެވެ؟ ވަޝިއްޔާގެ ހިތަށް އެރިއެވެ. އެ ސުވާލުގެ ޖަވާބު ވަގުތުން ލިބުނެވެ. އާނއެކެވެ. އަހަރެން އާދޭސް ކުރާނަމެވެ. އަތް ތުރުތުރުލުމަށްވުރެ ބޮޑަށް، އެ އިޙުސާސްވީ ހަޤީޤަތުން އޭނާ ބިރުގަތެވެ.
ފާއިތުވެގެން ދިޔައީ ދުވަސްތަކެއް ކަމެއް ނުވަތަ މަސްތަކެއް ކަމެއް މިހާރު އޭނާއަކަށް ނޭނގެއެވެ. އެންމެ ފަހުން ސިކުނޑި ހަމަޖެހިފައި ހުރި ވަގުތެއް، ނުވަތަ ބިރުވެރި ހުވަފެނަކާނުލައި ނިދާލެވުނު ރެއެއް، ނުވަތަ ދެން ވާނީ ކިހިނެއްބާއޭ ހިތަށް ނާރައި ހޭލެވުނު ދުވަހެއް އޭނާ ހަނދާނެއް ނެތެވެ. ވަޝިއްޔާއަށް އެނގޭހާވެސް އެއްޗަކީ، އޭނާ ކޮންޓްރޯލް ކުރުމަށް އެމީހުން ބޭނުންކުރާ މަސްތުވާތަކެއްޗަށް އޭނާ މުޅިން ދެވިހިފާފައިވާ ކަމެވެ.
ބައެއް ފަހަރު، ސިކުނޑި ކުޑަކޮށް ސާފުވާ ވަގުތުތަކުގައި، އެތަނުން ފިލުމަށް އޭނާ ވިސްނައެވެ. އެ އިމާރާތުގެ ކޮރިޑޯތަކުގެ ތެރޭގައި ދުވެފައި ގޮސް، ތަޅުނުލާ ހުރި ދޮރެއް ހޯދައި، އެހީއަށް އެދި ހަޅޭއްލަވައި، ކޮންމެވެސް ގޮތަކުން ފުލުސް އޮފީހަކާ ހަމައަށް ދެވޭނެކަމަށް އޭނާ އުންމީދުކުރެއެވެ. އަދި ބައެއް ފަހަރު މާ ނާއުންމީދީ ޚިޔާލުތައް އޭނާގެ ހިތަށް ވަދެއެވެ. މި ހުރިހާ ތަކުލީފަކުން ސަލާމަތްވުމަށް އޮތް ހަމައެކަނި މަގަކީ އަމިއްލައަށް މަރުވުންބާއޭ އޭނާގެ ހިތަށް އަރައެވެ.
ނަމަވެސް އޭނާގެ ހަރަކާތްތަކާއި ޚިޔާލުތަކާ އެއްވެސް ގުޅުމެއް ނެތް ކަހަލައެވެ. ހަނގުރާމަކުރަން އޭނާ ހިތަށް އެރި ނަމަވެސް، އިނދެވުނު ތަނުން ގުޑައެއް ނުލެވެއެވެ. ހަޅޭއްލަވަން ބޭނުންވިޔަސް، އޭނާއަށް ހުރެވެނީ ފާރަށް ބަލަހައްޓައިގެން ހިމޭނުންނެވެ. ފަހަރުގައި މިއީ ދެވިހިފުމުގެ ނަތީޖާއެވެ. މީހެއްގެ ނަފްސާނީ އަދި ޖިސްމާނީ ބާރު އެހާ ބޮޑަށް ދަށްކޮށްލުމުން، އަމިއްލަ ނަފްސު ސަލާމަތްކުރުމުގެ ޝައުޤުވެސް ކެނޑިގެން ދަނީކަމަށް ވެދާނެއެވެ. އެހެންނަމަވެސް، އެ އާރެއް ބާރެއް ނެތް ހަށިގަނޑުގެ ކޮންމެވެސް ހިސާބެއްގައި ވަޝިއްޔާގެ އަސްލު ސިފަ އަދިވެސް އެބަހުއްޓެވެ.
އޭނާގެ ނޯޓުފޮތް އޭނާ ބޭނުންވެއެވެ. އެމީހުން އޭނާގެ ކުރިމައްޗަށް ގެނެސްދޭ އަގުބޮޑު ހެދުންތަކާއި، ސެންޓާއި، އެހެނިހެން ތަކެއްޗަށްވުރެ ބޮޑަށް، އޭނާ ކުރިން ހުރިހާ ކަމެއް ނޯޓުކުރި އެ ކުޑަ ފޮތް އޭނާ ބޭނުންވެއެވެ. ސިކުނޑި ސާފުކޮށް ހުރި ވަގުތެއްގައި، ހަނދާން ހުރި ކަންތައްތައް ލިޔަން އޭނާ ބޭނުންވެއެވެ. ނަންތަކާއި، ސޫރަތަކާއި، ދެކެވުނު ވާހަކަތަކެވެ. އަދި އެ އިމާރާތް ފަރުމާކޮށްފައިވާ ގޮތެވެ. އޭނާ ހޯދަން އަންނަ މީހަކަށް އެހީތެރިވެދޭނެ ކޮންމެ ކަމެކެވެ.
ވަޝިއްޔާ ހަޅޭއްލަވަން ބޭނުންވެއެވެ. ދަންނަ އަޑެއް އަހާލަން ބޭނުންވެއެވެ. އޭނާ ވަކިވެގެން އައި ދުނިޔެއާ އަލުން ގުޅެން ބޭނުންވެއެވެ. އެންމެން އޭނާގެ މަތިން އުންމީދު ކަނޑާލީ ހެއްޔެވެ؟ އޭނާގެ ރަހުމަތްތެރިން އެނބުރި ޤައުމަށް ދިޔައީ ހެއްޔެވެ؟ އޭނާގެ އާއިލާއިން އޭނާގެ ޚަބަރު ހޯދުން ހުއްޓާލީ ހެއްޔެވެ؟ ކަމާބެހޭ ފަރާތްތަކުން އޭނާގެ މައްސަލަ ބަންދުކުރީ ހެއްޔެވެ؟ އެއްވެސް މީހަކު އޭނާ ހޯދަން ނާންނަނީ ކީއްވެ ހެއްޔެވެ؟ އަދި މިހާ ގިނަ ދުވަސް މިވަނީ ކީއްވެ ހެއްޔެވެ؟
*****
އެ ބޮޑު ބަދަލު އައީ އެއްވެސް މީހަކު އުންމީދު ނުކުރާފަދަ ކުއްލި ގޮތަކަށެވެ. އެ ދުވަހު އެ ތަނުގެ ތެރެ ފެންނަނީ އާދަޔާ ޚިލާފަށް ބިޒީކޮށެވެ. މުވައްޒަފުން އެކި ކޮޓަރިތަކަށް ވަދެ ނިކުމެ އުޅެއެވެ. ސިޓިންގްރޫމުގައި ތާޒާ މާބޮނޑިތައް އަތުރާފައި ހުއްޓެވެ. ވަޝިއްޔާގެ ރީތިކަމުގެ ކަންކަމާ ހަވާލުވެގެން ހުންނަ އަންހެން މީހާ ހުރީ ވަރަށް ބޮޑަށް ކެތްތެރިކަން ކުޑަވެފައެވެ.
“ތައްޔާރުވޭ. ވަރަށް މުހިންމު މެހުމާނަކު އެބަ އާދޭ.”
ވަޝިއްޔާ އިސްއުފުލާލީ ކިރިޔާއެވެ. “ކާކު؟”
“ވަރަށް މުހިންމު މީހެއް. މާ ގިނަ ސުވާލު ނުކުރޭ.”
އޭނާގެ އިސްތަށިގަނޑު ދޮވެ ރީތިކޮށް ބްލޯޑްރައިކޮށް ސްޓައިލް ކުރިއެވެ. އެނދުމަތީގައި ވަނީ ވަރަށް ބަލައިގެން ހޮވާފައިވާ ހެދުމެއް ބާއްވާފައެވެ. އޭގެ ފަހުން މޭކަޕްކޮށް، ސެންޓު ޖެހިއެވެ. ދެން އުސް ހައި ހީލްސްއެއް ޚިޔާރުކުރެވުނެވެ. އެ އަންހެން މީހާ، ވަޝިއްޔާގެ ސިފައަށް ދެ ފަހަރަކު ބަލައިލުމަށްފަހު ހިތްހަމަޖެހޭކަން ހާމަކުރިއެވެ.
“މިއަދު މަޑުކުރަންވާނީ މައި ސިޓިންގްރޫމުގައި. އެކި ތަންތަނަށް ހިނގާބިނގާވެ ނޫޅޭތި.”
ވަޝިއްޔާ ބޯޖަހާލިއެވެ. ސުވާލު ކުރުމަކުން ޖަވާބު ނުލިބޭނެކަން އޭނާއަށް ވަނީ ދަސްވެފައެވެ.
އިރުއޮއްސެންވީއިރު، ޖެހިގެން ހުރި ކޮޓަރިއަށް ގިނަ އަދަދެއްގެ އަންހެނުން އެއްވެއްޖެއެވެ. ބައެއް މީހުން ހީނ ސަމާސާ ކުރަމުންދިޔައިރު، އަނެއް ބަޔަކު ފޯނުތަކާ ކުޅެން ތިއްބެވެ. އަދި އޭގެ ކުރިން އައިސް ތިބި މީހުންނަށް ބައެއް އަންހެނުން ތައާރަފުކޮށްދެމުން ދިޔައެވެ.
ވަޝިއްޔާ އިނީ އެމީހުންގެ ތެރޭގައި މަޑުމަޑުންނެވެ. ކުއްލިއަކަށް މުޅި މާހައުލު ބަދަލުވެގެން ދިޔައެވެ. އަގުބޮޑު ކަޅު ކުލައިގެ ކާރެއް ބޭރުގައި މަޑުކޮށްލިއެވެ. ފުރަތަމަ އެތެރެއަށް ވަނީ ދެ ފިރިހެނުންނެވެ. އޭގެ ފަހުން ވަން ތިންވަނަ މީހާ، އެ ތަނުގެ މެނޭޖަރާ ކުރުކޮށް ވާހަކަދެއްކިއެވެ. އެ މީހުން އައުމުން އެންމެންގެ ސަމާލުކަން އެކަމަށް ހުއްޓުނެވެ. ދެކެވެމުންދިޔަ ވާހަކަތައް މަޑުޖެހިލިއެވެ. މުވައްޒަފުން އެމީހުންގެ ހެދުންތައް ރީތިކޮށްލިއެވެ. ވަޝިއްޔާއާމެދު އާދައިގެ ގޮތަކަށް ކަންތައްކުރާ އަންހެން މީހާގެ އުޅުންވެސް ވަރަށް ބޮޑަށް އަދަބުވެރިވެގެން ދިޔައެވެ.
އެ މެހުމާނު އަތުވެއްޖެއެވެ. އޭނާއަކީ އާދައިގެ ކަސްޓަމަރެއް ނޫނެވެ. އޭނާއަކީ މުއްސަނދި، ނުފޫޒުގަދަ އަދި އޭނާގެ ބޭނުންތަކަށް އެހެން މީހުންގެ ތާވަލުތައް ބަދަލުކުރުމަށް އާދަވެފައިވާ މީހެކެވެ. އޭނާގެ ނަމަކީ ބައެއް ދާއިރާތަކުގައި ބޮޑު ނަމެކެވެ. އެ ތަން ހިންގާ މީހުން ތިބީ އޭނާ ރުއްސުމަށް ވަރަށް ބޮޑަށް ތައްޔާރުވެގެންނެވެ.
ޖާބިރު ރަޙްމާން، އޭނާ ސިޓިންގްރޫމަށް ވަދެގެން އައީ، ދުވަހަކުވެސް ކަމަކަށް “ނޫނެކޭ” ބުނާ އަޑު އަހާފައި ނުވާ ފަދަ ސާބިތުކަމަކާއެކުގައެވެ. އޭނާ ލައިގެން ހުރީ އާދައިގެ ނަމަވެސް އަގުބޮޑު ސޫޓެކެވެ. އަތުކުރީގައި އޮތީ އަގުބޮޑު ގަޑިއެކެވެ. އޭނާގެ މޫނުމަތިން މާ ބޮޑު އަސަރެއް ފާޅެއް ނުވެއެވެ. އޭނާ މެނޭޖަރާ ސަލާމްކޮށް، އޭނާއާއެކު އައި މީހުންނާ ބައެއް ވާހަކަދައްކައި، ފިނި ކޮކްޓެއިލްއެއް ބޯން ފެށިއެވެ.
“މިރޭ ޚާއްސަ ކަމެއް ބޭނުންތޯ؟” މެނޭޖަރު އެހިއެވެ.
ޖާބިރު މުޅި ކޮޓަރިއަށް ނަޒަރު ހިންގާލިއެވެ. “އާނ.. ތަފާތު ކުއްޖެއް.”
މެނޭޖަރު ހިނިތުންވެލިއެވެ.
“އަޅުގަނޑުމެންގެ ތެރޭގައި ވަރަށް ގިނަ އާ މޫނުތައް އެބަތިބި.”
“އާދައިގެ ގޮތަކަށް ހުންނަ ކަންކަމަކަށް އަހަރެންގެ ޝައުޤުވެރިކަމެއް ނެތް.”
އޭނާގެ ދެލޯ، ސިޓިންގްރޫމުގައި ތިބި އަންހެނުންނަށް އަމާޒުވިއެވެ. އެކަކު ފަހަތުން އަނެކަކު އޭނާއަށް ތައާރަފުކޮށްދެމުން ދިޔައެވެ. އޭނާ މާ ބޮޑު ޝައުޤުވެރިކަމެއް ނެތި އަޑުއަހަން ހުއްޓެވެ. ބައެއް ފަހަރު ސުވާލެއް ކޮށްލުމަށްފަހު ކުރިއަށް ދެއެވެ. މެނޭޖަރު ދިޔައީ އޭނާގެ މެހުމާނު ހިތްހަމަޖައްސައިދިނުމަށް އެކި ގޮތްގޮތުން މަސައްކަތް ކުރަމުންނެވެ.
އެ ވަގުތު ޖާބިރަށް ވަޝިއްޔާ ފެނުނެވެ. އޭނާ އިނީ އެހެން މީހުންނާ ތަންކޮޅެއް ދުރުގައި، އަތްތިލަ އުނގުމަތީގައި ބާއްވައިގެންނެވެ. އެހެން އަންހެނުންނާ ޚިލާފަށް، އޭނާ އެއްވެސް މީހެއްގެ ސަމާލުކަން ހޯދާކަށް މަސައްކަތެއް ނުކުރެއެވެ.
“އެއީ ކާކު؟” އޭނާ އެހިއެވެ.
މެނޭޖަރުވެސް އެ ދިމާލަށް ބަލައިލިއެވެ. “ވަޝިއްޔާ.”
“އޭނާއަކީ އާ މީހެއްތަ؟”
“ތަންކޮޅެއް އާ.”
ޖާބިރު އިރުކޮޅަކު އޭނާއަށް ބަލަން ހުއްޓެވެ. “އޭނާ މިތަނަށް ގެނޭ.”
މެނޭޖަރު ކުޑަކޮށް ޖެހިލުންވިއެވެ. “އޭނާ އެހެން ކުދިންނާ ތަންކޮޅެއް ތަފާތުވާނެ.”
ޖާބިރު އޭނާއަށް ބަލައިލިއެވެ. “އަހަންނަށް އޭނާ ފާހަގަވީވެސް އެހެންވެ.”
އެ އަންހެން މީހާ ވަޝިއްޔާގެ ކައިރިއަށް ގޮސް ބުންޏެވެ. “އާދޭ. މެހުމާނު އިޚުތިޔާރުކުރީ ކަލޭ.”
ވަޝިއްޔާ އިސްއުފުލާ ބަލައިލިއެވެ. “އަހަރެން؟”
“އާނ. ހިނގާ ދާން.”
އޭނާ މަޑުމަޑުން ތެދުވިއެވެ. ކޮޓަރީގެ އަނެއް ފަރާތުގައި ހުރެގެން ޖާބިރު އޭނާ އަންނަތަން ބަލަން ހުއްޓެވެ. އޭނާގެ މޫނުމަތިން ފެންނަނީ ކޮންމެވެސް ވަރެއްގެ ޝައުޤުވެރިކަމެކެވެ.
“ވަޝިއްޔާ.” އެ ނަން ކިޔާލަމުން ޖާބިރު ބުންޏެވެ.
ވަޝިއްޔާ ބޯޖަހާލިއެވެ.
“އަހަރެން މިއީ ކާކުކަން އެނގޭތަ؟”
ވަޝިއްޔާ ނޫނެކޭ ބުނުމުގެ ގޮތުން ބޯހޫރާލިއެވެ. އެރޭގެ ތެރޭގައި ފުރަތަމަ ފަހަރަށް ޖާބިރު ހިނިތުންވެލިއެވެ.
“ތިއީ ވަރަށް ތަފާތު އާދަޔާ ޚިލާފު ކަމެއް.. ދިވެއްސެއް ހަމަ އެއީ؟”
މެނޭޖަރު އަދަބުވެރިކަމާއެކު ހީނލިއެވެ.
“އޭނާ މިތަނަށް އައިތާ މާ ގިނަ ދުވަހެއް ނުވޭ.”
ޖާބިރު އޭނާގެ ނަޒަރު ވަޝިއްޔާގެ މޫނަކުން ވަތްކެއް ނުކުރެއެވެ.
“ރަނގަޅު. އަހަންނަށް ކަމުދަނީ އަހަރެން އެނގޭކަމަށް ހެދިގެން ނޫޅޭ މީހުން.”
ވަޝިއްޔާ އިސްދަށަށް ޖެހިއެވެ. އެއީ ކާކު ކަމެއް، އޭނާ ބޭނުންވަނީ ކޮން ކަމެއް ކަމެއް، ނުވަތަ އޭނާ އައުމުން އެންމެން އެހާ ބޮޑަށް ހާސްވެގެން އެ އުޅެނީ ކީއްވެގެން ކަމެއް ވަޝިއްޔާއަކަށް ނޭނގެއެވެ. އޭނާއަށް އެނގޭހާވެސް ކަމަކީ، ކުއްލިއަކަށް އެންމެން އޭނާއަށް މުހިންމު ސަމާލުކަމެއް ދޭން ފަށައިފިކަމެވެ. އަދި އެފަދަ ތަނެއްގައި، އެހާ ބޮޑު ސަމާލުކަމެއް ލިބުމަކީ އާންމުކޮށް ރަނގަޅު ކަމެއް ނޫނެވެ.
(ނުނިމޭ)
