ކަރަންޓު ފުނައަކީ އިސްތަށި ފޭބުމުގެ މައްސަލައަށް އޮތް އައު ހައްލަކަށް ވެދާނެ ހެއްޔެވެ؟ ސައިންސްވެރިން ވަނީ “ޑިޓެންގަލް” ގެ ނަމުން ނަންދެވިފައިވާ ތަޖުރިބާގެ އާލާތެއް އުފައްދާފައެވެ. މި އާލާތް ބޭނުންކޮށްގެން، އިސްތަށި ފައިބާފައިވާ މީދާތަކެއްގެ ބޯ، އެންމެ 28 ދުވަހުގެ ތެރޭގައި ގާތްގަނޑަކަށް ސަތޭކައަކުން ސަތޭކަ އިންސައްތަ ވަނީ އިއާދަކޮށްދީފައެވެ.

3 ނޮވެމްބަރު 2026 ގައި “ނޭޗަރ ކޮމިއުނިކޭޝަންސް” ސައިންޓިފިކް ޖާނަލްގައި ޝާއިޢުކޮށްފައިވާ މި ހޯދުންތަކަކީ، އާންމުކޮށް ފިރިހެނުންނާއި އަންހެނުންނަށް ދިމާވާ ބޯތަލަވުމުގެ މައްސަލަ ނުވަތަ “އެންޑްރޯޖެނެޓިކް އެލޮޕީޝިއާ” އަށް ފަރުވާކުރުމަށް ހޯދުނު އުންމީދީ ކުރިއެރުމެކެވެ.

ޗައިނާގެ ބެއިހަންގް ޔުނިވަރސިޓީގެ ދިރާސާވެރިންނާއި އެހެނިހެން މުއައްސަސާތައް ގުޅިގެން އުފެއްދި މި “ޑިޓެންގަލް” ފުނައަކީ އާދައިގެ އިލެކްޓްރިކް ފުނައަކަށްވުރެ މާ ފަރުމާ ފުރިހަމަ އެއްޗެކެވެ. މީގައި ބޭނުންކޮށްފައިވާ ޚާއްސަ އިލެކްޓްރޯޑްތަކުން އުފައްދާ އިލެކްޓްރިކަލް ފީލްޑްގެ އެހީގައި، ބޭނުންކުރާ ފަރުވާގެ މާއްދާތައް އިސްތަށި ފަޅާ ވަޅުތަކުގެ (ހެއަރ ފޮލިކްލްސް) އެންމެ ފުނަށް ފޯރުކޮށްދެއެވެ.

މި އާލާތް މަސައްކަތްކުރަނީ ކިހިނެއް؟

މި ޓެކްނޮލޮޖީ މެދުވެރިކޮށް، އިސްތަށި ފޭބުމަށް މެދުވެރިވާ ތަފާތު ސަބަބުތަކަށް އަމާޒުކޮށް ދެ ބާވަތެއްގެ މާއްދާ ފޯރުކޮށްދެއެވެ.

ފުރަތަމަ މާއްދާއަކީ “ވީއީޖޭއެފްއޭ- އެންކޯދިންގް ޕްލާސްމާ” އެވެ. މީގެ މަޤުސަދަކީ އައު ލޭނާރުތައް އުފެއްދުމަށް ބާރުއަޅައި، އިސްތަށި ފަޅާ ވަޅުތަކުގެ ވަށައިގެން ލޭ ދައުރުވުން ރަނގަޅުކުރުމެވެ. ދެވަނަ މާއްދާއަކީ “އެސްއާރުޑީފައިވްއޭ2- ޓަލާގެޓިންގް އެސްއައިއާރުއެންއޭ” އެވެ. މީގެ ބޭނުމަކީ އިސްތަށި ފަޅާ ވަޅުތައް ހަނިވުމަށް މެދުވެރިވާ ހޯރމޯންގެ ނުފޫޒު ކުޑަކުރުމެވެ.

މި ދެ ގޮތް އެކުލަވާލުމުން، ދިރާސާވެރިން އުންމީދު ކުރަނީ ހޯރމޯންގެ މައްސަލަތަކަށް ހައްލު ހޯދައިދިނުމާއެކު، އިސްތަށި ފަޅާ ވަޅުތަކުގެ ދުޅަހެޔޮކަން އިތުރުކުރުމަށެވެ.

ތަޖުރިބާއިން ދެއްކީ ކޮން ނަތީޖާއެއް؟

މީދާ ބޭނުންކޮށްގެން ކުރި މި ދިރާސާގައި، 28 ދުވަހުގެ ތެރޭގައި ކޮންމެ ތިން ދުވަހަކުން އެއް ދުވަހު ފަރުވާ ދެވުނެވެ. އާންމުކޮށް ބޭނުންކުރާ “މިނޮކްސިޑިލް” ބޭހުން %70 އިސްތަށި ފެޅިއިރު، މި ފުނައިން ފަރުވާ ދިން ސަރަހައްދުގައި ގާތްގަނޑަކަށް %100 އިސްތަށި ވަނީ އަލުން ފަޅާފައެވެ.

މީގެ އިތުރުން، ފަރުވާ ދެވުނު ހަންގަނޑުގައި އިސްތަށި ފަޅާ ވަޅުތަކުގެ އަދަދު އިތުރުވެ، ލޭ ދައުރުވުން ރަނގަޅުވެފައިވާކަންވެސް ދިރާސާވެރިންނަށް ފާހަގަކުރެވުނެވެ.

މި ނަތީޖާތަކުން ދޭހަވަނީ، ކަރަންޓުގެ އެހީގައި ފަރުވާ ފޯރުކޮށްދިނުމުން، ހަންގަނޑުގައި އުނގުޅާ އާދައިގެ ބޭސްތަކަށްވުރެ މާ ފައިދާހުރި ގޮތެއްގައި ބޭހުގެ މާއްދާތައް އިސްތަށި ފަޅާ ވަޅުތަކާ ހަމައަށް ފޯރުކޮށްދެވޭނެ ކަމެވެ.

ކުރިއެރުމެއް، ނަމަވެސް އަދި މުޅި ހައްލެއް ނޫން

މި ހޯދުންތަކަކީ ހައިރާންކުރުވަނިވި ހޯދުންތަކަކަށް ވީނަމަވެސް، މުހިންމު ކަމެއް ފާހަގަކުރަން ޖެހެއެވެ. އެއީ މި ޓެކްނޮލޮޖީ އަދި ތަޖުރިބާކޮށްފައިވަނީ ހަމައެކަނި މީދަލުގައި ކަމެވެ. އިންސާނުންގެ ހަށިގަނޑުގައި މި އާލާތް އަދި ޓެސްޓުކޮށްފައި ނުވާތީ، މީގެ ނަތީޖާ އިންސާނުންނަށް ކުރާނެ މިންވަރާއި، ދިގު މުއްދަތުގައި މީގެ ސަލާމަތްތެރިކަމާއި، ކުރިމަތިވެދާނެ ނޭދެވޭ އަސަރުތަކެއް އަދި ނޭނގެއެވެ. އަދި އިންސާނުންގެ އިސްތަށި ފަޅާ ވަޅުތައް މަސައްކަތްކުރާ ގޮތް، ލެބޯޓްރީގައި ގެންގުޅޭ ޖަނަވާރުތަކާ ތަފާތުވުމަކީވެސް އެކަށީގެންވާ ކަމެކެވެ.

ބޯ ތަލަވުމާއި އިސްތަށި މަދުވުމުގެ މައްސަލަ ތަހައްމަލުކުރަމުންދާ މިލިއަނުން ބަޔަކަށް، މި ދިރާސާއަކީ އައު އުންމީދެކެވެ. މިއަށްވުރެ މުހިންމު ކަމަކީ، ބަޔޮއިލެކްޓްރޯނިކްސް އާއި މޮލިކިއުލަރ މެޑިސިން ގުޅިގެން، އިސްތަށި ފޭބުމުގެ އަސްލު ސަބަބުތަކަށް ފަރުވާ ހޯދިދާނެކަން މި ދިރާސާއިން ސާބިތުކޮށްދިނުމެވެ.

މިވަގުތަށް ބަލާއިރު، މި ކަރަންޓު ފުނައަކީ އަދި ހަމައެކަނި ތަޖުރިބާގެ މަރުހަލާގައިވާ އެއްޗެކެވެ. އިންސާނުންގެ ބޮލުގައިވެސް މިފަދަ ފުރިހަމަ ނަތީޖާއެއް މި އާލާތުން ނެރެވިދާނެތޯ ބެލުމަކީ ސައިންސްވެރިން ދެން ކުރަން އޮތް މަސައްކަތެވެ.