މުޅި ރަށަށް އިރުގެ އަލިކަން ފެތުރިގެން ދިޔައިރު، ސްވިމިންގ ޕޫލާއި ގޯތިތެރޭގެ ބަގީޗާ އޮތީ އިއްޔެ ހަވީރުގެ ހުނުމާއި މަޖާ އަޑުތައް ހަނދާންކޮށްދޭ ފަދަ ގޮތަކަށެވެ. ނަމަވެސް އެ ވަށައިގެންވާ ޤުދުރަތީ ރީތިކަން މިހާރު ސިފަވަނީ އަނިޔާވެރި އެއްޗެއްގެ ގޮތުގައެވެ. ފުލުހުންގެ އޮފިސަރުން ގޭތެރެއާއި އެ ދިގު ރުކާއި ދެމެދު ހަރަކާތްތެރިވަމުން ދިޔައިރު، ގޭތެރޭގައި ތިބި އެކުވެރިން ތިބީ ނުހަނު ވަރުބަލިވެ، ބިރުން ފިތްކަނޑައިގެންދާ ހާލުގައެވެ.
ނިހާގެ ރުއިމަކަށް ހުއްޓުމެއް ނާދެއެވެ. އޭނާ އިނީ ސޯފާގެ ކަނެއްގައި ދެއަތް ދެއަތާ ޖޯޑުކޮށްލައިގެން، ހުސްކަމެއްގެ ތެރެއަށް ގެއްލިފައެވެ. ޝާހިދަކީ އޭނާގެ ކައިވެނި ހަމަޖެހިފައިވާ ލޯބިވެރިޔާއެވެ. އެމީހުންގެ މުސްތަޤުބަލާއި، ކައިވެނީގެ އުފާވެރިކަމާއި، އެކުގައި ބިނާކުރަން އުޅުނު ދިރިއުޅުމުގެ ވާހަކަތައް ދެއްކީ އަދި ކިރިޔާއެވެ. ނަމަވެސް މިހާރު އެ ހުރިހާ ވާހަކަތަކެއް ބަދަލުވެފައިވަނީ އޭނާއަށް ކެތްނުކުރެވޭ ފަދަ ހިތްދަތި ހަނދާންތަކަކަށެވެ.
ލީޒާ އިނީ ނިހާގެ ގާތުގައެވެ. “ނިހާ، ޕްލީޒް ކުޑަކޮށް ފެންފޮދެއް ބޯލަބަލަ.”
ނިހާ ދެފަރާތަށް ބޯހޫރާލިއެވެ. “ލީޒާ، އަހަރެން އެކަނި ބައިންދަބަލަ.”
“އަހަރެން މި މަސައްކަތްކުރަނީ އެހީވާން.”
“އެހެންވިއްޔާ ބުނެދީބަލަ މިހެން ވާންވީ ކީއްވެގެންތަ؟” ލީޒާ އިސްދަށަށް ޖަހައި ހިމޭންވިއެވެ.
ކޮޓަރީގެ އަނެއް ފަރާތުގައި ހުރި އަނާޔާ އެ ދެމީހުންނަށް ބަލަން ހުއްޓެވެ. އޭނާ ނިހާއަށް ހިތްވަރުދޭން ބޭނުންވި ނަމަވެސް، އެކުވެރިޔާގެ ހިތާމަ ފެނުމުން އޭނާގެ ސިކުނޑިއަށް ވެރިވަނީ އެ ދިގު ރުކުގެ ދަށުން ފެނުނު ބިރުވެރި މަންޒަރެވެ. ޝާހިދު އެއްވެސް ހަރަކާތެއް ނެތި ވެއްޓިފައި އޮތް މަންޒަރާއި، އެންމެން ހޭލެއްވި ބިރުވެރި ހަޅޭކުގެ އަޑު އަދިވެސް އޭނާގެ ކަންފަތުގައި ގުގުމަމުން ދިޔައެވެ.
އަނާޔާ އިސްދަށަށް ޖަހައިލިއެވެ. އަހަރެން ހަޅޭއްލެވީ ކީއްވެގެން ހެއްޔެވެ؟ އޭނާ ހަނދާން ހުރީ ބިރުވެރި ހުވަފެނަކުން ހޭލެވުނުކަމެވެ. ނަމަވެސް އެ ހަނދާންތައް ހުރީ ވަރަށް ބޮޑަށް ބައިބައިވެފައެވެ. އަނދިރިކަމާއި، ބިރުވެރި ސިފައެއްގެ ވުޖޫދާއި، ނުރައްކާތެރި ކަމެއް ހިނގަން އުޅޭކަމުގެ އިޙުސާސެވެ. ހުވަފެނުގައި އޭނާއަށް ޝާހިދު ފެނުނީ ހެއްޔެވެ؟ ނުވަތަ ޝާހިދުގެ މަރު އޭނާއަށް އެއްވެސް މާނައެއް ނޭނގި ވަގުތުން ފެނުނީ ހެއްޔެވެ؟
“ދޮންތާ.” ޒިމާންގެ އަޑަށް އަނާޔާ ސިއްސައިގެން ދިޔައެވެ.
“ހުރިހާ ކަމެއް ރަނގަޅުތަ؟” އަނާޔާ ބޯޖަހައިލިއެވެ.
“ދޮންތަ އެއްވެސް އެއްޗެއް ނުކައި ތިހުރީ.”
“އަހަރެން ބަނޑުހައެއް ނުވޭ.”
“އަމިއްލަ ނަފްސަށް ބަލަންވާނެ.”
އަނާޔާ ޒިމާންގެ މޫނަށް ބަލައިލިއެވެ. ނުނިދުމުގެ ސަބަބުން އޭނާގެ މޫނުމަތި ވަނީ މިލާފައެވެ. ލޯ ވަނީ ދުޅަވެފައެވެ.
“ޒިމާން، ޝާހިދަށް ކީއްތަވީ؟”
ޒިމާން ދުރު ބަލައިލިއެވެ. “އަހަންނަކަށް ނޭނގެ.”
“އެކަމަކު ކޮންމެވެސް މީހަކު އެކަން ކުރީ.”
“ޔަޤީނެއްނު މީހަކު ކުރީކަން.” ޒިމާންގެ އަޑު ތުރުތުރުއަޅައިގަތެވެ. “މީހުން ހަމަ އެހެން ކުއްލިއަކަށް މަރެއް ނުވާނެ.”
އަނާޔާ އެއްވެސް އެއްޗެއް ނުބުނެއެވެ. ޒިމާން އޭނާގެ ނިތްކުރީގައި އަތް އުނގުޅައިލިއެވެ.
“އޭނާއަކީ އަހަރެންގެ ދެބެންގެދެދަރި ކޮއްކޮ. އަހަރެންގެ އެންމެ ގާތް އެކުވެރިޔާ. އަދިވެސް ޤަބޫލެއް ނުކުރެވޭ އޭނާ ވަކިވެގެން ހިނގައްޖެ ކަމަކަށް.” ޒިމާންގެ އަޑު ބެދުނެވެ. އަނާޔާ އޭނާގެ އަތުގައި ހިފަހައްޓައިލިއެވެ.
“އަހަރެން ވަރަށް ދެރަވެއްޖެ.”
ޒިމާން އެއްވެސް އެއްޗެއް ނުބުނެ މަޑުމަޑުން ބޯޖަހައިލިއެވެ.
އަނެއް ކޮޓަރީގައި އިންސްޕެކްޓަރ ބަދުރު އިޤްބާލް ދިޔައީ އެކުވެރިންނާ ސުވާލުކުރަމުންނެވެ. އޭނާ ޒިމާންއާ ސުވާލުކުރުމަށްފަހު، ދެން ގެނައީ ޝާރިޤެވެ.
“މެޗަށްފަހު ތި މީހުން ކުރި ކަމެއް ކިޔައިދީ.” ބަދުރު ބުންޏެވެ.
“ފިލްމެއް ބެލީ، ދެން ޕޫލަށް ދިޔައީ.”
“އަދި އޭގެ ފަހުން؟”
“އެންމެން ދިޔައީ އެމީހެއްގެ ކޮޓަރިއަށް.”
“ޝާހިދު ނިކުމެގެން ދިޔަތަން ދެކުނިންތަ؟”
“ނޫން.”
“އާދަޔާ ޚިލާފު އެއްވެސް އަޑެއް އިވުނުތަ؟”
“ނޫން، އެއްވެސް އަޑެއް ނީވޭ.”
ބަދުރު ނޯޓުފޮތުގައި އެއްޗެއް ލިޔެލިއެވެ.
“ޝާހިދާ މިތާ ތިބި އެއްވެސް މީހަކާ މައްސަލައެއް ޖެހިފައި އޮތްތަ؟”
“އަހަންނަށް އެނގިފައެއް ނެތް.”
“ވިސްނާލާފައި ބުނޭ. ބައެއް ފަހަރު މީހުން އެންމެ ގާތް އެކުވެރިންނަށްވެސް ކަންކަން ސިއްރުކުރޭ.”
ޝާރިޤް މޫނު ކުނިކޮށްލިއެވެ. “އޭނާއަކީ އަހަރެންގެ އެކުވެރިއެއް. ކަމެއް އޮތްނަމަ އަހަންނަށް އެނގޭނެ.”
“ވެދާނެ.” ބަދުރު ނޯޓުފޮތް ލައްޕައިލިއެވެ. “މިވަގުތަށް ނިމުނީ.”
ޝާރިޤް ތެދުވެގެން ނިކުމެގެން ދިޔައެވެ.
ދެން ވަނީ ލީޒާއެވެ. އޭނާ އިންސްޕެކްޓަރުގެ ކުރިމަތީގައި އިށީނދެ، އަޅައިގެން ހުރި އައިނު ރަނގަޅުކޮށްލިއެވެ.
“އަހަރެންގެ ނަމަކީ ލީޒާ.” އޭނާ ފެށިއެވެ. “އަނާޔާއާއި އަހަންނަކީ ކޮލެޖު ދުވަސްވަރުގެ އެކުވެރިން. އެކަކު އަނެކަކުގެ ގެއަށް ގޮސް އުޅެން. ދުވަސްވީ އެކުވެރިކަމެއް.”
ބަދުރު އެއްވެސް ހުރަހެއް ނާޅައި އަޑުއަހަން އިނެވެ. “ކުރިއަށް ގެންދޭ.”
“އެދުވަހު، މެޗު ކުޅެ ނިމިގެން ފިލްމެއް ބަލަން ރޭވީ. ފިލްމު ބަލާފައި ޕޫލަށް ދިޔައީ. އެއަށްފަހު އަހަރެމެން އެނބުރި ކޮޓަރިއަށް ގޮސް ނިދީ.”
“ކާކު ލީޒާޔާއެކު ހުރީ؟”
“ނިހާއާއި އަހަރެން.”
“ދެން އަނާޔާ؟”
“އޭނާ ހުންނަނީ ވަކި ކޮޓަރިއެއްގައި.”
“އެހެންވީމާ އޭނާ ނިދަން ދިޔަ ވަގުތެއް ނޭނގޭ؟”
“ނޫން.”
“ޕޫލުން އައި ފަހުން އޭނާ ދެކުނިންތަ؟”
ލީޒާ މަޑުޖެހިލިއެވެ. “ހަނދާނެއް ނެތް.”
ބަދުރު ގޮނޑީގައި ފަހަތަށް ޖެހިލިއެވެ. “އަހަންނަށް ވިސްނައިދީބަލަ. ތިޔައީ ވަރަށް ގާތް ދެ އެކުވެރިން. މުޅި ދުވަސް އެކުގައި ހޭދަކުރީ. އެކަމަކު އޭނާ ހޭލާތޯ ނުވަތަ ނިދާފައިތޯ އޮތީވެސް ނޭނގެނީތަ؟”
ލީޒާގެ މޫނުމަތި ހަރުކަށިވިއެވެ. “އިންސްޕެކްޓަރ، އަހަރެން މިހާރުވެސް ކިޔައިދީފިން ވީގޮތް.”
“އަހަރެން މި އަހަނީ ލީޒާގެ ވާހަކަ ފުރިހަމަނުވާތީ.”
“އެއީ ފުރިހަމަނުވާ ވާހަކައެއް ނޫން. އެއީ ތެދު.”
ބަދުރު އޭނާގެ އައިނުގެ ތެރެއިން ލީޒާއަށް ބަލައިލިއެވެ. “މިއީ ދަސްކޮށްގެން ދޭ ބަޔާނެއްތަ؟”
ލީޒާ ބަލަހައްޓައިގެން އިނެވެ. “ކީކޭ؟”
“ތިދޭ ޖަވާބުތައް ހުރީ ވަރަށް ބޮޑަށް ރާވާލައިގެން ދޭ ގޮތަކަށް.”
“މިއީ ސްކްރިޕްޓެއް ނޫން އިންސްޕެކްޓަރ. މިއީ ހިނގި ކަންތައް.”
“އެހެންވިއްޔާ އާދައިގެ ސުވާލުތަކަށް ޖަވާބުދޭން ތިހާ އުނދަގޫވަނީ ކީއްވެ؟”
ލީޒާ ދުރު ބަލައިލިއެވެ. ބަދުރު އިރުކޮޅަކު ހިމޭނުން އިނެވެ.
“އަނާޔާ ހަޅޭއްލަވައިގަތް އަޑު އިވުނުތަ؟”
“އާނ. އަހަރެމެންނަށް ހޭލެވުނީ އެ އަޑަށް.”
“ދެން ބޭރަށް ނިކުތްއިރު؟”
“ޝާހިދު އޭރުވެސް އޮތީ އެތާ.”
“އެހެން އެއްވެސް މީހަކު ފެނުނުތަ؟”
“ނޫން.”
ބަދުރު އޭނާގެ ނޯޓުފޮތުގައި ކޮންމެވެސް އެއްޗެއް ލިޔެލިއެވެ. “ޝުކުރިއްޔާ. ދެން ދިޔަޔަސް އެންމެ ރަނގަޅު.”
ލީޒާ ތެދުވިއެވެ. ނަމަވެސް ނިކުމެގެން ދިޔުމުގެ ކުރިން، ކުރިން އަނާޔާ ވަދެގެންދިޔަ ދޮރާ ދިމާއަށް އޭނާ ބަލައިލިއެވެ. އެ މޫނުމަތިން ފެންނަމުންދިޔަ އަސަރުތައް ދެނެގަންނަން އުނދަގުލެވެ.
އިރުކޮޅެއް ފަހުން، ބަދުރު އެނބުރި ސިޓިންގރޫމަށް އައެވެ.
“އަނާޔާ، އަހަރެން އަނާޔާއާ ވާހަކަދައްކާލަން ބޭނުން.”
އަނާޔާ ވަގުތުން ތެދުވިއެވެ. “އާދެ، މައްސަލައެއް ނެތް.”
އޭނާ ގޮނޑިއަކަށް އިޝާރާތްކޮށްލިއެވެ. “އިށީނދެބަލަ.” އަނާޔާ އިށީނެވެ.
“ރޭގަނޑު ވީގޮތް އަހަންނަށް ކިޔައިދީބަލަ.”
“އަހަރެން ކުރިންވެސް ބުނީމެއްނު. އަހަރެން އޮތީ ނިދާފައި.”
“އަދި އޭގެ ފަހުން؟”
“އަހަންނަށް ހޭލެވުނީ ބިރުވެރި ހުވަފެނެއް ފެނިގެން.”
“އެއީ ކޮން ކަމަކާ ބެހޭ ހުވަފެނެއް؟”
“އަހަންނަކަށް ސާފުކޮށް ހަނދާނެއް ނެތް.”
“ކަލޭ ހަޅޭއްލަވައިގަތް އަޑަށް ގޭގެ އެންމެން ހޭލި. ކަލޭ ތިބުނަނީ އެއްވެސް ކަމެއް ހަނދާން ނެތް ކަމަށްތަ؟”
އަނާޔާ އޭނާގެ ދެއަތަށް ބަލައިލިއެވެ. “އަހަރެން ހަނދާން ހުރީ ވަރަށް ބިރުގަތްކަން އެކަނި.”
“ނިދުމުގެ ކުރިންވެސް ބިރުގެންފައި ހުރިންތަ؟”
އޭނާ ފަސްޖެހިލިއެވެ. “އާނ.”
“ކީއްވެގެން؟”
އެ ބިރުވެރި މަޚްލޫޤާއި، އެ އާދަޔާ ޚިލާފު ލޮލާއި، ނުފެންނަ އަތްތަކަކުން ކުރެވުނު އިޙުސާސްތައް އޭނާއަކަށް ބުނެއެއް ނުދެވުނެވެ.
“އަހަންނަކަށް ޔަޤީނެއް ނޫން.”
ބަދުރު ފުންކޮށް އޭނާއަށް ބަލަން އިނެވެ. “ޝާހިދާ ދެމެދު އެއްވެސް ޒުވާބެއް ހިނގިތަ؟”
“ނޫން.”
“އޭނާ އަނާޔާއަށް އިންޒާރެއް ދިންތަ؟”
“ނޫން.”
“އޭނާއަށް އަނިޔާއެއް ކުރަންޖެހޭ ސަބަބެއް އަނާޔާގެ އޮތްތަ؟”
އަނާޔާގެ ދެލޯ ބޮޑުވެގެން ދިޔައެވެ. “ތިހެން ތި އަހަނީ ކީއްވެގެން؟”
“ސަބަބަކީ މިއީ މަރުގެ މައްސަލައެއްގެ ތަހުޤީޤަކަށް ވާތީ. އަހަރެން އެންމެންނާވެސް ސުވާލުކުރަން ޖެހޭނެ.”
“އަހަރެން އޭނާއަކަށް އަނިޔާއެއް ނުކުރަން.”
“އަހަރެން އަނާޔާގެ މައްޗަށް ތުހުމަތެއް ނުކުރަން.”
“އެކަމަކު ތި ބަލަނީ އަހަންނަށް ޝައްކުކުރާ ފަދަ ގޮތަކަށް.”
ބަދުރު ހަމަޖެހިލައިގެން އިނެވެ. “އަނާޔާ، އަހަރެން މި ގޭގައި ތިބި އެންމެންނާ މެދުވެސް ބަލަނީ އެއް ނަޒަރަކުން. އިންސާނަކު މަރުވެއްޖެ. އަދި އެކަން ވީގޮތް އަހަރެން ހޯދަން ޖެހޭނެ.”
އަނާޔާ ހިންދިރުވާލިއެވެ. “އެހެންވިއްޔާ އެކަން ކުރި މީހަކު ހޯދާ.”
“އަހަރެން މި އުޅެނީ ހަމަ އެކަން ކުރަން.” އޭނާ ތެދުވިއެވެ. “އަދި އެއް ވާހަކަ. ކިތަންމެ ކުޑަ ކަމެއް ކަމަށް ހީވިޔަސް، އާދަޔާ ޚިލާފު އެއްވެސް ކަމެއް ހަނދާންވެއްޖެނަމަ، އަހަންނަށް އަންގާލާތި.”
އަނާޔާ ބޯޖަހައިލިއެވެ. ނަމަވެސް އޭނާއަށް ބުނެދެވެން ނެތް ކަންތައްތަކެއް ހުރިކަން އޭނާއަށް އެނގެއެވެ. އަދި އެ ވަގުތެއް ނުޖެހެއެވެ.
އެދުވަހުގެ އިރުއޮއްސުނު ވަގުތު، އަނާޔާ އެންމެ ފަހުން އޭނާގެ ކޮޓަރިއަށް ދިޔައެވެ. ކޮޓަރިތެރެ އޮތީ ހަމަހިމޭންވެފައެވެ. އޭނާގެ ސާމާނުތައް އަދިވެސް ހުރީ ޑްރެސިންގ ޓޭބަލް މަތީގައި އެކި ތަންތަނަށް ފެތުރިފައެވެ. ކުޑަކޮށް ހުޅުވިފައިވާ ކުޑަދޮރުން ވަންނަމުންދިޔަ ވައިރޯޅިތަކާއެކު ދޮރުފޮތިގަނޑު މަޑުމަޑުން ހެލެމުން ދިޔައެވެ. އޭނާ ދޮރު ލައްޕައި، ދޮރުގައި ބުރަކަށި ޖައްސައިލިއެވެ. ހާދިސާ ހިނގި ފަހުން ފުރަތަމަ ފަހަރަށް އޭނާއަށް ހިތްފުރޭވަރަށް ރޮއިގަނެވުނެވެ. ނިހާ ފަދައިން އޭނާއަކީ ޝާހިދާ އެހާ ގާތް މީހެއް ނޫނެވެ. ނަމަވެސް އޭނާގެ މަރު އަނާޔާގެ ހިތް މުޅިން ކުދިކުދިކޮށްލައިފިއެވެ. މަދު ގަޑިއިރުތަކެއް ކުރިން އޭނާ ހުނެވެ. އޭނާ އަނާޔާއާ ވާހަކަދެއްކީ ނުހަނު އޯގާތެރިކަމާއެކުގައެވެ. ރުކެއްގެ ބުޑުގައި އޭނާގެ ފުރާނަ ނެތިދާނެކަމުގެ އެއްވެސް އިޝާރާތެއް އޭރަކު ނެތެވެ.
އަނާޔާ ފާޚާނާއާ ދިމާއަށް ހިނގައިގަތެވެ. އިސްކުރު ދޫކޮށްލުމަށްފަހު، އޭނާގެ މޫނަށް ފިނިފެން ބުރުއްސައިލިއެވެ. ފެންތިކިތައް އޭނާގެ ކޯތާފަތުން ފައިބައި، ދަތްދޮޅިދަށުން ތިކިތަޅަމުން ދިޔައެވެ. އޭނާ އިސްއުފުލައި ބަލައިލިއެވެ. ލޯގަނޑު އޮތީ އާވީގެ ސަބަބުން ފުސްވެފައެވެ. އަނާޔާ އޭނާގެ އަތްތިލައިން ލޯގަނޑު ފޮހެލިއެވެ. އެއާއެކު އޭނާ ގަނޑުވިއެވެ.
ބިއްލޫރިގަނޑުގެ މަތީގައި ކޮންމެވެސް އެއްޗެއް ފާޅުވެފައި ހުއްޓެވެ. ފުރަތަމަ އޭނާއަށް ހީވީ އެއީ އަލީގެ ސަބަބުން ފެންނަ އެއްޗެއް ކަމަށެވެ. ނަމަވެސް އެ ނިޝާންތައް ހުރީ ވަރަށް ސާފުކޮށް، ގަސްދުގައި ކޮށްފައިވާ ކަމެއް ފަދައިންނެވެ. ލޯގަނޑުގައި ލިޔެފައިވާ ބަސްތަކެއް ހުއްޓެވެ. ދެއްޔަކުން ނޫނެވެ. ކުލައަކުންވެސް ނޫނެވެ. އަކުރުތައް ހުރީ ރަތް ކުލައިގައެވެ. ލެއިންނެވެ.
އަނާޔާ ފަހަތަށް ފިޔަވަޅެއް އަޅައިލިއިރު، އޭނާގެ ނޭވާ ކަރުތެރޭގައި ތާށިވިއެވެ. ފެންނަމުންދިޔަ މަންޒަރު ޤަބޫލުކުރަން ދަތިވެފައިވާ ހާލު، އޭނާގެ ލޯ އެ ލިޔުމަށް އަމާޒުވެފައި ހުއްޓެވެ. އޭނާގެ ދެއަތް ތުރުތުރުއަޅަން ފެށިއެވެ. ދާދި ދެންމެއަކު އެ ލޯގަނޑުގައި އެއްވެސް އެއްޗެއް ނެތެވެ. ފާޚާނާގައި ހުރީ އޭނާ އެކަންޏެވެ. އޭނާގެ ފަހަތުގައި އެއްވެސް މީހަކު ނެތެވެ. އެހެންނަމަވެސް ކޮންމެވެސް މީހަކު ނުވަތަ ކޮންމެވެސް އެއްޗެއް އެވަނީ ބިއްލޫރިގަނޑުގައި ލިޔެފައެވެ.
މޫނުމަތިން ކުލަވަރު ފަނޑުވެފައިވާ ހާލު، އޭނާ އެ ބަސްތަކަށް ބަލަހައްޓައިގެން ހުއްޓެވެ. އެވަގުތު ކޮޓަރިތެރެއިން ކުޑަކުޑަ އަޑެއް އިވުނެވެ. މަޑުމަޑު ހަރަކާތެއްގެ އަޑެވެ. އޭނާ ދޮރާ ދިމާއަށް އެނބުރިލިއެވެ. “ކާކު؟” އެއްވެސް ޖަވާބެއް ނައެވެ.
އޭނާ މަޑުމަޑުން ބޭރަށް ނިކުމެ، ކޮޓަރިތެރެއަށް ބަލައިލިއެވެ. އެއްވެސް ކަމެއް ބަދަލެއް ނުވެއެވެ. އެނދު އޮތީ ހަމަ އެ ގޮތަށެވެ. ދޮރުފޮތިތައް އަދިވެސް ހެލެމުން ދިޔައެވެ. އަދި ދޮރު ހުރީ ތަޅުލެވިފައެވެ. އޭނައަށް އެވަގުތު ފާހަގަނުވީ ކޮޓަރީގައި ހުރި ލޯގަނޑުގައި އޭނާގެ ނަން ލިޔެވިފައިވާ ކަމެވެ. އަނާޔާ އަލުން އެނބުރި ފާޚާނާގެ ލޯގަނޑު ކައިރިއަށް ދިޔައެވެ. ލެއިން ލިޔެފައިވާ ލިޔުން އަދިވެސް އެހުރި ގޮތަށް ހުއްޓެވެ. ސިކުންތުކޮޅަކަށް އޭނާއަށް ހުރެވުނީ ހަމައެކަނި ބަލަހައްޓައިގެންނެވެ. ދެން އޭގެ މާނަ އޭނާގެ ސިކުނޑިއަށް ވިސްނުނެވެ. އެއީ ނަމެކެވެ.
“އަނާޔާ!”
އެއްއަތުން އަނގަމަތީގައި އަޅައިގެން ހުރެ، އޭނާއަށް ފަހަތަށް ޖެހިގަނެވުނެވެ. އޭނާގެ ނަން ލެއިން ލިޔަންވީ ކީއްވެގެން ހެއްޔެވެ؟ އެ ލިޔުނީ ކާކު ހެއްޔެވެ؟ އަދި ޝާހިދުގެ މަރާ މިކަމާ އޮތީ ކޮން ގުޅުމެއް ހެއްޔެވެ؟
ބޭރުން، އިރުއޮއްސުމުގެ ފިނި ވައިރޯޅިތައް ގަސްތަކުގެ ތެރެއިން ދަތުރުކުރަމުން ދިޔައެވެ. ޗުއްޓީ ހޭދަކުރާ ގޭގެ ވަރަށް ދުރުން، އަނދިރިކަން ވެރިވަމުން އައި ހިސާބަކުން، ފަނޑު ނޫކުލައިގެ އަލިކަމެއް ފާޅުވެފައި އަނެއްކާވެސް ގެއްލިގެން ދިޔައެވެ. އަނާޔާއަކަށް އެ މަންޒަރެއް ނުފެނެއެވެ. އޭނާގެ ހުރިހާ ސަމާލުކަމެއް ހުއްޓިފައިވަނީ، ލޯގަނޑުގައި ލެއިން ލިޔެވިފައިވާ އޭނާގެ އަމިއްލަ ނަމަށެވެ. އަދި ރުއްގަނޑު ނިމޭ ހިސާބުން އޭނާއާ ކުރިމަތިވި އެ ބިރުވެރި ނުރައްކަލަކީ، ދުވަހަކުވެސް އޭނާއާ ވަކިވެގެން ދިޔަ އެއްޗެއް ނޫންބާއޭ އޭނާގެ ހިތަށް އެރީ މުޅިން އަލަށެވެ.
(ނުނިމޭ)
