ތޫފާނުގެ ކުރިން
މީހުން ގިނަފަހަރަށް ހީކުރަނީ ހިމޭންކަމަކީ އަމާންކަން ކަމަށެވެ. މީހަކު ރުއިމާއި ޝަކުވާކުރުން ހުއްޓާލައި، ކުރިން އުނދަގޫވި ކަންކަމަށް އިޖާބަދިނުން ހުއްޓާލުމުން، އެ މީހަކު ރަނގަޅުވެއްޖެކަމަށް ވަށައިގެން ތިބޭ މީހުން ނިންމައެވެ. ހިތާމައިގެ ފާޅުކަން ބޮޑު ނިޝާނެއް ނުފެންނާތީ، ހުރިހާ ކަމެއްވެސް އޮތީ ރަނގަޅަށް ކަމަށް އެމީހުން ޤަބޫލުކުރެއެވެ. ނަމަވެސް، އިންޒާރަކާނުލައި ތޫފާނެއް އައުމަކީ ވަރަށް ނާދިރު ކަމެކެވެ. އެންމެ ފުރަތަމަ ބަދަލުވަނީ އުޑުމައްޗެވެ. ވައިރޯޅިތައް އާދަޔާ ޚިލާފަށް މަޑުޖެހިލައެވެ. ޖައްވު ބަރުވެގެންދެއެވެ. އެސްފިޔަ ޖަހާލާ ހިސާބު ނޫން ދުރު ފަޒާގެ ތެރޭގައި، ބާރުގަދަ ކަމެއް ފެށުމަށް ތައްޔާރުވަމުންދެއެވެ. އިންސާނުންގެ ހާލަތަކީވެސް މިއީއެވެ.
ވަޝިއްޔާގެ ވަށައިގެން ތިބި އެންމެންނަށް ފެންނަނީ އޭނާގެ ދިރިއުޅުން ވަރަށް ފުރިހަމައަށް ހަމަޖެހިފައިވާ ތަނެވެ. އޭނާ ވަނީ އާ މާހައުލަށް ހޭނިފައެވެ. އޭނާ ވަނީ ބަދަލުވެފައެވެ. އަގުބޮޑު ގަނޑުވަރުތަކާއި، ފެޝަން ހެދުންތަކާއި، ޚާއްސަ ހަފުލާތަކާއި، ނުފޫޒުގަދަ މީހުންގެ އެކުވެރިކަމުން ފުރިފައިވާ “މަސްތު” ގެ “ވިދާލާ” ދުނިޔޭގެ ބަޔަކަށް އޭނާ ވެއްޖެއެވެ. ކުރިން އޭނާގެ ދިރިއުޅުމުގައި އޮތް ނުތަނަވަސްކަމާއި ދަތިތަކުގެ ބަދަލުގައެވެ.
ކުރިން ނޯޓު ފޮތެއް ހިފައިގެން ހިނގި، ހުއްޓުމެއް ނެތި ސުވާލުކުރަމުން ދިޔަ އެ އަންހެން ކުއްޖާއަކީ، މިހާރު މަތީ ފަންތީގެ ހަފުލާތަކުން ފެންނަ، އެންމެންގެ ސަމާލުކަން ހުއްޓޭ “ޝްރެޔާ ރަހުމާން” އެވެ. މީހުން އޭނާގެ އެ ބަދަލަށް ތަޢުރީފު ކުރެއެވެ. ބައެއް މީހުން އޭނާގެ ދިރިއުޅުމުގެ ވައްޓަފާޅިއަށް ހަސަދަވެރިވެއެވެ. އަނެއް ބަޔަކު ސިއްރުން ބުނެ އުޅެނީ، އޭނާއަށް ބޭނުންވާ ކޮންމެ އެއްޗެއް ހޯދައިދެވޭނެ ފަދަ ބާރުގަދަ ފިރިހެނަކު ލިބުމަކީ އޭނާގެ ނަސީބު ކަމަށެވެ.
އެމީހުންނަށް ފެންނަނީ ގަހަނާތަކެވެ. އޭނާގެ ހިތުގައިވާ ލަކުނުތަކެއް ނޫނެވެ. ފޮޓޯތައް ފެނެއެވެ. ނަމަވެސް ހަނދާންތަކެއް ނުފެނެއެވެ. މީހަކު ބުނުމުން ހިނިތުންވާން ދަސްކޮށްފައިވާ އަންހެނެއް ފެނެއެވެ. އަދި އޭނާއަށް އުފާވެރިކަން ލިބިއްޖެކަމަށް އެމީހުން ހީކުރެއެވެ. ނަމަވެސް، ވަޝިއްޔާގެ ހިތުގެ ފުންމިނުގައި، ކަމެއް އަދިވެސް ދިރިދިރި އެބައޮތެވެ. އެއީ ވޭނުން ފުރިގެންވާ ކަމެކެވެ. އެއީ ހިތާމައެވެ. އެއީ ހަމައެކަނި އޭނާއަށް ދިމާވި ކަންތައްތަކުގެ މައްޗަށް ކުރާ ހިތާމައެއް ނޫނެވެ. އެކަމަކު، އެ ހާދިސާތަކުގެ ކުރިން އޭނާ އުޅުނު ގޮތާއި، އޭނާގެ އަމިއްލަ ނަފުސަށްޓަކައި ކުރާ ހިތާމައެކެވެ.
އޭނާއަށް ދެން ދުވަހަކުވެސް އަނބުރާ ނުލިބޭނެ އާދައިގެ ދިރިއުޅުމަށްޓަކައި އޭނާ ރޮއި ހިތާމަކުރެއެވެ. އޭނާއަށް ފަރިތަ އަޑުތަކާއި، ގޭގެ ހިތްހަމަޖެހުމާއި، ބިރުވެރިކަމެއް ނެތި ދަތުރުފަތުރުކުރުމުގެ މިނިވަންކަމާއި، މީހަކު ބަލާފާނެކަމުގެ ޖެހިލުންވުމެއް ނެތި އަމިއްލަ ނިންމުންތައް ނިންމުމުގެ މިނިވަންކަމަށް އޭނާ އެދެއެވެ. އޭނާ “ވަޝިއްޔާ” ގެ ގޮތުގައި ހުރުމަށް ބޭނުންވެއެވެ. ހިމޭންކަމާއެކު ފޮތެއް ކިޔާލަން އިނދެވޭ، ފޮތުގައި އެއްޗެހި ލިޔެވޭ، އަދި މާދަމާ އޭނާގެ އަތުން ބީވެގެންދާނީ ކޮން އެއްޗެއްތޯ ހިތަށް ނާރުވައި، އުއްމީދާއެކު މާދަމާއަށް އިންތިޒާރުކުރެވޭ އަންހެނަކަށް ވާން އޭނާ ބޭނުންވެއެވެ.
އެ ދިރިއުޅުން މިހާރު ފާއިތުވެއްޖެއެވެ. އަދި އެންމެ ހިތްދަތި ހަގީގަތަކީ، އަނބުރާ ގެއަށް ދާނެ ފަސޭހަ މަގެއް ނެތް ކަމެވެ. މާދަމާ އޭނާ ރާއްޖެއަށް ދިޔަ ނަމަވެސް، ކުރިން އޭނާ ދޫކޮށްލި ދިރިއުޅުމަކަށް އަނބުރާ ނުދެވޭނެއެވެ. ވޭތުވެދިޔަ ތިން އަހަރުގެ ތެރޭގައި ހުރިހާ ކަމެއް ބަދަލުވެއްޖެއެވެ. އެއްވެސް މީހަކަށް ފަހުމްނުވާ ކަމަކީ، ވަޝިއްޔާ ބަލިޤަބޫލުކޮށް އަމާންދީފައި ނުވާކަމެވެ. އޭނާ ހަމައެކަނި ހާލަތަށް ހޭނުނީއެވެ. މީގެ ދެމެދުގައި ބޮޑު ތަފާތެއްވެއެވެ.
މާ އަވަހަށް ރުޅި އިސްކުރުމަކީ ނުރައްކާތެރި ކަމެއްކަން އޭނާއަށް ދަސްވިއެވެ. ނުބައި ބައެއްގެ ތެރޭގައި ކުރެވޭ ސުވާލުތަކުން ޝައްކު އުފެދިދާނެކަން އޭނާއަށް އެނގުނެވެ. ކަރުނައިގެ ސަބަބުން ބޭނުންނުވާ ސަމާލުކަން ލިބޭއިރު، ހިމޭންކަމުގެ ސަބަބުން މީހުން އޭނާއަކީ ނިކަމެތި މީހެއް ކަމަށް ހީކުރެއެވެ. އެހެންކަމުން، އޭނާ ހިމޭނުން ހުންނަން ދަސްކުރިއެވެ.
އޭނާ ވަށައިގެން ތިބޭ މީހުންނާއި، އެމީހުންގެ އާދަކާދަތަކާއި، ވަފާތެރިކަމާއި، ބަލިފައިތައް ދެނެގަންނަން އޭނާ ދަސްކުރިއެވެ. އޭނާ ދެކެވޭ ވާހަކަތައް ހަނދާން ބެހެއްޓިއެވެ. މީހުންގެ ނަންތައް ފާހަގަކުރިއެވެ. އެހެން މީހުންނަށް މުހިންމު ނޫން ކުދިކުދި ކަންތައްތަކަށް އޭނާ ސަމާލުކަން ދިނެވެ.
ނިންމުންތައް ނިންމަނީ ކޮން ބައެއްކަމާއި، ނިންމާކަމަށް ހެދިގެން އުޅެނީ ކޮން ބައެއްކަން އޭނާ ދެނެގަތެވެ. ޖާބިރުދެކެ ބިރުގަންނަނީ ކޮން ބައެއްކަމާއި، އޭނާގެ ރުހުން ބޭނުންވަނީ ކޮން ބައެއްކަމާއި، ސިއްރުން އޭނާދެކެ ފޫހިވަނީ ކޮން ބައެއްކަން އޭނާއަށް އެނގުނެވެ. އޭނާ އެމީހުންގެ ދުނިޔޭގެ ބަހުރުވަ ދަސްކުރިއެވެ. އަދި އެންމެ މުހިންމު ކަމަކީ، އޭނާއަކީވެސް އެ ދުނިޔޭގެ ބައެއްކަން ދެއްކުމަށް އޭނާއަށް ދަސްވިއެވެ. އޭނާގެ މި ބަދަލަކީ ގަސްތުގައި ގެނައި ބަދަލެކެވެ.
އާންމު ހަފުލާތަކުގައި އޭނާއަކީ އަދަބުވެރި، ހިތްހެޔޮ މީހެކެވެ. އަމިއްލަ ފަންތީގެ ފަރިއްކޮޅުތަކުގައި އޭނާއަކީ މަޑުމައިތިރި މީހެކެވެ. ހިނިތުންވާންވީ ވަގުތާއި، ހިމޭނުން ހުންނަންވީ ވަގުތާއި، މީހަކު ހީވެސް ނުކުރާހާ ގިނަ މަޢުލޫމާތު ހާމަކުރުމަށް މަގުފަހިވާނެ ފަދަ އާދައިގެ ވާހަކައެއް ބުނަންވީ ވަގުތު އޭނާއަށް އެނގެއެވެ.
ޖާބިރު ޤަބޫލުކުރީ އޭނާގެ މަގާމަށް ވަޝިއްޔާ ހޭނެމުންދާ ކަމަށެވެ. ޖާބިރުގެ ބައިވެރިން ޤަބޫލުކުރީ ވަޝިއްޔާ އެ ހާލަތު ޤަބޫލުކޮށްފި ކަމަށެވެ. މުވައްޒަފުން ޤަބޫލުކުރީ އޭނާއަކީ ބޭކާރު ވާހަކަދެއްކުމަށްވުރެ އަގުބޮޑު ދިރިއުޅުމަށް ލޯބިކުރާ ހިމޭން އަންހެނެއް ކަމަށެވެ. އޭނާގެ ފުރިހަމަ ސޫރައިގެ ފަހަތުގައި، ބޮޑު މަންޒަރެއްގެ ކުދިކުދި ބައިތައް ވަޝިއްޔާ އެއްކުރަމުންދާ ކަމަކަށް އެކަކުވެސް ޝައްކެއް ނުކުރެއެވެ. އޭނާގެ ހިތާމައެއް ފިލައިގެންނެއް ނުދެއެވެ. އޭގެ ސިފަ ބަދަލުވީއެވެ. އަދި އެ އޮމާން ސޫރައިގެ އަޑީގައި، ބާރުގަދަ ތޫފާނެއް ފަދައިން ރުޅިވެރިކަން ދިޔައީ ބޮޑުވަމުންނެވެ. ނަމަވެސް، ހަމައެކަނި ބުއްދީގެ ބޭނުންކޮށްގެން އޭނާއަށް ކާމިޔާބު ނުކުރެވޭނެ އެހެން ހަނގުރާމައެއް އޮތެވެ.
މަސްތުވާތަކެއްޗަށް އޭނާ ދެވިހިފާފައިވާ މިންވަރު، އޭނާގެ ކޮންމެ ދުވަހެއްގެ ދިރިއުޅުމުގެ ތަކުލީފުތަކުގެ ބަޔަކަށް ވެއްޖެއެވެ. ހަޝީޝްއާއި، މަރިޖުވާނާއާއި، ބަނގުރާ އޭނާގެ ދިރިއުޅުމުގެ ތެރެއަށް ވަދެގެންދިޔައީ، އޭނާ ލަންކާއަށް ދިޔުމުގެ ކުރިން ދުވަހަކުވެސް ހީނުކުރާފަދަ ގޮތަކަށެވެ. ފެށުމުގައި މަޖުބޫރުކަމެއްގެ ގޮތުގައި ކުރިމަތިވި މި ކަންތައްތައް، މަޑުމަޑުން ގޯސް އާދައަކަށް ބަދަލުވެ، ބަންދުގައި ހުންނަން ޖެހުމުގެ ސަބަބުން ލިބުނު ނަފްސާނީ ހިތްދަތިކަމާއި ޒަޚަމްތަކާއެކު، މިއީ އޭނާގެ ދިރިއުޅުމުގެ ބޮޑު ބުރައަކަށް ވެގެންދިޔައެވެ.
ބައެއް ރޭރޭ، މާޒީގެ ހަނދާންތަކުން ދުރުވުމަށްޓަކައި އޭނާ މި ތަކެތީގެ އެހީ ހޯދައެވެ. އަނެއްބައި ރޭރޭ، އޭނާ ބޭނުންވަނީ އެއްވެސް ކަމަކާމެދު ނުވިސްނައި ހުރުމަށެވެ. ނަމަވެސް، އެއިން ލިބޭ ހިތްހަމަޖެހުމަކީ ދާއިމީ އެއްޗެއް ނޫނެވެ. ޖެހިގެން އަންނަ ހެނދުނު އޭނާއާ ކުރިމަތިވަނީ ވަރުބަލިކަމާއި، ކުށްވެރިކަމުގެ އިޙުސާސާއި، ހާސްކަމުގެ އިތުރުން، އެހެން މީހުންނަށް ސިއްރުކުރަން އޭނާ ދަސްކޮށްފައިވާ ފަޅުކަމެވެ.
ނަފްސާނީ ބައްޔަށް ފަރުވާ ހޯދުމުގެ ގޮތުން، ކޮލަމްބޯގެ އެންމެ އަގުބޮޑު އެއް ޚާއްސަ ޑޮކްޓަރުގެ ލަފާ އޭނާ ހޯދަމުން ދިޔައެވެ. ޑޮކްޓަރަށް ދެއްކުމުގެ ކަންކަން ކުރިއަށްދަނީ ވަރަށް ސިއްރުވެރި ގޮތަކަށެވެ. އޭނާގެ ބޭސްފަރުވާއަށް ހިނގާ ހުރިހާ ޚަރަދެއް އެއްވެސް ސުވާލެއް ނެތި ދައްކަމުން ދިޔައިރު، ޖާބިރު ދިޔައީ އޭނާއަށް ބޭނުންވާ ކޮންމެ ފަރުވާއެއް ލިބޭނެ މަގު ފަހިކޮށްދެމުންނެވެ. ނަމަވެސް، ފައިސާއަށް ޑޮކްޓަރުންގެ އެޕޮއިންޓްމަންޓްތައް ގަނެވިދާނެއެވެ. އެކަމަކު އެ ފައިސާއަކަށް ބަލިން ފަސޭހަވުމެއް ނުގަނެވޭނެއެވެ.
އޭނާގެ ޑޮކްޓަރު، ޑރ. ނަދީޝާ ޕެރޭރާއަށް މިހާރު ފުށުއަރާ ކަންތައްތަކެއް ފާހަގަވާން ފަށައިފިއެވެ. ވަޝިއްޔާ ވާހަކަދައްކަނީ ވަރަށް ހަމަޖެހިގެން ހުރެއެވެ. އޭނާ ކިޔައިދޭ ކަންކަމަކީ އާދައިގެ މީހަކަށްނަމަ ނަފްސާނީ ގޮތުން ބޮޑެތި އަސަރުތަކެއް ކުރާނެ ފަދަ ހިތްދަތި ކަންކަމެވެ. އޭނާގެ ވަށައިގެންވާ ކަންކަން ވަރަށް ތަފްސީލުކޮށް ކިޔައިދީ، ދެކެވުނު ވާހަކަތައް އަކުރުން އަކުރަށް ހަނދާން ހުރި ނަމަވެސް، އޭނާގެ އަމިއްލަ އިޙުސާސްތަކާ ބެހޭގޮތުން ވާހަކަދައްކަން އޭނާ އުނދަގޫވެއެވެ.
އެއްދުވަހެއްގެ މެންދުރުފަހު، ބޭއްވި ބައްދަލުވުމެއްގައި ޑޮކްޓަރު އޭނާގެ ގަލަން ބޭއްވިއެވެ.
“ޝްރެޔާ، އެންމެ ފަހުން ހަޤީޤީ އުފާވެރިކަމެއް އިޙުސާސްވީ ކޮންއިރަކު؟”
ވަޝިއްޔާ އެ ސުވާލާމެދު ފުންކޮށް ވިސްނާލިއެވެ.
“އަހަރެން ހަނދާނެއް ނެތް.”
“ކުޑަ ވަގުތުކޮޅަކަށް ނަމަވެސް؟”
ވަޝިއްޔާ ކުޑަދޮރާ ދިމާއަށް ބަލާލިއެވެ.
“އަހަރެން އުފާވި ދުވަސްތައް ހަނދާން އެބަހުރި. އެކަމަކު މިހާރު އެ އުޅެނީ އޭރު ހުރި މީހާކަމެއް އަހަންނަކަށް ނޭނގެ.”
ޑޮކްޓަރު ކުޑަ ވަގުތުކޮޅަކަށް ހިމޭންވިއެވެ.
“ދެން މިހާރު އިޙުސާސްކުރެވެނީ ކޮން ކަމެއް؟”
ވަޝިއްޔާ ޑޮކްޓަރާ ދިމާއަށް އެނބުރުނެވެ.
“ބައެއް ފަހަރު އެއްވެސް އިޙުސާސެއް ނުކުރެވޭ. އަނެއްބައި ފަހަރު މާ ބޮޑަށް އިޙުސާސް ކުރެވޭ.”
“ތިމާގެ އަމިއްލަ ނަފްސަށް ރައްކާތެރިކަން އިޙުސާސް ކުރެވޭތަ؟”
ވަޝިއްޔާގެ މޫނުމަތިން ފަނޑު ހިނިތުންވުމެއް ފެނިގެންދިޔައެވެ.
“ޑޮކްޓަރު ތިޔަ ކުރީ ވަރަށް ޝައުޤުވެރި ސުވާލެއް.”
“އެއީ ކީއްވެ؟”
“މިހާރު އެންމެންވެސް އަހަރެން ގާތު ބުނަނީ އަހަރެން ހުރީ ވަރަށް ރައްކާތެރިކޮށް ކަމަށް ވާތީ.”
ޑޮކްޓަރު ވަރަށް ފަރުވާތެރިކަމާއެކު އޭނާއަށް ބަލަން އިނެވެ.
“އަދި އެމީހުން ބުނާ ވާހަކަ ޤަބޫލުކުރަންތަ؟”
ވަޝިއްޔާ އެއްވެސް ޖަވާބެއް ނުދެއެވެ.
(ނުނިމޭ)
