”ހިތުދަސް ކުލާހުގައި ކޮންމެ ދުވަހަކުވެސް ދަރިވަރުންނަށް ފިލާވަޅު ނަގައިދެވޭނެ. އަދި މުރާޖަޢާވެސް ކުރިއަށް ގެންދާނެ. މުރާޖަޢާ ކުލާހުގައި، ހިތުދަސްކޮށްފައިވާ ދަރިވަރުންނަށް ވަކިން 30 މިނެޓް މުރާޖަޢާ ކުރުމަށް ހަމަޖައްސައިދެވޭނެ.”

* އަލްޙާފިޒް އަލްޤާރީ މުޙައްމަދު އުޘްމާން

ހިތުދަސް ކުލާހާއި މުރާޖަޢާ ކުލާހުގެ އިތުރުން ”މުތަޝާބިހާތުލް ޤުރުއާނުލް ކަރީމް“ ކުލާހެއްވެސް ކުރިއަށް ގެންދިއުމަށް ވަނީ ހަމަޖެހިފައެވެ. މިއީ ކީރިތި ޤުރުއާނުގައި ތަކުރާރުވެފައިވާ އާޔަތްތައް ނުވަތަ އެއްގޮތް ސިފަތަކެއް ހުންނަ އާޔަތްތައް ކިޔަވައިދޭ ކުލާހެކެވެ.

ޝަހާދަތުލް ޤުރުއާން އޮންލައިން ޙިފްޒް ކުލާހުން މިހައިތަނަށް އައިއިރު ވަނީ އެމީހުންގެ ޓާގެޓުގައި ބަޔާންކޮށްފައިވާ ގޮތަށް ހަމަ އެންމެ 3 އަހަރުގެ މުއްދަތުގައި ކީރިތި ޤުރުއާން ހިތުދަސްކޮށްފައިވާ ދަރިވަރުންތަކެއް އުފައްދައިދީފައެވެ.

ޝަހާދަތުލް ޤުރުއާން ކުލާހުން ކުރިއަށްގެންދާ ދިގު ރާގު ކުލާހާއި ޚަތިމު ކުލާސް ވެސް މިއަހަރު ކުރިއަށް ގެންދިއުމަށް ވަނީ ހަމަޖެހިފައެވެ.

ޝަހާދަތުލް ޤުރުއާން ކުލާހުގައި ކިޔަވައިދެއްވާނީ ދިވެހިންނަށް ކީރިތި ޤުރުއާން އުނގަންނައިދިނުމުގައި 15 އަހަރުގެ ތަޖުރިބާ ލިބިފައިވާ ޕާކިސްތާނަށް ނިސްބަތްވާ ޤާރީ އުސްތާޛުންނެވެ.

ޕާކިސްތާނުގެ ޙާފިޒް އަލްޤާރީ މުޙައްމަދު އުޘްމާން

ލޯތްބާއި އޯގާތެރިކަމާއެކު އުނގަންނައިދިނުމުގެ ތަޖުރިބާ ލިބިފައިވާ ޤާބިލު މުދައްރިސުން، ޝަހާދަތުލް ޤުރުއާން ކުލާހުގައި ކިޔަވައިދޭނީ ދަރިވަރުންގެ ފެންވަރަށް ބަލައި އެ ދަރިވަރެއްގެ ފެންވަރުންނެވެ.

ކުރިއަށް އޮތް ކުލާސްތަކުގައި ބައިވެރިވުމަށް ބޭނުންފުޅުވާ ބޭފުޅުން، ނަން ނޯޓް ކުރެއްވުމަށް 21 ޖުލައި އިން 7 އޮގަސްޓްގެ ނިޔަލަށް ފުރުޞަތު ހުޅުވާލާފައިވެ އެވެ. ނަންނޯޓުކުރެއްވުމަށް 923033473784+ ނަންބަރަށް ފުރިހަމަ ނަން، އުމުރު އަދި ވަޓްސްއެޕް ބޭނުންކުރައްވާ ނަންބަރު ފޮނުވުމަށް، ޝަހާދަތުލް ޤުރުއާން އޮންލައިން ހިތުދަސް ކުލާހުން އެދެ އެވެ.

މި ކުލާހުގެ އިސް މުދައްރިސަކީ ރާއްޖޭގައި ގިނަ އަހަރު ތަކެއް ވާންދެން ޤުރުއާން ކިޔަވައިދެއްވުމުގައި ހޭދަކުރައްވަމުން ގެންދަވާ ޕާކިސްތާނުގެ ޙާފިޒް އަލްޤާރީ މުޙައްމަދު އުޘްމާން އެވެ. މުޙައްމަދު އުޘްމާން އަކީ ރާއްޖޭގައި ކީރިތި ޤުރުއާން އުނގަންނަވައިދެއްވުމުގެ އިތުރުން ތަޖުވީދު ޢިލްމުގެ ފޮތްތައް ދިވެހިބަހުން ލިޔުއްވައި ޝާއިޢުކުރައްވަމުން ގެންދަވާ ބޭފުޅެކެވެ.