ބޮލީވުޑްގެ ކުޅަދާނަ އެކްޓަރު ރާޖްކުމާރު ރާއޯގެ މޮޅު އެކްޓިންގ ފެނިގެން ގޮސް، ނޭޝަނަލް އެވޯޑް ހާސިލުކުރި ފިލްމު “ޝާހިދު”، ރިލީޒްކުރިތާ 13 އަހަރު ފަހުން އޯޓީޓީ ޕްލެޓްފޯމް “ޕްރައިމް ވީޑިއޯ” އިން ސްޓްރީމް ކުރަން ފަށައިފިއެވެ.

ހަންސަލް މެހެތާ ޑައިރެކްޓްކޮށް 2013 ވަނަ އަހަރު ނެރުނު މި ފިލްމަކީ، 2010 ވަނަ އަހަރު އަވަހާރަކޮށްލި އިންސާނީ ޙައްޤުތަކަށް މަސައްކަތްކުރި ވަކީލު ޝާހިދު އަޒްމީގެ ހަޔާތުގެ މައްޗަށް ބިނާކޮށް އުފައްދާފައިވާ ފިލްމެކެވެ. މި ފިލްމުގައި ޝާހިދު އަޒްމީގެ ރޯލު ރާޖްކުމާރު ރާއޯ އަދާކުރިއިރު، މުޙައްމަދު ޒީޝާން އައްޔޫބް، ޕްރަބްލީން ސަންދޫ އަދި ބަލްޖިންދަރު ކޯރުވެސް މުހިންމު ރޯލުތަކުން ފެނިގެންދިޔައެވެ.

މި ފިލްމު ޑިޖިޓަލް ޕްލެޓްފޯމަކަށް އައުން މިހާ ބޮޑަށް ލަސްވުމާ ގުޅިގެން، ފިލްމުގެ ރައިޓަރު އަދި އެޑިޓަރު އަޕޫރްވާ އެމް އަސްރާނީ ވަނީ ސޯޝަލް މީޑިއާ ޕްލެޓްފޯމް އެކްސްގައި އޭނާގެ ކަންބޮޑުވުންތައް ހިއްސާކޮށް، ސުވާލުތަކެއް އުފައްދާފައެވެ.

އަސްރާނީ ލިޔެފައިވާ ގޮތުގައި، “ޝާހިދު” އަކީ ޓެރަރިޒަމްގެ ތުހުމަތުތައް ކުރެވޭ މީހުންގެ ދިފާޢުގައި އަދި މުސްލިމުންނަކީ ކުށެއް ސާބިތުވުމުގެ ކުރިންވެސް ކުށްވެރިންގެ ގޮތުގައި ގިނަ ފަހަރަށް ބަލަމުންދިޔަ މާހައުލެއްގައި އިންސާފު ހޯދައިދިނުމަށް މަސައްކަތްކުރި ވަކީލެއްގެ ވާހަކައެވެ. ނަމަވެސް، މި ފިލްމު ސްޓްރީމިން ޕްލެޓްފޯމަކަށް އައުމަށް 13 އަހަރު ނެގި ސަބަބާމެދު އޭނާ ވަނީ ސުވާލު އުފައްދާފައެވެ.

އޭނާ އިތުރަށް ފާހަގަކުރި ގޮތުގައި މި ފިލްމު ރިލީޒްކުރީ 2014 ގެ ކުރިންނެވެ. އެއަށްފަހު އައި ސިޔާސީ މާހައުލުގައި، ޚިޔާލުފާޅުކުރާ މީހުންނާއި، އެކްޓިވިސްޓުންނާއި، ނޫސްވެރިން އަދި ތުހުމަތުކުރެވޭ ފަރާތްތަކުގެ ޙައްޤުގައި ވަކާލާތުކުރާ މީހުންނަކީ ޝައްކުގެ ނަޒަރަކުން ބެލެވޭ ބަޔަކަށް ވެގެންދިޔައެވެ. އަދި އުމަރު ޚާލިދު ފަދަ އެތައް ބަޔަކު ޝަރީއަތަކާ ނުލައި އެތައް އަހަރެއް ޖަލުގައި ހޭދަކުރަން ޖެހިފައިވާކަންވެސް އޭނާ ފާހަގަކުރިއެވެ.

ފިލްމީ ދާއިރާގެ މިހާރުގެ ހާލަތަށް ފާޑުކިޔަމުން އަސްރާނީ ބުނީ، “ޝާހިދު” ފަދަ ހިތްވަރުގަދަ ވާހަކަތައް ގެނެސްދޭން އުޅުނު ލިޔުންތެރިންނާއި ޑައިރެކްޓަރުންނަށް ބޮޑެތި ގޮންޖެހުންތަކާ ކުރިމަތިލާން ޖެހުނު ކަމަށެވެ. އަދި ބައެއް ފަރާތްތަކުން ސިޔާސީ ގޮތުން ސަރުކާރު ރުއްސުމަށްޓަކައި އުފައްދާ ފެންވަރު ދަށް، އާދައިގެ ފިލްމުތަކަށް އެވޯޑުތައް ލިބެމުންދިޔަ ކަމަށްވެސް އޭނާ ތުހުމަތުކުރިއެވެ.

މިހާރު މި ފިލްމު ސްޓްރީމް ކުރަން ފެށުމުން އަސްރާނީ ވަނީ، ބިރުވެރިކަމުގެ ސިޔާސަތާ ދެކޮޅަށް މީހުންގެ ވިސްނުން ބަދަލުވާން ފެށީތޯ ސުވާލުކޮށްފައެވެ. އަދި ކޮންމެ ސަބަބަކާ ހުރެ ނަމަވެސް މި ފިލްމާމެދު ފަޚުރުވެރިވާ ކަމަށާއި، މި ފިލްމަކީ ކުރީން އުފައްދަމުން އައި ހިތްވަރުގަދަ ސިނަމާގެ ހަނދާން އާކޮށްދޭ މުހިންމު ފިލްމެއް ކަމަށް ބުނެ އެންމެންވެސް މި ފިލްމު ބެލުމަށް އޭނާ ވަނީ އެދިފައެވެ.