މަޝްހޫރު ވެބް ސީރީޒް “ބޭ – އަ ގޯރަވް ތިވާރީ މިސްޓްރީ” ގެ ދެވަނަ ސީޒަނުންވެސް ގޯރަވް ތިވާރީގެ ރޯލުން އެކްޓަރު ކަރަން ޓެކާ ފެނިގެންދާނެ ކަމަށް ބެލެވިއްޖެއެވެ.

ބޮލީވުޑް ހަންގާމާއިން ރިޕޯޓްކޮށްފައިވާ ގޮތުގައި، މި ސީރީޒް ޕްރޮޑިއުސްކުރާ ކުންފުނި ކަމަށްވާ “އަލްމައިޓީ މޯޝަން ޕިކްޗާ” އިން މިހާރު ރާވަމުން ދަނީ 2027 ވަނަ އަހަރުގެ ޖެނުއަރީ މަހުގެ މެދުތެރޭގައި ދެވަނަ ސީޒަންގެ ޝޫޓިން ފެށުމަށެވެ. އަދި ހުރިހާ ކަމެއް ޕްލޭނާ އެއްގޮތަށް ކުރިއަށް ގޮސްފިނަމަ، 2027 ގެ ފަހުކޮޅު މި ސީޒަން ރިލީޒް ކުރެވޭނެ ކަމަށް ލަފާކުރެވެއެވެ.

“ބޭ” ގެ ދެވަނަ ސީޒަނުގައި އާދަޔާ ޚިލާފު ކަންތައްތައް ތަހުޤީޤުކުރުމާއި، ސަބަބު ދެނެގަންނަން ނޭނގޭ ގޮތްނޭނގޭ ހާދިސާތަކުގެ ތެރެއަށް އިތުރަށް ފުންކޮށް ވަދެގެންދާނެ ކަމަށް ބެލެވެއެވެ.

މި ސީރީޒް އުފައްދާ ފަރާތްތަކުން ތައްޔާރުވަމުން ދަނީ އާ ތަހުޤީޤުތަކާއި، މިހާތަނަށް ހައްލުނުކުރެވި ހުރި އާދަޔާ ޚިލާފު އާ މައްސަލަތަކެއް މި ސީޒަނުގައި ހިމެނުމަށެވެ. ނަމަވެސް، މި އާ ސީޒަން ފެށިގެންދާނީ ފުރަތަމަ ސީޒަން ނިމުނު ހިސާބުން ކަމެއް ނުވަތަ މުޅިން އާ ކޭހަކާއެކު ކަމެއް އަދި ސާފެއް ނުވެއެވެ.

2025 ވަނަ އަހަރު ނުކުތް “ބޭ” ގެ ފުރަތަމަ ސީޒަނަކީ އަލްމައިޓީ މޯޝަން ޕިކްޗާގެ ދަށުން ޕްރަބްލީން ސަންދޫ ޕްރޮޑިއުސްކޮށް، ރޮބީ ގްރެވަލް ޑައިރެކްޓްކުރި ސީރީޒެކެވެ. އަރުޝަދު ސައްޔިދު ލިޔެފައިވާ މި ސީރީޒްގައި ކަރަން ޓެކާގެ އިތުރުން ކަލްކީ ކޮއެޗްލިން އަދި ސަލޯނީ ބަޓްރާ ފަދަ މޮޅެތި ތަރިން މުހިންމު ރޯލުތަކުން ފެނިގެން ގޮސްފައިވެއެވެ.

އާންމުކޮށް ފެންނަ ބިރުވެރި ފިލްމުތަކާއި ސީރީޒްތަކާ ޚިލާފަށް، ކުއްލި ސިހުންތަކާއި ބިރުވެރި ސިފަތަކަށް ބަރޯސާވުމުގެ ބަދަލުގައި، “ބޭ” ޚާއްސަވެގެން ދިޔައީ ގޮތްނޭނގޭ ކަންކަމާމެދު އިންސާނާގެ ސިކުނޑީގައި އުފެދޭ ބިރުވެރިކަމާއި، އާދަޔާ ޚިލާފު ހާދިސާތައް ތަހުޤީޤީ ނަޒަރަކުން ދައްކުވައިދިން ގޮތުގެ ސަބަބުންނެވެ.