އެއްޗެއް ދަސްކުރުމަކީ ހަމައެކަނި ފޮތެއްގައި ހުރި އެއްޗެއް ކިޔައިލުމެއް ނޫނެވެ. އެއީ އެ ދަސްކުރާ އެއްޗެއް ސިކުނޑީގައި ބަހައްޓައި، ބޭނުންވާ ވަގުތު އޭގެ ބޭނުން ހިފުމެވެ. ޖަޕާނުގެ މީހުންނަކީ ކަންކަން ރޭވުންތެރިކަމާއެކު ކުރުމަށް މަޝްހޫރު ބައެކެވެ. އެގޮތުން ކިޔަވާ ކުދިންނަށާއި އައު ކަންކަން ދަސްކުރަން ބޭނުންވާ މީހުންނަށް، ކުރު ވަގުތުކޮޅެއްގެ ތެރޭގައި ފިލާވަޅުތައް ދަސްކޮށްދޭނެ ފަސް އުކުޅެއް ތިރީގައި މިވަނީއެވެ.
1. ސިޑީގެ އުކުޅު (ސްޓެއަރ-ސްޓެޕް މެތަޑް):
މި އުކުޅަކީ ފިލާވަޅެއްގެ އެންމެ އާދައިގެ ކަންކަމުން ފެށިގެން މައްޗަށް ދިއުމެވެ. އެގޮތުން އެންމެ ފުރަތަމަ ފިލާވަޅުގެ މައިގަނޑު އަސާސްތައް ދަސްކުރުމަށްފަހު، އެއަށްވުރެ ތަފުސީލީ ބައިތަކަށް ދިއުމެވެ. މިއީ ސިޑިއަކުން މައްޗަށް އަރާ ފަދައިން، މަޑުމަޑުން މަޢުލޫމާތުތައް ސިކުނޑިއަށް ބަލައިގަތުމަށް އެހީތެރިވެދޭނެ ގޮތެކެވެ.
2. ހަނދާނަށް ގެނައުން (އެކްޓިވް ރިކޯލް):
މިއީ ހަމައެކަނި ފިލާވަޅު ކިޔުމުގެ ބަދަލުގައި، ކިޔާފައިވާ އެއްޗެއްގެ މަތިން ހަނދާންކޮށް، އަމިއްލައަށް ސުވާލުކުރުމެވެ. ފޮތް ލައްޕާލުމަށްފަހު ދަސްވި އެއްޗެއް ހަނދާނަށް ގެނައުމަށް މަސައްކަތް ކުރުމުން، ސިކުނޑީގައި އެ މަޢުލޫމާތު ވަރުގަދައަށް ހަރުލާނެއެވެ.
3. ލޮލަށް ސިފަކުރުން (ވިޒުއަލައިޒޭޝަން):
ކިޔަވާ އެއްޗެއް ސިކުނޑިން ތަޞައްވުރު ކުރުމަކީ ނުވަތަ ކޮންމެވެސް މަންޒަރެއްގެ ސިފައިގައި ސިފަކުރުމަކީ ހަނދާން ބެހެއްޓުމަށް އޮތް ވަރަށް ފަސޭހަ މަގެކެވެ. މިސާލަކަށް، ތާރީޚީ ހާދިސާއެއް ނަމަ، އެކަން ހިނގައިދިޔަ ގޮތް ފިލްމެއްގެ ސިފައިގައި ސިކުނޑިން ތަޞައްވުރު ކޮށްލާށެވެ.
4. ބާރަށް ކިޔުން (ރީޑިންގ އެލައުޑް):
ހަމައެކަނި ހިތުން ކިޔުމުގެ ބަދަލުގައި، އަޑުވީއްލައި ބާރަށް ކިޔުމުން، ސިކުނޑީގެ އިތުރު ހިއްސުތަކެއް މިކަމުގައި ބައިވެރިވެއެވެ. ތިމާގެ އަމިއްލަ އަޑު ކަންފަތަށް އިވުމުން، އެ މަޢުލޫމާތެއް ދަސްކުރުމަށް ސިކުނޑިއަށް މާ ފަސޭހަވެއެވެ.
5. އަމިއްލަ ނަފްސަށް ކިޔައިދިނުން (ސެލްފް-އެކްސްޕްލެނޭޝަން):
މިއީ ފިލާވަޅު ދަސްވެއްޖެތޯ ބެލުމަށް އޮތް އެންމެ ރަނގަޅު ގޮތެވެ. ދަސްކުރި ބައި، އެހެން މީހަކަށް ކިޔައިދޭ ފަދަ އާދައިގެ ބަހުރުވައަކުން އަމިއްލަ ނަފްސަށް ކިޔައިދޭށެވެ. މިގޮތަށް ކަންކުރުމުން، ތިމާއަށް އޮޅުންނުފިލާ ހުރި ބައިތައް ފާހަގަވާނެއެވެ.
15 މިނެޓުގެ ޖަޕަނީޒް މެމޮރީ ރޫޓިން
މި އުކުޅުތައް ބޭނުންކޮށްގެން ކޮންމެ ފިލާވަޅެއްވެސް އެންމެ 15 މިނެޓުގެ ތެރޭގައި ދަސްކުރުމަށް ތިރީގައިވާ ތާވަލަށް އަމަލުކުރާށެވެ.
- 1–3 މިނެޓު: ސްޓެއަރ-ސްޓެޕް މެތަޑް (ފިލާވަޅުގެ މައިގަނޑު އަސާސްތައް ބަލައިލުން)
- 4–6 މިނެޓު: ވިޒުއަލައިޒޭޝަން (ކިޔާ އެއްޗެއް ސިކުނޑިން ސިފަކުރުން)
- 7–9 މިނެޓު: އެކްޓިވް ރިކޯލް (ދަސްވި އެއްޗެއް ހަނދާނަށް ގެނައުން)
- 10–12 މިނެޓު: ރީޑިންގ އެލައުޑް (މުހިންމު ނުކުތާތައް ބާރަށް ކިޔުން)
- 13–15 މިނެޓު: އަމިއްލަ ނަފްސަށް ކިޔައިދިނުން (ދަސްވި ބައި އަމިއްލަ ބަހުން ތަރުޖަމާކޮށްލުން)
މި ފަސޭހަ އުކުޅުތަކުގެ ބޭނުން ހިފައިފިނަމަ، ކިޔެވުމަކީ ފޫހިކަމެއް ނެތި، ވަރަށް ފަސޭހައިން ކުރެވިދާނެ ކަމެކެވެ. އަދި ދަސްކުރާ މަޢުލޫމާތުތައް ގިނަ ދުވަހު ހަނދާނުގައި ހަރުލާފައި ހުންނާނެއެވެ.
