އިންސާނާގެ ހަށިގަނޑާއި ސިކުނޑިއަށް އަރާމު ދިނުމަށްޓަކައި މާތްﷲ ދެއްވާފައިވާ އެންމެ ބޮޑު އެއް ނިޢުމަތަކީ ނިންޖެވެ. ނިދުމަކީ ހަށިގަނޑުގެ ވަރުބަލިކަން ފިލުވައިދީ، ދެން އަންނަ ދުވަހުގެ މަސައްކަތްތަކަށް ތައްޔާރުވުމަށް އެހީތެރިވެދޭ ކަމެކެވެ. ނަމަވެސް، ކޮންމެ ކަމެއްގައިވެސް މެދު މިންގަނޑެއް ހިފެހެއްޓުމަކީ އިސްލާމްދީން ބާރުއަޅާ ކަމެކެވެ. އެގޮތުން، ބޭނުންވާ މިންވަރަށްވުރެ އިތުރަށް ނިދުމަކީ ނުވަތަ ނިދި ގިނަވުމަކީ އިންސާނާގެ ދުނިޔަވީ އަދި އާޚިރަތުގެ ޙަޔާތަށް އޭގެ ނޭދެވޭ އަސަރު ފޯރާ ކަމެކެވެ.
ނިދި ގިނަވުމުގެ ސަބަބުން ކުރިމަތިވާ އެންމެ ބޮޑު އެއް މައްސަލައަކީ ޙަޔާތުގެ ބަރަކާތް ކެނޑިގެން ދިއުމެވެ. ވަގުތަކީ އިންސާނާއަށް ދެއްވާފައިވާ އެންމެ އަގުބޮޑު ރައުސްމާލެވެ. ދުވަހުގެ ބޮޑު ބައެއް ނިދީގައި ހޭދަކޮށްލުމަކީ އެތައް ހެޔޮ އަމަލުތަކަކުންނާއި، ދުނިޔަވީ ކުރިއެރުންތަކުން މަޙްރޫމްވާ ކަމެކެވެ. ޚާއްޞަކޮށް ފަތިސް ވަގުތުގެ ބަރަކާތް ގެއްލިގެން ދިއުމަކީ މުޅި ދުވަހުގެ މަސައްކަތްތަކުން ބަރަކާތް ކެނޑިގެންދާ ސަބަބެކެވެ. ކީރިތި ރަސޫލާ ﷺ ވަނީ ފަތިސް ވަގުތުގެ ބަރަކާތް ލިބިގަތުމަށްޓަކައި ދުޢާ ކުރައްވާފައެވެ. އެހެންކަމުން، ގިނައިން ނިދާ މީހާއަށް މި މަތިވެރި ބަރަކާތުން މަޙްރޫމް ވެއެވެ.
ހަމައެއާއެކު، ނިދި ގިނަވުމަކީ ހިތް ޣާފިލުވާ ކަމެކެވެ. ގިނައިން ނިދުމުގެ ސަބަބުން މީހާގެ ކަންނެތްކަން އިތުރުވެ، އަޅުކަންތަކަށް ދޭ ސަމާލުކަން ކުޑަވެއެވެ. ﷲ ހަނދުމަކުރުމާއި، ދީނީ ވާޖިބުތައް އަދާކުރުމުގައި ފަރުވާކުޑަ ކުރެވެން ފަށައެވެ. މިކަމުގެ ސަބަބުން ހިތުގެ ދިރުން ކެނޑި، ދުނިޔޭގެ ވަގުތީ އުފަލަށް ހިތް ލެނބި، އާޚިރަތުގެ މަތިން ހަނދާން ނެތޭ ގޮތްވެއެވެ. ޢިލްމުވެރިން ވިދާޅުވާ ގޮތުގައި، ގިނައިން ނިދުމަކީ ހިތް ހަރުވެ، ރޫޙާނީ ދިރުން ކުޑަވާ ކަމެކެވެ.
މީގެ އިތުރުން ވެސް، ނިދި ގިނަވުމަކީ އިންސާނާގެ ތޫނުފިލިކަން ނެތިގޮސް، މީހާ ބީތާވާ ކަމެކެވެ. ސިއްޙީ ގޮތުން ބަލާއިރު، މާ ގިނައިން ނިދުމަކީ ސިކުނޑީގެ މަސައްކަތްތަކަށް ބުރޫއަރައި، ހަނދާން ބަލިވުމަށް މެދުވެރިވާ ކަމެކެވެ. ކަންކަމަށް ފޯކަސް ކުރުމުގެ ޤާބިލުކަން ކުޑަވެ، ވިސްނުން ކޮށިވެއެވެ. މީގެ ނަތީޖާއެއްގެ ގޮތުން، މީހާގެ ހީވާގިކަން ގެއްލި، މުޖުތަމަޢުގައި އެއްވެސް ދައުރެއް އަދާނުކުރެވޭ، ދިރިއުޅުމުގެ އަމާޒެއް ނެތް، މީހަކަށް އޭނާ ބަދަލުވެގެންދެއެވެ.
ގިނައިން ނިދުމަކީ ހަމައެކަނި ވަގުތު ބޭކާރުވުމެއް ނޫނެވެ. އެއީ ހަށިގަނޑުގެ ދުޅަހެޔޮކަން ގެއްލި، ބަލިމަޑުކަމަށް މަގުފަހިވާ ކަމެއްވެސް މެއެވެ. ކަންނެތްކަމާއި މަސައްކަތްތެރިކަމެއް ނެތި ގިނަވަގުތު އޮށޯވެގެން އޮތުމަކީ އިންސާނާގެ ހަށިގަނޑުގެ ވަރުގަދަކަން ދަށްކޮށްލާ ކަމެކެވެ. ސިއްހީ މާހިރުން ހާމަކުރައްވާ ގޮތުގައި، ބޮޑު މީހަކަށް ދުވާލަކު 7 ގަޑިއިރާއި 9 ގަޑިއިރާ ދެމެދުގެ ނިދި ފުދެއެވެ. ނަމަވެސް، އާދަވެގެން 9 ގަޑިއިރަށްވުރެ ގިނައިން ނިދުމަކީ “ހައިޕަރސޮމްނިއާ” ނުވަތަ މާގިނައިން ނިދުމުގެ މައްސަލައެއް ކަމަށް ޑޮކްޓަރުން ސިފަކުރައްވައެވެ. މިގޮތަށް ގިނައިން ނިދުމަކީ ހަށިގަނޑުގެ ބަރުދަން އިތުރުވުމާއި، ހަކުރު ބައްޔާއި، ހިތުގެ ބަލިތަކަށް މަގުފަހިވާ ކަމެކެވެ. މީގެ އިތުރުން، ގިނައިން ނިދުމުގެ ސަބަބުން ސިކުނޑީގެ މަސައްކަތްތައް ލަސްވެ، ހަނދާން ބަލިވުމާއި، ކަންކަމަށް ސަމާލުކަން ދިނުމުގެ ގާބިލުކަން ކުޑަވާކަމަށް ދިރާސާތަކުން ދައްކައެވެ.
ނިދުމަކީ ﷲ ދެއްވި ބޮޑު ނިޢުމަތަކަށް ވީނަމަވެސް، އެކަމުގައި ހައްދުފަހަނަޅައި ދިއުމަކީ އިންސާނާގެ ދެދުނިޔެ ބާއްޖަވެރިކުރުމަށް އޮތް ހުރަހެކެވެ. ޙަޔާތުގެ ބަރަކާތް ދަމަހައްޓައި، ހިތުގެ ދިރުން އާކޮށް، ތޫނުފިލި ހީވާގި މީހަކަށް ވުމަށްޓަކައި ނިދި މިންގަނޑެއްގައި ހިފެހެއްޓުމަކީ ކޮންމެހެން ބޭނުންތެރި ކަމެކެވެ. އަޅުގަނޑުމެންގެ ވަގުތުތަކުގެ ބޭނުން ހެޔޮގޮތުގައި ހިފައި، ކަންނެތްކަމުން ދުރުހެލިވުމަކީ ކާމިޔާބީގެ އަސްލެވެ. ނަމަވެސް، އެކަން ހައްދުފަހަނަޅައި ދިޔުމަކީ އިންސާނާގެ މުޅި ދިރިއުޅުން ބަރުބާދުކޮށްލާނެ ކަމެކެވެ. ތޫނުފިލި، ހަކަތަ ހުރި، އަދި ބަރަކާތްތެރި ދިރިއުޅުމެއް ބޭނުންވާ ނަމަ، ނިދި ކޮންޓްރޯލްކޮށް، ވަގުތުގެ ބޭނުން ހެޔޮގޮތުގައި ހިފުމަކީ ކޮންމެހެން ކުރަންޖެހޭ ކަމެކެވެ. މިކަމުން ސަލާމަތްވުމަށް އޮތް ހައްލަކީ ވަގުތަށް އިޙްތިރާމްކޮށް، ހެނދުނުގެ ބަރަކާތްތެރި ވަގުތުގެ ބޭނުން ހިފުމެވެ.
