ހެނދުނު ބޯ ކޮފީ ތަށިން ހަނދާންގަދަވުމަށް ހީނުކުރާ ފަދަ ކުރިއެރުމެއް ލިބިދާނެ ކަމަށް އާ ދިރާސާއަކުން ދައްކައިފިއެވެ. ނިދި މަދުވުމުގެ ސަބަބުން ސިކުނޑިއަށް ކުރާ ނޭދެވޭ އަސަރުތައް ކުޑަކުރުމަށް ކެފެއިން އެހީތެރިވެދޭކަން ދިރާސާވެރިން ވަނީ ހޯދާފައެވެ.
މުހިންމު ނުކުތާތައް:
☕ ދުޅަހެޔޮ ސިއްހަތެއްގެ އެންމެ މުހިންމު އެއް ތަނބަކީ ނިންޖެވެ. ސިކުނޑިން ހަނދާންތައް އުފެއްދުމުގައި ނިދި ވަރަށް މުހިންމު ދައުރެއް އަދާކުރެއެވެ.
☕ ކުރު މުއްދަތަކަށް ނިދި މަދުވުމަކީވެސް ހަނދާން ބަލިވުމާއެކު ސިކުނޑީގެ މަސައްކަތްތަކަށް ބުރޫއަރާފާނެ ކަމެކެވެ.
☕ ކެފެއިންގެ ސަބަބުން މިފަދަ ބައެއް އަސަރުތަކާ ދެކޮޅަށް މަސައްކަތް ކުރެވުނު ނަމަވެސް، އެއީ ފެންވަރު ރަނގަޅު ނިދީގެ ބަދަލުގައި ބޭނުންކުރެވޭނެ އެއްޗެއް ނޫނެވެ.
އިންސާނާގެ ދުޅަހެޔޮކަމަށް ނިދީގެ މުހިންމުކަން ހާމަކޮށްދޭ ދިރާސާތައް ދަނީ އިތުރުވަމުންނެވެ. ކާނާއާއި ކަސްރަތާ އެއްވަރަށް ނިންޖަކީވެސް ސިއްހަތުގެ މައިގަނޑު އަސާސެއް ކަމަށް މިހާރު ގިނަ މާހިރުން އެއްބަސްވެއެވެ. ނަމަވެސް، މި މުހިންމުކަމާއެކުވެސް ގިނަ ބަޔަކަށް ރޭގަނޑަކަށް ބޭނުންވާ ހަތް ގަޑިއިރާއި ނުވަ ގަޑިއިރާ ދެމެދުގެ ނިދި ނުލިބޭކަން ފާހަގަކުރެވެއެވެ.
ދިގު މުއްދަތަކަށް ނިދި މަދުވުމަކީ ހިތުގެ ބަލިތަކާއި، ހޯރމޯންތަކަށް އަންނަ ބަދަލުތަކާއި، ދިފާއީ ނިޒާމު ބަލިކަށިވުން ފަދަ ސިއްހީ ގިނަ މައްސަލަތަކަކަށް މަގުފަހިވާ ކަމެކެވެ. މީގެ އިތުރުން، ސިކުނޑީގެ ދުޅަހެޔޮކަމަށާއި، ކަންކަން ދަސްކުރުމާއި ހަނދާން ބެހެއްޓުމަށް ނިދި ވަރަށް ބޮޑަށް ބޭނުންވެއެވެ. ސިކުނޑީގައި ހަނދާންތައް އުފެއްދުމަށް އެންމެ މުހިންމު ދައުރެއް އަދާކުރާ އެއް ސަރަހައްދަކީ “ހިޕޯކެމްޕަސް” އެވެ.
ހިޕޯކެމްޕަސްގެ ތެރޭގައި ހުންނަ ވަކި ޚާއްޞަ ނިއުރޯންތަކަކީ އިޖުތިމާއީ ހަނދާންތައް، ނުވަތަ ކުރިން ބައްދަލުވެފައިވާ މީހުން ފާހަގަކޮށް ހަނދާން ބެހެއްޓުމުގެ ގާބިލުކަން ދަމަހައްޓައިދޭ އެއްޗެކެވެ. އާ ދިރާސާތަކުން ދައްކާ ގޮތުގައި، ކުރު މުއްދަތަކަށް ނަމަވެސް ނިދި ހަމަނުވުމަކީ މި ނިޒާމަށް ބުރޫއަރައި، މީހުން ހަނދާން ބެހެއްޓުމަށް ދަތިވާ ކަމެކެވެ.
އާންމުކޮށް އަހަރެމެންނަށް އިރުޝާދު ދެވެނީ ނިދި ރަނގަޅު ކުރުމަށްޓަކައި ކެފެއިން ފަދަ ތަކެތި ބޭނުންކުރުން މަދުކުރުމަށެވެ. ނަމަވެސް “ނިއުރޯސައިކޯފާމަކޮލޮޖީ” މަޖައްލާގައި ޝާއިޢުކޮށްފައިވާ އާ ދިރާސާއަކުން ދައްކާ ގޮތުގައި، ނިދި މަދުވެފައިވާ ހާލަތްތަކުގައި ކެފެއިން އާއި ސިކުނޑީގެ މަސައްކަތާ ދެމެދު އޮންނަނީ މިއަށްވުރެ ތަފާތު ގުޅުމެކެވެ.
ދިރާސާ ކުރިއަށް ގެންދިޔަ ގޮތް
ނިދި މަދުވުމުން އިޖުތިމާއީ ހަނދާނަށް ކުރާ އަސަރާއި، އެކަމުގައި ކެފެއިން އަދާކުރާ ދައުރު ބެލުމަށްޓަކައި ދިރާސާވެރިން 119 މީދާ ބޭނުންކޮށްގެން ތަހުލީލުތަކެއް ކުރިއަށް ގެންދިޔައެވެ.
މި ތަހުލީލުގައި ބައެއް މީދަލަށް އެއް ހަފުތާ ވަންދެން ބޯފެނާއެކު ކެފެއިން ދީފައިވެއެވެ. އޭގެ ފަހުން ބައެއް މީދާތައް ފަސް ގަޑިއިރަށް ނިދި މަހުރޫމު ކުރެވުނެވެ. މިގޮތަށް ކަންތައް ކުރުމަށްފަހު، ނިދި މަދުވުމުގެ ސަބަބުން ސިކުނޑިއަށް ކުރި އަސަރުތަކާއި، ކެފެއިންގެ ސަބަބުން އެކަމަށް އައި ބަދަލުތައް ދިރާސާވެރިން ބަލާފައިވެއެވެ.
ދިރާސާވެރިން މައިގަނޑު ގޮތެއްގައި ބަލާފައިވަނީ:
1- އިޖުތިމާއީ ހަނދާން: މީދަލަށް ކުރިން ފެނިފައިވާ މީދަލެއް ވަކިކުރަން އެނގޭތޯ ބެލުން.
2- ސިކުނޑީގެ މަސައްކަތް: ސިކުނޑީގެ ސެލްތަކުގެ މެދުގައި އޮންނަ ގުޅުން ވަރުގަދަވާ މިންވަރު ބެލުން.
3- ސިކުނޑީގެ ކެމިސްޓްރީ: ހަނދާން ބެހެއްޓުމަށް އެހީވާ ޕްރޮޓީންތަކަށް އަންނަ ބަދަލު ބެލުން.
4- ކެފެއިންގެ އަސަރު: ނިދި މަދުވުމުން ކުރާ ނޭދެވޭ އަސަރުތައް ކެފެއިންގެ ސަބަބުން ކުޑަވޭތޯ ބެލުން.
ދިރާސާއިން ފާހަގަވި ކަންތައްތައް
ދިރާސާއިން ދެއްކި ގޮތުގައި ނިދި މަދުވުމުން ސިކުނޑީގެ ހަނދާނާ ގުޅުންހުރި މަސައްކަތްތަކަށް ހުރަސްއެޅެއެވެ. ނަމަވެސް، ހައިރާން ކުރުވަނިވި ނަތީޖާއަކީ، ކެފެއިންގެ ސަބަބުން މި ނޭދެވޭ އަސަރުތައް އިއާދަވިކަމެވެ. ކެފެއިންއަކީ ސިކުނޑީގައި ނިދި އަންނަކަމުގެ އިހުސާސްކުރުވައިދޭ މާއްދާއެއް ކަމަށްވާ “އެޑިނޯސިން” ހުއްޓުވައިދޭ އެއްޗަކަށް ވާތީ، އޭގެ ސަބަބުން ސިކުނޑީގެ ސެލްތައް ހީވާގިވެ، ހަނދާންތައް ދެމެހެއްޓުމަށް މަގުފަހިވެއެވެ.
ފާހަގަކޮށްލަންޖެހޭ މުހިންމު ކަމަކީ، މި ދިރާސާ ހަދާފައިވަނީ މީދާ ބޭނުންކޮށްގެން ކަމެވެ. އެހެންކަމުން މީގެ ނަތީޖާ ސީދާ އިންސާނުންނަށް ބެލުމުގައި ބައެއް ތަފާތުތައް ހުރެދާނެއެވެ. އެހެންނަމަވެސް، އިންސާނުން ބޭނުންކޮށްގެން ހަދާފައިވާ ބައެއް އެހެން ދިރާސާތަކުންވެސް ވަނީ ހެނދުނު ކެފެއިން ބޭނުންކުރުމަކީ ކަންކަމަށް ސަމާލުކަން ދިނުމާއި ހަނދާން ގަދަކުރުމަށް އެހީތެރިވެދޭ ކަމެއްކަން ދައްކާފައެވެ.
އަމަލީ ދިރިއުޅުމުގައި މިކަން ބޭނުންކުރާނީ ކިހިނެއް؟
ކެފެއިންގެ ސަބަބުން ވަގުތީ ގޮތުން ސިކުނޑީގެ މަސައްކަތްތަކަށް އެހީތެރިކަން ލިބުނު ނަމަވެސް، އެއީ ހަމަ ނިދީގެ ބަދަލުގައި ބޭނުންކުރެވޭނެ އެއްޗެއް ނޫނެވެ. ދިގު މުއްދަތަކަށް ސިކުނޑީގެ ދުޅަހެޔޮކަން ދަމަހައްޓަން ބޭނުންނަމަ، ފެންވަރު ރަނގަޅު ނިދި ހޯދުމަކީ ކޮންމެހެން ކުރަންޖެހޭ ކަމެކެވެ.
ނިދި ރަނގަޅު ކުރުމަށްޓަކައި ކުރެވިދާނެ ބައެއް ކަންތައްތައް:
☕ ނިދާ ގަޑި އެއްވަރެއްގައި ހިފެހެއްޓުން: ކޮންމެ ދުވަހަކުވެސް އެއް ގަޑިއަކަށް ނިދައި، އެއް ގަޑިއަކަށް ހޭލުމަށް އާދަކުރުން.
☕ ނިދުމުގެ ކުރިން ސްކްރީން ބޭނުންކުރުން މަދުކުރުން: ފޯނާއި ލެޕްޓޮޕްގެ އަލީގެ ސަބަބުން ނިދަން އުނދަގޫވެދާނެއެވެ.
☕ ދުވާލު ވަގުތު ބޭރުގައި ހޭދަކުރުން: ގުދުރަތީ އަލި ލިބުމަކީ ހަށިގަނޑުގެ ނިދުމުގެ ނިޒާމު ރަނގަޅު ކުރުމަށް އެހީވާ ކަމެކެވެ.
☕ ހަމަޖެހިލުމަށް އާދައެއް ބެހެއްޓުން: ފޮތް ކިޔުން ނުވަތަ މަޑުމައިތިރި މިއުޒިކް އަޑުއެހުން ފަދަ ކަމަކުން ނިދަން ތައްޔާރުވުން.
މީގެ އިތުރުން، މާ ލަސްވާ ފަހުން ކެފެއިން ބޭނުން ނުކުރުމަށް ސަމާލުކަން ދޭންޖެހެއެވެ. އެހެނީ، މާ ލަހުން ކޮފީ ބޯނަމަ ނިދަން އުނދަގޫވެ، އޭގެ ސަބަބުން އަނެއްކާވެސް ކެފެއިންއަށް ބަރޯސާވާންޖެހޭ ދައުރެއް އުފެދިދާނެތީއެވެ.
ޚުލާޞާ
މި ދިރާސާއިން އަނެއްކާވެސް މި ހާމަވަނީ ނިންޖަކީ ސިކުނޑީގެ ސިއްހަތަށް ކިހާ މުހިންމު އެއްޗެއް ކަމެވެ. ނިދި މަދުވުމުން ކުރާ އަސަރުތައް ކުޑަކުރުމަށް ކެފެއިން އެހީތެރިވެދޭ ނަމަވެސް، އެއީ ވަގުތީ ހައްލެކެވެ. ދިގު މުއްދަތަކަށް ހަނދާން ގަދަކުރުމަށާއި، ސިކުނޑީގެ ސާފުކަން ދެމެހެއްޓުމަށް އޮތް އެންމެ މުހިންމު ކަމަކީ އަބަދުވެސް ހަމަ ނިދި ހޯދުމެވެ.
