ލޭ ހަދިޔާކުރުމަކީ ފުރާނަ ސަލާމަތްކުރުމަށްޓަކައި ކޮށްދެވޭނެ އެންމެ އަގުހުރި އެއް މަސައްކަތެވެ. މިއީ ހަމައެކަނި ސިއްހީ ކަމެއްގެ ބަދަލުގައި، އަޅުގަނޑުމެންގެ މުޖުތަމައުގެ މެދުގައި އޮންނަންޖެހޭ އިންސާނިއްޔަތުކަމުގެ ރޫހު ދިރުވައިދޭ އަދި ކޮންމެ ފަރުދަކުމެ އަދާކުރަންޖެހޭ މުހިންމު އިޖުތިމާއީ ޒިންމާއެކެވެ.
އެކަކު ހަދިޔާކުރާ ލޭގެ ސަބަބުން ތިން މީހެއްގެ ފުރާނަ ސަލާމަތްކުރުމުގެ ފުރުސަތު ލިބިގެންދެއެވެ. މިއީ އިސްލާމީ ރިވެތި އުސޫލުތަކުގެ ތެރޭގައި ހިމެނޭ ކަމެކެވެ. އެކަކު އަނެކަކަށް އެހީތެރިވުމުގެ މަތިވެރި އަމަލެކެވެ. ކީރިތި ގުރުއާނުގައިވެސް އެއް ފުރާނަ ސަލާމަތްކުރުމަކީ މުޅި އިންސާނިއްޔަތު ސަލާމަތްކުރުން ފަދަ ކަމެއްގެ ގޮތުގައި ބަޔާންކުރައްވާފައިވެއެވެ.
ރާއްޖޭއަކީ ތެލެސީމިއާ ކުދިން ގިނަ ޤައުމެކެވެ. ބައެއް ކުދިންނަކީ 20 ދުވަހުން ލޭ އަޅަން ޖެހޭ ކުދިންނެއެވެ. އަޅުގަނޑުމެންގެ ތެރެއިން މީހަކު މަދުވެގެން 2 ފަހަރު ލޭ ހަދިޔާ ކުރާ ނަމަ، ލޭ ހޯދާ ފަރާތްތަކުގެ އާއިލާތަކުންނަށް އުފުލަން ޖެހޭ ބުރަޔަށް ލުއިތަކެއް ލިބިގެން ދާނެއެވެ. މީގެ އިތުރުން، ބޮޑެތި އޮޕަރޭޝަންތައް ކުރާ މީހުންނާއި، ވިހެއުމުގެ ތެރޭގައި ދިމާވާ ނުރައްކާތެރި ހާލަތްތަކުގައާއި، ކުއްލި އެކްސިޑެންޓްތަކުގައި ލޭ ބޭނުންވާ މީހުންނަށް، ގަވާއިދުން ލޭ ހަދިޔާކުރާ މީހުން ތިބުމަކީ ކޮންމެހެން ބޭނުންތެރި ކަމެކެވެ.
ލޭގެ ބާވަތް ތަކަށް ބަލާއިރު، ކޮންމެ ގުރޫޕެއް ގެ ލެޔަކީ ވެސް މުހިއްމު ލެއެކެވެ. ގިނަ ފަހަރު އަހަރުމެންނަށް ހީވެފައި އޮންނަނީ މަދުން ހުންނަ ލޭގެ ގްރޫޕްތަކަކީ އެއީ މުހިއްމު ލޭ ކަމުގައެވެ. ނަމަވެސް ހަގީގަތަކީ، އާންމުކޮށް ފެންނަ ލޭގެ ގްރޫޕްތައް ބޭނުންވާ މީހުންގެ އަދަދު ވެސް އެހާމެ ގިނަ ކަމެއެވެ. “އޭ ޕޮޒިޓިވް” ވިޔަސް، “ބީ ޕޮޒިޓިވް” ވިޔަސް، “އޯ ޕޮޒިޓްވް” ވިޔަސް، ކޮންމެ ލޭ ތިއްކަކީ މީހެއްގެ ދިރިއުޅުމަށް އުއްމީދު ތަކެއް ގެނެސް ދޭނޭ އެއްޗެކެވެ.
ލޭ ހަދިޔާކުރާ މީހުންގެ އަދަދު ބޮޑުތަނުން ނިސްބަތުން މަދުނަމަވެސް މި ކުޑަ މުޖުތަމައުން އުފާވެރި ކަމެއް ފެނިގެން ދެއެވެ. އެއީ މި މަތިވެރި މަސައްކަތުގައި ކުރިއަށްދާ އެތަކެއް ޖަމިއްޔާތަކާއި ޕޭޖްތައް ފެނިގެން ދެއެވެ. އޭގެތެރޭގައި “މޯލްޑިވްސް ބްލަޑް ޑޯނާސް” އަދި “ސޭފް ހައުސް” އިން، ލޭ ހޯދަމަށް ދަތިވާ ފަރާތްތަކަށް އަދި މުޖުތަމައު ހޭލުންތެރިކުރުމުގެ މަސައްކަތް ހުއްޓުމެއްނެތި ކުރަމުން ދެއެވެ.
މިއީ ލެއަށް ބޭނުންވެފައިވާ ދިވެހީންނަށް ލޭ ހޯދައިދިނުމަށާ ލޭގެ ކަންކަމުގައި ހޭލުންތެރިކުރުވަން ހަރަކާތްތެރިވާ ދެ ފަރާތެއްގެ ލޯގޯ
ނަމަވެސް އަޅުގަނޑުމެން މި ކުޑަކުޑަ މުޖުތަމައުގައި، ފެންނަމުން ދާ ވަރަށް ހިތާމަހުރި އެއް ކަމަކީ، ލެއަށް ބޭނުންވާ އާއިލާއެއް، ލެޔަށް ބޭނުންވެގެން މީހެއްގެ ގާތަށް ދިޔުމުން، ލޭ ވިއްކާ ވާހަކަ އަޑުއިވިގެން އެބަދެއެވެ. މިއީ އަހަރުމެންނަށް މި ކުޑަކުޑަ މުޖުތަމައުން ފެންނަ ނޭދެވޭ ކަމެކެވެ. މިއީ ކަނޑައެޅިގެން އިސްލާމް ދީނުގައި ހަރާމްކުރައްވާފައިވާ ކަމެއްކަން އެފަދަ ހުށައެޅުންތައް ހުށައަޅާ ފަރާތްތަކަށް ނޭނގެނީބާވައެވެ؟
ލޭ ހަދިޔާކުރުމަކީ އަޅުގަނޑުމެންގެ ތެރެއިން ކޮންމެ މީހަކަށްވެސް ކުރެވިދާނެ، އަދި ކުރަންޖެހޭ ކަމެކެވެ. ތިބާ ހަދިޔާކުރާ ކޮންމެ ލޭ ތިއްކަކީ މީހެއްގެ ފުރާނައާ ގުޅިފައިވާ އުއްމީދެކެވެ. އެހީތެރިކަމަށް ބޭނުންވެފައިވާ ފަރާތްތަކަށް އެހީތެރިވުމަކީ އަޅުގަނޑުމެންގެ ފަރުދީ ޒިންމާއަކަށް ހަދަމާތޯއެވެ.
