މޫސަ އެކަޑަމީން އަލަށް ތައާރަފްކޮށް އިފްތިތާޙްކުރި “ސުޕަ ކަޕް” ފުޓްސަލް މުބާރާތުގެ ފޯރިގަދަ ފައިނަލް މެޗު ކާމިޔާބުކޮށް، މުބާރާތުގެ ތަށި ހުޅަނގު މެދު ޓީމުން އުފުލާލައިފިއެވެ.
ރޭ ކުޅެވުނު މި ފައިނަލް މެޗުގައި ބައްދަލުކުރީ ހުޅަނގު މެދު ޓީމާއި ފެނަކަ ހޮޅުދޫ ބްރާންޗުގެ ޓީމެވެ. ވަރަށް ވާދަވެރި ކުޅުމެއް ފެނިގެންދިޔަ މި މެޗު ހުޅަނގު މެދު ޓީމުން ކާމިޔާބުކުރީ 5-2 ގެ ނަތީޖާއަކުން ފެނަކަ ޓީމު ބަލިކުރުމަށްފަހުއެވެ.
މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ފެނިގެންދިޔައީ ހަމަހަމަ އަދި މޮޅު ކުޅުމެކެވެ. ނަމަވެސް، ފުރަތަމަ ހާފު ނިމެން ގާތްވެފައި ވަނިކޮށް ހުޅަނގު މެދު ޓީމުން ވަނީ ލަނޑެއް ޖަހައި މެޗުގެ ލީޑު ނަގާފައެވެ. މީގެ ސަބަބުން ފުރަތަމަ ހާފު ނިމިގެންދިޔައީ 1-0 އިން ހުޅަނގު މެދު ކުރީގައި އޮވެގެންނެވެ.
ދެވަނަ ހާފު ފެށިގެން ފެނަކަ ޓީމުން ކުޅުން ރަނގަޅުކޮށް، ގޯލެއް ޖަހައި ނަތީޖާގެ ފަރަގު ކުޑަކުރިއެވެ. ނަމަވެސް، ހުޅަނގު މެދު ޓީމުން ވަނީ މެޗުގެ ކޮންޓްރޯލް ހޯދައި އިތުރު ލަނޑުތަކެއް ޖަހާފައެވެ. މެޗު ނިމިގެންދިޔައީ ތިން ގޯލުގެ ތަފާތުން ހުޅަނގު މެދު ކުރީގައި އޮވެގެންނެވެ.
މި މެޗުގެ މޮޅު ކުޅުންތެރިޔާ ނުވަތަ މޭން އޮފް ދަ މެޗުގެ މަގާމު ހޯދީ ހުޅަނގު މެދު ޓީމުގެ އިބްރާހުމް ރަޝީދެވެ. އޭނާ ވަނީ މުޅި މެޗުގައިވެސް އެ ޓީމަށް ކާމިޔާބީ ހޯދައިދިނުމުގައި މުހިންމު ދައުރެއް އަދާކޮށްފައެވެ.
