ވާހަކަދައްކާ ހުވަފެންތައް
ރަށު ތެރޭގައި އޭނާއަށް އޮތް ޝައުޤުވެރިކަން ހަލުވިކަމާއެކު ފެތުރެމުން ދިޔައެވެ. ޚާއްޞަކޮށް، އޭނާގެ ރީތިކަމަށް ދެވިހިފައި، އެކަމުގެ ސަބަބެއް ނޭނގި އޭނާއަށް ދަމައިގަނެވޭ ޒުވާނުންގެ މެދުގައެވެ. ބައެއް މީހުން ގަބޫލުކުރާ ގޮތުގައި އޭނާއަކީ އިންސާނެއް ނޫނެވެ. ކަނޑު އޭނާގެ ކިބައިން ފުރާނަތަކެއް އަތުލުމަށްފަހު، ބަދަލުގައި ކޮންމެވެސް އެހެން ބާރެއް ދިނީއެވެ. އަނެއް ބަޔަކު ބުނާ ގޮތުގައި އޭނާއަކީ ކޮންމެވެސް ރޫހާނީ ބާރެއް ނުވަތަ ބިރުވެރި ފަންޑިތައެއްގެ ޝިކާރައަކަށް ވެފައިވާ މީހެކެވެ.
އަދި އެ ހިތާމަވެރި ބިރުވެރި ހާދިސާ ހަނދާން ހުރި ބަޔަކުވެސް އެބަ އުޅެއެވެ. އެއީ އޭނާގެ މައިންބަފައިން ކަނޑަށް ގެއްލުނު ރެއެވެ. އޭގެ ފަހުން އައި މަރުފަދަ ތޫފާނީ ނާމާންކަމެވެ. ދެން އޭނާގެ މާމަގެ ގާތަށް އޭނާ ބަދަލުކުރެވުނެވެ. އެ މާމައަކީވެސް ހަމަ އެހައިމެ ވާހަކަ މަދު، މީހުންނާ ގުޅުން ކުޑަ، ރަށުގެ ހަލަބޮލިކަމާ ދުރުގައި އުޅޭ މީހެކެވެ. އެ ގޭގައި އިތުރު މީހެއްގެ ހިނލަމެއް، އަޅާލުމެއް ނެތެވެ. ޒިޔާރަތްކުރާނެ މީހަކު ނެތެވެ. އަދި އެއްވެސް ކަމެއްގެ ތަފްޞީލެއްވެސް ނެތެވެ. ނަމަވެސް، މީހުންގެ މެދުގައި ތުންތުން މަތިން ދެކެވޭ ސިއްރު ވާހަކަތައް ދިޔައީ އިތުރުވަމުންނެވެ. ސަބަބަކީ، އިންސާނުންނަށް ފަހުމްނުވާ ކަންތައްތަކަކީ އަބަދުވެސް އެމީހުން ބިރުގަންނުވާ ޝައުގުވެރިކަން އުފައްދާ ކަންތައްތަކަށް ވާތީއެވެ. ފަރުވާލެއް ނެތެވެ. ޔަސްމީން އޭނާގެ މި ދިރިއުޅުމަށް ރަނގަޅަށް ލޯހުޅުވި އާދަވެއްޖެއެވެ.
ދުވަސްތައް މިގޮތަށް ފާއިތުވަމުން ދިޔައެވެ….
ރޭގަނޑުގެ އަނދިރިކަމަކީ މިހާރު އޭނާ ބިރުގަންނަ ވަގުތެއް ނޫނެވެ.
ހުވަފެންތަކުގައި، އެ މީހަކު އޭނާއާ ގާތްވަމުން ދިޔައެވެ.
އާދަޔާ ހިލާފަށް ގާތުގައިވާ ހަނދުގެ އަލީގައި، ފަޅުތެރެ ރިހިކުލައިން ފެންވަރަމުން ދިޔައެވެ. އޭނާ މަޑުކޮށްގެން ހުންނައިރު، އޭނާގެ ހާޒިރުކަމުގެ ތުރުތުރުލުން، ފައިތިލައިން ފެށިގެން މުޅި ޖައްވުގެ ތެރެއިން އޭނާއަށް އިހުސާސް ކުރެވެއެވެ.
އޭނާގެ ގާތުގައި އެ ފަރާތެއް ހުރިކަން އެންމެ ފުރަތަމަ އިހުސާސް ކުރެވުނު ރޭ، ލޯ ހުޅުވާލިއިރު ކޮޓަރި އޮތީ ރީތި މަޑު ހަނދުވަރީ އަލިކަމެއްގެ ތެރޭގައެވެ. ފަންކާގެ ފިނިކަމެއްވެސް ނެތެވެ. އެހެންނަމަވެސް، އޭނާގެ ހަމަށް މަޑު ހޫނުކަމެއް އިހުސާސްވަމުން ދިޔައެވެ. އެއީ ބިރެއް ނޫނެވެ. އަދި ހަމައެކަނި އެދުންވެރިކަމެއް ވެސް ނޫނެވެ. އެއީ މާ ބޮޑު، މާ ފުން، އަދި ނިމުމެއް ނެތް އިހުސާސްއެކެވެ.
ހުވަފެންތަކުގައި، އެ ސޫރަ ހަރަކާތްތެރިވަނީ ބާނިތަކެއް ފަދައިންނެވެ. ލަސްލަހުން، އެހެނަސް ހުއްޓުމެއް ނެތި، ކެތްތެރިކަމާއެކުގައެވެ. ދުވަހަކުވެސް އޭނާގެ ގައިގައި ބީހިލާފައެއް ނުވެއެވެ. އެހެންނަމަވެސް، އޭނާގެ ކޮންމެ ނާރަކަށް އެކަމުގެ އިހުސާސް ކުރެވެއެވެ. ވައިރޯޅިތައް އޭނާގެ އިސްތަށިގަނޑުގައި ފިރުމާލައެވެ. ރުއްތައް ގާތަށް ގުދުވެއެވެ. ފަޅުތެރެ ބަބުޅަމުންދާއިރު، ޖައްވުގެ ތެރޭގައި ބުނެދޭން ނޭނގޭ ވަހެއް ހިފާފައި ހުރެއެވެ. އެއީ ލޮނުވަހާއި، މާވަހާއި، އަދި މި ދުނިޔެއަށް ނިސްބަތްނުވާ ކޮންމެވެސް ވަހެކެވެ.
“ޔަސްމީން އިހުސާސްކުރޭ. އަހަރެންގެ މީހަކަށްވޭ،” އޭނާގެ ސިކުނޑީގެ ތެރޭގައި އަޑެއް ގުގުމާލިއެވެ. އެއީބިރުވެރި ބަސްތަކެއް ނޫނެވެ، ނޫނީ އަމުރެއް ވެސް ނޫނެވެ. އެއީ ދައުވަތެކެވެ. “ހޭލާށެވެ.”
ދުވާލުގެ ވަގުތުތަކުގައި ވެސް، އެ ސޫރައިގެ ނިޝާންތައް ފެންނަމުން ދިޔައެވެ. ލޮލުގެ ކޮޅުން ފެންނަ ހިޔަންޏެކެވެ. ކޮނޑުމަތިން ބީހިލާ ވައިރޯޅިއެކެވެ. މުޅި ރަށް ވެސް އޭނާގެ ހިތުގައި އުފެދެމުންދާ ޝުއޫރުތަކަށް ހޭލާފައިވާ ކަހަލައެވެ. ވައިގެ ތެރޭގައި ރުއްތައް ގުދުވަނީއެވެ. ފައިތިލައިގައި ރާޅުތައް ބީހިލަނީއެވެ. އަދި ފަޅުތެރެ ރިހިކުލައިން ބަބުޅަނީ އެ ސޫރައިގެ ހަނދާނުގައެވެ.
ކަންތައްތައް ފެށިގެން އައީ ވަރަށް ކުދިކުދި ކަންތައްތަކަކުންނެވެ. އެއީ ފާހަގަކުރަންވެސް ދަތި، ނަމަވެސް މީހާގެ ހިތަށް ބިރުވެރިކަމުގެ ސިހުމެއް ގެނުވާ ފަދަ ކަންކަމެވެ. އަތްނުލަނީސް މޭޒުމަތީގައި ހުންނަ ތަށިތައް އަމިއްލައަށް ވެއްޓުމާއި، މީހަކު ނެތް އިރު ކޮޓަރީގެ ދޮރުތައް ހުޅުވި ލެއްޕުމާއި ގޮތްނޭނގޭ އަޑުތައް އިވުމެވެ. އެނދުގެ ބޯލާ ކޮޅުގައި ހުންނަ ބާލީސް ކައިރީގައި، ކުދިކުދި ރީތި މުތީތަކެއް ބަހައްޓާފައި ހުރެއެވެ. އެއީ އޭނާ ނިދާފައި އޮއްވައި، ކޮންމެވެސް މީހަކު އެތަނަށް ޒިޔާރަތްކުރި ކަމުގެ ހެއްކެއް ފަދައެވެ. މިއީ ހަމައެކަނި ހީއެއް ނުވަތަ ހިޔަންޏެއްގެ ކުޅިވަރެއް ކަމަށް އޭނާގެ އަމިއްލަ ނަފްސަށް ވިސްނައިދޭން މަސައްކަތް ކުރި ނަމަވެސް، އޭނާގެ ހިތުގެ ހިނގުން ބުނެދެނީ މުޅިން ތަފާތު ވާހަކައެކެވެ.
ފެންވަރާ ގަޑިތަކަކީ އޭނާއަށް ކެތްކުރަން ދަތި، ހަމައެހެންމެ ވަރަށް ތަފާތު އިހުސާސްތަކެއް ކުރެވޭ ވަގުތުތަކެކެވެ. ފެންފޮދުގެ ހޫނުމިން އާދަޔާ ހިލާފަށް ގަދަވެ، މުޅި ހަށިގަނޑު ރަތްވެގެން ދެއެވެ. އޭނާއާ ވަރަށް ގާތުގައި ކޮންމެވެސް އެއްޗެއް ނުވަތަ މީހަކު ހުރިކަމުގެ އިހުސާސް ކުރެވެއެވެ. ކަރުދޮށަށް މީހަކު ފުމެލާހެން ހީވުމުން، މުޅި ހަށިގަނޑުން ހީބިހި ނަގައިގެން ދެއެވެ. ބިރުގަތް ނަމަވެސް، ހިތުގެ ފުންމިނުގައި ބަޔާންކުރަން ނޭނގޭ ފަދަ ހޫނުކަމެއް އުފެދެއެވެ. އޭނާގެ ހަރަކާތްތަކަށް މީހަކު ބަލަހައްޓައިގެން ހުންނަ ކަމުގެ އިހުސާސް ކުރެވުނު ނަމަވެސް، ހިތަށް ލިބެނީ ބަޔާންކުރަން ދަތި އަމާންކަމެކެވެ.
ރޭގަނޑުގެ ވަގުތުތަކަކީ މިއަށްވުރެ ބަޔާންކުރަން ދަތި ވަގުތުތަކެކެވެ. ނިދިން ހޭލެވޭއިރު، ރަޖާގަނޑު އޮންނަނީ ބިންމަތީގައެވެ. ނިދާ ހެދުމުގެ ގޮށްތައް ވަނީ ނެއްޓިފައެވެ. އެއީ މީހަކު ވަރަށް މަޑުމައިތިރިކަމާއި ކެތްތެރިކަމާއެކު ކޮށްފައިވާ ކަމެއް ފަދައެވެ. ހިތުގެ ވިންދު އަވަސްވެ، ކަންފަތްދޮށުގައި އެ އަޑު ގުގުމަމުން ދެއެވެ. އޭނާއާ ވަރަށް ގާތުގައި، ނުފެންނަ ނަމަވެސް އެކަމަކު ހަގީގަތުގައިވެސް މީހަކު ހުރިކަމުގެ އިހުސާސް މުޅި ހަށިގަނޑުގައި ހަރުލާފައި ހުރެއެވެ. މިއީ ބިރުވެރިކަމާއި އުފާވެރިކަން އެކުލެވިގެންވާ، ބަހުން ބަޔާންކުރަން ނޭނގޭ ފަދަ ކަމެކެވެ.
މިއީ ހަމައެކަނި ބިރުވެރިކަމެއް ނޫނެވެ. އެއީ އޭނާގެ ހިތުގައި އުފެދިފައިވާ ފުން އެދުމެކެވެ. ހަށިގަނޑުގެ ކޮންމެ ނާރެއްގައި ހިނގަމުންދާ އެ ތުރުތުރުލުމަކީ، އޭނާއަށް ބުނެދޭން ނޭނގޭ ފަދަ ބޭނުންވުމެކެވެ. އެކަމާ ދެކޮޅު ހަދަން އޭނާ ބޭނުންވި ނަމަވެސް، ކޮންމެ ސިހުމަކާއި ކޮންމެ އިހުސާސަކުން އޭނާ އެކަމުގެ ތެރެއަށް އިތުރަށް ފީނައިގަންނަނީއެވެ.
ބައެއް ރޭރޭ އޭނާ ނުނިދައި، މުޅި ކޮޓަރީގެ ތެރެއަށް ކަންފަތް ދީގެން އޮވެއެވެ. ތަޅުންގަނޑުން އިވޭ އަޑުތަކާއި، ވަޔާއެކު އިވޭ ސިއްރުވެރި އަޑުތަކަކީ މިހާރު އޭނާގެ ދިރިއުޅުމުގެ ބައެކެވެ. އެ ސިއްރުވެރި ބާރު އޭނާއާ ކުޅެމުންދަނީ ކެތްތެރިކަމާއެކުގައެވެ. އަދި އޭނާވެސް، އެކަން ހިނގަން ބޭނުންވެއެވެ.
ކޮންމެ ދުވަހަކު އިރުގެ އަލިކަން ކޮޓަރި ތެރެއަށް އެޅުމުން، ރޭގަނޑުގެ އެ އިހުސާސްތައް ފިލައިދިޔުމުން އޭނާ ހިތާމަކުރެއެވެ. އެންމެ ފަހުން އޭނާއަށް ގަބޫލުކުރެވުނީ، އެކަން ހުއްޓޭކަށް އޭނާ ބޭނުންނުވާ ކަމެވެ. އޭނާ ބޭނުންވަނީ އެ ސިއްރުވެރި ބާރު އޭނާއާ އިތުރަށް ގާތްވުމަށެވެ. ބިރުވެރިކަމާއި އެދުންވެރިކަން ވަކިކުރަން ނޭނގޭ މިންވަރަށް އެކަމުގެ ތެރެއަށް ގެނބިގެން ދިއުމަށެވެ. އެއީ ހަމައެކަނި އޭނާގެ އަމިއްލަ އިހުސާސެކެވެ. ރޭގަނޑުގެ ހިމޭންކަމާއި ހޫނުމިނުގެ ތެރޭގައި، އޭނާ އެކަމަށް އަމާންދީ، މުޅިން އާ ދިރިއުޅުމަކަށް ހޭލަން ބޭނުންވަނީއެެވެ.
(ނުނިމޭ)
