މިއަދު މީސްމީޑިއާ ބަލާލުމުން، އުމުރުން 60، 70 އަދި 80 ގެ އަހަރުތައް ގުނަމުންދާ ދުވަސްވީ މީހުން ޖިމްގައި ވަރުގަދަ ކަސްރަތުތައް ކުރާ މަންޒަރު ފެނުމަކީ އާންމު ކަމެކެވެ. 75 އަހަރުގެ މާމައަކު ބަރު އުފުލައިގެން ކަސްރަތު ކުރާތަން ނުވަތަ 84 އަހަރުގެ ބޮލީވުޑް އެކްޓަރު ރަންޖީތު ޖިމްގައި ހަރަކާތްތެރިވާ މަންޒަރުން ސާބިތުކޮށްދެނީ އުމުރަކީ ހަމައެކަނި އަދަދެއް ކަމެވެ. މިފަދަ ވީޑިއޯތަކުން ގިނަ ބަޔަކަށް ހިތްވަރު ލިބުނު ނަމަވެސް، މިއީ ކިހާވަރެއްގެ ރައްކާތެރި ކަމެއްތޯ އާއި މިކަމުގައި އަމަލުކުރަންވީ އެންމެ ރަނގަޅު އުސޫލުތަކަކީ ކޮބައިތޯ ސުވާލު އުފެދެއެވެ.
ދުވަސްވީ މީހުންނަށް ޖިމަށް ދިއުމަކީ ކިހާވަރެއްގެ ރައްކާތެރި ކަމެއް؟
ކަމާބެހޭ މާހިރުން ހާމަކުރާ ގޮތުގައި އުމުރުން 60 އަހަރުވުމަށްފަހު ވެސް، ރަނގަޅު އުސޫލުން ކަސްރަތު ކުރާނަމަ އޭގެ ފައިދާ އިންތިހާއަށް ބޮޑެވެ. މިކަމުގެ ރައްކާތެރިކަން ބިނާވެފައިވަނީ ކަސްރަތު ކުރާ ގޮތުގެ ރަނގަޅު އުކުޅުތަކަށާއި، އެ މީހަކަށް ޚާއްސަކޮށް ފަރުމާކޮށްފައިވާ ޕްރޮގްރާމްތަކަށެވެ. މާހިރެއްގެ ބެލުމުގެ ދަށުން، ހަށިގަނޑަށް ކުޅަދާނަވާ މިންވަރަށް ބަލައިގެން މަޑުމަޑުން ކަސްރަތުތައް ވަރުގަދަ ކުރަމުން ގެންދިއުމަކީ ރައްކާތެރި ގޮތެވެ.
ޖިމަށް ދިއުމުން ލިބޭ ފައިދާތައް
ޤަވާއިދުން ކަސްރަތު ކުރުމަކީ ހަށިގަނޑުގެ ވަރުގަދަކަމާއި، ހަރަކާތްތެރިކަން ދެމެހެއްޓުމަށް އެހީތެރިވެދޭ ކަމެކެވެ. އުމުރުން ދުވަސްވުމުން މަސްތައް ހިކުމާއި ކަށިތައް ބަލިކަށިވުން މިއީ އާންމު ކަމެކެވެ. ނަމަވެސް، ބަރު އުފުލައިގެން ކުރާ ކަސްރަތުތަކުގެ ސަބަބުން މި ބަދަލުތައް ލަސްކޮށްދީ، ހަށިގަނޑުގެ ބެލެންސް ހިފެހެއްޓުމަށާއި ވެއްޓޭ ވެއްޓުންތަކުން ސަލާމަތްވުމަށް މަގުފަހިކޮށްދެއެވެ. މީގެ އިތުރުން ހިނގުމާއި ބައިސްކަލް ދުއްވުން ފަދަ ކަސްރަތުތަކުގެ ސަބަބުން ހިތުގެ ސިއްޙަތު ރަނގަޅުވެ، ހަށިގަނޑުގެ ވަރުބަލިކަން ކުޑަކޮށްދެއެވެ.
ދުވަސްވީ މީހުން ސަމާލުވާންޖެހޭ ކަންކަން
ކަސްރަތު ފެށުމުގެ ކުރިން އެންމެ އިސްކަމެއް ދޭންޖެހޭނީ ރައްކާތެރިކަމަށެވެ. ޚާއްސަކޮށް ހިތުގެ ބަލި، ހަކުރު ބަލި ނުވަތަ ހުޅުހުޅުގެ މައްސަލަ ހުންނަ މީހުން، ކަސްރަތު ޕްރޮގްރާމެއް ފެށުމުގެ ކުރިން ފުރިހަމަ ސިއްޙީ ޗެކަޕެއް ހެދުމަކީ ކޮންމެހެން ބޭނުންތެރި ކަމެކެވެ. ފުރަތަމަ ފަށާއިރު ލުއި ކަސްރަތުތަކުން ފަށައި، ހަށިގަނޑަށް ބާރުބޮޑު ނުވާނޭހެން ކުރިއަށް ގެންދިއުމަށް ކަމާބެހޭ މާހިރުން އިރުޝާދު ދެއެވެ.
ފޮޓޯ: މުނިއަވަސް ގްރެފިކްސް
ކަސްރަތު ކުރާނެ ގޮތް
ކަސްރަތު ކުރާއިރު އެންމެ މުހިންމީ އެކަން ކުރާ ގޮތުގެ ރަނގަޅު ފޯމް ނުވަތަ އުކުޅުތައް ހިފެހެއްޓުމެވެ. މިކަމަށްޓަކައި ތަޖުރިބާކާރު އިންސްޓްރަކްޓަރެއްގެ އެހީތެރިކަން ހޯދުމަކީ އަނިޔާއަކުން ސަލާމަތްވުމަށް އޮތް އެންމެ ރަނގަޅު މަގެވެ. މީގެ އިތުރުން ސްޓްރެޗިން ފަދަ ހަށިގަނޑު ލެނބޭނެ ކަސްރަތުތަކަށް ސަމާލުކަން ދިނުމަކީ ދިރިއުޅުމުގެ އާންމު ކަންކަން ކުރުމުގައި ލުއިފަސޭހަކަން ގެނެސްދޭނެ ކަމެކެވެ.
އަރާމުކުރުމާއި ހަށިގަނޑަށް ސަމާލުވުން
ޒުވާނުންނާ ޚިލާފަށް، އުމުރުން ދުވަސްވީ މީހުންގެ ހަށިގަނޑު ކަސްރަތަށްފަހު އިއާދަވުމަށް ނުވަތަ ރިކަވަރީއަށް ގިނަ ވަގުތު ބޭނުންވެއެވެ. އެހެންކަމުން ހަށިގަނޑަށް މާ ބޮޑަށް ބާރުބޮޑު ކުރުމުގެ ބަދަލުގައި، ވަރުބަލިކަން ނުވަތަ ތަދެއް އިޙުސާސްވާނަމަ އެކަމަށް ސަމާލުވެ، ހަށިގަނޑަށް ބޭނުންވާ އަރާމު ދިނުން މުހިންމެވެ.
ކާނާ އާއި ފެން
ކަސްރަތު ކުރާއިރު ހަށިގަނޑުން ފެން މަދުވިޔަނުދީ ހިފެހެއްޓުމަށާއި، ފައިތިލައަށް ފަސޭހަ ބޫޓަކަށް އެރުމަށް ސަމާލުކަން ދޭންޖެހެއެވެ. އަދި ހަށިގަނޑުގެ މަސްތައް ވަރުގަދަ ކުރުމަށްޓަކައި ޕްރޮޓީން ހިމެނޭ ރަނގަޅު ކާނާ ކެއުމަކީ ކޮންމެހެން ކުރަންޖެހޭ ކަމެކެވެ.
ކަމާބެހޭ މާހިރުންގެ އިރުޝާދުތަކަށް ބަލާއިރު، ފަރުވާތެރިކަމާއެކު ކުރިއަށްދާނަމަ، އުމުރުގެ ފަހު ފިޔަވަހީގައި ކަސްރަތު ކުރުމަކީ ހަށިގަނޑަށް ދުޅަހެޔޮކަން ލިބި، އުފާވެރި ހަރަކާތްތެރި ދިރިއުޅުމެއް އުޅުމަށް އޮތް ވަރަށް ރަނގަޅު ފުރުސަތެކެވެ.
