ފަތިހުގެ ފިނިކަމާއެކު، ނަޖުމާ ގޮވައިގެން މާލެއަށް މިސްރާބު ޖަހާފައިވާ ދޯނި، ކަނޑުގެ އޮމާން ރާޅުތަކުގެ ތެރެއިން މަޑުމައިތިރިކަމާއެކު ދަތުރުކުރަމުން ދިޔައެވެ. ދޯނީގެ އިންޖީނުގެ މަޑު އަޑާއި، ބޮޑުވަމުން އައި އުޑުމަތީގެ ރީތިކަން އެކުވެފައިވާއިރު، ނަޖުމާ އިނީ އޭނާގެ ކުޑަކުޑަ ދެއަތުން ދޯނީގެ އަރިމަތީގައި ބާރަށް ހިފަހައްޓައިގެން، އަމިއްލަ ރަށުގެ މަންޒަރު ލޮލުން އޮބެމުންދާތަން ބަލާށެވެ. އެވަގުތު އޭނާއަށް އިޙުސާސްވަމުން ދިޔައީ، މިއީ ހަމައެކަނި ރަށާ ވަކިވެގެންދާ ދަތުރެއް ނޫން ކަމެވެ. މިއީ އޭނާއަށް އަދި މުޅިން ތަސައްވަރު ނުކުރެވޭ، އާ ދިރިއުޅުމަކާ ދިމާލަށް އޭނާ ކޮށްޕާލި ބޮޑު ދަތުރެކެވެ. އޭނާގެ ހަނދާނުގައި ހަރުލާފައިވަނީ، ވަކިވީ ވަގުތު މަންމަގެ ތުރުތުރުލާ ހިނިތުންވުމާއި، ބައްޕަގެ އުންމީދުން ފުރިގެންވި ސާބިތު ބެލުމެވެ. އެމީހުންގެ ހިތުގައި އޮތް މާތް ﷲގެ މަތިވެރި އިތުބާރު، ނަޖުމާގެ ހިތުގައި ވަޢުދެއްގެ ސިފައިގައި ބާރަށް ހަރުލާފައިވެއެވެ.
ނަޖުމާގެ އުމުރަކީ އެންމެ ފަނަރަ އަހަރެވެ. ނަމަވެސް، އޭނާގެ ހިތުގައި އަމިއްލަ ނަފުސާމެދު އޮތް އިތުބާރު ބޮޑެވެ. ރަށު މަދަރުސާގެ ކުލާސްތަކުގައި އިނދެ އޭނާ ދެކެމުން އައީ އާދައިގެ ހުވަފެންތަކެއް ނޫނެވެ. އޭނާގެ މައިންބަފައިންނަކީ ފަޤީރު، ދަތި ހާލުގައި އުޅޭ ބަޔަކަށް ވީނަމަވެސް، އެމީހުންގެ ދަރިފުޅުގެ ކިބައިގައި ހުރި ތޫނުފިލިކަމާއި އަގުހުރި ސިފަތައް އެމީހުން ދެނެގަތެވެ. އެހެންކަމުން، ބިރުވެތިކަމާއި އީމާންތެރިކަމާއެކު، މާލެއަށް އޭނާ ކިޔަވަން ފޮނުވަން ނިންމީ، އެމީހުންނަށް ނުދެވޭނެ އެހީތެރިކަމެއް މާތް ﷲ އެކަލާނގެ މިންވަރުފުޅުން ދެއްވާނެ ކަމުގެ ފުރިހަމަ ޔަޤީންކަމާ އެކުގައެވެ.
ކަންތައް ނިންމާފައި އޮތްގޮތުން ނަޖުމާ ހުރީ ވަރަށް ހިތްހަމަޖެހިފައެވެ. އޭނާ އުޅެން ޖެހޭނީ މާލޭގެ ގެއެއްގައެވެ. އެ ގޭގެ މަސައްކަތްތަކުގައި އެހީތެރިވުމުން، ބަދަލުގައި އޭނާއަށް ހިޔާވަހިކަމާއި ކިޔެވުމުގެ ފުރުސަތު ލިބޭނެއެވެ. މިއީ ހެޔޮލަފާ، އޯގާތެރި މީހުންގެ މެދުގައި ކުރެވޭ އިންސާފުވެރި މުޢާމަލާތެއް ކަމަށް ނަޖުމާ ޤަބޫލުކުރިއެވެ. ސަބަބަކީ އޭނާ ބޮޑުވީ އެކަކު އަނެކަކަށް އެހީތެރިވެ، އިޚްލާޞްތެރިކަމަށް އިސްކަންދޭ މާހައުލެއްގައި ކަމަށް ވާތީއެވެ.
ނަމަވެސް، އޭނާ ވަން ގެއަކީ އޭނާއަށް ކުރިން ފެނުނު އޯގާތެރިކަމުގެ މައްޗަށް ބިނާވެފައިވާ ތަނެއް ނޫނެވެ. އެއީ ފެންނަފެނުމަށް ބޮޑު، ހައިބަތުހުރި ގެއެއް ނަމަވެސް، އެ ގޭގެ ފާރުތަކުންވެސް އިޙުސާސްވަނީ ފިނިކަމެވެ. އެ ގޭގެ ސާހިބުކަނބުލޭގެ ވާހަކަދައްކަވަނީ އަދަބުވެރިކަމުގެ ނިވަލުގައި ހުރި ހަރުކަށިކަމަކާ އެކުގައެވެ. އެ ގޭގެ އަންހެން ދަރިންގެ ކިބައިން ފެންނަނީ ނަޖުމާ އަކީ އެއްވެސް އަގެއް ނެތް މީހެއް ކަމަށް ދެކޭ ބޮޑާކަމެވެ. އަދި ގޭގެ ސާހިބުމީހާގެ ހިމޭންކަމާއި، އޭނާ ބަލާ ބެލުންތަކުން ނަޖުމާގެ ހިތުގައި ބަޔާންކުރަން ނޭނގޭ ބިރުވެރިކަމެއް އުފެދުނެވެ.
ނަޖުމާގެ ދިރިއުޅުން ވަރަށް އަވަހަށް ބުރަ މަސައްކަތަކަށް ބަދަލުވިއެވެ. އިރު އެރުމުގެ ކުރިން ފެށިގެން ދެންމެދެންމެ ވަރުބަލިވެގެން ވެއްޓިދާނެހެން ހީވާ ވަގުތާ ހަމައަށް އޭނާ އުޅެން ޖެހެނީ ހުއްޓުމެއް ނެތް މަސައްކަތުގައެވެ. ސާފުކުރުމާއި، ކެއްކުމާއި، އެކި ކަންކަމުގައި ދުވުމެވެ. އޭނާގެ މަސައްކަތުގެ އަގުވަޒަންކުރުމެއް ނެތެވެ. ކުޑަ ކުށެއް ކުރެވުނަސް ހަރުކަށި ފާޑުކިޔުންތައް އަމާޒުވެއެވެ. އޭނާއާމެދު ކަންތައް ކުރެވެނީ އިންސާނެއްގެ ގޮތުގައެއް ނޫނެވެ.
އެ ގޭގެ ދެ އަންހެން ދަރިން ކަމަށްވާ ޝިޔާއާއި ލިޔާނާ، ނަޖުމާއާމެދު ކަންތައް ކުރަނީ އެމީހުންނާ އެއްވަރުގެ އަންހެން ކުއްޖެއްގެ ގޮތުގައެއް ނޫނެވެ. އެމީހުންގެ ހަރުކަށި ބަސްތަކުން ނަޖުމާގެ ހިތަށް ފުން އަސަރުތަކެއް ކުރި ނަމަވެސް، އޭނާ އެކަން ދުވަހަކުވެސް ބޭރަކަށް ނުދައްކައެވެ. އޭނާ ޖަވާބުދެނީ މަޑުމައިތިރިކަމާއެކުގައެވެ. އޭނާ ހިމޭނުން ހުންނަނީ ބުނާނެ އެއްޗެއް ނެތުމަކުން ނޫނެވެ. ނަމަވެސް، އޭނާގެ އަސްލު މަޤުސަދަކީ ކިޔެވުން ކަމަށް ވާތީ، ބޭކާރު ކަންކަމުގައި ވަގުތު ނަގާނުލުމަށެވެ.
ނަޖުމާއަށް އޮތް ހަމައެކަނި ހިތްހަމަޖެހުމަކީ މަދަރުސާއެވެ. އެއީ އޭނާއަށް ބިރުވެތިކަމެއް ނެތި ނޭވާލެވޭ ހަމައެކަނި ތަނެވެ. އޭނާގެ ހަށިގަނޑު ވަރުބަލިވެ، ލޯ މެރޭވަރު ވީނަމަވެސް، އޭނާ ކޮންމެ ފިލާވަޅެއް ދަސްކުރީ އެއީ އޭނާގެ މުސްތަޤުބަލު އުޖާލާކޮށްދޭނެ ވަސީލަތް ކަމުގައި ދެކިގެންނެވެ.
އޭނާ ހިމޭންކަން އިޚްތިޔާރުކުރީ ބަލިކަށިކަމުންނެއް ނޫނެވެ. އެކަމަކު އޭނާގެ މައިންބަފައިން ދެކެވާ ލޯތްބެއްގެ ބޮޑުކަމުންނެވެ. އޭނާ އުޅޭ ދަތި ހާލާއި، ކުރާ ބުރަ މަސައްކަތުގެ ވާހަކަ މައިންބަފައިންނަށް ކިޔައިދެވެން އޮތެވެ. ނަމަވެސް، އެމީހުންގެ ހިތަށް ލިބޭނެ ތަދާއި، ކުރާނެ ހިތާމަ އޭނާއަށް އިޙުސާސްކުރެވެއެވެ. އެހެންކަމުން، އޭނާ ހުރިހާ ތަދެއް ހިތުގައި ފޮރުވައިގެން، ކެތްތެރިކަމާއެކު ކުރިއަށް ދިޔައީއެވެ.
ބައެއް ރޭރޭ ވަރުބަލިކަން އިންތިހާއަށް ދިއުމުން، ލޮލުން ކަރުނަ ފޭދިގަނެއެވެ. ނަމަވެސް، އެފަދަ ވަގުތުތަކުގައިވެސް އޭނާ މާތް ﷲގެ ހަޟްރަތުގައި ދުޢާކޮށް، އަލުން ފޮތްތަކާ ކުރިމަތިލައެވެ. އޭނާގެ ހިތުގެ ފުންމިނުގައި އޮތް ވަރުގަދަ އަޒުމަކީ، މިއީ އޭނާގެ ވާހަކައިގެ ނިމުން ނޫން ކަމެވެ.
މިގޮތުގައި އަހަރުތައް ފާއިތުވެގެން ދިޔައެވެ. ކޮންމެ ދުވަހަކު ކުރިމަތިވި ގޮންޖެހުންތަކުން އޭނާގެ އަޒުމްވީ ވަރުގަދައެވެ. އެންމެ ފަހުން، އޭނާ އެންމެ އުންމީދުކުރި ދުވަސް އައިސް ބައްދަލުކޮށްފިއެވެ. އިމްތިހާނުގެ ނަތީޖާ ލިބުނު ދުވަހު، އޭނާގެ ހިތް ބާރަށް ތެޅެމުން ދިޔައެވެ. ނަތީޖާ ކަރުދާހަށް ބަލާލިއިރު، އޭނާ ކުރި ހުރިހާ މަސައްކަތެއްގެ ފޮނި މޭވާ ލިބިއްޖެކަން ޔަޤީންވިއެވެ.
އޭނާއަށް ލިބުނީ ހަމައެކަނި ކާމިޔާބީއެއް ނޫނެވެ. އޭނާ ވީ މުޅި ސަރަހައްދުންވެސް އެންމެ މޮޅު ނަތީޖާ ހޯދި ދަރިވަރުންގެ ތެރޭގައެވެ. އޭނާގެ މުދައްރިސް އޭނާއަށް ދެއްވި އެންމެ އުފާވެރި ޚަބަރަކީ، އޭނާގެ މަތީ ތަޢުލީމުގެ ހުރިހާ ޚަރަދެއް ހަމަޖެހޭ ފަދަ ފުލް ސްކޮލަޝިޕެއް ލިބުނުކަމުގެ ޚަބަރެވެ. އެވަގުތު އޭނާގެ ލޮލުން އުފާވެރިކަމުގެ ކަރުނަ އޮހިގަތެވެ. އަދި މަޑުމައިތިރިކަމާއެކު “އަލްޙަމްދުލިﷲ” އޭ ބުނެލިއެވެ.
އެދުވަހު ހަވީރު އޭނާ އެނބުރި ގެއަށް ދިޔައިރު، އެގެއަށް އެއްވެސް ބަދަލެއް އައިސްފައެއް ނެތެވެ. ނަމަވެސް، އެ ގޭގެ ތެރޭގައި އޮތް މަސްލަހަތު ވަނީ ބަދަލުވެފައެވެ. ކުރިން ބޮޑާކަމާއެކު އުޅުނު ދެ އަންހެން ކުދިން ތިބީ ނާކާމިޔާބީގެ ހިތާމައިގައި ހިމޭންވެފައެވެ. އެމީހުން ނަޖުމާއަށް ބަލާލީ ކުރިން ބަލާލި ދަށު ދަރަޖައިގެ ބެލުމަކުން ނޫނެވެ. އޭގެ ބަދަލުގައި އެމީހުންގެ ލޮލުން ފެންނަނީ ހައިރާންކަމެވެ. ނަޖުމާ އެމީހުންނާމެދު އެއްވެސް ބަދަލެއް ނުހިފައެވެ. ސަބަބަކީ އޭނާގެ ކާމިޔާބީއަކީ އެހެން ބަޔަކަށް ދައްކަން ކުރި ކަމަކަށް ނުވާތީއެވެ.
ނަޖުމާ އެގެއިން ނުކުމެގެން ދިޔައީ އެއްވެސް ރުޅިވެރިކަމެއް ނެތިއެވެ. އޭނާގެ މުސްތަޤުބަލާ ދިމާލަށް ހިނގައިގަތްއިރު، އޭނާއަށް އިޙުސާސްވަމުން ދިޔައީ އިރުގެ އަލިކަން އޭނާގެ މޫނަށް އެޅި، އާ ދިރިއުޅުމަކަށް މަރުޙަބާ ކިޔާ ފަދަ ގޮތަކަށެވެ. އެގެއިން ނުކުމެގެން ހިނގައިގަތްއިރު، އޭނާއަށް ވަރަށް މުހިންމު ކަމެއް ވިސްނުނެވެ. އެއީ، އޭނާ އެ ދޫކޮށްލީ ހަމައެކަނި އުޅުނު ތަން ނޫން ކަމާއި، ކެތްތެރިކަމުގެ ތެރެއިން އޭނާގެ ކިބައިގައި އުފެދުނު ބަލިކަށި ސިފަތައްވެސް ދޫކޮށްލި ކަމެވެ.
މިއަދު އޭނާއަކީ އެއަށްވުރެ މާ ވަރުގަދަ މީހެކެވެ.
އަހަރުތަކެއް ފަހުން، ނަޖުމާ އެހެން މީހުންގެ ކުރިމަތީގައި ހުއްޓި ހުރީ ހިމޭންކަމާއެކު އަނިޔާ ލިބުނު ކުއްޖެއްގެ ގޮތުގައެއް ނޫނެވެ. އޭގެ ބަދަލުގައި، އޭނާ ހުރީ އެ ހިމޭންކަން ވަރުގަދަ ބާރަކަށް ބަދަލުކޮށްލި ހިތްވަރުގަދަ އަންހެނެއްގެ ގޮތުގައެވެ. އޭނާގެ އަޑު އުފުލީ އޭނާ ފަދައިން ބާކީވެފައިވާ ކުދިންގެ ޙައްޤުގައެވެ. އޭނާގެ ތަޖުރިބާގެ އަލީގައި، ތަޢުލީމު ހާސިލުކުރަން މަސައްކަތްކުރާ ކުދިންނަށް ކުރިމަތިވާ ހަޤީޤީ ގޮންޖެހުންތަކާމެދު މުޖުތަމައު ހޭލުންތެރިކުރުވިއެވެ. އޭނާ މަސައްކަތްކުރީ އަންހެން ކުދިންނަށް ރައްކާތެރިކަމާއެކު ތަޢުލީމު އުނގެނޭނެ މަގުތައް ފަހިކޮށްދިނުމަށެވެ. އަދި އެއްވެސް ކުއްޖެއްގެ އުންމީދުތައް ހާސިލުކުރަންޖެހޭނީ އަމިއްލަ ނަފުސުގެ އަގު ވައްޓާލައިގެން ނޫންކަން އޭނާ އެންމެންނަށް ހަނދާންކޮށްދިނެވެ.
ނަޖުމާގެ ވާހަކަ ވީ ގިނަ ބައެއްގެ ދިރިއުޅުމަށް އަލިކަން ގެނެސްދިން ވާހަކައަކަށެވެ. އެއީ އޭނާގެ ދިރިއުޅުމުގައި އަނދިރިކަމެއް ނެތީމައެއް ނޫނެވެ. ނަމަވެސް، ކިތަންމެ ބޮޑު ގޮންޖެހުމެއް ކުރިމަތިވިޔަސް، އުންމީދު ދޫކޮށްނުލާ މީހަކަށް ކުރިއަށް ދާނެ މަގެއް އަބަދުވެސް އޮންނާނެކަން އޭނާ ސާބިތުކޮށްދިނުމުންނެވެ.
ބައެއް ރޭރޭ، އޭނާ ކުރި ދިގު ދަތުރާމެދު ވިސްނާލާއިރު، ނަޖުމާގެ ހިތަށް ބަޔާންކުރަން ނޭނގޭ ފަދަ ހަމަޖެހުމެއް ލިބެއެވެ. ސަބަބަކީ، އޭނާއަށް ވަރަށް މުހިންމު ހަޤީޤަތެއް އެނގިފައިވާތީއެވެ. އެއީ އެއްވެސް ކެތްތެރިކަމެއް ބޭކާރު ނުވާނެކަމާއި، މާތް ﷲގެ މަގުގައި ކުރާ އެއްވެސް މަސައްކަތެއް ގެއްލިގެން ނުދާނެކަމެވެ. އަދި އިޚްލާޞްތެރިކަމާއެކު ސާބިތުވެ ހުންނަ ހިތެއް، އެކަލާނގެ ދުވަހަކުވެސް ދޫކޮށްނުލައްވާނެކަމެވެ.
ހަމަކަށަވަރުން، މާތް ﷲ ވޮޑިގެންވަނީ ރީތި ގޮތުގައި ކެތްތެރިވާ މީހުންނާ އެކުގައެވެ. މަގު ކިތަންމެ ބުރަވެފައި ދުނިޔެ ހިމޭންވެފައިވާހެން ހީވި ނަމަވެސް، އިޚްލާޞްތެރިކަމާއެކު ކުރިއަށްދާ މީހުންނަށް އެކަލާނގެ މަގު ދައްކަވާނެއެވެ.
އެއްދުވަހަކު ނަޖުމާއަކީ ކަނޑު ހުރަސްކޮށް ހުވަފެންތަކެއް ހިފައިގެން ދިޔަ، ބިރުވެތިކަމުން ފުރިގެންވި ކުޑަ އަންހެން ކުއްޖެކެވެ. ނަމަވެސް މިއަދު އޭނާއަކީ އެ ހުވަފެންތައް ހަޤީޤަތަކަށް ބަދަލުކޮށް، އެހެން މީހުންނަށް އުންމީދު ދައްކައިދޭ ނަމޫނާއެކެވެ. އޭނާގެ ދިރިއުޅުމަކީ، ހިތްވަރަކީ އަބަދު އަޑުގަދަކޮށް ދައްކާ އެއްޗެއް ނޫން ކަމާއި، އެންމެ ބޮޑު ކާމިޔާބީތަކަކީ ހިމޭންކަމުގެ ތެރެއިން، ސާބިތު ފިޔަވަޅުތަކަކާއެކު ބިނާކުރެވޭ އެއްޗެއްކަން އަންގައިދޭ ދިރިހުރި މިސާލެކެވެ.
(ނިމުނީ)
