ދުނިޔޭގައި ފާހަގަކޮށްލެވޭ ފަދަ އާދަޔާ ޚިލާފު މަސައްކަތްތައް ކުރާ ފަރާތްތަކުން ދަނީ އިންސާނުންނަށް ކުރެވިދާނެ ކަންކަމުގެ އިންތައް އަލުން ކަނޑައަޅަމުންނެވެ. އެގޮތުން، އެންމެ ހިކި ވައިގެ ތެރެއިންވެސް ދިރިއުޅުމުގެ އަސާސް ކަމުގައިވާ ފެން އުފައްދައި، އުންމީދީ މަސައްކަތްތަކެއް ދަނީ ކުރަމުންނެވެ.

ޔުނިވަރސިޓީ އޮފް ކެލިފޯނިއާގެ ކެމިސްޓެއް ކަމަށްވާ އަދި 2025 ވަނަ އަހަރުގެ ނޯބެލް އިނާމު ހާސިލުކުރެއްވި އުމަރު އެމް. ޔާޣީ ވަނީ ސަހަރާގެ ހިކި ވައިގެ ތެރެއިން ސާފު ބޯފެން ނެގޭނެ އިންޤިލާބީ ޓެކްނޮލޮޖީއެއް އީޖާދުކުރައްވާފައެވެ. މިއީ ދުނިޔެއަށް ކުރިމަތިވެފައިވާ ފެނުގެ ތަދުގެ މައްސަލައަށް އޮތް ވަރަށް ބޮޑު ހައްލެއްގެ ގޮތުގައި ދާއިރާގެ މާހިރުން ސިފަކުރައްވައެވެ.

ޔާޣީގެ ކުންފުނި “އެޓޯކޯ” އިން އުފައްދާފައިވާ މި ފެން އުފައްދާ ނިޒާމަކީ ޝިޕިންގ ކޮންޓޭނަރެއްގެ ޤަދުގެ އެއްޗެކެވެ. މިއީ ދުވާލަކު 1,000 ލީޓަރުގެ ފެން އުފެއްދުމުގެ ގާބިލުކަން ލިބިގެންވާ ނިޒާމެކެވެ. މީގެ އެންމެ ޚާއްސަ ސިފައަކީ، މިއީ އެއްވެސް ބޮޑު ކަރަންޓުގެ ވިއުގައަކާ ނުގުޅައި، އަމިއްލައަށް މަސައްކަތްކުރާ ނިޒާމަކަށް ވުމެވެ.

މި ނިޒާމުގެ މައިގަނޑު އަސާސަކީ ޔާޣީ އީޖާދުކުރެއްވި “މެޓަލް-އޯގަނިކް ފްރޭމްވޯކްސް” އެވެ. މި މާއްދާގައި ހިމެނޭ އެތައް މިލިއަން ކުދި ލޯވަޅުތަކަކުން ވައިގެ ތެރޭގައި ހުންނަ ފެން ތިކިތައް ނުވަތަ އާވި ހިފަހައްޓައެވެ. މިއީ ތެތްމިން އިންތިހާއަށް ދަށް ސަހަރާ ފަދަ ހިކި ސަރަހައްދުތަކުގައި ވެސް ނުހަނު ފުރިހަމައަށް މަސައްކަތްކުރާ އެއްޗެކެވެ.

މި ނިޒާމު މަސައްކަތް ކުރާ ގޮތަކީ، ރޭގަނޑުގެ ވަގުތުތަކުގައި މެޓަލް-އޯގަނިކް ފްރޭމްވޯކްސް މެދުވެރިކޮށް ވައިގެ ތެރޭގައި ހުންނަ ތެތްމިން ދަމައިގަނެއެވެ. އަދި ދުވާލު އިރުގެ ހޫނުން އެ އާވި ބޭރުކޮށް، ކޮންޑެންސްކޮށްގެން ސާފު ބޯފެނަށް ބަދަލުކޮށްދެނީއެވެ.

އާދައިގެ ޑިއުމިޑިފަޔަރތަކާ ޚިލާފަށް، މި ޓެކްނޮލޮޖީއަކީ ފެން މަދު، ހަރުކަށި މާހައުލުތަކުގައި ވެސް ނަތީޖާ ދައްކާ އެއްޗެކެވެ. މިކަމުގެ ސަބަބުން ފެނަށް ޖެހިފައިވާ ސަރަހައްދުތަކަށާއި، އެކަހެރި ރަށްތަކަށާއި، އަދި ކާރިސާތައް ކުރިމަތިވާ ސަރަހައްދުތަކަށް ބޭނުންވާ ފެން ފޯރުކޮށްދިނުމުގައި މިއީ ވަރަށް މުހިންމު ދައުރެއް އަދާކުރާނެ އީޖާދެއް ކަމަށް ބެލެވެއެވެ.

ޔާޣީގެ މި އީޖާދަކީ ދެމެހެއްޓެނިވި ސައިންސްގެ ދާއިރާއިން ލިބުނު ބޮޑު ކުރިއެރުމެކެވެ. މިއީ ދުނިޔޭގެ ކޮންމެ ތަނެއްގައި ހުރި މީހަކަށް ވެސް ފަސޭހަކަމާއެކު ސާފު ބޯފެން ލިބޭނެ މުސްތަޤުބަލެއްގެ އުންމީދު އާކޮށްދޭ އީޖާދެކެވެ.