ބޮލީވުޑްގެ މަޝްހޫރު ފިލްމީ ތަރި އަރޫނާ އިރާނީ، އޭނާ ދެ ފަހަރެއްގެ މަތިން އުރަމަތީގެ ކެންސަރާ ހަނގުރާމަކޮށްފައިވާކަން ހާމަކޮށް ވަރުގަދަ މެސެޖެއް ދީފިއެވެ.
އޭނާއަށް މި ބަލި ޖެހިފައިވާކަން ފުރަތަމަ އެނގުނީ 2015 ވަނަ އަހަރުއެވެ. އޭރު އޭނާ އޮޕަރޭޝަނެއް ކުރި ނަމަވެސް، ކީމޯތެރަޕީ ހެދުމަށް އޭރު އުޒުރުވެރިވިއެވެ. ނަމަވެސް، 2020 ވަނަ އަހަރު އަލުން ބަލި ފެނުމާއެކު، އޭނާ ވަނީ ފަރުވާ ފުރިހަމަކޮށް، ބަލިން މުޅިން ފަސްވެ، ސަލާމަތްވެފައެވެ.
އޭނާ ތަހައްމަލުކުރި މި އުނދަގޫ ދަތުރާ ގުޅޭގޮތުން ވާހަކަދައްކަމުން އަރުނާ ވަނީ ވަރުގަދަ މެސެޖެއް ދީފައެވެ. އެއީ ދިރިއުޅުމުގައި ކުރިމަތިވާ އެންމެ ގަދަ ތޫފާންތަކުގައި ވެސް ހިތްވަރު އެލުވައިނުލުމެވެ. ކޮންމެފަދަ ގޮންޖެހުމަކުން ވެސް އަރައިގަނެވޭނީ ހިތްވަރާއި، ސާބިތުކަމާއި، އަދި ކެތްތެރިކަމާއެކު މަސައްކަތް ކޮށްގެން ކަމަށް އޭނާ ބުންޏެވެ.
ގިނަ ބައެއްގެ ލޯބި ހޯދާފައިވާ މި ފަންނާނުގެ މި ވާހަކައަކީ ގިނަ ބައެއްގެ ހިތްތަކަށް އަސަރުކުރުވި، އަދި ކޮންމެފަދަ އުނދަގޫ ހާލަތެއްގައި ވެސް ސާބިތުކަން އިސްކުރުމަކީ ކާމިޔާބީގެ އަސްލުކަން ހަނދާންކޮށްދޭ ފިލާވަޅެކެވެ.
