އޭނާގެ ފާފަތަކުގެ އަގު
މިރުޒާ ގަފޫރު އަބަދުވެސް ޤަބޫލުކުރަމުން އައީ އޭނާއަކީ ނުރައްކަލާ ކުޅެލައިގެން އޭގެ ޝިކާރައަކަށް ނުވެ ސަލާމަތްވުމުގެ ހިކުމަތްތެރިކަން ހުރި މީހެއް ކަމަށެވެ.
އަހަރުތަކެއް ވަންދެން އޭނާ އުޅެމުން އައީ މަސްތުގެ ދުނިޔޭގައި ނުހަނު ފަސޭހަކަމާ އެކުގައެވެ. ގުޅުންތައް ވަރުގަދަކޮށް، އޭނާގެ ނުފޫޒު ފަތުރައި، އެހެން މީހުންގެ ބަލިފައިތަކަކީ އަމިއްލަ ފައިދާ ހޯދާނެ ފުރުސަތުތަކަކަށް އޭނާ ބަދަލުކުރިއެވެ. އަލަށް އަންނަ މީހުންނަށް އެފަދަ މަޖިލިސްތައް ކަމުދާނެ ގޮތްތަކާއި، ބީރައްޓެހިންނަށް މަރުހަބާ ކިޔާނެ ގޮތް އޭނާއަށް ރަނގަޅަށް އެނގެއެވެ. އަދި މީހުންގެ ހިތުގައި އުފެދޭ ޝައުޤުވެރިކަން އަމަލީ ބައިވެރިވުމަކަށް ބަދަލުކޮށްލުމާއި، ނުރައްކާތެރި އާދަތަކަކީ އުފާވެރި ރޭގަނޑެއްގެ އާދައިގެ ބައެއްގެ ގޮތުގައި ދައްކަން އޭނާ ކުޅަދާނައެވެ.
އޭނާއަކީ އެކަމުގައި ވަރަށް ކުޅަދާނަ މީހެކެވެ. ފަހަރުގައި އެކަމަށް އޭނާ މާ ބޮޑަށް ވެސް ހުޝިޔާރީއެވެ.
އޭނާގެ ކުރިމަތިން ފެންނަމުން ދިޔައީ މައުސޫމު ނިޔަތްތަކަކާއެކު އަންނަ މީހުންނެވެ. ހަމައެކަނި އެއް ރޭގެ އުފަލެއް ހޯދުމަށާއި، އެންމެ ފަހަރަކު ތަޖުރިބާކޮށްލުމަށް ނުވަތަ ރަހުމަތްތެރިން ދައްކާ ވާހަކަތަކެއް ބަލާލުމުގެ އަޒުމުގައެވެ. ޒުވާނުންނާއި، އެކި ދާއިރާތަކުގެ އިލްމީ މީހުންނާއި، ޒިޔާރަތްކުރާ މީހުންނާއި އާދައިގެ އާންމުން، އެމީހުން ދުވަހަކުވެސް ވަންނަން ގަސްދުނުކުރާ ދުނިޔެއަކަށް މަޑުމަޑުން ހޭނެމުން ދިޔަ މަންޒަރު އޭނާ ދުށްޓެވެ. ބައެއް މީހުން އެނބުރި އަންނަނީ ލިބޭ ފޯރިއަކަށްޓަކައެވެ. އަނެއްބަޔަކު އަންނަނީ ފުރަތަމަ ފެނުނުއިރު އެއްވެސް ގެއްލުމެއް ނެތް ކުޅިވަރެއްގެ ގޮތުގައި ދެއްކި ކަންތައްތަކަށް ދެވިހިފާ، އޭގެ މައްޗަށް ބަރޯސާވާން ފެށުމުންނެވެ.
މި ދެބައިމީހުންގެ ތަފާތު މިރުޒާއަށް ވަރަށް ރަނގަޅަށް އެނގެއެވެ. އަދި އޭނާ ހޯދާ ފައިސާއާއެކު އޭގެ ނަތީޖާތަކެއް ވެސް ކުރިމަތިވާނެކަން އޭނާއަށް އެނގެއެވެ. ނަމަވެސް، ނަތީޖާއަކީ އަބަދުވެސް އެހެން މީހުންނަށް ކުރިމަތިވާނެ ކަމެއްގެ ގޮތުގައި އޭނާ ދެކެމުން އައެވެ.
މިކަމުގެ ތެރެއިން އާއިލާތަކުގެ އެންމެ ފަހަށް ހުންނަ ފައިސާކޮޅުވެސް މަދުވެގެން، ހުސްވެގެން ގެއްލިގެން ގޮސް އެމީހުން ކަންބޮޑުވާއިރު، އެތައް ގުޅުންތައް ރޫޅި، މީހުންނަށް ކޮންޓްރޯލް ނުކުރެވޭ އާދަތަކެއްގެ ތެރޭގައި ތަޅާފޮޅަމުން ދިޔައިރު، މިރުޒާ ދިޔައީ މި މަސްތުގެ ދުނިޔެއިން އެއްވެސް ފަރުވާލެއް ނެތި ފައިސާ ހޯދަމުންނެވެ. އިންސާނީ ދިރިއުޅުންތައް ބޮއްސުންލައިގެން ދިޔަ މަންޒަރު އޭނާ ބަލަމުން ދިޔައީ އެއީ އެމީހުންގެ އަމިއްލަ ނިކަމެތިކަމެއް ކަމަށް ނިންމައި އެކަމަށް ފަރުވާލެއް ނެތިއެވެ.
މިރުޒާއަށް ހެދުނު އެންމެ ބޮޑު ގޯހަކީ، އެ ތަދާއި ވޭން ދުވަހަކުވެސް އޭނާގެ އަމިއްލަ ދޮރުމައްޗާ ހަމައަށް ނާންނާނެކަމަށް ޤަބޫލުކުރުމެވެ. ނަމަވެސް މިހާރު އެކަން މިވަނީ ވެފައެވެ.
ވަޝިއްޔާ ގެއްލުވާލުމުގެ ފަހަތުގައި ތިބި މީހުން ގަސްދުކުރީ މިރުޒާއަށް ދޭ މެސެޖަކީ އޯގާތެރި އެއްޗަކަށް ނުހެދުމަށެވެ. މައުސޫމު އެއްޗެއް ހަލާކުކޮށްލުމުގެ މާނައަކީ ކޮބައިކަން މިރުޒާއަށް ވިސްނައިދޭން އެމީހުން ބޭނުންވިއެވެ. ބިރުވެރިކަމާއި، އެހީތެރިކަމެއް ނެތް ނިކަމެތިކަމާއި، ދެން ވާނެ ގޮތެއް ނޭނގުމުގެ ކެތްނުކުރެވޭ ފަދަ ނުތަނަވަސްކަން އޭނާއަށް އިޙުސާސްކޮށްދޭން އެމީހުން ބޭނުންވިއެވެ.
އެމީހުން ވަޝިއްޔާ އިޚްތިޔާރުކުރީ އޭނާއަކީ މިރުޒާއަށް މުހިންމު މީހަކަށް ވާތީއެވެ. އަދި ވަޝިއްޔާއަކީ މިރުޒާގެ ވިޔަފާރިއާ އެއްވެސް ގުޅުމެއް ނެތް މީހަކަށް ވުމުން، އޭނާއަށް އަނިޔާވެރިވުމަކީ، މިރުޒާގެ ފައިސާއަށް ދޭ އިންޒާރަކަށްވުރެ ބޮޑަށް، އޭނާ އަމިއްލައަށް ބިނާކުރި އަނިޔާވެރި ދުނިޔޭގެ ރަހުމެއް ނެތްކަން ހާމަވެގެންދާނެ ކަމަކަށް ވާތީއެވެ.
*****
ވަޝިއްޔާއަށް ހޭލެވުނީ ކިތައް ފަހަރު ކަމެއް އޭނާއަކަށް ނޭނގެއެވެ.
އެ ކޮޓަރީގެ ހާލަތަކަށް އެއްވެސް ބަދަލެއް ނާދެއެވެ. އަބަދުވެސް އޮންނަނީ ފިނިކޮށް، އަނދިރިކޮށެވެ. މުޅި ތަނުގައި ހިފާފައިވަނީ ސިނގިރޭޓާއި ބަނގުރަލުގެ ނުބައި ވަހެވެ. ކެމެރާތައް ހުރީ ކުރިންވެސް ހުރި ތަންތަނުގައެވެ. އޭގައި ހުރި ރަތް ކުޑަ ބައްތިތަކުން ދިއްލިފައި ހުރީ އެތަނުގައި ހިނގާ ކަންތައްތަކުގެ ހިމޭން ހެކިވެރިން ފަދައިންނެވެ.
އޭނާގެ އަމިއްލަ ހަށިގަނޑުވެސް އޭނާއަށް އިޙުސާސްވަނީ ބޭނުން ނުކުރެވޭ ބާރުނެތް އެއްޗެއްގެ ގޮތުގައެވެ.
އޭނާ ހުރީ ވަރަށް ބޮޑަށް ބިރުގެންފައެވެ. އަދި ވިސްނުން އެއްކުރަން އުނދަގޫވެ، އިންތިހާއަށް ބަލިކަށިވެފައެވެ.
ވަޝިއްޔާގެ ގަޔަށް ޖަހަމުންދިޔަ އިންޖެކްޝަންތަކުގެ ސަބަބުން އޭނާގެ ބޯ އަނބުރައި މޭނުބައިކޮށް އޭނާ ހަދާނެގޮތް ހުސްވިއެވެ. ދޮރު ކައިރިން އިވޭ ފިޔަވަޅުގެ އަޑަށް އޭނާ ބިރުގަންނަން ފެށިއެވެ. ބޭސްވެރިކަމުގެ ސާމާނު ހިފައިގެން މީހަކު ވަންނަ ކޮންމެ ފަހަރަކު، އޭނާގެ ގައިގައި އަތްނުލުމަށް އާދޭސްކޮށް، އެމީހުންނާ ދުރަށް ޖެހެން އޭނާ މަސައްކަތް ކުރެއެވެ.
އޭނާގެ ގަޔަށް ޖަހަނީ ކޮން އެއްޗެއްކަން އެމީހުން ދުވަހަކުވެސް ކިޔައެއް ނުދެއެވެ. އަދި އޭނާގެ ރުހުމެއްވެސް އެއްވެސް ކަމެއްގައި ނުހޯދައެވެ.
އެމީހުން އޭނާއާމެދު ކަންތައް ކުރަމުން ދިޔައީ، އެމީހުން ކުރާ ކަންތައްތަކާމެދު ސުވާލުކުރުމުގެ އެއްވެސް ޙައްޤެއް އޭނާއަށް ނެތް ފަދަ ގޮތަކަށެވެ.
ފޮޓޯ ނެގުމަކީ އޭނާއަށް ދިން އަނިޔާވެރިކަމުގެ އިތުރު ބޮޅެކެވެ. އޭނާގެ ރުހުމެއް ނެތި، އޭނާގެ އަބުރު ގެއްލޭ ފަދަ ގޮތްގޮތަށް ފޮޓޯއާއި ވީޑިއޯ ނަގަމުން ދިޔައެވެ. އެ މަންޒަރުތައް ފެންނަން ހުންނާނެކަން އޭނާއަށް އެނގުނު ނަމަވެސް، އެ ފޮޓޯތައް ދާނީ ކާކުގެ އަތަށްކަން ތަސައްވަރުކޮށްލަންވެސް އޭނާއަށް ކެތެއް ނުކުރެވުނެވެ.
އެ ޚިޔާލުތަކުގެ ސަބަބުން އޭނާގެ ހަށިގަނޑަށް ނުބައި އަސަރުތަކެއް ކުރަމުން ދިޔައެވެ. ބުނެދޭންވެސް ނޭނގޭ ފަދަ ދަށު ދަރަޖައިގެ އަނިޔާތައް އޭނާއަށް ލިބެމުން ދިޔައިރު، އެކަން ކުރަމުންދިޔަ މީހުންނަށް އޭނާގެ ހާލަތުން ލިބެނީ އުފަލެކެވެ.
އެއްފަހަރަކު، ގިނަ އަދަދެއްގެ ފިރިހެނުން އެއްކޮށް ކޮޓަރިއަށް ވަނެވެ. ބަރަހަނާ ހާލުގައެވެ. އެމީހުން ފެނުމާއެކު އޭނާ ބިރުން ރޫރޫ އަޅަން ފެށިއެވެ. އަދި އޭނާއަށް އެހެން ނެހެދުމަށް އެދި އާދޭސް ކުރިއެވެ. ނަމަވެސް، އެމީހުން އެ އާދޭސްތަކަށް ބީރު ކަންފަތެއް ދިނެވެ. ކެމެރާތަކުން މަންޒަރުތައް ރެކޯޑުކުރަމުން ދިޔައިރު، އެމީހުން އޭނާއަށް ޖިންސީ ބޮޑެތި އަނިޔާތަކެއް ދިނެވެ.
އެމީހުން ނިކުމެގެން ދިޔުމުން، ވަޝިއްޔާ އޮތީ ފޮތިގަނޑުގެ ދަށުގައި ބޮނޑިވެގެންނެވެ. ދޮރާ ދިމާލަށް ބަލާލަންވެސް އޭނާއަށް ކެރޭވަރެއް ނޫނެވެ.
މިހާރު އޭނާ ހަޅޭކެއް ނުލަވައެވެ. ބާރަށް ރޯނެ، އާދޭސްކުރާނެ ހިތްވަރެއްވެސް ނެތެވެ. އެއީ ބިރު ކެނޑުނީތީއެއް ނޫނެވެ. ނަމަވެސް އިންތިހާއަށް ވަރުބަލިވެފައި ހުރުމުގެ ސަބަބުން، ހަޅޭއްލެވުމުގެ ބާރުވެސް އޭނާގެ ކިބައިން ނެތިގޮސްފައި ވުމުންނެވެ.
އޭނާ ސީލިންގަށް ބަލަހައްޓައިގެން އޮތްއިރު، ލޮލުން ފައިބަމުންދިޔަ ކަރުނަތައް ކަންފަތާ ދިމާލަށް ރޮނގު ދެމެމުން ދިޔައެވެ.
އޭނާގެ ހިތަށް އަބަދުވެސް ވަންނަނީ އެއް ސުވާލެކެވެ. އަހަރެން ކީއްވެ ހެއްޔެވެ؟
އޭނާއަކީ އެއްވެސް ޕާޓީއެއް ބޭއްވި މީހެއް ނޫނެވެ. އެއްވެސް މީހަކަށް މަސްތުވާތަކެތި ތައާރަފުކޮށްދިން މީހެއްވެސް ނޫނެވެ. ނިކަމެތި މީހުންގެ ބޭނުން ހިފައިގެން ފައިސާ ހޯދި މީހެއްވެސް ނޫނެވެ. އަދި އެއްވެސް މީހަކަށް އޮޅުވާލައި، ބައެއްގެ ވިޔަފާރީގެ ތެރެއަށް ވަދެގަތް މީހެއްވެސް ނޫނެވެ.
ވަޝިއްޔާ ކުރިހާވެސް ކަމަކީ ފިރިހެނަކާ ބައްދަލުވުމެވެ. އެ ފިރިހެންމީހާގެ ދުނިޔެއަކީ އޭނާއަށް ކުރިން ހީކުރެވުނު ވަރަށްވުރެ މާ ނުރައްކާތެރި ތަނެއްކަން އޭނާއަށް އެނގުނީ މާ ފަހުންނެވެ.
*****
ވަޝިއްޔާ އެތަނުގައި ބަންދުކޮށްގެން ގެންގުޅޭ މީހުންގެ ތެރެއިން ކޮނމެވެސް އިސް މީހެއް އެރޭ ފަހުން އައެވެ.
އޭނާ ހުރީ ވަރަށް ފުރިހަމައަށް ހެދުން އަޅައިގެންނެވެ. އޭނާގެ މޫނުމަތިން ފެންނަނީ ހަމަޖެހުމެވެ. އަދި ހަރަކާތްތަކުގައި އެއްވެސް އަވަސްއަރުވާލުމެއް ނެތެވެ. އޭނާ މުޅި ކޮޓަރިއަށް ނަޒަރު ހިންގާލައި، އެތަނުގައި ހުރި ސާމާނުތައް ޗެކް ކުރުމަށްފަހު ވަޝިއްޔާއަށް ބަލާލިއެވެ.
“އަދިވެސް ހޭލާތަ؟”
އޭނާގެ ހަށިގަނޑުގައި އޮތް ފޮތިގަނޑު އިތުރަށް ބާރުކޮށްލިއެވެ.
“އާދޭސްކުރަން، އަހަރެން ދޫކޮށްލާ.”
އޭނާ އެ އާދޭހަށް ސަމާލުކަމެއް ނުދީ، ފޯނު ނެގިއެވެ.
“ކަލޭ މިތާ ތިހުރީ ކީއްވެގެންކަން އެނގޭތަ؟” އޭނާ ސުވާލުކުރިއެވެ.
ވަޝިއްޔާ ބޯ ހޫރާލިއެވެ.
“މިރުޒާގެ ސަބަބުން.”
ވަޝިއްޔާގެ ލޮލަށް ކަރުނަ ޖަމާވިއެވެ.
“އެހެންވީމާ އޭނާއާ ވާހަކަދައްކާ. އޭނާގެ ވިޔަފާރިއާ ބެހޭ އެއްވެސް އެއްޗެއް އަހަންނަކަށް ނޭނގޭ.”
“އަހަރެމެން ޝައުޤުވެރިވަނީ އެކަންކަމަކަށް ނޫން.”
“އާދޭސްކުރަން. އަހަރެން އެއްވެސް ކަމެއް ނުކުރަން.”
އޭނާ ވަޝިއްޔާއަށް ބަލާލީ ވަރަށް ފިނި ނަޒަރަކުންނެވެ.
“ކަލޭ އެއްވެސް ކަމެއް ނުކުރާ ފަދައިން، މިރުޒާގެ ދުނިޔެއަކީ އެއްވެސް ގެއްލުމެއް ނެތް ތަނެއް ކަމަށް ހީކޮށް އެތަނަށް ވަތް މީހުންވެސް އެއްވެސް ކަމެއް ނުކުރޭ.”
ވަޝިއްޔާ އޭނާއަށް ބަލަހައްޓައިގެން ހުއްޓެވެ.
އޭނާ ވާހަކަ ކުރިއަށް ގެންދިޔައެވެ.
“މިރުޒާ ބާއްވާ އެކިއެކި ބައްދަލުވުންތަކަށް އެއީ ކޮންފަދަ ކަމެއްކަން ނޭނގި އައި މީހުން. އިތުބާރުކުރެވޭ މީހަކު ދިން އެއްޗެއްގެ ސަބަބުން މަސްތުވާތަކެތީގެ ތެރެއަށް ވަދެވުނު މީހުން. ބޭނުންވުމުން އެކަމުން ދުރަށް ދެވޭނެކަމަށް ހީކުރި މީހުން.”
އޭނާ ވަޝިއްޔާއާ ގާތަށް ޖެހިލިއެވެ.
“މިރުޒާ އެމީހުންގެ ބޭނުން ހިފައިގެން ފައިސާ ހޯދި. އެމީހުން އެނބުރި އަންނަ މަންޒަރު އޭނާ ބަލަން ހުރި. ކަންތައް ވަމުންދިޔަ ގޮތް އެނގިހުރެ، އޭނާ އެކަން އިތުރަށް ފުޅާކުރަމުން ދިޔައީ.”
ވަޝިއްޔާގެ ތުންފަތް ތުރުތުރުލާން ފެށިއެވެ.
“އަހަންނަށް އެއިން އެއްވެސް ކަމެއް ނޭނގޭ.”
“އާނ، ކަލެއަކަށް ނޭނގޭނެ.”
އޭނާ ކުޑަކޮށް މަޑުކޮށްލިއެވެ.
“އެހެންވެ، މިކަމުގެ ސަބަބުން އޭނާއަށް ވަރަށް ތަދުވާނެ.”
އޭނާ ދޮރާ ދިމާލަށް އެނބުރުނެވެ.
“އޭނާ ގާތު ބުނޭ.” ވަޝިއްޔާ މަޑުމަޑުން ބުންޏެވެ.
އޭނާ ހުއްޓުނެވެ. “ކީކޭ ބުނަންވީ؟”
“މިރުޒާ ގާތު ބުނޭ އަހަންނަށް އެއްވެސް އެއްޗެއް ނޭނގެއޭ. މި ކުރާ ކަމެއް ހުއްޓާލަން ބުނޭ. އާދޭސްކުރަން.”
އެމީހާ އަލުން ވަޝިއްޔާއަށް ބަލާލިއެވެ.
“މިރުޒާއަށް މާލަހެއް ނުވެ މި ހުރިހާ ކަމެއް އެނގޭނެ.”
ދެން އޭނާ ނިކުމެގެން ދިޔައެވެ.
ވަޝިއްޔާ ދޮރާ ދިމާލަށް ބަލަހައްޓައިގެން އޮތެވެ. ފުރަތަމަ ފަހަރަށް، އެމީހުންގެ އަނިޔާވެރި މަޤުސަދު އޭނާއަށް ފުރިހަމައަށް ވިސްނުނެވެ. އެމީހުން މަސައްކަތްކުރަނީ އޭނާގެ އަތުން މަޢުލޫމާތެއް ހޯދާކަށް ނޫނެވެ. ނުވަތަ އޭނާ ކުރި ކަމެއްގެ އަދަބު ދޭކަށްވެސް ނޫނެވެ. އެމީހުން ގަސްތުގައި އޭނާގެ ދިރިއުޅުން ބަރުބާދުކުރަމުން އެދަނީ އެހެން މީހަކަށް އަދަބު ދިނުމަށެވެ.
(ނުނިމޭ)
