ފާރަވެރިޔާ

ފުރުމުގެ ކުޑަ ވަގުތުކޮޅެއް ކުރިން ޒަކަރިއްޔާ އަތުވެއްޖެއެވެ. އޭނާގެ ހުރުމަކީ އަބަދުވެސް އެންމެންނަށް ލިބޭ ހިތްހަމަޖެހުމެކެވެ. އޭނާ މާ ގިނަ ވާހަކައެއް ނުދެއްކި ނަމަވެސް، އޭނާގެ ލޮލުން ފެންނަން ހުރި ލޯތްބާއި ކުލުނުން ހުރިހާ އެއްޗެއް ބަޔާންކޮށްދެއެވެ.

“މަގޭ ދަރިންނޭ.” ޒަކަރިއްޔާ މަޑުމަޑުން ބުންޏެވެ. “ﷲ އަށް ވަކީލުކޮށްގެން ދޭ.. ލިޔެވިފައިވާ ކަމެއް މެނުވީ ކުރިމަތިނުވާނެ.”

ޚަދީޖާ އިސްޖަހާލިއެވެ. އޭނާގެ ހިތް ވަނީ ޝުކުރުން ފުރިފައެވެ. އޭނާ މަޑުމަޑުން “އާމީން” އޭ ބުނެ، އެ ބަސްތަކާއެކު ދަތުރަށް ތައްޔާރުވިއެވެ.

ކަނޑުގެ އަމާންކަމާއި ރާޅުތަކުގެ ތެރެއިން ދޯނި ދުވަމުންދިޔައިރު، އެއީ ހިތްގައިމު ނަމަވެސް ކަންބޮޑުވުންތަކެއް ހުރި ދަތުރެކެވެ. އަންހެން ކުދިން ފޯރިއާއެކު މާލެއާ ބެހޭގޮތުން ވާހަކަދައްކަމުން ދިޔައިރު، ޚަދީޖާ އިނީ އާދަޔާ ޚިލާފަށް ހިމޭންވެފައެވެ. އޭނާގެ ނަޒަރު ހުއްޓިފައި ހުރީ އުދަރެހަށެވެ. އޭނާގެ ހިތަށް އުނދަގޫކުރަމުންދިޔަ ކަންތައްތަކާމެދު އޭނާ ވިސްނަމުން ދިޔައެވެ.

އެއްވަގުތެއްގައި، ދޯނީގެ ކައިރީގައި ހުއްޓިލައިގެން ހުއްޓާ، ދުރުން ދަތުރުކުރަމުންދިޔަ އެހެން ދޯންޏެއް އޭނާގެ ލޮލުގައި އަޅައިގަތެވެ. އެއީ ވަގުތުން ބިރުގަންނަން ޖެހޭވަރުގެ ދުރުމިނެއްގައި އޮތް ދޯންޏެއް ނޫނެވެ. ނަމަވެސް އެ ދޯނި ދަތުރުކުރަމުންދިޔަ ގޮތުން، އެއީ ގަސްތުގައި އެމީހުންގެ ފަހަތުން އަންނަ ދޯންޏެއްކަމުގެ އިޙުސާސް އޭނާއަށް ކުރެވުނެވެ. އިރުގެ އަލިގަދަކަމުން އެ ދޯނީގެ ތަފްސީލެއް ނުފެނުނެވެ. އަދި އަންހެން ކުއްޖަކު ގޮވާލުމުން އެ ދިމާއަށް ބަލާލާފައި އަލުން ބަލާލިއިރު، އެ ދޯންޏެއް ފެންނާކަށް ނެތެވެ. ހީވީ ކަނޑުގެ ތެރެއަށް ގެއްލުނީހެންނެވެ.

އޭނާގެ ހިތުގައި ނުތަނަވަސްކަމެއް އުފެދުނެވެ. އެކަމަކު އެއްވެސް މީހަކު ގާތު އެ ވާހަކައެއް ނުބުނެއެވެ.

މާލެއަށް ދެވުމާއެކު، ރަށުގެ ހިމޭންކަމާ މާލޭގެ ހަލަބޮލިކަމާ ހުރި ތަފާތު ވަރަށް ބޮޑަށް ފާހަގަވިއެވެ. މީހުންގެ އަވަސް ހަރަކާތްތަކާއި، ގިނަ އަަޑުތަކާއި، އުސް އިމާރާތްތަކުން އެ އަންހެން ކުދިން ތިބީ ހައިރާންވެފައެވެ.

މުބާރާތް އޮތް ތަނުގައި ވަރަށް ބޮޑު ފޯރިއެއް އޮތެވެ. އެކި ރަށްރަށުގެ މީހުން އެމީހުންގެ ތަކެތި ދައްކާލުމަށް ތައްޔާރުވަމުން ދިޔައެވެ. ޚަދީޖާ އެ އަންހެން ކުދިންނަށް އެހީތެރިވެދެމުން ދިޔައިރު، އޭނާގެ ހިތުގައި އޮތް ނުތަނަވަސްކަން ކުޑަވެ، ކުރަން އައި މަސައްކަތަށް ސަމާލުކަން ދެވުނެވެ.

އެކުދިންގެ ފުރުސަތު އައިއިރު، އެކުދިން ތިބީ ކުޑަކޮށް ޖެހިލުންވެފައެވެ. ނަމަވެސް ރިހިރަންފުށީގެ އާދަކާދަތަކާއި، އެރަށުގެ ވަސީލަތްތަކާ ބެހޭގޮތުން ވާހަކަދައްކަން ފެށުމާއެކު، އެކުދިންގެ އަމިއްލަ ނަފުސަށް އޮތް އިތުބާރު ބޮޑުވެގެން ދިޔައެވެ. ޚަދީޖާގެ އިރުޝާދުގެ ދަށުން އެކުދިން ދެއްކި ވާހަކަތަކުން އެންމެންގެ ސަމާލުކަން ހުއްޓުނެވެ.

ޚަދީޖާ ދުރުގައި ހުރެގެން އެ މަންޒަރު ބަލަމުން ދިޔައީ ފަޚުރުވެރިކަމާއެކުގައެވެ. އޭނާގެ ލޮލުން އުފާވެރިކަމުގެ ކަރުނަ ފާޅުވިއެވެ. އޭނާ މަޑުމަޑުން “އަލްޙަމްދުލިﷲ” އޭ ބުނެލިއެވެ. ސަބަބަކީ ނަތީޖާ ކޮންމެ ގޮތަކަށް އައި ނަމަވެސް، އެކުދިންނަށް މިހާރުވެސް ބޮޑު ކާމިޔާބީއެއް ލިބިއްޖެކަން އޭނާއަށް އެނގޭތީއެވެ.

ނަމަވެސް އެ އުފާވެރި ވަގުތުގައިވެސް، މީހުންގަނޑުގެ ތެރެއިން ވަކިން ހުރި މީހަކު އޭނާގެ ސަމާލުކަން އަތުލިއެވެ.

އެމީހެއްގެ ކިބައިން އާދަޔާ ޚިލާފު މާބޮޑު ކަމެއް ފެންނާކަށް ނެތެވެ. ބަލާބެލުމަށް އެހެން މީހުންނާ އެއްގޮތެވެ. ނަމަވެސް، އެމީހަކު ހުއްޓިލައިގެން ހުރި ގޮތާއި، އެހެން އެއްވެސް ދިމާއަކަށް ބެލުމެއް ނެތި ސީދާ ޚަދީޖާއަށް އަމާޒުކޮށްފައިވާ ތޫނު ނަޒަރުގެ ސަބަބުން ޚަދީޖާގެ ހަށިގަނޑު ފިނިވެގެން ދިޔައެވެ.

އެ ދެމީހުންގެ ހަތަރުކަޅި ބައްދަލުވި ހިނދު، އެމީހަކު ވަގުތުން އެނބުރި، މީހުންގަނޑުގެ ތެރެއަށް ވަދެ ގެއްލިއްޖެއެވެ. އެއީ ވަރަށް ހުޝިޔާރުކަމާއެކު ގަސްތުގައި ކުރި ކަމެއްކަން އެނގެއެވެ. ޚަދީޖާގެ ނޭވާ ކުރުވެ، ހިތުގެ ތެޅުން އަވަސްވިއެވެ. އޭނާ ހަމަޖެހެން މަސައްކަތް ކުރި ނަމަވެސް، މިއީ އިއްތިފާޤެއް ނޫންކަން އޭނާގެ ހިތް ބުނަމުން ދިޔައެވެ.

މުބާރާތުގެ ނަތީޖާ އިޢުލާނު ކުރެވުނުއިރު، ރިހިރަންފުށީގެ އަންހެން ކުދިންނަށް އުއްމީދު ކުރިވަރަށްވުރެވެސް ބޮޑު ކާމިޔާބީއެއް ލިބުނެވެ. އެކުދިންގެ އުފެއްދުންތަކުގެ އަމިއްލަވަންތަކަމާއި، ދެމެހެއްޓެނިވި ގޮތަކަށް ކުރެވިފައިވާ މަސައްކަތަށް ވަރަށް ބޮޑަށް ތަޢުރީފު ލިބުނެވެ. މުޅި ތަނުގައި އޮތީ އުފާވެރިކަމެވެ. އެކަކު އަނެކަކު ގައިގައި ބައްދައި، އުފާވެރިކަމުގެ ކަރުނަ އޮއްސަމުން ދިޔައެވެ.

ފަހުން އެމީހުންނާ ގުޅުނު އަޙްމަދު، އުފަލުން ގޮސް އެއް ކުއްޖަކު އުފުލާލިއެވެ. އޭނާގެ މޫނުމަތިން ފެންނަނީ ފަޚުރުވެރިކަމެވެ. އޭނާ ޚަދީޖާއާ ހަތަރުކަޅި ބައްދަލުވި ވަގުތު، ދެމީހުންގެ ދެމެދުގައި ބަޔާންކުރަން ނޭނގޭ ފަދަ އުފާވެރިކަމެއް ބަދަލުކުރެވުނެވެ.

ނަމަވެސް، އެ ހިނިތުންވުމުގެ ފަހަތުގައި ޚަދީޖާއަށް ކަމެއް އިޙުސާސްވަމުން ދިޔައެވެ. މި ލިބުނު ކާމިޔާބީއާއި މަޝްހޫރުކަމުގެ ސަބަބުން، ހިޔަނިތަކުގެ ތެރޭގައި ފޮރުވިގެން ތިބި ބަޔަކު ފާޅުވުމަށް އިތުރު ބާރަކަށް ވާނެކަން އޭނާއަށް އެނގެއެވެ. އެރޭ އެނބުރި ރަށަށް ދިއުމަށް ތައްޔާރުވަމުން ދިޔައިރު، ޚަދީޖާ ހުރީ މާލޭގެ ބައްތިތަކަށް ފުރަގަސްދީ ކަނޑާ ދިމާއަށް ބަލަހައްޓައިގެންނެވެ. ކުރިއަށް އޮތް ދުވަސްތަކަކީ އަމާން ދުވަސްތަކެއް ނޫންކަން އޭނާގެ ހިތް ބުނަމުން ދިޔައެވެ.

އެނބުރި ރިހިރަންފުށްޓަށް ދެވުމާއެކު، ރަށުގެ ރައްޔިތުން އެމީހުންނަށް މަރުޙަބާ ކީ ވަރަށް ކުލަގަދަކޮށެވެ. މުޅި ރަށުގައި އޮތީ އުފާ ފާޅުކުރުމެވެ. އެންމެންގެ މޫނުމަތިން ފެންނަ އެއްބައިވަންތަކަމުގެ ސަބަބުން، ޚަދީޖާގެ ހިތުގައި އޮތް ބިރުވެރިކަން ކުޑަ ވަގުތުކޮޅަކަށް ފިލައިދިޔަ ކަހަލައެވެ.

ނަމަވެސް، އޭނާގެ ގެއާ ހަމައަށް ފޯރުނު ތަނާހެން، އޭނާގެ ލޮލުގައި އަޅައިގަތް ކަމަކުން އޭނާ ހުއްޓުން އެރިއެވެ. ގޭގެ އެއްފަރާތުގައި، ފޮތިގަނޑެއްގެ ދަށުގައި ފޮރުވާފައި އޮތް ކުޑަ ސިޓީއެއް އޮތެވެ.

ޚަދީޖާގެ ހިތް ތެޅެން ފެށިއެވެ. އޭނާ ވަރަށް މަޑުމަޑުން އެ ކަރުދާސްކޮޅު ނަގައި ނިއުޅާލިއެވެ. މިފަހަރު ލިޔެފައިވާ ބަސްތައް މާ ސާފެވެ. އޭގައި އޮތީ “ކަލޭ ފެންނާކަށް ނުޖެހޭ.”

ވަށައިގެން އުފާ ފާޅުކުރުމުގެ އަޑުތައް އިވެމުންދިޔައިރު، ޚަދީޖާ ހުރީ ހުއްޓުން އަރާފައެވެ. ދެންމެ ހުރިހާ ކަމެއް ބަދަލުވެއްޖެއެވެ. މިއީ ދެން އޮޅުމެއް އޮތް ކަމެއް ނޫނެވެ. ކޮންމެވެސް މީހަކު އޭނާއަށް ފާރަލަނީއެވެ. އަދި އެމީހަކު ހުރީ އެ ފުރުސަތުގެ އިންތިޒާރުގައެވެ.

ރަށުގެ އުފާވެރިކަމުގެ ޖަލްސާ ރޭގަނޑު މާލަސްވަންދެން ކުރިއަށް ދިޔައެވެ. ހަނިހަނި ވެލިމަގުތަކުގެ ތެރެއިން ހުނުމުގެ އަޑު ގުގުމަމުން ދިޔައިރު، އުއްބައްތިތަކުގެ ހުޅުކޮޅުތަކުން ފަނޑު އަލިކަމެއް ފެތުރި، އެ އަލިކަން ގޭގޭގެ ފާރުތަކުގައި ބީހެމުން ދިޔައެވެ. ކުރިން އެކަހެރިވެފައި ހުރި އެ ގޭގެއަށް މިހާރު ވަނީ އާ ދިރުމެއް ލިބިފައެވެ. ގިނަ ބަޔަކަށް މިއީ ފާއިތުވި ގިނަ އަހަރުތަކެއްގައި ތަޖުރިބާކުރެވިފައި ނުވާފަދަ ފަޚުރުވެރި ވަގުތުކޮޅެކެވެ. ރިހިރަންފުށްޓަކީ މިހާރު ހަނދާން ނެތިފައިވާ ނުވަތަ އަޅާނުލާ ދޫކޮށްލެވިފައިވާ ރަށެއް ނޫންކަން އެންމެންނަށްވެސް ޤަބޫލުކުރެވިއްޖެއެވެ.

ނަމަވެސް، މި އުފާވެރިކަމުގެ ތެރޭގައިވެސް، ޚަދީޖާ ހުރީ އެ މާހައުލާ ނުގުޅޭ ފަދަ ހިމޭންކަމެއްގައެވެ. އޭނާގެ އަތުގައި އޮތް ބޮނޑިކޮށްލާފައިވާ ކުޑަ ކަރުދާސްކޮޅަށް ބާރުކޮށްލައިގެން ހުރިއިރު، އެއީ އޭގެ ސައިޒަށްވުރެ މާ ބަރުދަން ބޮޑު އެއްޗެއް އުފުލައިގެން ހުރި ކަހަލައެވެ.

އަޙުމަދުގެ މޫނުމަތިން ފެންނަން ހުރި އުފާވެރިކަމަށާއި އެހެން މީހުންގެ ފޯރިއަށް ހުރަސްއަޅަން ބޭނުން ނުވާތީ، ޚަދީޖާ އެކަމާ ބެހޭގޮތުން ވަގުތުން ވާހަކައެއް ނުދައްކައެވެ. އެހެނަސް، އޭނާގެ ސިކުނޑީގައި އެ ލަފުޒުތައް ވަނީ ފިލައިގެން ނުދާނޭ ފަދަ ސާފުކަމާއެކު ބިންވަޅު ނެގިފައެވެ. “ކަލޭމެންނަކީ ފެންނަން ތިބެންޖެހޭ ބައެއް ނޫން.” މި އިބާރާތް އޭނާގެ ހިތުގައި ތަކުރާރުވަމުން ދިޔައެވެ. ކޮންމެ ތަކުރާރަކާއެކު، އޭގެ މާނަ އިތުރަށް ބަރުވެ، ގޮތް ނޭނގޭ ބިރުވެރިކަމެއް އިޙުސާސްވަމުން ދިޔައެވެ.

އަޙުމަދު އެއްޗެއް ބުނުމުގެ ކުރިންވެސް، ޚަދީޖާގެ މި ބަދަލު ފާހަގަކުރިއެވެ. މިއީ އެދެމެދުގައިވާ ގާތްކަމުގެ ސަބަބުން އުފެދިފައިވާ، ވާހަކަ ދައްކަން ނުޖެހި އެކަކު އަނެކަކު ދެނެގަތުމުގެ ސިފައެކެވެ. ރޭގަނޑުގެ ހަލަބޮލިކަން ކެނޑި، މީހުން ގެއަށް ދާން ފެށުމުން، އަޙުމަދު މަޑުމަޑުން ޚަދީޖާ ގޮވައިގެން ގޭގެ ފެންޑާއަށް ނުކުތެވެ. އެއީ އެހެން މީހުންގެ އަޑުތަކާ ދުރުގައި، ޚަދީޖާ ތައްޔާރުވުމުން ވާހަކަ ދެއްކުމުގެ ފުރުސަތު ދިނުމަށެވެ.

“ކިހިނެއްވީ؟” އެންމެ ފަހުން އަޙުމަދު ސުވާލުކުރިއެވެ. އޭނާގެ އަޑުގައިވަނީ މަޑުމައިތިރިކަމާއި، އަޅާލުމާއި، އަދި ކޮންމެ ކަމަކާ ކުރިމަތިލުމުގެ ސާބިތުކަމެވެ. ޚަދީޖާ ކުޑަ ވަގުތުކޮޅަކަށް ފަސްޖެހުމަށްފަހު، އެ ނޯޓުކޮޅު އަޙުމަދަށް ދިއްކޮށްލިއެވެ. އަޙުމަދު އެ ކަރުދާސްކޮޅު ނިއުޅާލައިގެން ކިޔަމުންދިޔައިރު، ޚަދީޖާ ހުރީ ވަރަށް ފަރުވާތެރިކަމާއެކު އޭނާގެ މޫނަށް ބަލާށެވެ.

ފުރަތަމަކޮޅު އަޙުމަދުގެ މޫނުމަތިން އެއްވެސް ބަދަލެއް ނުފެނެއެވެ. ނަމަވެސް، އިރުކޮޅަކުން އޭނާގެ ކަތުރުކަށިގަނޑަށް ބާރުވެ، ދެލޯ ކުޑަކޮށްލިއެވެ. އޭނާ އެ ޖުމުލަ ދެވަނަ ފަހަރަށް ކިޔާލީ، އޭގެ ފަހަތުގައި ފޮރުވިފައިވާ ސިއްރެއް ހޯދަން އުޅޭ ފަދައިންނެވެ. އޭނާ އިސްއުފުލާ ޚަދީޖާއަށް ބަލާލިއިރު، އެއީ ކުޑަކުއްޖެއްގެ ސަމާސާއެއް ނުވަތަ އިއްތިފާޤެއްކަމަށް ބުނެ އެކަން ދޫކޮށްލާކަށް އޭނާ ބޭނުމެއް ނުވިއެވެ.

“މިއީ އިއްތިފާޤެއް ނޫން.” އަޙުމަދު މަޑުމަޑުން ބުންޏެވެ. އޭނާގެ އަޑުގައި ހުރި ޔަގީންކަމެއްގެ ސަބަބުން މުޅި މާހައުލަށް އިތުރު ބަރުދަނެއް އިޙުސާސްވިއެވެ. “މިއީ މީހަކު އަހަރެމެންނަށް ފާރަލަމުންދާކަމުގެ ހެއްކެއް.. އޭނާ އެހުރީ ބަލަން. ފުރުސަތަކަށް އިންތިޒާރުކޮށްގެން.”

ޚަދީޖާ މަޑުމަޑުން ބޯޖަހާލިއެވެ. އޭނާއަށް އިޙުސާސްވަމުންދިޔަ ބިރުވެރިކަމަކީ ހީއެއް ނޫންކަން އެނގުމުން ހިތްހަމަޖެހުމެއް ލިބުނު ނަމަވެސް، ކަންބޮޑުވުން އިތުރުވިއެވެ.

“އެކަމަކު ކީއްވެ؟” ޚަދީޖާ ސިއްރުސިއްރުން އަހާލިއެވެ. “އެމީހުން އަހަރެމެންގެ ކިބައިން ބޭނުންވަނީ ކޮން އެއްޗެއް؟”

އަޙުމަދު ވަގުތުން ޖަވާބެއް ނުދެއެވެ. ސަބަބަކީ އޭނާއަށްވެސް އެ ސުވާލުގެ ޖަވާބު އަދި ނޭނގޭތީއެވެ. އެންމެ ބޮޑު ނުތަނަވަސްކަމަކީވެސް އެއީއެވެ. ފެންނަން ނެތް، ކެތްތެރިކަމާއެކު ރާވައިގެން ހަރަކާތްތެރިވާ ކަމެއްގެ ކުރިމަތީގައި ތިބެންޖެހުމެވެ.

(ނުނިމޭ)