ދޮގު ވަޢުދުތަކާއި މާސްކުތަކެއް
ސަލާމަތްކުރެވުނު އަންހެން ކުދިންގެ ފަރާތުން ފެނުނީ މީހުން އުންމީދުކުރި ފަދަ ރުއިމުގެ މަންޒަރުތަކެއް ނޫނެވެ. ބާރަށް ރޮއި އާދޭސްކުރުމެއް، ނުވަތަ މިނިވަންވުމުން އޮހިގަތް ވާހަކަތަކެއް ނެތެވެ. އޭގެ ބަދަލުގައި، ވެރިވެފައިވަނީ އުނދަގޫ ކުރުވާފަދަ ހިމޭންކަމެކެވެ. އެކުދިން ތަހައްމަލުކުރި ހިތްދަތިކަން، އެކުދިންގެ އިޙުސާސްތައް ބޭރުކުރުމުގެ ޤާބިލުކަންވެސް ނިިވާލާފައިވާ ކަހަލައެވެ. ތުނި ފޮތިގަނޑުތަކެއްގައި އޮޅިލައިގެން، އެއްދިމާލަކަށް ނަޒަރު ހުއްޓާލައިގެން އެކުދިން ތިބިއިރު، އެކުދިންގެ ހަށިގަނޑު އެތަނުގައި ހުއްޓަސް، ސިކުނޑި ވަނީ އަތްނުފޯރާ ފަދަ ދުރު ތަނެއްގައެވެ. ކުޑަ އަޑަކަށްވެސް އެކުދިން ދަނީ ސިހިގެންނެވެ. މުޅި ދުނިޔެއަކީ ނުރައްކާތެރި، އިތުބާރު ނުކުރެވޭ ތަނެއްގެ ގޮތުގައި އެކުދިންނަށް ސިފަވަނީއެވެ.
ޑރ. ޝިފާ އެކުދިންގެ މެދުގައި ހަރަކާތްތެރިވަމުން ދިޔައީ ނުހަނު މަޑުމައިތިރިކަމާއެކުގައެވެ. އެކުދިންނަށް ބޭނުންވާ އޯގާތެރިކަމާއި އަޅާލުން ދިނުމުގައި އޭނާ ފަރުވާތެރިވިއެވެ. ނަމަވެސް، އެކުދިންނަށް ބޭނުންވަނީ އެންމެ ރެއަކުން ނުވަތަ މަދު ދުވަސްކޮޅަކުން ދެވޭނެ ފަރުވާއެއް ނޫންކަން އޭނާއަށްވެސް އެނގެއެވެ. މިފަދަ ހާލަތްތަކުގައި ނަފުސާނީ ދުޅަހެޔޮކަން އަނބުރާ ހޯދުމަކީ ދިގު އަދި ނާޒުކު ދަތުރެކެވެ. ކުޑަކުޑަ ހަނދާނަކުންވެސް އެ މުޅި އުންމީދު ފުނޑުފުނޑުވެދާނެއެވެ.
ރިހާން ދުރުގައި ހުރެގެން އެކުދިންނަށް ބަލަމުން ދިޔައިރު، އޭނާގެ ހިތަށް ބަރުވެ، ބުނެދޭން ނޭނގޭ ފަދަ އިޙުސާސެއް ކުރެވެމުން ދިޔައެވެ. އެއީ ހަމައެކަނި ރުޅިވެރިކަމެއް ނުވަތަ ހިތާމައެއް ނޫނެވެ. އެއަށްވުރެ މާ ފުން، މާ ބަރު އިޙުސާސެކެވެ. އެއީ ވަރުބަލިކަމެވެ. ހަށިގަނޑުގެ ވަރުބަލިކަމެއް ނޫނެވެ. ފުރާނައިގެ ވަރުބަލިކަމެވެ.
މިއީ އޭނާ އުންމީދުކުރި، ނުވަތަ އެދިގެން އުޅުނު ދިރިއުޅުމެއް ނޫނެވެ. އިންސާނުންގެ ވިޔަފާރިކުރާ މީހުންގެ ފަހަތުން ދުވުމާއި، ހިތްފަޅައިގެންދާ ފަދަ ހަޤީޤަތްތައް ހޯދުމަކީ އޭނާ ދުވަހަކުވެސް ތަސައްވަރުކުރި ކަންކަމެއް ނޫނެވެ. އޭނާއަކީ އާދައިގެ، އާދައިގެ ބޭނުންތަކެއް ހުރި މީހެކެވެ. އޭނާ ބޭނުންވީ ހިމޭން ގެއަކާއި، ހަމަޖެހޭ ދިރިއުޅުމަކާއި، އިތުބާރާއި ލޯބީގެ މައްޗަށް ބިނާވެފައިވާ ކައިވެންޏެކެވެ. ނަމަވެސް މިހާރު އޭނާގެ ދުވަސްތައް ގުނަން ޖެހިފައިވަނީ ސިއްރުތަކާއި، ނުރައްކަލާއި، ނުނިމޭ ހާސްކަމުގެ ތެރޭގައެވެ. ރޭގަނޑުގެ ނިދި ގެއްލި، ކުރިމަތިވަނީ އިތުރު ސުވާލުތަކެކެވެ.
ކުޑަ ހިނދުކޮޅަކަށް ނުރައްކާތެރި ޚިޔާލެއް އޭނާގެ ސިކުނޑިއަށް އައެވެ. މި ހުރިހާ ކަމެއް ދޫކޮށްލާފައި ހިނގައިދާންވީ ހެއްޔެވެ؟ މި ތަހުޤީޤާއި، އަނދިރިކަމާއި، ނުނިމޭ ހާސްކަން ފަހަތަށް ދޫކޮށްލާފައި، އޭނާ އަބަދުވެސް ބޭނުންވި އާދައިގެ، އަމާން ދިރިއުޅުމަކަށް އެނބުރި ދާނީ ހެއްޔެވެ؟ އެ ޚިޔާލު އޭނާގެ ސިކުނޑީގައި ބިންވަޅު ނެގުނެވެ. އެއީ ފުރަތަމަ ފަހަރަށް ކުރެވިދާނެ ކަމެއްގެ ގޮތުގައި އިޙުސާސްވީތީއެވެ. ނަމަވެސް، ހަމަ އެވަގުތު އެއީ ނުވާނެ ކަމެއްކަންވެސް އޭނާއަށް އެނގެއެވެ.
ސަލާމަތްކުރެވުނު ކުދިންގެ ތެރެއިން ކުއްޖަކު ގެއްލުމާއެކު، އެމީހުން ބިނާކުރި ކުޑަކުޑަ އުންމީދުވެސް ފުނޑުފުނޑުވިއެވެ. އެއްވެސް ކުރިމަތިލުމެއްގެ ނިޝާނެއް ނެތެވެ. ފާރަވެރިން ތިއްބާ އެކުއްޖާ ގެއްލުނީ ކިހިނެއްބާއެވެ. ޔަޤީނުންވެސް ފިލީއެއްނޫނެވެ. އެއީ ވަރަށް ބޮޑަށް ރޭވިގެން ކޮށްފައިވާ ކަމެކެވެ.
އާހިލް ހުރީ އިންތިހާއަށް ކަންބޮޑުވެފައެވެ. “މިއީ އަހަރެމެން ހީކުރި ވަރަށްވުރެ މާ ބޮޑަށް އިންތިޒާމުވެފައިވާ ބައެއް.”
ރިހާން ވަގުތުން ޖަވާބެއް ނުދެއެވެ. އޭނާގެ ސިކުނޑި ދިޔައީ ކުރިމަތިލާން ބޭނުންނުވާ ހަޤީޤަތްތަކަކަށް އަމާޒުވަމުންނެވެ. “އެމީހުން ބޭރުން އައީއެއް ނޫން.” އެންމެ ފަހުން ރިހާން ބުންޏެވެ. އާހިލް ހުއްޓުން އެރިއެވެ. “ދެން ކިހިނެއް؟” ރިހާން އޭނާއަށް ބަލާލިއެވެ. “ބޭރުން އަންނާކަށް ނުވެސް ޖެހޭ.”
ރިހާން ޔަސްނާގެ ކޮޓަރިއަށް ވަންއިރު، ޔަސްނާ ހުރީ ކުޑަދޮރު ކައިރީގައެވެ.
“އެމީހުން އެއް ކުއްޖަކު އަނބުރާ ގެންގޮސްފި.” ރިހާން ބުންޏެވެ. “އެމީހުން އަބަދުވެސް އެހެން ހަދާނެ.” ޔަސްނާ މަޑުމައިތިރިކަމާއެކު ޖަވާބުދިނެވެ. ރިހާން ގާތަށް ޖެހިލާފައި އަހާލިއެވެ. “އެހެންވީމާ އަހަރެމެންނަކީ ކޮން ބައެއް؟”
ޔަސްނާގެ ތުންފަތަށް ވެރިވީ ފަނޑު ހިނިތުންވުމެކެވެ. “އަހަރެމެންނެއް ނޫން.” އޭނާ މަޑުމަޑުން ބުންޏެވެ. “އަހަރެން.”
ހަޤީޤަތް ފާޅުވާން ފެށީ މަޑުމަޑުންނެވެ. ފޮރުވާފައިވާ ލިޔެކިޔުންތަކުންނެވެ. ސައްޙަ ވިޔަފާރިތަކުގެ ނިވާފަތްގަނޑުގައި ފޮރުވާފައިވާ ހިސާބުތަކުންނެވެ. ރިހާން އެ ލިޔެކިޔުންތައް ބަލަމުން ދިޔައިރު، އޭނާގެ އެތެރެހަށީގައި ބޮޑު ބަދަލެއް އަންނަމުން ދިޔައެވެ. ފުރަތަމަ އެއީ ޤަބޫލުކުރަން އުނދަގޫ ކަމަކަށް ވިޔަސް، ހުރިހާ މަޢުލޫމާތެއް ގުޅުވާލުމުން ހަޤީޤަތް ސާފުވިއެވެ.
އެ ހުރިހާ މުއާމަލާތްތަކަކާއި، ރަށްރަށުން ގެންނަ ކުދިންގެ ކަންކަމުގައި އެންމެ އިސްކޮށް އޮތީ އޭނާގެ މަންމަގެ ނަމެވެ. އެއީ ދުރުގައި ހުރި މީހެއްގެ ގޮތުގައެއް ނޫނެވެ. އެއީ މުޅި މި ނިޒާމުގެ މަރުކަޒުގެ ގޮތުގައެވެ. ކަންކަން ރާވާ، ހުއްދަދީ، ނާޒުކު ހާލަތްތަކުގައި ތިބި ކުދިން ބާރުވެރި މީހުންނާ ގުޅުވައިދޭ މީހަކީ އެއީއެވެ. އޭނާގެ މަންމައަކީ ހަމައެކަނި ބައިވެރިއެއް ނޫނެވެ. އެއީ މި ހުރިހާ ކަމެއްގެ ވެރިޔާއެވެ.
ރިހާންގެ މުޅި ދުނިޔެ ބަދަލުވިއެވެ. ކުރިން އުފަލާއެކު ހަނދާންކުރި ކަންކަން ބިރުވެރި ސިފައަކަށް ބަދަލުވިއެވެ. މަންމަ ކިޔައިދިން ވާހަކަތައް ހަނދާނަށް އައެވެ. އަންހެން ކުދިންނަށް ރަނގަޅު މުސްތަޤުބަލެއް ހޯދައިދިނުމާއި، އެހީތެރިވުމުގެ ވާހަކަތަކެވެ. މިހާރު އެނގޭ ގޮތުގައި އެއީ ހަމައެކަނި ދެއްކުންތެރިކަމެކެވެ. އަނދިރި ހަޤީޤަތް ފޮރުވަން ބޭނުންކުރި މާސްކެކެވެ.
“މިއީ އޮޅުވާލުމަކަށްވެސް ވެދާނެ.” ދުރުން އާހިލްގެ އަޑު އިވުނެވެ. “ނޫން.” ރިހާން މަޑުމަޑުން ބުންޏެވެ. އޭނާގެ އަޑުގައި ރުޅިވެރިކަމެއް ނެތެވެ. އޮތީ ޔަޤީންކަމެވެ. “މަންމައަށް އެނގޭ އޭނާ އެކުރަނީ ކީއްކަން.”
ޔަސްނާ ދުރުގައި ހުރެގެން އޭނާއަށް ބަލަމުން ދިޔައެވެ. “އޭނާ އެކަނި މިކަމެއް ނުކުރޭ. އެކަމަކު މިކަން ކާމިޔާބުކުރީ އޭނާ.” ޔަސްނާ ބުންޏެވެ.
ރިހާން އަހާލިއެވެ. “ކީއްވެ އަހަރެން ގާތު ކުރިން ނުބުނީ؟”
ޔަސްނާގެ ލޮލުން އޯގާތެރިކަން ފެނުނެވެ. “ބުނިނަމަ ޤަބޫލުކުރާނަންތަ؟”
ޖަވާބު އޮތީ ސާފުކޮށް އެނގޭށެވެ. އެއީ ދޮގުކުރެވޭނެ ހަޤީޤަތެއް ނޫނެވެ. ރިހާނަށް އިޙުސާސްވީ އޭނާ ކުރިން ބޭނުންވި އަމާން ދިރިއުޅުމަކީ ދުވަހަކުވެސް ވުޖޫދުގައި އޮތް އެއްޗެއް ނޫން ކަމެވެ. އޭނާގެ މުޅި ދިރިއުޅުން ބިނާވެފައިވަނީ އޭނާ ދުވަހަކުވެސް ސުވާލު އުފައްދާފައިނުވާ، ކަނު އިތުބާރެއް ކުރި ދޮގުތަކެއްގެ މައްޗަށެވެ. އަދި މިހާރު، އެނގުނު ކަންތައްތައް ނޭނގޭ ކަމަށް ހަދާފައި ކުރީގެ ދިރިއުޅުމަށް އެނބުރި ދެވޭނެ އެއްވެސް މަގެއް ނެތެވެ.
ކުޑަ ހިނދުކޮޅަކަށް ކުރީގެ އެ ޚިޔާލު އަނެއްކާވެސް އައެވެ. ހުރިހާ ކަމެއް ދޫކޮށްލާފައި ދިއުމުގެ ޚިޔާލެވެ. ނަމަވެސް، އެ އަންހެން ކުދިންގެ ހިމޭންކަމަށާއި އެކުދިންގެ ލޮލުން ފެންނަން ހުރި ހުސްކަމަށް ބަލާލުމުން، އަދި ހަމައެކަނި އަނިޔާ ލިބުނު މީހެއްގެ ގޮތުގައި ނޫން ނަމަވެސް، އެ އަނދިރިކަމުގެ ލަކުނުތައް ޖެހިފައި ހުރި ޔަސްނާއަށް ބަލާލުމުން، އޭނާއަށް ހަޤީޤަތް ވަރަށް ސާފުކޮށް ވިސްނުނެވެ. މިކަންކަމާ ދުރަށް ދިއުމަކީ މިނިވަންކަމެއް ނޫނެވެ. އެއީ ބަލި ޤަބޫލުކޮށް އަމާންދިނުމެވެ.
“މިހާރު އެނގިއްޖެ ދޯ.” ޔަސްނާ މަޑުމަޑުން ބުންޏެވެ. ރިހާން މަޑުމަޑުން ބޯޖަހާލިއެވެ. “އާނ.” އޭނާ ޖަވާބު ދިނެވެ. މިފަހަރު އޭނާގެ ކިބައިގައި އެއްވެސް ޖެހިލުންވުމެއް ނެތެވެ.
މާދުރުގައި، އެއްވެސް މީހަކަށް އަތްނުފޯރާ ފަށުގައި، އަންހެނަކު އިނީ ނުހަނު ހަމަޖެހިލައިގެންނެވެ. އޭނާ އުފެއްދި ހަލަބޮލިކަމުގެ އެއްވެސް އަސަރެއް އޭނާގެ ދިރިއުޅުމަކަށް ނުކުރެއެވެ. ވަރަށް ސިއްރުވެރި އަޑުތަކުން ދެމުންދިޔަ މަޢުލޫމާތުތައް އަޑުއަހަމުން ދިޔައިރު، އޭނާގެ މޫނުމަތިން ފެންނަނީ ކެތްތެރިކަމެވެ. އޭނާ މިކަން ބިނާކުރީ ވަރަށް ފަރުވާތެރިކަމާއެކު، އަހަރުތަކެއްގެ މަސައްކަތުންނެވެ. އަދި އެހެން މީހުންނަށް ދެނެގަންނަން ފެށުނު ހަޤީޤަތް އޭނާއަށް މާ ކުރިންވެސް އެނގެއެވެ. މިއީ ފަސޭހައިން ރޫޅާލެވޭނެ އެއްޗެއް ނޫނެވެ. މިއީ އެންމެ ހޯދުމަކުން ފުނޑުފުނޑުވާނެ ކަމެއް ނޫނެވެ. މިއީ ނިޒާމެކެވެ. އަދި އޭނާ ހުރީ އެ ނިޒާމުގެ އެންމެ މެދުގައެވެ.
އަނދިރި ކޮޓަރީގެ ތެރޭގައި، ޔަސްނާ ކުޑަދޮރާ ދިމާއަށް އެނބުރުނެވެ. ރޭގަނޑުގެ ފަނޑު އަލިކަން އޭނާގެ މޫނަށް އެޅިފައިވާއިރު، އޭނާގެ މޫނުމަތިން ފެންނަނީ ހަމަޖެހުމެވެ. ސަބަބަކީ އަނދިރިކަމުގެ ތެރޭގައި އެއްވެސް އޮޅުވާލުމެއް ނޯންނާތީއެވެ. ދޮގު ވަޢުދުތަކާއި މާސްކުތަކެއް ނެތެވެ. އޮތީ ހަމައެކަނި ހަޤީޤަތެވެ. އަދި ބައެއް ފަހަރު، ހަޤީޤަތަކީ ކޮންމެ އެއްޗަކަށްވުރެވެސް ބިރުވެރި އެއްޗެކެވެ.
ބޭރުގައި، ރޭގަނޑުގެ ހިމޭންކަން އޮތީ އެގޮތުގައެވެ. ސިއްރުތައް އޭގެ ފުންމިނުގައި ފޮރުވައިގެންނެވެ. ނަމަވެސް އެ ހިމޭންކަމުގެ ތެރެއިން ކޮންމެވެސް ކަމެއް ބަދަލުވެއްޖެއެވެ. އެއީ، ދުރަށް ނުގޮސް ހަޤީޤަތާ ކުރިމަތިލާން ރިހާން ނިންމި ހިސާބުން، ހުރިހާ ކަމެއް ބަދަލުވެގެން ދިޔުމެވެ.
(ނުނިމޭ)
