ސިއްޙަތަކީ މާތް ﷲ އިންސާނާއަށް ދެއްވާފައިވާ އެންމެ އަގުބޮޑު އެއް ނިޢުމަތެވެ. ގިނަ ފަހަރަށް އަޅުގަނޑުމެންނަށް ސިއްޙަތުގެ އަގު ވަޒަންކުރެވެނީ އެ ނިޢުމަތް ބީވެގެންދާ ހިސާބުންނެވެ. ޤަބޫލުކުރަންޖެހޭ ހަގީގަތަކީ، އިންސާނާގެ ދުޅަހެޔޮކަން ގެއްލިގެންދަނީ ކުއްލިއަކަށް އެއް ދުވަހަކުން ނޫން ކަމެވެ. އެއީ ދިރިއުޅުމުގެ އާދަކާދަތަކުގެ ތެރެއިން އަޅުގަނޑުމެން ނިންމާ ކުދިކުދި ނިންމުންތަކުގެ ނަތީޖާއެވެ.
އަޅުގަނޑުމެންގެ ތެރެއިން ގިނަ މީހުންނަށް ހީވަނީ ނިދި މަދުކުރުމާއި، ނަފުސާނީ ބުރަތަކަށް ނުވަތަ ސްޓްރެސްއަށް ފަރުވާކުޑަކުރުމަކީ މާ ބޮޑު ކަމެއް ނޫން ކަމަށެވެ. އަދި ކަސްރަތުކުރުން މާދަމާއަށް ފަސްކުރުމާއި، ހަށިގަނޑަށް ފައިދާހުރި ކާނާގެ ބަދަލުގައި ވަގުތީ ފަސޭހައަކަށްޓަކައި ތައްޔާރީ ކާނާ އިޚްތިޔާރު ކުރުމަކީ އޭރުން ބަލާއިރު ކުޑަ ކަމެއްހެން ހީވެދާނެއެވެ. ނަމަވެސް، މި ހުރިހާ ކަމެއްގެ “ހިސާބު” އަޅުގަނޑުމެންގެ ހަށިގަނޑު ދަނީ ބަލަހައްޓަމުންނެވެ. ހަށިގަނޑަށް ދެވޭ ކޮންމެ އަނިޔާއެއް، އެއީ ކިތަންމެ ކުޑަ ކަމެއް ނަމަވެސް، ވަގުތު ޖެހުމުން އޭގެ ނަތީޖާ ދައްކާނެއެވެ.
ދުނިޔޭގެ ދުވެލި ހުރިގޮތުން އަޅުގަނޑުމެން އަބަދުވެސް އުޅެނީ ވަގުތު ނެތިގެންނެވެ. އެހެންނަމަވެސް، ހަނދާނުގައި ބަހައްޓަންޖެހޭ ކަމަކީ، މިއަދު ދުޅަހެޔޮ ސިއްޙަތެއްގައި ހުރުމަށްޓަކައި ވަގުތު ހުސްނުކޮށްފިނަމަ، މާދަމާ ބަލިމަޑުކަމުގައި ވަގުތު ހޭދަކުރަން މަޖުބޫރުވާނެކަމެވެ. ބަލިވުމުން އެކަމަށް ހޭދަކުރަންޖެހޭ ވަގުތަކީ އަޅުގަނޑުމެން ބޭނުންވާ ގޮތަށް ނިންމޭނެ ވަގުތެއް ނޫނެވެ. އެއީ މަޖުބޫރީ ހާލަތެކެވެ. އެހެންކަމުން، ބަލިވުމުގެ ކުރިން ސިއްޙަތަށް ރައްކާތެރިވުމަކީ ބުއްދިވެރިންގެ ގޮތެވެ.
ހަޤީޤަތަކީ، ބަލިން ރައްކާތެރިވުމަށް ކުރަންޖެހޭ ހޭދައާއި ކުރަންޖެހޭ މަސައްކަތް، ބަލިވުމަށްފަހު ކުރަންޖެހޭ ފަރުވާއަށްވުރެ މާ ކުޑަވެފައި ފަސޭހަކަމެވެ. ސިއްޙަތު ސަލާމަތުން އޮތްއިރު އެކަމުގެ ކޮންޓްރޯލް އޮތީ ތިބާގެ އަތްމަތީގައެވެ. ނަމަވެސް ބަލިވުމަށްފަހު އެ ކޮންޓްރޯލް ގެއްލިގެންދެއެވެ. އެހެންކަމުން، މިއަދުން މިއަދަށް ދިރިއުޅުމުގެ އާދަކާދަތައް އިސްލާހުކޮށް، ސިއްޙަތަށް އިސްކަންދޭން ފަށަމާ ހިނގާށެވެ. މިއީ ތިބާގެ މުސްތަޤުބަލަށްޓަކައި ކުރެވޭނެ އެންމެ އަގުހުރި އިންވެސްޓްމަންޓެވެ.
